EKIRAJAAYA 09
Aleewashii waya nümaa Maleiwa woʼuraajüle nümüin
Choʼujaʼawaire pümüin kaalinwaa, pütüjaweere saaʼu wanee kasa, choʼujaale pümüin pükatchinnüin aaʼin jee aleeweere pia nümaa Jehová, puʼuraaja nümüin süpüla nükaalinjain pia. ¿Kasa paaʼinrajatka süpüla puʼuraajüin nümüin? ¿Naapüinche Maleiwa sünüiki wayuu süpüshuaʼa? ¿Kasa paaʼinrajatka süpüla naapüin Maleiwa pünüiki? Wekirajaa süchiki tia.
1. ¿Jarai chi woʼuraajüinjachikai amüin? ¿Kasa wachuntajatka nümüin?
Naashin Jesús niainjachi neʼe woʼuraajaka amüin Jehová. Oʼuraajapuʼushi neʼe nia nümüin. Anuu nünüiki: «Müinjatü jünüiki juʼuraajapa: ‹Washikai iipünaajachikai...›» (Mateo 6:9, TNM). Aleewashii maʼin waya nümaa Jehová wanaa sümaa woʼuraajüin nümüin.
Eesü süpüla wachuntuin nümüin jee waküjain nümüin kasa eekai eein. Süpüla naapüinjatüin Maleiwa wanüiki, nnojotsü wachuntajatüin wanee kasa nnojotka nücheküin wapüleerua. Saashin tü Bibliakat «müleka wachuntüle nümüin tü nüchekakat wapüleerua, jaʼitairü wachuntüin kasa eekai eein, watüjaa aaʼulu sünain naapüin wanüiki» (1 Juan 5:14, 15). Nüküjain Jesús süchiki waneirua kasa eeka süpüla wachuntuin nümüin Maleiwa (paashajeʼera Mateo 6:9, 10, TNM; Mateo 6:11-13). Nnojotsü wachuntajatüin neʼe nümüin tü choʼujaakat wamüin, waapüinjatü analuʼutka nümüin Maleiwa saaʼu tü naaʼinrakat wapüleerua otta achuntuinjana waya naaʼu na waneinnua.
2. ¿Kasa waaʼinrajatka woʼuraajapa?
Anuu sünüiki tü Bibliakat: «Jüküja nümüin [Maleiwa] tü shapaakalü atuma jaaʼin» (Salmo 62:8). Waküjainjatü nümüin Maleiwa tü suluʼukat waaʼin woʼuraajapa nümüin. Eeshii süpüla woʼuraajüin nümüin Jehová sümaa emetuluin wanüiki jee woʼuraajüin nümüin suluʼu waaʼin. Weeʼiyatüinjatü nujutu nümüin woʼuraajapa nümüin jaʼitainna shaʼwatüin jee joyotuin waya. Eeshii süpüla woʼuraajüin nümüin eepünaale jalain waya.
3. ¿Kasa nusoutaka akajee Maleiwa wamüin?
Kojuyasü sukuwaʼipa nutuma Maleiwa. Nüküjain wamüin tü watüjaweekalü aaʼu sükajee tü Bibliakat. «Kekiishi maʼin wanee wayuu» naashajeʼerüle shia (Salmo 19:7; paashajeʼera Santiago 1:5). Aneerü waaʼin nutuma Maleiwa müleka woʼuraajüle nümüin soʼunnaa sülatüin kasa mojusü wamüin jee müsia nükaalinjeena waya nakajee na wawalayuukana.
WEKIRAJAA SOOʼOMÜIN
Wekirajaa süchiki tü waaʼinrajatkat süpüla anainjatüin nümüin Maleiwa tü wachuntakat nümüin otta jamüin aneetka wakuwaʼipa woʼuraajüle nümüin.
4. Eesü waneirua kasa waaʼinrajatka süpüla naapüin Maleiwa wanüiki
¿Kasa waaʼinrajatka süpüla naapüin Maleiwa wanüiki? Jünaja tü VIDEOKOT.
Nücheka achikit Jehová woʼuraajüinjanain neʼe nümüin. Jaashajeʼera Salmo 65:2 otta yooto jia süchiki tüü:
-
¿Jamüsü nüchekaka Maleiwa puʼuraajüin nümüin?
Süpüla naapüin Maleiwa wanüiki, pansaainjatü tü wakuwaʼipakat wanaapünaa sümaa tü nuluwataakalü anain waya. Jaashajeʼera Miqueas 3:4 otta 1 Pedro 3:12 otta yooto jia süchiki tüü:
-
¿Kasa waaʼinrajatka süpüla naapüin Maleiwa wanüiki?
Nachuntule nümüin Maleiwa waneinnua surulaat süpüla nakanajüin tü atkawaakat jee mataajaʼa natuma na neʼipolokana, ¿naapeetche Maleiwa nanüiki?
5. Waküjainjatü nümüin Maleiwa tü suluʼukat waaʼin
Wainma na wayuu ekirajünakana sünain neiteʼerakuʼu namüinjatüin tü nanüikikat noʼuraajapa. ¿Anasüche nümüin Maleiwa müle sukuwaʼipa wanüiki woʼuraajapa nümüin? Jaashajeʼera Mateo 6:7, TNM otta yooto jia süchiki tüü:
-
¿Kasa waaʼinrajatka süpüla nnojoluin weiteʼerakuʼu wamüin wanüiki?
Jülüjale paaʼin tü kasa anasü naapakat Jehová pümüin soʼukaiwai jee paapüle analuʼut nümüin saaʼu tia, nnojoleerü piiteʼerakuʼu müin pünüiki puʼuraajapa.
Nücheka achikit wanee wayuu nüküjainjatüin chi nüchonkai tü suluʼukat naaʼin. Akaataajaʼa neʼe Jehová, nücheka achikit waküjainjatüin nümüin tü suluʼukat waaʼin.
6. Katchinsü waaʼin woʼuraajüle nümüin Maleiwa
¿Jamüsü katchinka waaʼin soʼunnaa tü alatakat wamüin woʼuraajüle nümüin Maleiwa? Jünaja tü VIDEOKOT.
Saashin tü Bibliakat aneerü waaʼin woʼuraajüle nümüin Maleiwa. Jaashajeʼera Filipos 4:6, 7 otta yooto jia süchiki tüü:
-
Mayaainjeʼe nnojoluin süpüla sunoutaain süpüshuaʼa tü alatakat wamüin woʼuraajüle nümüin Maleiwa, ¿kasa anasü weʼreetka sünainjee?
-
¿Kasa puchunteeka nümüin Maleiwa puʼuraajapa nümüin?
¿Pütüjaa aaʼu tüü?
Tü pütchikat amén wayuunaikiruʼu «shiimain tia», «kasataalejeseʼe shikeraajüin» maluʼulu. Na wayuu anoujakana nünain Maleiwa sümaiwa paala «amén» müshii naya sujutaaya nanüiki noʼuraajapa (1 Crónicas 16:36).
7. Woʼuraajawai nümüin Maleiwa
Eesü motule waaʼin woʼuraajüin nümüin Maleiwa sutuma nnojoliin jimatüin waya. ¿Kojutusüche maʼin nümüin Jesús naashajaain nümaa Maleiwa? Jaashajeʼera Mateo 14:23 otta Marcos 1:35 otta yooto jia süchiki tüü:
-
¿Kasa naaʼinraka Jesús süpüla naashajaʼawalin nümaa Maleiwa?
-
¿Kasa paaʼinrajatka süpüla paashajaʼawalin nümaa Maleiwa?
EESHII WAYUU EEKAI NAMÜIN: «Amüla neʼe wachuntuin nümüin Maleiwa, nnojoleerü naapüin wanüiki».
-
¿Shiimainchejeʼe tia saaʼin pümüin?
WATÜJAAITPAKA AAʼU
Aleewashii waya nümaa Maleiwa waküjale nümüin tü suluʼukat waaʼin. Anasü waaʼin sutuma otta katchinsü waaʼin süpüla waaʼinrüin tü nüchekakat Jehová wapüleerua.
Pusouta shiʼipajee
-
¿Jarai chi woʼuraajüinjachikai amüin?
-
¿Kasa waaʼinrajatka woʼuraajapa nümüin Jehová?
-
¿Kasa anasü weʼreetka woʼuraajüle nümüin Maleiwa?
PÜNAʼLA SOOʼOMÜIN
Anuu aküjünüin tü natüjaweekalü aaʼu na wayuukana süchiki tü oʼuraajaakat.
Paashajeʼera jamüin choʼujaaka puʼuraajüin otta kasain eein süpüla püküjain nümüin Maleiwa.
«¿Jamüsü choʼujaaka maʼin woʼuraajüin?» (Pütchi suluʼuka jw.org)
Anuu süküjain tü Bibliakat süchiki jaralin chi woʼuraajüinjachikai amüin.
«¿Anasüche aresawaa sümüin niyaakua wanee santo?» (Pütchi suluʼuka jw.org)
Pünaja tü videokot süpüla pütüjaain saaʼu naapüin pünüiki Maleiwa eepünaale pia.
Eesüjaʼa kamalainjeerüle pümüin aashajeʼeraa tüü
SÜSAKIRAWAIKA ANAIN WAYUU
¿Jamüsü sukuwaʼipa shikirajia wayuu sünain tü Bibliakat natuma na Aküjaliikana pütchi?
Pikirajaale sünain tü Bibliakat namaa na aküjaliikana pütchi nüchiki Jehová, eesü süpüla pikirajaain süka tü Biblia eekat pümaʼana otta puunejaain püpüshi jee paʼaleewainyuu.
