ZASEŊƆ 09
Zusa Naayinɛ Ta’an Vurege Lɛm En
Hon tabelɛ ti’isɛ bisɛ ti la nari ti ba ka’am hɔ? Hon tari sokesɛka n pakɛ hɔ ti ho bɔta ti ho nyɛ lebesego? Hon boti ho nyɛ subuɣelegɔ ti ho suure gã’a ma’asum? Hon wan bɔta ti ho lɛm Yehowa? Zusega n wan ta’an soŋɛ hɔ ti ho nyɛ yele aŋa za’a. Ge to wan zusɛ la wani? Naayinɛ keleseri zusega woo? Hon wan eŋɛ la wani basɛ ti a kɛlesa ho zusega? Basɛ ti to bisɛ.
1. To nari ti to zusa la ani ge bem yɛla ti to wan zusa?
Yezu yuun pa’alɛ tɔ ti to zusa to saazuo Sɔ la ma’a. Yezu mea yuun ni zusa la Yehowa. A yuun yeti: “Ya wan zusa se’em n wana: ‘To Sɔ n boi saazuo sa . . . ’” (Matu 6:9) To san zusa Yehowa, tomam la eŋa zɔtɔ nyɔka la tari la paŋa.
To ta’an zusɛ sɛla ti to bɔta to vom poan. Sira, Naayinɛ san wan lebese to zusega la, la nari ti to zusega la makɛ la a puti’irɛ n boti sɛla. “To san yeen zusɛ [Naayinɛ] sɛla ti la makɛ la a puti’irɛ, a keleseri to mɛ.” (1 Yon 5:14) Yezu yuun pa’alɛ tɔ yelese’a ti to nara ti to zusa. (Kaalɛ Matu 6:9-13.) Sɛla n le pa’asɛ ti to wan zusa dela, to pɛ̃ɣera en la eŋa n iti sɛla bɔ’ɔra to la ge zusa en ti a soŋera nɛreba me.
2. To wan zusa la wani?
Baabule la kpemese to giila ti to “tɔɣɛ ya sɛla n boi [to] suure poan bo [Naayinɛ].” (Yooma 62:8) Bala la, to zusega nari ti la ze’ele to suure poan ge dɛna yelemɛŋɛrɛ. Ho ta’an zusa ti la yɛsera bii ho zusa ho suure poan ge ti hon wan ana homea se’em ge zusera la tara gilema. To wan ta’an zusa en zɛ’an woo la saŋa woo.
3. Naayinɛ lebeseri to zusega la wani?
A doli la sarɔtɔ zo’e zo’e poan lɛbesa to zusega. Yehowa bo to la Baabule la ti to ta’an nyɛ to sokere woo lebesego. Baabule kaalegɔ wan taʼan “basɛ ti yɛm pɔ’ɔrɛ daana la tara yɛm.” (Yooma 19:7; kaalɛ Yames 1:5.) Yele san paɛ tɔ eŋa n wan bo to putɛsonɛ. A me ta’an basɛ ti a yamesi soŋɛ tɔ se’em ma’a ti yele paɛ to la.
VIISƐ PA’ASƐ
Viisɛ bisɛ hon wan ta’an eŋɛ se’em yese ho suure za’a zusa ti la pɛɛra Naayinɛ puurɛ ge le baŋɛ zusega n wan ta’an bo ho nyuurɔ se’em.
4. Naayinɛ pa’alɛ tɔ to nari ti to zusa en se’em
Yele ani n wan pa’alɛ ti Naayinɛ keleseri to zusega bii a ka keleseri? Ŋmɛ VIDIYO la.
Yehowa boti la to zusa en. Kaalɛ Yooma 65:2 ge nyaa sɔsɛ sokere ana wa:
-
Hon ti’isɛ ti “Seʼem N Keleseri zusega” la boti ho zusa en? Bem zuo bii bem zuo ti la daɣɛ bala?
To san bɔta ti Naayinɛ kelese to zusega, la nari ti to vɔna to vom ti la makɛ la a pa’alegɔ la. Kaalɛ Mikah 3:4 la 1 Peter 3:12 ge nyaa sɔsɛ sokere wa:
-
To wan eŋɛ la wani sakɛ ti Yehowa wan kelese to zusega?
Tisi san zabera, ba za’a ni zusa mɛ ti ba zabɛ nyaŋɛ. Yɛm boi bim ti to ti’isa ti Naayinɛ wan kelese ba?
5. To zusega za’a nari ti la ze’ele to suure poan
Nɛreba basɛba gulesɛ la zusega biŋe ti la dɛna ti ba zusa bala mea nɔɔ taɣesa. Ge Naayinɛ n boti ti to zusa se’em n bala? Kaalɛ Matu 6:7 ge nyaa sɔsɛ sokere wa:
-
To wan eŋɛ la wani kan tara “yeleyinɛ taɣesa” to zusega poan?
Dabeserɛ woo poan, ho ta’an ti’isɛ sɛla ti Yehowa eŋɛ bo ho ge nyaa pɛ̃ɣɛ en. Ita wana ta paɛ bakwai ge ho wan nyɛ yɛla ayopɔi ti ho wan dekɛ pɛɣɛ en ge kan tara yele yinɛ ma’a taɣesa.
Sɔsonkɔ ni bɔta la a bia yese a suure za’a tɔɣɛ bo en. Bala mea nɔɔ ti Yehowa me bɔta ti to ni yese to suure za’a zusa en
6. Zusega dela Naayinɛ bo’olum
Zusega wan eŋɛ la wani bo to paŋa sansɛka n ani soŋa la be’em saŋa? Ŋmɛ VIDIYO la.
Baabule la yeti zusega ta’an soŋɛ tɔ ti to puti’irɛ ana mama. Kaalɛ Filipi 4:6, 7 ge nyaa sɔsɛ sokere ana wa:
-
Daɣɛ saŋa woo ti zusega yɛsera to daaŋɔ basera ge la soŋeri to la wani?
-
Yɛla ase’a dela ani ti ho wan zusa?
Hon mi?
Yelebire la n de “amen” vuurɛ dela, “la dɛna bala” bii “taarɛ.” Baabule saŋa la ba yuun ni san zusɛ ba’asɛ, ba ni yeti “amen.”—1 Yelebiŋ’a 16:36.
7. Nyɛta nɛŋa zusa
Saŋa ase’a to ta’an yee tuuma poan ge tamɛ zusega yele. Zusega yele yuun pakɛ Yezu la wani? Kaalɛ Matu 14:23 la Mark 1:35 ge nyaa sɔsɛ sokere ana wa:
-
Yezu yuun iti la wani nyɛta nɛŋa zusa?
-
Wani ma’a ti hon wan nyɛta nɛŋa zusa?
NƐREBA BASƐBA YETI: “Zusega yeen dɛna la malema.”
-
Hon wan yeti bem?
YELEKPINE
Suure poan zusega basɛ ti to du’ura la Naayinɛ ge me bɔ’ɔra tɔ suma’asum la paŋa ti to ta’an ita sɛla n peeri Yehowa puurɛ.
Tiisegɔ Sokere
-
To nari ti to zusa la ani?
-
To nari ti to zusa la wani wani?
-
Zusega soŋeri to la wani?
Ɛ BISƐ
Ɛ sokese’a ti nɛreba sɔkera zusega poan lebesego.
“Yɛla Ayopɔi Ti Ho Nara Ti Ho Baŋɛ Zusega Poan” (The Watchtower, October 1, 2010)
Zamesɛ baŋɛ la de ninmɔ’ɔrɛ se’em ti to zusera ge le baŋɛ to wan eŋɛ se’em ti to zusega la ana soŋa.
Geele bisɛ Baabule la n pa’alɛ mina ti la nari ti to zusa.
Vidiyo yuunɛ wa poan, bisɛ zɛsɛka la sansɛka ti la nara ti to zusa.
Ho Me Ta'an Bɔta Yele Ana
SOKESE’A TI NƐREBA SƆKERA
Bem Baabule Zamesegɔ N Bala Ti Yehowa Sɛɛradoma Ita La Nɛreba?
Hon la Yehowa Sɛɛradoma san zamesa Baabule la, ho ta’an tara homea Baabule la kaala, zamesegɔ la poan. Ho ta’an yele ho yire nɛreba za’a la ho zɔdoma ti ba laɣum kelese zamesegɔ la.
