NUPINPLỌN 09
Nọ Hodẹ̀ Nado Dọnsẹpọ Jiwheyẹwhe
Be a nọ mọdọ emi tindo nuhudo anademẹ tọn to gbẹ̀mẹ ya? Be kanbiọ titengbe delẹ tin he a jlo na mọ gblọndo na ya? Be a tindo nuhudo homẹmimiọn kavi jidevọnamẹ tọn ya? Be e na jlo we nado dọnsẹpọ Jehovah dogọ ya? Dẹ̀hiho gán gọalọna we nado sudo nuhudo enẹ lẹpo tọn. Amọ́, nawẹ mí gán nọ hodẹ̀ to aliho he sọgbe mẹ gbọn? Be Jiwheyẹwhe nọ sè odẹ̀ lẹpo ya? Etẹwẹ a sọgan wà na ewọ nido nọ sè odẹ̀ towe lẹ? Gbọ mí ni pọ́n.
1. Mẹnu wẹ mí dona nọ hodẹ̀ hlan, podọ etẹlẹ go wẹ mí gán nọ hodẹ̀ gando?
Jesu plọn mí dọ Otọ́ olọn mẹ tọn mítọn kẹdẹ wẹ mí dona nọ hodẹ̀ hlan. Jesu lọsu nọ hodẹ̀ hlan Jehovah. E dọmọ: “Enẹwutu, lehe mìwlẹ dona nọ hodẹ̀ do die: ‘Otọ́ mítọn he tin to olọn mẹ . . .’” (Matiu 6:9) Eyin mí hodẹ̀ hlan Jehovah, mí nọ vẹ́ hẹ ewọ dogọ.
Mí gán hodẹ̀ diblayin gando whẹho depope go. Na nugbo tọn, eyin Jiwheyẹwhe na na gblọndo na odẹ̀ mítọn lẹ, yé dona sọgbe hẹ ojlo etọn. “Nudepope he mí biọ sọgbe hẹ ojlo [Jiwheyẹwhe tọn], ewọ nọ sè mítọn.” (1 Johanu 5:14) Jesu na mí apajlẹ nuhe go mí gán hodẹ̀ gando lẹ tọn. (Hia Matiu 6:9-13.) Gbọnvona dẹ̀hiho gando nuhahun mẹdetiti tọn mítọn lẹ go, mí ma dona nọ wọnji nado nọ dopẹna Jiwheyẹwhe, na nuhe e ko wà na mí lẹ bosọ nọ biọ ẹ nado gọalọna mẹdevo lẹ ga.
2. Nawẹ mí dona nọ hodẹ̀ gbọn?
Biblu na tuli mí nado ‘nọ hùn ahun mítọn na Jiwheyẹwhe.’ (Salmu lẹ 62:8) Enẹwutu, mí dona nọ hodẹ̀ po ahundopo po. Mí gán hodẹ̀ daga kavi do homẹ, to ninọmẹ depope he do sisi hia mẹ. Mí gán sọ hodẹ̀ to whedepopenu podọ to fidepope.
3. Nawẹ Jiwheyẹwhe nọ na gblọndo na odẹ̀ mítọn lẹ gbọn?
Jiwheyẹwhe nọ na gblọndo odẹ̀ lẹ tọn to aliho voovo mẹ. Jehovah ko na mí Ohó etọn Biblu, he mẹ gblọndo na kanbiọ mítọn lẹ te. Ohó Jiwheyẹwhe tọn hihia gán “hẹn wunvinọ zun nuyọnẹntọ.” (Salmu lẹ 19:7; hia Jakọbu 1:5.) Ewọ nọ na mí jijọho ahun mẹ tọn whenue mí to pipehẹ nuhahun lẹ. Podọ ewọ gán yí sinsẹ̀n-basitọ etọn lẹ zan nado na mí alọgọ he mí tindo nuhudo etọn.
DINDONANU DOGỌ
Pọ́n lehe a gán nọ hodẹ̀ ahundopo tọn he nọ hẹn homẹ Jiwheyẹwhe tọn hùn lẹ do, gọna lehe odẹ̀ gán hẹn ale wá na we do.
4. Lehe Jiwheyẹwhe nọ jlo dọ mí ni hodẹ̀ do
Etẹlẹ wẹ nọ dohia eyin Jiwheyẹwhe na sè odẹ̀ mítọn lẹ kavi lala? Hò VIDEO lọ.
Jehovah nọ jlo dọ mí ni nọ hodẹ̀ hlan ewọ. Hia Salmu lẹ 65:2, enẹgodo dọhodo kanbiọ ehelẹ ji:
-
Be a lẹndọ “Sisètọ odẹ̀ tọn” jlo dọ a ni hodẹ̀ hlan ewọ ya? Naegbọn a do lẹnmọ?
Mí dona dovivẹnu nado nọ setonuna nujinọtedo Jiwheyẹwhe tọn lẹ eyin mí jlo dọ ewọ ni nọ sè odẹ̀ mítọn lẹ. Hia Mika 3:4, gọna 1 Pita 3:12, enẹgodo dọhodo kanbiọ ehe ji:
-
Etẹwẹ gán hẹn mí kudeji dọ Jiwheyẹwhe na sè odẹ̀ mítọn lẹ?
To awhàn de whenu, awhànpa awe he jlo na hoavùn sọta yede lẹ to dẹ̀ho dọ emi ni dudeji. Be e sọgbe hẹ lẹnpọn dagbe nado donukun dọ Jiwheyẹwhe na sè odẹ̀ enẹlẹ ya?
5. Mí dona nọ hodẹ̀ sọn ahun mẹ
Yè ko plọn mẹdelẹ nado nọ vọ́ nudopolọ dọ to odẹ̀ mẹ. Amọ́, be lehe Jiwheyẹwhe nọ jlo dọ mí ni hodẹ̀ do niyẹn ya? Hia Matiu 6:7, enẹgodo dọhodo kanbiọ ehe ji:
-
Nawẹ a gán dapana “dọvọdọ nudopolọ lẹ tọn” to odẹ̀ towe lẹ mẹ gbọn?
To azán dopodopo ji, a gán nọ lẹnnupọndo nudagbe de he Jehovah ko wà na we to gbẹzan towe mẹ ji bo nọ dopẹ́ enẹ tọn na ẹn. Eyin a wàmọ na osẹ dopo, a na penugo nado hodẹ̀ gando onú voovo ṣinawe delẹ go matin dọvọdọ.
Otọ́ dagbe de nọ jlo dọ ovi etọn ni dọhona ẹn sọn ahun mẹ. Jehovah lọsu nọ jlo dọ mí ni hodẹ̀ hlan ẹn sọn ahun mẹ wá
6. Odẹ̀ yin nunina de sọn Jiwheyẹwhe dè
Nawẹ odẹ̀ nọ gọalọna mí to ninọmẹ sinsinyẹn lẹ mẹ gbọn? Hò VIDEO lọ.
Biblu dopà dọ odẹ̀ gán gọalọna mí nado tindo jijọho ahun mẹ tọn. Hia Filipinu lẹ 4:6, 7, enẹgodo dọhodo kanbiọ ehelẹ ji:
-
Dile etlẹ yindọ odẹ̀ ma nọ de nuhahun mítọn lẹ sẹ̀, nawẹ e nọ gọalọna mí gbọn?
-
Etẹlẹ go wẹ a nọ jlo na hodẹ̀ gando?
Be a yọnẹn ya?
Hogbe dowhenu tọn he yin lilẹdo “niṣẹ” wẹ “amẹn,” he zẹẹmẹdo “ni yinmọ” kavi “na jide tọn.” Sọn ojlẹ he mẹ Biblu yin kinkan te, “niṣẹ” nọ yin didọ to vivọnu odẹ̀ lẹ tọn.—1 Otànnugbo lẹ 16:36.
7. Nọ de whenu dovo nado hodẹ̀
To whedelẹnu, alọnu mítọn sọgan ján sọmọ bọ mí ma na nọ flin nado hodẹ̀. Nawẹ odẹ̀ yin nujọnu na Jesu sọ? Hia Matiu 14:23, gọna Malku 1:35, enẹgodo dọhodo kanbiọ ehelẹ ji:
-
Etẹwẹ Jesu wà nado nọ mọ whenu bo hodẹ̀?
-
Ojlẹ tẹlẹ wẹ hiẹ lọsu sọgan de dovo nado nọ hodẹ̀?
MẸDELẸ NỌ DỌ DỌ: “Whenu hẹngu wẹ dẹ̀hiho yin, na mẹde ma tin he nọ sè odẹ̀ wutu.”
-
Etẹwẹ a na dọ?
BLADOPỌ
Odẹ̀ ahundopo tọn nọ zọ́n bọ mí nọ vẹ́ dogọ hẹ Jiwheyẹwhe, nọ na mí jijọho ahun mẹ tọn bo nọ na mí huhlọn nado wà ojlo Jehovah tọn.
Dogbapọn
-
Mẹnu wẹ mí dona nọ hodẹ̀ hlan?
-
Nawẹ mí dona nọ hodẹ̀ gbọn?
-
Ale tẹlẹ wẹ odẹ̀ nọ hẹnwa na mí?
PỌ́N NUDỌNAMẸ DEVO LẸ
Dín gblọndo na kanbiọ he mẹsusu nọ kanse gando dẹ̀hiho go lẹ.
Pọ́n whẹwhinwhẹ́n he wutu dẹ̀hiho do yin nujọnu po nuhewutu a dona hẹn dẹ̀hiho towe pọnte dogọ po.
Pọ́n nuhe Biblu dọ gando mẹhe mí dona nọ hodẹ̀ hlan go.
“Be N’Dona Nọ Hodẹ̀ Hlan Mẹwiwe lẹ Wẹ Ya?” (Hosọ Intẹnẹt ji tọn)
To video ohàn tọn ehe mẹ, doayi e go eyin fie mí nọ hodẹ̀ te kavi whenue mí nọ hodẹ̀ te yin nujọnu.
A Gán Sọ Pọ́n Hosọ Ehelẹ
KANBIỌ HE MẸSUSU NỌ KANSE LẸ
Tito Biblu Pinplọn Tọn Tẹwẹ Kunnudetọ Jehovah Tọn lẹ Do?
Vọnu wẹ tito Biblu pinplọn tọn Kunnudetọ Jehovah tọn lẹ tọn, podọ a gán zan lẹdogbedevomẹ Biblu tọn depope. Voawu nado ylọ whẹndo towe blebu po họntọn towe depope po wá nupinplọn lọ tẹnmẹ.
