LEKSION 09
Magpalapit sa Dios Paagi sa Pangamuyo
Kinahanglan mo bala ang giya? May mga pamangkot ka bala nga gusto mo masabat? Kinahanglan mo bala sing paumpaw? Gusto mo bala nga mangin mas malapit kay Jehova? Makabulig gid sa imo ang pangamuyo. Pero paano dapat mangamuyo? Ginapamatian bala sang Dios ang tanan nga pangamuyo? Ano ang himuon mo para pamatian niya ang imo mga pangamuyo? Hibaluon naton.
1. Kay sin-o kita dapat mangamuyo, kag ano ang puede ipangamuyo?
Si Jesus nagtudlo nga mangamuyo lang kita sa aton Amay sa langit. Si Jesus mismo nangamuyo kay Jehova. Sia nagsiling: “Gani, mangamuyo kamo sing subong sini: ‘Amay namon nga yara sa langit . . . ’” (Mateo 6:9) Kon nagapangamuyo kita kay Jehova, mangin mas malapit kita sa iya.
Puede naton ipangamuyo ang bisan ano. Pero, para sabton sang Dios ang aton pangamuyo dapat suno ini sa iya kabubut-on. ‘Bisan ano ang ipangamuyo naton suno sa kabubut-on sang Dios, magapamati sia sa aton.’ (1 Juan 5:14) Naghatag si Jesus sing mga halimbawa kon ano ang puede ipangamuyo. (Basaha ang Mateo 6:9-13.) Puede naton ipangamuyo ang aton mga ginakabalak-an, pero indi naton pagkalipatan nga pasalamatan ang Dios sa tanan niya nga ginhimo para sa aton kag pangabayon sia nga buligan ang iban.
2. Paano kita dapat mangamuyo?
Ang Biblia nagsiling nga ‘ipautwas naton sa Dios ang aton ginabatyag.’ (Salmo 62:8) Gani ang aton pangamuyo dapat sinsero kag halin gid sa tagipusuon. Puede kita mangamuyo sing matunog ukon mahinay, sa bisan ano nga posisyon basta may pagtahod sa Dios, sa bisan ano nga oras, kag sa bisan diin.
3. Paano ginasabat sang Dios ang aton mga pangamuyo?
Ginasabat niya ini sa lainlain nga paagi. Ginhatag ni Jehova ang Biblia para makita naton ang sabat sa aton mga pamangkot. Ang pagbasa sa Pulong sang Dios “nagahatag sing kaalam sa tawo nga kulang sing kinaalam.” (Salmo 19:7; basaha ang Santiago 1:5.) Mahatagan kita sang Dios sing kalinong sa hunahuna kon may problema kita. Kag puede niya gamiton ang iya mga alagad para buligan kita.
USISAA PA GID
Hibaluon naton kon ano ang himuon mo para ang imo pangamuyo mangin sinsero kag nagapalipay sa Dios, kag kon paano ini makabulig sa imo.
4. Pangamuyo nga ginapamatian sang Dios
Ano nga pangamuyo ang ginapamatian sang Dios? Tan-awa ang VIDEO.
Gusto ni Jehova nga mangamuyo kita sa iya. Basaha ang Salmo 65:2, dayon binagbinaga ini nga mga pamangkot:
-
Sa banta mo, gusto bala sang “Manugpamati sang pangamuyo” nga mangamuyo ka sa iya? Ngaa?
Dapat naton tumanon ang mga sugo sang Dios para pamatian niya ang aton mga pangamuyo. Basaha ang Miqueas 3:4 kag 1 Pedro 3:12, dayon binagbinaga ini nga pamangkot:
-
Ano ang himuon mo para pamatian ni Jehova ang imo mga pangamuyo?
Kon may inaway, ang kada partido nagapangamuyo nga magdaug sila. Sabton ayhan sang Dios ang ila pangamuyo?
5. Ang aton pangamuyo dapat sinsero
Ang iban gintudluan nga sulitsuliton kag sauluhon ang mga pangamuyo. Pero amo bala sina nga klase sang pangamuyo ang gusto sang Dios? Basaha ang Mateo 6:7, dayon binagbinaga ini nga pamangkot:
-
Ano ang himuon mo para ‘indi mo pagsulitsuliton ang imo ginasiling’ sa imo mga pangamuyo?
Kada adlaw, pamensara ang isa ka pagpakamaayo nga nabaton mo, dayon pasalamati si Jehova. Kon himuon mo ini kada adlaw sa sulod sang isa ka semana, may pito ka butang ka na nga ginapangamuyo nga wala ginasulit.
Gusto sang amay nga isugid sang iya bata kon ano ang ara sa iya tagipusuon. Amo man sini ang gusto ni Jehova kon mangamuyo kita sa iya
6. Ang pangamuyo regalo halin sa Dios
Paano ang pangamuyo makabulig sa aton, ilabi na kon may problema kita? Tan-awa ang VIDEO.
Ang Biblia nagapromisa nga ang pangamuyo makabulig sa aton nga mangin malinong ang aton hunahuna. Basaha ang Filipos 4:6, 7, dayon binagbinaga ini nga mga pamangkot:
-
Bisan indi man pirme madula sang pangamuyo ang aton problema, paano ini makabulig sa aton?
-
Ano ang pila ka butang nga gusto mo ipangamuyo?
Kabalo ka bala?
Ang “amen” nagakahulugan sing “kabay pa.” Halin pa sang panahon sang Biblia, ang “amen” ginahambal sa katapusan sang mga pangamuyo.—1 Cronica 16:36.
7. Mangamuyo pirme
Kon kaisa bangod masako kita, malipatan naton ang pagpangamuyo. Importante bala kay Jesus ang pagpangamuyo? Basaha ang Mateo 14:23 kag Marcos 1:35, dayon binagbinaga ini nga mga pamangkot:
-
Ano ang ginhimo ni Jesus para makapangamuyo sia?
-
San-o ka puede makapangamuyo?
KON MAGSILING ANG IBAN: “Usik lang sa tiempo ang pagpangamuyo, kay wala man sang nagapamati.”
-
Ano ang isabat mo?
SUMARYO
Ang sinsero nga pangamuyo makabulig sa aton nga mangin mas malapit sa Dios, mangin malinong ang aton hunahuna, kag mapalipay naton si Jehova.
Rebyu
-
Kay sin-o kita dapat mangamuyo?
-
Paano kita dapat mangamuyo?
-
Ano ang mabulig sa aton sang pangamuyo?
DUGANG NGA IMPORMASYON
Basaha ang sabat sa pirme ginapamangkot sang mga tawo parte sa pangamuyo.
“Pito ka Butang nga Dapat Mo Mahibaluan Parte sa Pangamuyo” (Ang Lalantawan, Oktubre 1, 2010)
Usisaa kon ngaa dapat ka mangamuyo kag kon paano mo mapauswag ang imo pangamuyo.
Hibalua kon kay sin-o kita dapat mangamuyo suno sa Biblia.
“Dapat Bala Ako Mangamuyo sa mga Santos?” (Artikulo sa website)
Sa sini nga music video, tan-awa kon puede kita makapangamuyo bisan diin ukon bisan ano nga oras.
Basi Manamian Ka Man
MGA PIRME GINAPAMANGKOT
Ano ang Pagtuon sa Biblia nga Ginatanyag sang mga Saksi ni Jehova?
Ang interactive nga programa nga ginatanyag sang mga Saksi ni Jehova libre lang, kag puede mo gamiton ang bisan ano nga translation sang Biblia nga gusto mo. Mahimo mo man hagaron ang imo bilog nga pamilya ukon ang bisan sin-o nimo nga abyan nga mag-upod sa imo.
