ZAJ KAWM 09
Thov Vajtswv Koj Thiaj Sib Raug Zoo Nrog Nws
Puas tau muaj ib zaug uas koj tsis paub xyov yuav txiav txim siab li cas? Puas muaj tej yam uas koj xav paub txog tiam sis tsis muaj leej twg qhia tau rau koj? Koj puas xav tau kev nplig siab los yog kev txhawb zog? Koj puas xav muaj kev sib raug zoo nrog Yehauvas? Kev thov Vajtswv yuav pab tau koj rau tej no huv si. Tiam sis, peb yuav thov Vajtswv li cas? Vajtswv puas hnov txhua tus tej lus thov? Peb yuav tau ua li cas es Vajtswv thiaj mloog peb tej lus thov? Cia peb mus kawm txog tej no.
1. Peb yuav thov leej twg thiab peb thov tau dab tsi rau dab tsi xwb?
Yexus tau qhia kom peb cia li thov peb Leej Txiv tus uas nyob saum ntuj ceeb tsheej xwb. Yexus kuj thov Yehauvas tib yam nkaus li ntawd thiab. Nws hais tias: “Nej yuav tsum thov Vajtswv li no, ‘Peb Leej Txiv tus uas nyob saum ntuj ceeb tsheej . . .’” (Mathais 6:9) Thaum peb thov Yehauvas, ces yuav pab tau peb txoj kev sib raug zoo nrog nws nyob ruaj khov.
Peb yeej thov tau txhua yam tiam sis yuav kom Vajtswv teb peb tej lus thov peb yuav tsum thov raws li nws lub siab nyiam. Yog peb nco ntsoov thov raws li hais no ces Yehauvas yeej yuav teb peb tej lus thov. Phau Vajlugkub hais tias “yog peb thov tej uas raws li Vajtswv lub siab nyiam, Vajtswv yeej yuav mloog peb tej lus thov.” (1 Yauhas 5:14) Yexus tau qhia tseg tias peb yuav thov Vajtswv li cas rau li cas. (Nyeem Mathais 6:9-13.) Ntxiv rau ntawd, tsis txhob thov kom Vajtswv pab peb tej kev nyuaj siab nkaus nkaus xwb tiam sis nco ntsoov ua Vajtswv tsaug rau tej uas nws tau ua pub rau peb thiab thov kom nws pab lwm tus.
2. Peb yuav tsum thov Vajtswv li cas?
Phau Vajlugkub txhawb kom peb cia li qhib peb lub siab lub ntsws es qhia txhua yam nyob nraim nkoos rau Vajtswv. (Phau Ntawv Nkauj 62:8) Yog li, peb cov lus thov yuav tsum yog tej uas tawm hauv nruab siab tuaj thiab tej uas peb xav kom muaj tiag. Thaum peb thov Vajtswv txawm peb yuav hais nrov hais yau los sis cia li thov twj ywm hauv nruab siab tuaj xwb los nws yeej hnov. Peb yeej thov tau Yehauvas rau txhua lub sij hawm thiab tsis hais peb yuav nyob rau qhov chaw twg, yuav sawv ntsug, yuav zaum, los sis txhos caug. Thaum peb thov peb yuav tsum qhia tias peb hwm thiab saib taus Yehauvas.
3. Vajtswv teb peb tej lus thov li cas?
Yehauvas yeej siv txhua txoj hau ke los teb peb tej lus thov. Nws tau muab nws Txoj Lus hauv phau Vajlugkub rau peb kom peb thiaj nrhiav tau tej uas peb xav paub txog. Yog peb nyeem Vajtswv Txoj Lus ces yuav “ua rau tus uas muaj tswvyim tsawg txawj ntse tuaj.” (Ntawv Nkauj 19:7; nyeem Yakaunpaus 1:5.) Yehauvas pab kom peb muaj tau lub siab tus yees thaum peb ntsib kev nyuaj siab. Tsis tas li ntawd, nws yuav tshoov cov uas pe hawm nws lub siab kom tuaj pab peb thaum peb muaj chaw ti.
KAWM NTXIV
Ua tib zoo kawm seb yuav ua cas koj thiaj thov tau haum Vajtswv siab tawm hauv nruab siab tuaj, thiab seb kev thov Vajtswv pab tau koj li cas.
4. Vajtswv yeej muaj tej kab ke rau neeg thov Nws
Muaj tej yam twg qhia rau peb tias Vajtswv txais yuav peb tej lus thov los tsis txais? Saib zaj YEEB YAJ KIAB.
Yehauvas xav kom peb thov nws. Nyeem Phau Ntawv Nkauj 65:2, thiab tham txog ob lus no:
-
Koj puas xav tias tus uas “teb peb tej lus thov” yeej xav kom koj thov nws? Vim li cas koj xav li ntawd?
Peb yuav tau xyaum ua peb lub neej raws li Vajtswv tej kev cai yog tias peb xav kom nws mloog peb tej lus thov. Nyeem Mikhas 3:4 thiab 1 Petus 3:12, thiab tham txog lo lus no:
-
Ua cas peb thiaj paub tias Yehauvas mloog peb tej lus thov?
Thaum muaj ib ntsuj rog twg, tej zaum tog twg los nyias yuav thov Vajtswv kom nyias tog tua yeej. Puas tsim nyog Vajtswv teb tej lus thov zoo li ntawd?
5. Peb tej lus thov yuav tsum tawm hauv nruab siab tuaj
Ib txhia tau kawm tias thaum lawv thov Vajtswv lawv yuav tau hais mus hais los tib co qub lus xwb. Tiam sis Vajtswv puas xav kom peb thov nws li ntawd? Nyeem Mathais 6:7, thiab tham txog lo lus no:
-
Thaum koj thov Vajtswv koj yuav ua li cas koj thiaj tsis hais mus hais los tib co qub lus?
Txhua hnub, xav txog ib yam koob hmoov uas koj tau txais ces ua Yehauvas tsaug rau yam ntawd. Yog koj ua li no txhua hnub ces ib lub li tiam twg koj twb thov Vajtswv tau txog xya yam lawm. Thaum ntawd ces koj yuav tsis hais mus hais los tib co qub lus.
Ib leeg txi uas muaj lub siab dawb siab zoo yeej xav kom nws tus tub qhia tej uas nyob nraim nkoos hauv tus tub nruab siab rau nws. Yehauvas los yeej xav kom peb thov nws hauv nruab siab tuaj thiab
6. Txoj kev thov Vajtswv yog ib yam uas Vajtswv pub rau peb
Ua cas kev thov Vajtswv thiaj pab tau peb thaum muaj kev zoo siab thiab thaum muaj kev nyuaj siab? Saib zaj YEEB YAJ KIAB.
Phau Vajlugkub cog lus tias thaum peb thov Vajtswv ces yuav pab peb muaj lub siab tus yees. Nyeem Filipis 4:6, 7, thiab tham txog ob lo lus no:
-
Txawm tias kev thov Vajtswv tsis tshem kiag peb tej teeb meem los, qhov uas peb thov ntawd ho yuav pab tau peb li cas?
-
Koj xav thov txog tej yam twg?
Koj puas paub?
Lo lus “amees” yog lus Henplais uas txhais hais tias, “thov kom yog li ntawd” los sis “thov kom muaj tseeb li ntawd”. Txij thaum sau phau Vajlugkub los, lawv yeej ib txwm hais “Amees” tom qab thov Vajtswv tas.—1 Xwmtxheej Vajntxwv 16:36.
7. Lauj sij hawm los thov Vajtswv
Tej zaum muaj tej lub caij peb khwv dhau lawm ces peb twb tsis nco qab thov Vajtswv li. Kev thov Vajtswv tseem ceeb npaum li cas rau Yexus? Nyeem Mathais 14:23 thiab Malakaus 1:35, thiab tham txog ob lo lus no:
-
Yexus ua li cas thiaj lauj tau sij hawm los thov Vajtswv?
-
Koj thov Vajtswv rau thaum twg xwb?
IB TXHIA HAIS TIAS: “Kev thov Vajtswv yeej pab tsis tau yus dab tsi, tsuas yog pab kom siab nqeg xwb.”
-
Koj ho xav li cas?
KOJ KAWM TAU DAB TSI
Thaum peb thov Yehauvas hauv nruab siab tuaj ces peb yim huab yuav muaj kev sib raug zoo nrog nws, muaj lub siab tus yees, thiab yuav cuab tau peb lub zog kom ua tau haum nws siab.
Rov Tham Dua
-
Leej twg yog tus uas peb thov rau?
-
Peb yuav tsum thov li cas?
-
Kev thov Vajtswv pab tau peb li cas xwb?
TSHAWB NTXIV
Mus saib cov lus teb uas coob tus thiab tej zaum koj tau nug txog txoj kev thov Vajtswv.
“Xya Yam Uas Koj Yuav Tau Paub Txog Kev Thov Vajtswv” (Phau Tsom Faj lub 10 Hli tim 1 xyoo 2010)
Kawm tias vim li cas tseem ceeb rau peb thov Vajtswv thiab yuav ua li cas peb thiaj txawj thov Vajtswv zoo zuj zus.
“Vim Li Cas Kuv Thiaj Thov Vajtswv?” (Nyeem hauv jw.org/hmn)
Nyeem seb phau Vajlugkub qhia kom peb thov rau leej twg xwb.
“Kuv Puas Yuav Thov Rau Cov Leej Ntshiab?” (Nyeem hauv jw.org/hmn)
Hauv zaj nkauj no, peb pom tias peb thov Vajtswv thaum twg thiab qhov twg los yeej tau.
Tej Yam No Yuav Pab Tau Koj Thiab
TEJ UAS COOB TUS NUG TXOG
Kev Kawm Vajlugkub Nrog Yehauvas Cov Tim Khawv Zoo Li Cas?
Yehauvas Cov Tim Khawv qhia Vajlugkub dawb xwb. Koj xav siv phau Vajlugkub twg los kawm los yeej tau. Koj yeej caw tau tag nrho koj tsev neeg thiab koj tej phooj ywg tuaj nrog koj kawm.
