LESENI 09
Guriguri amo Dirava Kahirakahira Oi Lao
Emu mauri ai oi ura ta ese oi ia durua, a? Oi ura emu henanadai edia haere oi diba, a? Oi ura ta ese oi ia hagoadaia, a? Oi ura Iehova kahirakahira oi lao, a? Guriguri karana ese oi ia durua diba unai oi karaia totona. To edena be guriguri dala maorona? Dirava be guriguri ibounai ia kamonai henia, a? Dahaka oi karaia be namo emu guriguri ia kamonai totona? Mani ita herevalaia.
1. Daika do ita guriguri henia, bona dahaka totona do ita guriguri?
Iesu ese ita ia hadibaia, namona be iseda guba Tamana sibona ita guriguri henia. Iesu danu be Iehova ia guriguri henia. Ia gwau: “Vadaeni inai bamona do umui guriguri: ‘Aiemai Tamana guba dekenai oi noho . . . ’” (Mataio 6:9) Iehova ita guriguri henia neganai, iseda hetura karana ia goada.
Gau ibounai totona ita guriguri diba. Oibe, Dirava ese iseda guriguri ia haerelaia totona, ena ura hegeregerena ita guriguri be namo. “Herevana dahaka ita gurigurilaia, bema unai be [Dirava ena] ura hegeregerena, ia ese ita do ia kamonai henia.” (1 Ioane 5:14) Iesu be ita gurigurilaia diba gau maorodia ia herevalaia. (Mataio 6:9-13 duahia.) Danu, iseda lalohekwarahi gaudia sibona ita gurigurilaia lasi, to namona be Dirava ita tanikiu henia badina ita ia durua bona ita noia ma haida ia durua totona.
2. Edena bamona do ita guriguri?
Baibel ese ita ia hagoadaia namona be ‘Dirava dekenai iseda laloa gaudia ibounai ita gwauraia.’ (Salamo 62:8) Unai dainai mai momokani ida ita guriguri be namo. Bona guriguri ita gwauraia badabada eiava lalona ai ita gwauraia diba. To mai hemataurai ida Iehova ita guriguri henia. Nega bona gabu idauidau ai ita guriguri diba.
3. Edena dala ai Dirava ese iseda guriguri ia haerelaia?
Ia ese dala idauidau ai guriguri ia haerelaia. Iehova ese ita dekenai iena Hereva, Baibel ia henia, iseda henanadai edia haere ita davaria totona. Dirava ena Hereva duahia karana ese “diba bada lasi tauna dekenai aonega ia henia.” (Salamo 19:7; Iamesi 1:5 duahia.) Hekwakwanai negadiai Dirava ese lalomaino ia henia diba. Bona iena hesiai taudia ia gaukaralaia diba ita idia durua totona.
DIBA MA HAIDA ABIA
Mai momokani ida Dirava ia hamoalea gurigurina oi gwauraia, bona guriguri ese oi ia durua diba dalana oi dibaia.
4. Dirava ese ia abia dae guriguri
Edena bamona do ita diba Dirava ese iseda guriguri ia abia dae eiava lasi? VIDIO itaia.
Iehova ia ura ia ita guriguri henia. Salamo 65:2 duahia, bena inai henanadai herevalaia:
-
Oi laloa “guriguri ia kamonai Diravana” ia ura ia oi guriguri henia, a? Dahaka dainai unai bamona oi haere?
Bema ita ura Dirava ese iseda guriguri ia kamonai, namona be iena hakaua dalana ita badinaia. Mika 3:4 bona 1 Petero 3:12 duahia, bena inai henanadai herevalaia:
-
Edena bamona do ita diba Iehova be iseda guriguri ia kamonai?
Orea rua be tuari ai idia kwalimu totona idia guriguri. Oi laloa Dirava ese unai guriguri do ia haerelaia, a?
5. Mai kudouna ibounai ida ita guriguri
Taunimanima be ma haida amo idia dibaia guriguri idia gwauraia loulou. To Dirava ia ura unai bamona ia do ita guriguri henia, a? Mataio 6:7 duahia, bena inai henanadai herevalaia:
-
Edena dala ai emu guriguri lalonai “gau tamona oi gwauraia loulou” lasi?
Dina ta ta ai, oi abia hahenamo ta oi laloa neganai, Iehova oi tanikiu henia. Wiki lalonai, dina ta ta ai, unai oi karaia neganai, anina be gau 7 oi gurigurilaia vadaeni, unai amo gau tamona oi gwauraia loulou lasi.
Tama namona ia ura ena natuna ese ena hemami korikori ia gwauraia. Unai hegeregerena, Iehova ia ura guriguri amo iseda hemami korikori ita gwauraia
6. Guriguri be Dirava ena harihari gauna
Edena dala ai metau negadiai guriguri karana ese ita ia hagoadaia? VIDIO itaia.
Baibel ia gwauhamata guriguri karana ese ita ia durua diba lalomaino ita abia totona. Filipi 4:6, 7 duahia, bena inai henanadai herevalaia:
-
Ena be guriguri karana ese iseda hekwakwanai ia haorea lasi, to edena dala ai ita ia durua?
-
Emu guriguri ai dahaka gaudia oi ura gwauraia?
Inai oi diba, a?
Inai hereva “amen” ena anina be “oibe” eiava “momokani.” Baibel negadia amo ema bona hari, guriguri edia dokona ai “amen” idia gwauraia.—1 Sivarai 16:36.
7. Nega atoa guriguri totona
Nega haida ita bisi bada dainai ita laloaboio ita guriguri totona. Edena dala ai Iesu dekenai guriguri karana be mai anina bada? Mataio 14:23 bona Mareko 1:35 duahia, bena inai henanadai herevalaia:
-
Edena dala ai Iesu be guriguri totona nega ia atoa?
-
Edena bamona negadia ai oi guriguri be namo?
HAIDA IDIA GWAU: “Guriguri be nega haorea kava karana, badina ta do ia kamonai lasi.”
-
Dahaka do oi gwau?
POINT BADANA
Mai momokani ida Iehova ita guriguri henia neganai, ia kahirakahira ita lao, bona lalomaino bona goada ia henia ia ita hamoalea totona.
Riviu
-
Daika ita guriguri henia be namo?
-
Edena bamona ita guriguri be namo?
-
Guriguri ena namo haida be dahaka?
REFERENS ITAIA
Momo ese guriguri totona idia henia henanadai edia haere oi tahua.
“Guriguri Bona Henanadai Seven” (Gima Kohorona, October 1, 2010)
Guriguri ena badina bona emu guriguri oi hanamoa dalana oi dibaia.
Mani Baibel ai oi tahua, daika ita guriguri henia be namo.
Inai miusiki vidio ai, do oi itaia edeseniai bona edena nega ai ita guriguri be mai anina bada.
Reana Inai Danu Oi Ura
Momo Edia Henanadai
Iehova Ena Witnes Taudia be Dahaka Baibel Stadi Kosi Idia Karaia?
Iehova Ena Witnes Taudia ese idia karaia Baibel stadi be davana lasi, bona oi ura henia Baibel oi gaukaralaia diba. Emu ruma bese eiava turadia oi boiria diba stadi lalonai idia helai totona.
