AJUMTALÁB 09
An oláb tu tólmiyal abal ku utey kʼal a Dios
¿A atsʼál abal junchikíl a yéjenchal tólmidh abal ka exlaʼ jantʼoj ka tʼajaʼ? ¿Waʼatsej yan jantʼoj axi yabayej a éxbayal? ¿A atsʼál abal a yéjenchal ti kanatbédhaʼ jitaʼ? ¿A léʼ kit utey más kʼal a Jehová? Max játs antsanáʼ, an oláb neʼets ti tólmiy abal ka koʼoy patal axéʼ. Pero, ¿jantʼiniʼ kwaʼal ku oláts? ¿In atsʼál a Dios patal an oláb? Ki tsuʼuw jantʼoj a éjtowal ka tʼajaʼ abal ka exlaʼ abal a Dios ti atsʼanchal a olábil.
1. ¿Jitaʼ kwaʼal ki ólonchij? ¿Jantʼoj kwaʼal ki konoy ti olábil?
A Jesús tu exóbchij abal expidh kwaʼal ki ólonchij a Jehová ani jajáʼ tu punchij an tʼiplab, expidh in ólonchalak a Jehová. Jun a kʼicháj a Jesús in uluw: «Tatáʼchik kwaʼal kit olon antséj, Tátaj axi it kʼwajat ti éb» (Mateo 6:9). Tam i olonchal a Jehová i atsʼál más utat kʼal Jajáʼ.
I éjtowal ki ólchij patal jawaʼ i atsʼál. Pero max ki konchij jantʼoj axi a Jehová yab in kulbetnál, yab neʼets tu ku tókʼtsiy. An Biblia in ulal abal «i éjtowal ki konoy jawaʼ ki léʼnaʼ kom i tsoʼobits abal max ki konchij jawaʼ Jajáʼ in kulbetnál, Jajáʼ tu atsʼál» (1 Juan 5:14). A Jesús tu exóbchij jantʼoj i éjtowal ki konoy ti olábil (ka ajiy Mateo 6:9-13). Yab expidh kwaʼal ki konchij tu ku tólmiy, jayej kwaʼal ki kʼakʼnanchij jawaʼ tu pidhámal ani ki konchij kin tólmiy axi kʼeʼatchik.
2. ¿Jantʼiniʼ in tomnál ku oláts?
An Biblia tu ólchal: «Ka ólchij [a Dios] patal jawaʼ a atsʼál ta ichích» (Salmo 62:8). Tam i olonchal kwaʼal ki ólchij jawaʼ chubax i atsʼál ti ichích. I éjtowal ki ólonchij kawidh o expidh ti tsalápil. A Jehová yab tu ólchal jantʼiniʼ kwaʼal ku kʼwajiy tam i olonchal, pero kwaʼal ki tejwamédhaʼ abal i kʼakʼnál kom kʼwajat tu tʼilom kʼal Jajáʼ.
3. ¿Jantʼiniʼ tu tókʼtsinchal a Dios i olábil?
In eyendhál yan jantʼoj. Ejtíl, ban Biblia tu tókʼtsinchal jawaʼ i yéjenchal ki exlaʼ. Tam i ajiyal an Biblia «tu tólmiyal ki exlaʼ jantʼoj ki tʼajaʼ» (Salmo 19:7; ka ajiy Santiago 1:5). Ani tam i tametnál i kʼibataláb, a Jehová tu pidhál i koyattaláb ti ichích. Ma in éjtowal kin eyendhaʼ jun i atikláb kʼal axi tu kʼakʼnáb abal tu ku tólmiy.
ABAL KA EXÓBNAʼ MÁS
Ki exóbnaʼ jantʼiniʼ i éjtowal ki tʼajchij i oláb a Jehová axi ka kalej ma ti ichích ani jantʼiniʼ neʼets tu ku tólmiy max ki ólonchij antsanáʼ.
4. Jawaʼ kwaʼal ki tʼajaʼ abal a Dios tu ku atsʼanchij i olábil
¿Jantʼoj kwaʼal ki tʼajaʼ abal a Dios tu ku atsʼanchij i olábil? Ka tsuʼuwchik an VIDEO.
A Jehová in léʼ abal expidh Jajáʼ ki ólonchij. Ka ajiychik Salmo 65:2 ani ka tsálpaychik kʼal axéʼ:
-
¿A tsálpayal abal a Dios chubax in léʼ abal tatáʼ ka ólonchij? ¿Jaleʼ a tsálpayal antsanáʼ?
Max i léʼ abal a Dios tu ku atsʼanchij i olábil, kwaʼal ki tsápnanchij ki tʼajaʼ jawaʼ Jajáʼ in kulbetnál. Ka ajiychik Miqueas 3:4 ani 1 Pedro 3:12, ani ka tsálpaychik kʼal axéʼ:
-
¿Jantʼiniʼ i éjtowal ki exlaʼ abal a Dios chubax tu atsʼanchal i olábil?
Tam waʼats jun i pextaláb walám patal axi neʼets ti pejex in konchal a Dios abal in léʼ ka tólmiyat kin ataʼ. ¿Pero walám neʼets kin tókʼtsiy a Dios nixéʼ xi oláb, max jawaʼ in léʼchik játs ti tsemdhom?
5. Tam i olonchal a Dios kwaʼal ki ólchij jawaʼ chubax i atsʼál
Yan i atikláb exobchinének abal tam in olonchal a Dios expidh in yéjenchal kin tsab uluw jawaʼ dhúchadhits. ¿Pero walám in kulbetnál a Dios abal antsanáʼ ka olonchat? Ka ajiychik Mateo 6:7 ani ka tsálpaychik kʼal axéʼ:
-
¿Jantʼoj i éjtowal ki tʼajaʼ abal tam i olonchal a Dios yab júniniʼ jawaʼ i konchal?
Ka tsalpay chudhél chudhél kʼal jantʼoj axi a Jehová ti pidhál ani ka kʼakʼnanchij tam ka ólonchij. Max ka tʼajaʼ axéʼ al jun i semana, neʼets ka tʼajaʼ ti kwéntaj abal yab júniniʼ jawaʼ a konchij.
Jun i tataláb axi kʼanidhom in léʼ abal kʼal in tsakámil ka olchat jawaʼ chubax in atsʼál. A Jehová jayetsej in léʼ abal ki tʼajaʼ wawáʼ.
6. An oláb pel jun i tsʼejwalixtaláb axi tu pidhámal a Dios
¿Jantʼiniʼ tu pidhál i tsapláb an oláb tam kʼwajat i watʼál jantʼoj lej kʼibat? Ka tsuʼuwchik an VIDEO.
An Biblia tu ólchal abal an oláb chubax in éjtowal tu ku pidhaʼ i koyattaláb ti ichích. Ka ajiychik Filipenses 4:6, 7 ani ka tsálpaychik kʼal axéʼ:
-
An oláb yab tu tíxkʼanchal patal an kʼibataláb axi i kwaʼal, pero ¿jantʼiniʼ in éjtowal tu ku tólmiy?
-
¿Jantʼoj a léʼ ka ólchij a Jehová ta olábil?
¿A exlalak?
An kaw amén in léʼ kin uluw «antsanáʼ ka watʼey». Ma ti biyál, eyendhámej tin taltal jun i oláb (1 Crónicas 16:36).
7. Ka jolkʼaʼ i kʼij abal ka ólonchij a Jehová
Junchikíl i ukʼchiyal ki ólonchij a Jehová kom u kʼwajat lej tʼojlidh. ¿Jaleʼ ti lej éxbadhak abal a Jesús ka oláts? Ka ajiychik Mateo 14:23 ani Marcos 1:35, ani ka tsálpaychik kʼal axéʼ:
-
¿Jantʼoj in tʼajalak a Jesús abal ka jolkʼan ka oláts?
-
Ani tatáʼ, ¿jantʼiniʼ a éjtowal kit jolkʼan abal kit oláts?
JAWAʼ TALCHIK IN TSÁLPAYAL: «An oláb expidh pel abal ka kaldhaʼ jawaʼ a atsʼál».
-
¿Jantʼoj a tsálpayal tatáʼ?
JAWAʼ I EXOBNÁMAL
An oláb axi i tʼajchal a Jehová ma ti ichích tu tólmiyal abal ku utey kʼal Jajáʼ. Jayej tu tólmiyal abal ki atsʼaʼ i koyattaláb ti ichích ani ki tʼajchij in kulbétal a Jehová.
Ki tʼilaʼ jawaʼ i exóbnaʼ
-
¿Jitaʼ in tomnál ki ólonchij?
-
¿Jantʼiniʼ in tomnál ku oláts?
-
¿Jantʼiniʼ tu tólmiyal an oláb?
KA EXÓBNAʼ JANTʼOJ ÍT
Ka tʼajaʼ ti kwéntaj jawaʼ yan i atikláb in léʼ kin exlaʼ tin kwéntaj an oláb.
«Buk i konowixtaláb axi an atikláb in tʼajál tin kwéntaj an oláb» (La Atalaya, 1 de octubre de 2010)
Ka exóbnaʼ jaleʼ ti lej exbadh ki oláts ani jantʼiniʼ a éjtowal ka tʼajaʼ más alwaʼ a olábil.
Ka tsuʼuw jitaʼ in ulal an Biblia abal in tomnál ki ólonchij.
«¿Walám tekedh ki ólonchij an santos?» (Artículo axi ti jw.org)
Ka tsuʼuw al axéʼ xi video jaykʼiʼ ani juʼtáj i éjtowal ki ólonchij a Jehová.
Juʼtámakits kin kʼwajiy u éjtowal ku ólonchij a Jehová (1:22)
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
