EHONGWA 09
Tumbuka ku Mukuru mongumbiro
Hapo u muna kutja u hepa ombatero mehupo? U nomapuriro omananḓengu ngu u vanga kutja ye zirwe? U hepa omahuhumiṋino? Poo u vanga okukara popezu na Jehova? Ongumbiro mai yenene okuyenenisa oviṋa avihe mbyo. Nu hapo tu sokukumba momuano uṋe omusemba? Hapo Mukuru u puratena kozongumbiro azehe? Ovikwaye mbi mo sokutjita kutja Mukuru ma zuvire ozongumbiro zoye? Indjo tu tare.
1. Hapo matu sokukumba ku uṋe, nu matu sokukumba ohunga na iye?
Jesus wa honga kutja matu sokukumba ku Tate wetu womeyuru. Jesus omuini aa kumbu ku Jehova. Eye wa tja: “Nopu mwa sokukumba nai: ‘Tate yetu ngu u ri momayuru . . . ’” (Mateus 6:9) Indu tji matu kumbu ku Jehova, tu kurisa oupanga wetu ku na ye.
Matu yenene okukumba ohunga noviṋa avihe mbi tu kendisa. Kutja Mukuru ma zuvire ozongumbiro zetu, ozo maze sokukara otja kombango ye. “Eye tjinga ama zuvire ozongumbiro zetu tji matu ningire ngamwa otjiṋa otja kombango ye.” (1 Johanes 5:14) Jesus we tu pa ovihorera vyoviṋa ovinanḓengu mbi twa sokukumbira. (Lesa Mateus 6:9-13.) Pendje nokukumba ohunga nozongendo zetu uriri, katu sokuzemba okutja okuhepa ku Mukuru koviṋa mbye tu tjitira nokumuningira kutja ma vatere ovandu varwe.
2. Omomuano uṋe mu matu sokukumba?
Ombeibela i tu tunduuza kutja tu ‘raere omaumba wetu aehe’ ku Mukuru. (Epsalme 62:8) Ku nao ozongumbiro zetu maze sokuza komutima tjiri. Matu yenene okukumba kotjinyo poo momutima, momuano auhe mbu mau raisa ondengero. Nu matu yenene okukumba oiri ngamwa aihe na poruveze aruhe.
3. Mukuru u zira vi ozongumbiro zetu?
Eye u ze zira momiano omingi pekepeke. Jehova we tu pa Embo re Ombeibela, mu tu muna omaziriro komapuriro wetu. Okulesa Embo ra Mukuru ku “yandja ounongo ku imba mbe hi na wo.” (Epsalme 19:7; lesa Jakobus 1:5.) Eye ma yenene okutupa ohange momuinyo indu tji tu ri kehi yomauzeu. Nu u yenena okutjita kutja ovakarere ve ve tu vatere indu tji matu hepa ombatero.
KONḒONONA OUKOTO
Konḓonona kutja mo yenene vi okukumba momuano mbu tjata ku Mukuru, nu kondja okutjiwa kutja ongumbiro mai ku vatere vi.
4. Mukuru ka yakura ongumbiro ngamwa aihe
Ovikeṋa mbi tjita kutja ongumbiro yetu i yakurwe poo ai ha yakurwa i Mukuru? Nyanda OKAVIDIO.
Jehova u vanga kutja tu kumbe ku ye. Lesa Epsalme 65:2, nu okuzambo hungirira komapuriro nga:
-
Hapo mo munu kutja ingwi “ngu u zuvira ozongumbiro” u vanga kutja ove u kumbe ku ye? Omena raye?
Matu sokukondja okuhupa otja komirari vya Mukuru indu tji matu vanga kutja ma zuvire ozongumbiro zetu. Lesa Mika 3:4 na 1 Petrus 3:12, nu okuzambo hungirira kepuriro ndi:
-
Omomuano uṋe mu matu yenene okutjiwa kutja Jehova u puratena kozongumbiro zetu?
Movita, ovimbumba mbi mavi ru kumwe mape ya avi kumbire ondoṋeno. Hapo tu sokuundjira ko kutja Mukuru ma zuvire ozongumbiro nḓo?
5. Matu sokukumba okuza komutima
Ovandu tjiva va hongwa okuyarukira po omambo yemwe mozongumbiro zawo. Hapo imbwo oomuano Mukuru me vanga kutja tu kumbe ku ye? Lesa Mateus 6:7, nu okuzambo hungirira kepuriro ndi:
-
Matu yenene vi okuhina ‘okuwondjorora’ poo okuyarukira po omambo yemwe mozongumbiro zetu?
Ripura notjiṋa otjiwa eyuva arihe mehupo roye nu u tje okuhepa ku Jehova kotjiṋa ho. Tji wa tjiti nao oure wotjivike, mo yenene okukumba ohunga noviṋa hambombari pekepeke nokuhina okuyarukira po omambo yemwe.
Ihe ma vanga kutja omuatje we ma hungire ku na ye okuza komutima. Jehova wina u vanga kutja eṱe tu kumbe okuza komutima
6. Ongumbiro otjiyandjewa okuza ku Mukuru
Ongumbiro mai yenene vi okutuvatera, tjinene tji tu ri momauzeu? Nyanda OKAVIDIO.
Ombeibela ya kwizika kutja ongumbiro mai yenene okutuvatera okukara nohange momuinyo. Lesa Ovafilipi 4:6, 7, nu okuzambo hungirira komapuriro nga:
-
Nandarire kutja ongumbiro kai yenene okuisa po omauzeu wetu aruhe, omomuano uṋe mu i tu vatera?
-
Ovikwaye tjiva mbi mo vanga okukumba mongumbiro?
Hapo ove oo tjiwa?
Embo ndi “amen” ri heya “otjingaperi” poo “ngape kare nao.” Okuza moruveze rwOmbeibela, embo ndi “amen” aari hungirwa komaandero wongumbiro.—1 Ekuruhungi 16:36.
7. Twa po oruveze rwokukumba
Povikando tjiva tu kara noviungura ovingi mbi tjita kutja tu zembe okukumba. Omomuano uṋe ongumbiro mu ya ri onanḓengu ku Jesus? Lesa Mateus 14:23 na Markus 1:35, nu okuzambo hungirira komapuriro nga:
-
Jesus aa tjiti tjike kutja ma kare noruveze rwokukumba?
-
Oruṋe tji mo yenene okukara noruveze okukumba?
OVANDU TJIVA VE TJA: Ongumbiro kai vatere, oyo i tjita kutjau rimune nawa oure woruveze orusupi.”
-
Ove otjo tja vi?
OKUYARUKIRA PO OUSUPI
Ongumbiro ndji za komutima tjiri i tjita kutja tu kare popezu na Mukuru, i tu pa ohange momuinyo nomasa ngu matu hepa okuyorokisa Jehova.
Okurizemburukisa
-
Matu sokukumba ku uṋe?
-
Omomuano uṋe mu matu sokukumba?
-
Ongumbiro i tu vatera vi?
RIHONGA OVINGI
Muna omaziriro komapuriro ovandu ovengi ngu ve pura ohunga nongumbiro.
“Oviṋa hambombari mbi mo sokutjiwa ohunga nongumbiro” (Oruhungu, 1 ku Oktoba, 2010)
Rihonga kutja omena raye tji mo sokukumba nokutja mo sokukumba momuano uṋe.
Tara kutja Ombeibela i honga kutja matu sokukumba ku uṋe.
“Hapo me sokukumba ku imba mbe varwa otja ovayapuke?” (Okarupa okasupi morungovi)
Mokavidio komizumbi nga, tara kutja oruṋe nu opi tji matu sokukumba.
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
