PELAJAR 09
Datai Semak ngagai Petara Nengah Sampi
Kati nuan kala besampi minta iring, pengelantang ba ati, saut ngagai tanya ti beguna sereta ngambika nuan ulih datai semak ngagai Petara? Kati sampi ulih nulung? Tentu ulih. Tang kati Petara ningaka semua sampi? Nama chara besampi ti betul? Nama patut digaga nuan ngambika Petara ningaka sampi nuan? Pelajar tu deka nyaut semua tanya nya.
1. Ngagai sapa kitai patut besampi, lalu nama utai ke ulih disampika kitai?
Jesus ngajar kitai semina patut besampi ngagai Apai kitai ti di serega. Jesus empu besampi ngagai Jehovah. Ku iya: “Nya alai, baka tu ku chara kita patut besampi: ‘Apai kami ti di serega . . . ’” (Matthew 6:9) Lebuh kitai besampi ngagai Jehovah, kaul kitai enggau Iya deka nyadi tegap agi.
Kitai ulih besampi pasal sebarang utai. Tang enti kitai dekaka Petara nyaut sampi kitai, nama utai ke patut dikingatka kitai? Bup Kudus madahka: “Enti kitai minta sebarang utai nitihka peneka [Petara], Iya ninga kitai.” (1 John 5:14) Jesus ngajar kitai pasal utai ti ulih disampika kitai. (Bacha Matthew 6:9-13.) Kitai ulih besampi pasal utai ti diguna kitai. Tang anang enda ingat meri terima kasih ngagai Petara sereta besampika orang bukai.
2. Baka ni chara kitai patut sampi?
Ku Bup Kudus: “Padahka ngagai [Petara] semua penusah kita.” (Masmur 62:8) Nya alai, sampi kitai patut datai ari ati. Kitai ulih besampi ba sebarang endur sereta ba sebarang maya. Jehovah ulih ninga sampi kitai ke disebut dalam ati tauka enggau nyawa ti inggar. Enda ngira duduk tauka bediri, utai ti pemadu beguna iya nya, kitai besampi enggau chara ti bebasa.
3. Baka ni Jehovah nyaut sampi kitai?
Iya nyaut sampi kitai nengah mayuh macham chara. Siti ari chara nya, nengah Bup Kudus. Enggau macha Bup Kudus, kitai ulih tetemuka saut ti diguna kitai. Bup Kudus ulih “meri penemu-dalam ngagai orang ke nadai penemu-dalam.” (Masmur 19:7; bacha James 1:5.) Jehovah mega meri kitai pengelantang ba ati lebuh napi penanggul. Kelimpah ari nya, Jehovah ulih ngena bala nembiak Iya nulung kitai.
BELAJAR MAYUH AGI
Belajar meh chara besampi ke diterima Petara sereta penguntung ari besampi.
4. Chara besampi ke didinga Petara
Enti kitai deka Petara ninga sampi kitai, nama utai ke patut digaga sereta diseliahka kitai? Mainka VIDEO.
Jehovah deka kitai besampi ngagai Iya. Bacha Masmur 65:2, lalu kerandauka tanya tu:
-
Ba runding nuan, kati Petara ke “nyaut sampi” deka nuan besampi ngagai Iya? Nama kebuah?
Kitai enda tau enda ngasika Petara enti kitai dekaka Iya ninga sampi kitai. Bacha Mikah 3:4 enggau 1 Peter 3:12, lalu kerandauka tanya tu:
-
Baka ni kitai ulih nentuka Jehovah ninga sampi kitai?
Maya beperang kedua-dua piak besampi ngambika menang. Ba runding nuan, kati Petara deka nyaut sampi sida?
5. Jehovah dekaka kitai besampi ari ati
Sekeda orang diajar ngambika nandu leka sampi ti sama mayuh kali. Kati nya utai ti dikedeka Petara kereja kitai? Bacha Matthew 6:7, lalu kerandauka tanya tu:
-
Baka ni aku ulih nentuka diri enda nandu leka jaku ti sama tiap kali aku besampi?
Ninting hari, pikirka siti berekat ti manah ke udah diterima nuan, udah nya beri terima kasih ngagai Jehovah. Kereja meh utai tu ninting hari pengelama seminggu. Asil iya, nuan ulih besampi pasal tujuh iti utai ti bebida.
Apai ti bepengerindu dekaka anak iya madahka asai ati diri. Pia mega, Jehovah dekaka kitai besampi ari ati
6. Sampi nya pemeri ari Petara ke kitai
Baka ni sampi ulih nulung kitai, kelebih agi lebuh napi penanggul? Mainka VIDEO.
Bup Kudus madahka sampi ulih mai pemaik ba runding. Bacha Pilipi 4:6, 7, lalu kerandauka tanya tu:
-
Taja pan penanggul kitai enda lenyau pengudah besampi, tang baka ni sampi agi ulih nulung kitai?
-
Nama utai ke deka disampika nuan?
Nemu nuan?
Leka jaku “amin” mai reti “setuju” tauka “amat”. Kenyau ari jeman Bup Kudus, leka jaku “amin” dikena ba pengujung sampi.—1 Bansa Israel 16:36.
7. Anang enda ingat besampi
Kadang-kadang kitai kelalu kisuk nyentukka kitai enda ingat besampi. Kati sampi nya bisi besai reti ba Jesus? Bacha Matthew 14:23 enggau Mark 1:35, lalu kerandauka tanya tu:
-
Nama utai ke digaga Jesus ngambika ulih besampi ngagai Jehovah?
-
Ni maya nuan ulih besampi?
BISI ORANG MADAH: “Nadai guna aku besampi. Iya enda ulih nulung aku.”
-
Nama deka dipadah nuan?
LANSA
Lebuh kitai besampi ari ati, kitai ulih datai semak ngagai Petara, bulih pengelantang ba runding enggau ba ati, sereta meri kitai pengering kena ngelantangka ati Jehovah.
Ulang Kaji
-
Kitai patut besampi ngagai sapa?
-
Baka ni chara kitai patut besampi?
-
Nama penguntung iya enti kitai besampi?
ARAM BELAJAR
Giga meh saut ngagai tanya pasal sampi.
“Tujuh Iti Utai ke Patut Ditemu Nuan pasal Sampi” (Menara Jaga, 1 Oktober 2010)
Peda meh kebuah nuan patut besampi, lalu baka ni nuan ulih ngemanahka agi sampi nuan.
“Nama Kebuah Aku Patut Besampi?” (Artikel ba laman web jw.org)
Kelimpah ari Petara, kati aku patut besampi ngagai orang bukai? Bacha meh saut iya ba artikel tu.
“Kati Aku Patut Besampi Ngagai Saint?” (Artikel ba laman web jw.org)
Lebuh meda video musik tu, peratika kemaya sereta ba dini kitai ulih besampi.
Nuan Engka Rindu Meda Tu
UTAI KE SUAH DITANYA
Nama Reti Kursus Belajarka Bup Kudus ke Diatur Saksi-Saksi Jehovah?
Nengah kursus ke pechuma ti diatur Saksi-Saksi Jehovah, nuan ulih ngena sebarang salin Bup Kudus ke dikembuan nuan. Nuan mega diperansang mai semua diri sebilik sereta bala kaban nuan sama enggau kursus tu.
