ƐLĀ Ō NWU ƆMƐ 09

Tubla Ujehofa Ajaajɛ Ŋma Lɛ Ō Gbɔɔkɔ

GBƆƆ

A gbɛla ku a cɛgbá ō na tu ɔwɛ ipu oyeeyi jeeje ɛ? Ó lɛ ɔka ō cɛgbá duuma nɛ a géē dɔka ō jé ohi ku nu? A cɛgbá ɔtu ō tu kwu ɔtu? A géē dɔka ō tubla Ujehofa ajaajɛ fiyɛ? Ɔkɔ ō gba géē ta uwɔ abɔ ipu aɔwɛ nyā kpɛmm. Amáŋ ɔwɛ nyá le kpaakpa nɛ alɔ lɔfu gbɔɔkɔ a? Ɔwɔico gē jahɔ tu ɛjɛɛji ɔkɔ nɛ ācɛ gē gba a? Ɔdi nɛ a géē ya o ya ɛɛ ku Ɔwɔico kóō jahɔ tu ɔkɔ nɛ a gē gba lɛ ɔ a? Alɔ má ɔ.

1. Ɔnyɛ nɛ alɔ géē gbɔɔkɔ lɛ ɔ a, ɔdi nɛ alɔ géē gbɔɔkɔ lɛyikwu ɔ a?

Ujisɔsi nwu alɔ ku alɔ gbɔɔkɔ lɛ Adā alɔ nōo yɔ ɔkpanco foofunu. Ujisɔsi abɔyinu gbɔɔkɔ lɛ Ujehofa. Ó kahinii: “Ɔwɛ ɛ́gɛ́nyā nɛ̄ aá géē gbɔ̄ɔkɔ ā. Ádā alɔ, nōo yɔ̄ ɔkpáncō . . .” (Umátiyu 6:9) Eko duuma nɛ alɔ gē gbɔɔkɔ lɛ Ujehofa nɛɛ, alɔ gē lɔfu tu ɛma nɛ alɔ lɛ mla ɔ a iyē.

Alɔ lɔfu gbɔɔkɔ lɛyikwu ɔdā duuma gla. Ku ɛlā ɔkwɛyi a, ɔdaŋ ku alɔ dɔka ku Ujehofa kóō po ɔkɔ nɛ alɔ gē gba lɛ ɔ a, ɔdā nɛ alɔ yɔ i gbɔɔkɔ ku nu a cika ō cɛtɔha mla ococɛ ku nu piii. “Ɔ́dāŋ́ ka alɔ ba [Ɔwɔico] ɔdā dóódu nōo tá ɔ̄ ɔtū, ó gē jāhɔ̄ lɛ alɔ.” (1 Ujɔ́ni 5:14) Ujisɔsi je ocabɔ mafu lɛ alɔ lɛyikwu aɔdā nɛ alɔ géē gbɔɔkɔ nu a lɛ alɔ. (Jé Umátiyu 6:9-13.) Ba tu ɔkɔ nɛ alɔ gē gba lɛyikwu aɔdā nɛ alɔ cɛgbá nu a, alɔ hii mlanyi ō ta Ujehofa ahinya ku aɔdā nɛ ó ya lɛ alɔ a ŋ. Gbɔɔkɔ lɛ ɔ kóō ta ācɛ ɔhá abɔ duu.

2. Ɛgɛnyá nɛ alɔ cika ō gbɔɔkɔ lɛ Ɔwɔico a?

Ubáyíbu ta alɔ ɔtu kwu ɔtu kahinii: “Aá da [Ɔwɔico] odúúdú unwalu kú aá.” (Aíjē Kú Ɛ̄gbā 62:8) Ohigbu ɛnyā, ɔkɔ nɛ alɔ gē gba a cika ō ŋma ipu ɔtu ku alɔ. Alɔ lɔfu gbɔɔkɔ tɛɛcɛ gboogbom amāŋ tayinu gla. Alɔ klla lɔfu gbɔɔkɔ ɛgɛ duuma nɛ alɔ dɔka ō yɔ ɔdaŋ kóō mafu ojilima lɛ Ujehofa. Alɔ gbɔɔkɔ eko duuma ŋma ɛga duuma gla.

3. Ɛgɛnyá nɛ Ɔwɔico gē cila ɔkɔ ō gba ku alɔ a?

Ó gē cila ɔkɔ ō gba ku alɔ ɔwɛ ɛyɛɛyɛyi. Ujehofa lɛ Ubáyíbu je lɛ alɔ, ipu nu alɔ gē má ohi ku aɔka nɛ alɔ gē da a. Ubáyíbu ō jé lɔfu “yá kú ɔ̄cɛ kóō jééyī.” (Aíjē Kú Ɛ̄gbā 19:7; jé Ujɛ́mīsi 1:5.) Eko duuma nɛ alɔ yɔ i má unwalu, Ujehofa lɔfu je ɛbɔ ku ɔtu lɛ alɔ. Ó klla lɔfu ya ku ācɛ nōo gē gba ɔ ɛ̄gbā a kóō ta alɔ abɔ eko nɛ alɔ cɛgbá nu.

JÉ GƆBU

Leyi yɛ ɛgɛ nɛ a géē gbɔɔkɔ ŋma ɔtu nōo géē he Ɔwɔico ɔtu a mla ɛgɛ nɛ ɔkɔ ō gba lɔfu ta uwɔ abɔ a.

4. Ó lɛ ɔwɛ nɛ Ɔwɔico dɔka ku alɔ bēē gbɔɔkɔ

Ɔdi gē cɛ lɛ Ɔwɔico po ɔkɔ nɛ alɔ gē gba lɛ ɔ a? Ɔdi gē ya nɛ Ɔwɔico i gē po ɔkɔ nɛ alɔ gē gba lɛ ɔ a ŋ ma? Lɛ UVIDIO nyā mafu.

UVIDIO: Ɛjɛɛji Ɔkɔ Ō Gba Nɛ Ɔwɔico Gē Po A?—Aya Ō Kpii Ku Nu (2:42)

Ujehofa dɔka ku alɔ gbɔɔkɔ lɛ ɔ. Jé Aíjē Kú Ɛ̄gbā 65:2, cɛɛ ku aa kɔka lɛyikwu aɔka nōo ba nyā:

A gbɛla ka ‘Ɔwɔico nōo gē po ɔkɔ nɛ ɔcɛ gē gba’ a dɔka ku a gbɔɔkɔ lɛ ɔ? Ɔdiya nɛ a ka lɛ a?

Alɔ cika ō ceyitikwu lā oyeeyi ku alɔ ɔwɛ nōo cɛtɔha mla ɔwɛ ku Ujehofa ɔdaŋ ku alɔ dɔka ku ó po ɔkɔ nɛ alɔ gē gba lɛ ɔ a. Jé Umáyíka 3:4 mla 1 Upíta 3:12, cɛɛ ku aa kɔka lɛyikwu ɔka nyā:

Ɔdi nɛ alɔ géē ya o ya ɛɛ ku Ujehofa kóō po ɔkɔ ō gba ku alɔ a?

Ɛpleeko nɛ ācɛ gáā kpo ɛfu mla iyi uwa, uwa ɛplɛɛpa gē gbɔɔkɔ kéē le yale. A gbɛla kóō géē wɛ ɔdā ijeeyi ō leyice ka Ɔwɔico géē po ɔkɔ ō gba ɛgɛnyā?

5. Alɔ gbɔɔkɔ ŋma ɔtu

Ó lɛ ācɛ ōhī néē nwu uwa kéē gbɔɔkɔ ɛdɔ ekponu eko doodu. Amáŋ ɛgɔɔma nɛ Ɔwɔico tine ku alɔ gbɔɔkɔ lɛ ɔ a nɛɛ? Jé Umátiyu 6:7, cɛɛ ku aa kɔka lɛyikwu ɔka nyā:

Ɛgɛnyá nɛ a géē gbɔɔkɔ nɛ á gáā “kɛlā cɔhá icō” ŋ ma?

Ɛ̄cī doodu, a lɔfu gbɛla lɛyikwu ɔdā olɔhi nɛ Ujehofa ya gā uwɔ ipu oyeeyi ku uwɔ cɛɛ ku a ta ɔ ahinya ku nu. Abɔ a gē ya ɛnyā ɛ̄cī doodu a, ipu alaadi a géē ta Ujehofa ahinya ipu ɔkɔ ō gba lɛyikwu ɔdā ɛyɛɛyɛyi ahaapa nɛ ó ya gā uwɔ nɛ a kéē gáā kɛla cɔha ico ŋ.

Adā olɔhi gē dɔka ka ɔyi nu kóō kɛla lɛ ɔ ŋma ipu ɔtu. Ɛgɔɔma duu a, Ujehofa dɔka ku alɔ gbɔɔkɔ lɛ ɔ ŋma ipu ɔtu ku alɔ

6. Ɔkɔ ō gba wɛ ɛhi ŋma ɛgiyi Ɔwɔico

Ɛgɛnyá nɛ ɔkɔ ō gba gē ta alɔ abɔ, ofiyɛ duu a eko nɛ alɔ yɔ i má unwalu a? Lɛ UVIDIO nyā mafu.

UVIDIO: Ɔkɔ Ō Gba Gē Ta Alɔ Abɔ Lé Ɔtu (1:32)

Ubáyíbu da alɔ ka ɔkɔ ō gba lɔfu ta alɔ abɔ lɛ ɛbɔ ku ɔtu. Jé Ācɛ Ufílipāyi 4:6, 7, cɛɛ ku aa kɔka lɛyikwu aɔka nōo ba nyā:

Naana nɛ ɔkɔ ō gba i gē ya ka unwalu ku alɔ kóō mɛ eko doodu ŋ ma a, ɛgɛnyá nōó gē ta alɔ abɔ a?
Ɔdi wɛ ɔdā ōhī nɛ a géē dɔka ō gbɔɔkɔ lɛyikwu ɔ a?

A jé?

Ɛyi ɛlā nōo wɛ “aamí” a wɛ “kóō le yá lɛ ā” amāŋ “n cɛ.” Ŋma eko néē ta Ubáyíbu a, é gē ka “aamí” oŋmɛyi ku ɔkɔ ō gba. —1 Úklɔ́ kú Aɔ́cɛ́ 16:36.

7. Lɛ eko taajɛ ku a gbɔɔkɔ

Ekoohi, ohigbu ɔdā alɛwa ō kpo ta abɔ, alɔ lɔfu je mlanyi ō gbɔɔkɔ. Ɛgɛnyá nɛ ɔkɔ ō gba cɛgbá lɛ Ujisɔsi a? Jé Umátiyu 14:23 mla Umáki 1:35, cɛɛ ku aa kɔka lɛyikwu aɔka nōo ba nyā: