ANG ỌJẸ́JẸ 09
Tụ́ Ju Ohe Oluhye Chwẹẹ Bwula Abwọ Ọrịrị
À me irya nyori à baba nya ọngọ ka kpang ụgbẹyị ọ-ọhịhị ẹnẹhẹ lẹ? À la ịtọ ẹla ịhyẹ ịlẹ ká tịtọ nya ọwẹwẹ nyaa? À baba nya ẹjẹ ọkpụ́kpụ bala ọhụ ojuju? À tịtọ nyọka tụ́ ju iJihova chwẹẹ gụ ọwọwa? Abwọ ọrịrị ka jẹ́-ẹ họ ang ịwẹ wuu hang. Ma ụgbẹyị oyina à tị́ pwoku nyọka raabwọ? Ohe kaa ke ụru wo abwọ ọrịrị ọnyị myị́ ọnyị? Ịyẹ a tị́ ka họ chajị kọ ka wo abwọ ọrịrị nyang? Ahị yẹ wẹẹ.
1. Owo ahị tị́ ka raabwọ ha? Ahị tị́ ka jẹ́-ẹ raabwọ chajị nya ịyẹ?
IJisọsị mẹjẹ nyori Adahị olepwoohe kem, ahị nya-à ka raabwọ ha lẹ. IJisọsị lịlọmwụ raabwọ ha iJihova. O yẹkẹẹ: “Ịịlẹ anụ ka bwu raabwọ ha Ohe Oluhye lẹlẹ: ‘Adahị ọlẹ ká juwa e-epwoohe . . . ’ ” (ỊMatiyu 6:9) Ụka kahị raabwọ ha iJihova, ahị wẹẹ ju igu oriri nyahị balọọ ọngịrị.
Ahị ka jẹ́-ẹ raabwọ u-uhye nya ẹla myị́ ẹla. Ma, kori ká Ohe Oluhye á ka wẹẹhị abwọ ọrịrị nyahị aalẹ, ị ka pwoku irya nyamwụ pyii. “Ang myị́ ang ọlẹ kahị bịlẹ Ohe Oluhye pwoku irya nyamwụ ẹ-ẹpwụ nya abwọ ọrịrị, Ohe Oluhye kaa wo abwọ ọrịrị nyahị ọọwa.” (1 ịJọn 5:14) IJisọsị gu ẹnyị nya ang ịlẹ kị pwoku nyọka raabwọ chajị nyaa. (Wa ịMatiyu 6:9-13.) Datị hi ọ-ka raabwọ u-uhye nya ịbaba nyịlọhị, áhị ka deeri la o-ji Ohe obe chajị nya ang ịlẹ kọ họ hahị ka. Ịnyịnyị, áhị ka deeri la ọ-bịlọọ kọ ka da angịkịla ụbwọ ka.
2. Ányị ahị tị́ ka raabwọ?
ỊBayịbụụ juhi ọhụ nyori ahị nyị “ya akama [nyahị] wuu [ju Ohe].” (Eje Ọnyịịla 62:8) Abwọ ọrịrị nyahị chịla kọ ka bwu ọkịlẹtụ nyahị. Ahị ka jẹ́-ẹ raabwọ gboo lee ọ-rị ẹ-ẹpwụ-ẹpwụ myị́. Ahị tị ka kụ ụ-ụgbẹyị ọlẹ kọ ka mẹjẹ nyori ahị ju iJihova ihi.
3. Ányị Ohe à tịị wẹ abwọ ọrịrị nyahị?
Ọ kaa họ ịnyị a-agbẹyị lụmẹ-lụmẹ. IJihova ya Omyi Ẹla nyamwụ hahị, ẹ-ẹpwụ nyamwụ ahị kaa ye ọwẹwẹ nya ịtọ ẹla nyahị ụka lụmẹ-lụmẹ. Ọ-wa Omyi Ẹla nya Ohe kaa “ya ẹla ọjẹjẹ ha angị la ka.” (Eje Ọnyịịla 19:7; wa iJemsi 1:5.) Ọ ka jẹ́-ẹ ya okpunyi nya ọkịlẹtụ hahị ụka kahị la akama. Ọ ka jẹ́-ẹ kpa anchẹ nyamwụ dahị ụbwọ ụka kahị baba nyamwụ.
JẸ́ GỤ ỌỌWA
Kụ ẹhị yẹ ụgbẹyị ọlẹ á ka raabwọ kọ ka kpụ Ohe ịpyọ bala abwọlẹ ká abwọ ọrịrị ka jẹ́-ẹ ju apyobwuna hang.
4. Ohe Oluhye la agbẹyị ịlẹ kahị ka bwu raabwọ họọ
Ịyẹ à tị́ ka du ká Ohe Oluhye ka ye abwọ ọrịrị nyahị myị lee kọ ka ye myị ka? Yẹ IFIM ọwẹ.
IJihova tịtọ kahị ka raabwọ họọ. Wa Eje Ọnyịịla 65:2, kanụ ya ẹla u-uhye nya ịtọ ẹla ịlẹ:
-
À me irya ká Ọngọ “wo abwọ ọrịrị” tịtọ ká ahụ kaa raabwọ họọ? Ịyẹ tị́ du ká ya ịnyị?
Ahị ka hịhị ba ehile nya iJihova jẹ pyii kori kahị tịtọ kọ ka wo abwọ ọrịrị nyahị. Wa ịMayịka 3:4 bala 1 iPita 3:12, kanụ ya ẹla u-uhye nya ịtọ ẹla ọlẹ:
-
Ányị ahị tị́ ka họ ká iJihova ka wo abwọ ọrịrị nyahị?
Ụka nya ẹwụ ọdada, oye imimiiye ka raabwọ kị ka kụrụ myị́. À me irya ká Ohe ka wo abwọ ọrịrị nyaa?
5. Abwọ ọrịrị nyahị ka bwu ọkịlẹtụ
Ị mẹjẹ angịhyẹ nyori nyị ma ẹla ookpokpo-ookpokpo ya ẹ-ẹpwụ nya abwọ ọrịrị ụka myị́ ka. Ma ịnyị Ohe à tịtọ kahị ka raabwọ họọ lẹ? Wa ịMatiyu 6:7, kanụ ya ẹla u-uhye nya ịtọ ẹla ọlẹ:
-
Ányị a tị́ ka bwu cheji ba hi ọ-ka “ma ẹla ookpokpo ya gbegbegbe” a-abwọ ọrịrị nyang?
Ẹnụ myị́ ẹnụ, à ka jẹ́-ẹ kụ irya nya ahị ọwawa ọhẹ ọ-ọhịhị nyang bala o-ji iJihova obe chajị nyamwụ. Kori ká họ ịnyị ẹnẹnẹẹnụ ẹ-ẹpwụ nya epwihi ookpokpo lẹ aalẹ, à raabwọ u-uhye nya ang irwiye la ọ-ma ẹla ookpokpo ya kaka lẹ.
Adịda ọnyịịla kaa tịtọ ká ọnyị nyamwụ ka ya ẹla olirya nyamwụ joo. IJihova tịtọ kahị ka raabwọ họọ bwu ọkịlẹtụ nyahị
6. Abwọ ọrịrị ri āhị bwu ẹga nya Ohe
Ányị abwọ ọrịrị à tị́ ka jẹ́-ẹ juhi ọngịrị ụka ọnyịịla tụ́ ụka ọtịpyọ? Yẹ IFIM ọwẹ.
ỊBayịbụụ chehe nyori abwọ ọrịrị nyị ka jẹ́-ẹ dahị ụbwọ ye okpunyi nya ọkịlẹtụ. Wa Ala iFilipayị 4:6, 7, kanụ ya ẹla u-uhye nya ịtọ ẹla ịlẹ:
-
Nanana nyori abwọ ọrịrị á kaa kpa akama nyahị rụ ụka myị́ ụka ka, ányị ọ tị kaa dụbwọ?
-
Ang iyina à tị́ ka háng nyọka raabwọ chajị nyaa?
À jẹ́ ẹla ọlẹ?
Etu nya “amẹn” ri “ọ lịnyị mẹ” lee “ịịwẹ ịnyị.” Bwu ụka-ụka onyogo, angịnyị kaa ya nya “amẹn” o-ocheju nya abwọ ọrịrị.—1 Ego Ogbegbe 16:36.
7. A deeri la ọ-raabwọ ka
Ụka ọhẹ, áhị ka hi ụbwọ ka, du kahị ka deeri la ọ-raabwọ myị́. Ányị abwọ ọrịrị à tị́ ju apyobwuna ha iJisọsị kaka ba? Wa ịMatiyu 14:23 bala ịMakị 1:35, kanụ ya ẹla u-uhye nya ịtọ ẹla ịlẹ:
-
Ịyẹ iJisọsị à tị́ họ chajị kọ ka ye ụka raabwọ?
-
Ụka oyina a tị́ ka jẹ́-ẹ hu nọ nyọka raabwọ?
ANGỊHYẸ KAA YẸKẸẸ: “Abwọ ọrịrị ri ụka ọbịrịị-bịrị, chajị ọngọngọhẹ á kaa ke ụrụ ka.”
-
Ányị a tị́ ka wẹ?
ẸLỊYẸ A TỊ́ JẸ́?
Abwọ ọrịrị o-bwu ọkịlẹtụ kaa tụ́ụhị ju Ohe chwẹẹ, ya okpunyi nya ọkịlẹtụ hahị, bala ọ-ya ọngịrị ọlẹ kahị baba nyọka họ ẹla kpụ iJihova ịpyọ hahị.
Ẹlịyẹ A Tị́ Yụbwọ Chị?
-
Owo ahị tị́ ka raabwọ ha?
-
Ányị ahị tị́ ka raabwọ?
-
Ịyẹ à tị́ ri apyobwuna nya abwọ ọrịrị?
JẸ́ ANG ỊLẸ DỌỌ U-UHYE
Ye ọwẹwẹ nya ịtọ ẹla ịhyẹ ịlẹ ká angịnyị lụmẹ-lụmẹ kaa tọ u-uhye nya abwọ ọrịrị.
Jẹ́ ang odudu ká ka raabwọ bala abwọlẹ ká abwọ ọrịrị nyang ka há gụ ọwọwa.
“Ịyẹ Tị́ Du Kam ka Raabwọ?” (Ụpwụ ọla intanẹtị)
Kụ ẹhị yẹ ẹla ọlẹ ká ịBayịbụụ ya u-uhye nya ọngọlẹ kahị ka raabwọ ha.
“M̀ ka Raabwọ Ha Angị Ịgọgọ?” (Ụpwụ ọla intanẹtị)
I-ifim nya eje ọlẹ, yẹ kori ká ẹga bala ụka ọlẹ kahị raabwọ á baba.
