UKỌCHẸ 09

Tẹmẹr’Ọjọ Lefu Adua

PLAY

Tẹmẹr’Ọjọ Lefu Adua

I che n’ẹgba k’ẹ kpibe kaki ẹ tene ẹnẹ ki an’ẹ le mama mẹ? Ẹ che n’amene ogbogaga k’ẹ tene ku ma dohi ñwu? Ẹ tene ẹbọla abẹki ugbẹdọ? Ẹ tene k’ẹ tẹmẹru Jihofa? Adua neke ch’abunẹ wẹ efu ọgbọ amẹñwu-i chaka. Ama ẹñwu ch’ọna ki dukpẹ k’a chadua? Ọjọ agbọ adua duu kwugbo amonẹ chaka? Ẹñwu ẹ neke che k’Ọjọ ki na gb’adua wẹ? K’a g’ẹñwu ki dukpẹ k’ẹ ma lugbo adua.

1. Ẹnẹ a ch’adua ru, ẹñwu a la neke ch’adua lugbo ñwu?

Jisọs kọ wa kakini k’a ch’adua ru Ata wa ki d’efojale kate. Jisọs onugo ch’adua ru Jihofa. I kakini: “Abu ku mẹ ach’adua le dẹ kakini: Ata-wa ki d’efojale . . . ” (Matiu 6:9) Ichẹñwu k’a ch’adua ru Jihofa, e-lẹ ajẹñwu onukwu wa kpai owñ ki dẹ kpaka.

A neke ch’adua lugbo ẹñwu duu. Ama, tak’Ọjọ ki dohi am’adua wa, otila i che k’ebi wa ki chẹñwu ki d’owñ ẹdọ. “Ichẹwñ k’a abi ẹwñ’ka likpa alu ki d’owñ ẹdọ mak i agbọ ebi-wa.” (1 Jọn 5:14) Jisọs d’ujiwe am’ẹñwu ọkpakpa k’a neke ch’adua oji ñwu ña. (Gba Matiu 6:9-13.) Alu k’a n’adua ache todu amẹñwu k’ekwu ñwu akwu wa-i, a ki we gbenyọ ed’ugwa ñwu Jihofa todu amẹñwu ki che ñwu wa, k’a la ka ñwu ki ch’abunẹ abomunẹ gẹ.

2. Abu i dukpẹ k’a ch’adua?

Baibul d’ugbẹdọ ñwu wa k’a “m’ẹwñ ki d’ẹdọ-[wa] ko daj’anẹ ọgba-wñ.” (Eli Ekọ D’Ọjọ 62:8) Abalẹ adua wa k’a che ki na kwefu ẹdọ wa. A neke na ch’adua gbogbo abẹki efu ẹdọ wa. Ọna duu ki ad’ojima ñwu Jihofa oñ a neke dẹ. A neke ch’adua iko duu kpai ugbo duu.

3. Abu Ọjọ adohi am’adua wa?

Ọjọ adohi adua wa l’ọna ojoji ojoji. Jihofa d’Ọtakada Baibul ñwu wa, k’a neke li ohi am’ene wa kwefu-wñ. Baibul egba “ad’ibe ñw ẹnemọ.” (Eli Ekọ D’Ọjọ 19:7; gba Jemis 1:5.) I neke d’urẹdọ ñwu wa ẹgba k’a defu akanya. I la neke jẹñwu abo-wñ ku ma ch’abunẹ wa iko k’a tene amẹñwu ekwu.

N’UMA NYỌGBA

G’alu k’ẹ neke ch’adua kwefu ẹdọ wẹ alu ki Jihofa atene, k’ẹ la g’alu k’ẹ neke j’ile kwefu adua eche.

4. Ọjọ che n’ọna ki atene k’a ch’adua

Ẹñwu ch’amẹñwu ki ajẹñwu wa ma ichẹwñu k’Ọjọ agbọ adua wa abẹk i gbọ n? G’IFIDIO-i.

IFIDIO: Ọjọ Agbọ Adua Duu?—E-Ka Du Kwefu-Wñ (2:42)

Jihofa atene k’a ch’adua r’owñ. Gba Eli Ekọ D’Ọjọ 65:2, ubilẹ mẹ ch’oluka oji am’ene-i:

Ẹ neju kakini ‘Ẹnẹ ki agb’adua atene ki uwẹ ki ch’adua r’owñ? Ẹñwu chi kẹ k’abalẹ?

A chukpẹ k’a neti r’Ọjọ ichẹñwu k’a tene ki gbọ adua wa. Gba Maika 3:4 kpai 1 Pita 3:12, ubilẹ mẹ ch’oluka oji ene-i:

Ẹñwu a neke che ki Jihofa ki na neti ru adua wa?

Iko ogwu, ọwọ meji ach’adua ku ma du ọla ma. Ẹ neju kaki Ọjọ adohi adua abalẹ?

5. Adua wa chukpẹ ki kwefu ẹdọ wa

Ma f’abo ka kọ adua akatoji ku ma na kọla ka, aka-ñọ-ka efu adua ma. Ama, alu k’Ọjọ atene k’a ch’adua r’owñ dẹ? Gba Matiu 6:7, ubilẹ mẹ ch’oluka oji ene-i:

Abu ẹ neke we “kekalẹ ofo” (aka-ñọ-ka) efu adua wẹ?

Ọjọ duu, ẹ neke kpibe ẹñwu ẹnyọ ka ki Jihofa che ñwẹ ef’ọlai wẹ k’ẹ la dugwa ñwu. Ichẹñwu k’ẹ ch’abalẹ ọjọ duu efu aladi ka, abẹk ẹ la f’adua che oji ẹñwu mebie mẹ ki ma la nẹ aka-ñọ-ka n.

Ata ọmẹmẹle ka atene k’ọma ñwu ki na kọla ñwu kwefu ẹdọ ñwu. Abalẹ gẹ, Jihofa atene k’a ch’adua ru kwefu ẹdọ wa

6. Adua chẹñwu ele ogbogaga ki kwugbo Ọjọ

Abu adua neke d’ukpahiu ñwu wa iko k’ẹñwu gbiti ñwu wa? G’IFIDIO-i.

IFIDIO: Adua Ach’abunẹ Wa K’a N’ẹdọ Ẹgbo Iko Akanya (1:32)

Baibul gbalutanẹ kaki adua ach’abunẹ wa k’a n’urẹdọ ochochi. Gba Filipai 4:6, 7, ubilẹ mẹ ch’oluka oji am’ene-i:

Dagba ki ma ch’iko duu adua ak’amakanya wa kwo n, abu i ach’abunẹ wa le?
Amẹñwu ẹ tene k’ẹ ch’adua lugbo-wñ?

Ẹ che ma?

Ofe “Ami” che “ki d’abalẹ” abẹki “ochochi.” Akw’iko Baibul “ami” ch’ukpoji adua oñ ma aka.—1 Iko Iko 16:36.

7. D’iko tẹ ñwu adua

Iko ka dọmọ a li uña n gbogbo af’adua eche gbenyọ. Abu Jisọs du ña kaki adua chẹñwu ogbogaga-wñ? Gba Matiu 14:23 kpai Mark 1:35, ubilẹ mẹ ch’oluka oji am’ene-i: