LESN 09

Prie Tu Gad So Dat Yu Kyan Jraa Nier Tu Im

PLIE

Yu eva fiil laik yu niid sumadi fi tel yu wa fi du iina yu laif? Yu av som kwestiyan we yu wel waahn nuo di ansa fa? Yu waahn sumadi we a-go de de fi yu an mek yu nuo se tingz a-go aarait? Yu wuda waahn nuo se yu an Jeuova a get kluos kluos? Wen yu prie, it kyan elp yu wid aal a dem sitn ya. Bot a ou wi fi riili prie? A evri kain-a prieya Gad lisn tu? Wa yu fi du ef yu waahn im fi lisn tu yu wen yu prie tu im? Mek wi si wa wi fi du.

1. A uu wi fi prie tu? An wa’a som a di sitn dem we wi kyan prie bout?

Jiizas mek wi nuo se a onggl wi Faada we iina evn wi fi prie tu. Iina Matyu 6:9, im tel wi se: “A so unu fi prie: ‘Wi Faada we iina evn . . .’” An wen wi luk pan it, Jiizas did aalwiez prie tu im Faada, Jeuova. So wen wi prie tu Jeuova, wi an im kyan ton gud gud fren.

Wi kyan prie bout eniting an im wi ier wi, so langks a wa im waahn wi fi prie bout. 1 Jan 5:14 se: “Wi shuor se Gad wi ier wi prieya wen wi aks im fi di sitn dem we im waahn wi fi aks fa.” Jiizas did tel wi som sitn we wi kyan prie bout. (Riid Matyu 6:9-13.) Wi no fi onggl prie bout tingz we av fi du wid wi, bot wi fi mek shuor se wi tangk Gad fi di ting dem we im du fi wi, an wi fi prie fi ada piipl tu.

2. A ou wi fi prie?

Di Baibl tel wi se wi “fi tel [Gad] evriting we a gwaan iina [wi] aat.” (Saam 62:8) So wen wi a prie, wi fi mek shuor se wi a taak tu Gad fram wi aat. Wi kyan prie iina wi main, ar wi kyan prie out loud. An di wie ou wi set wiself fi prie fi shuo se wi av nof rispek fi Gad. Wi kyan prie enitaim an eniwe wi de.

3. A ou Gad ansa wi prieya dem?

Gad ansa wi prieya dem iina wol iip a difrant difrant wie. Jeuova gi wi di Baibl, an wi kyan fain di ansa fi wi kwestiyan dem iina it. Wen wi riid Gad Wod, it kyan “mek di wan we no nuo nof, nuo wa fi du.” (Saam 19:7; riid Jiemz 1:5.) Wen wi a go chuu wol iip a prablem, Jeuova kyan elp wi fi kaam wi aat. An im kyan yuuz di piipl dem we a sorv im fi elp wi tu.

LORN SOM MUO

Fain out ou yu kyan prie tu Gad di wie ou im waahn yu fi prie tu im fram yu aat. An yu a-go si ou wen yu prie, it kyan elp yu.

4. Gad no waahn wi prie tu im eni an eni wie

Wa’a som tingz we mek wi nuo ef Gad a-go lisn tu wi wen wi prie tu im? Plie di VIDIYO.

VIDIYO: Wan Paat Fram Di Vidiyo We Niem, Yu Tingk Gad Lisn Tu Evri Prieya? (2:42)

Jeuova waahn aal a wi fi prie tu im. Riid Saam 65:2, an den wi a-go taak bout dem kwestiyan ya:

Yu tingk se “di Wan we ier wi wen wi prie” waahn yu fi prie tu im? Wa mek yu se so?

Ef wi waahn Gad fi ier wi wen wi prie tu im, wi afi mek shuor se wi a liv di wie ou im waahn wi fi liv. Riid Maika 3:4 an 1 Piita 3:12, an den wi a-go taak bout da kwestiyan ya:

Wa wi fi du ef wi waahn mek shuor se Jeuova ier wi wen wi prie tu im?

Wen waar a gwaan, di difrant said dem prie tu Gad fi win. Yu tingk Gad lisn tu dem prieya de?

5. Wi fi prie tu Gad fram wi aat

Yu tingk Gad waahn wi se di siem prieya dem uova an uova agen laik wa som piipl du wen dem a prie tu im? Riid Matyu 6:7, an den wi a-go taak bout da kwestiyan ya:

Ou yu kyan mek shuor se yu naa se di siem sitn uova an uova wen yu a prie?

Wa yu kyan du a tingk bout wan a di blesn dem we yu av iina yu laif an tangk Jeuova fi’it. Chrai an du dis evridie fi wan wiik, an yu a-go si se yu prie tu Jeuova bout sevn difrant sitn, an yu neehn se di siem sitn dem uova an uova.

Wan faada we lov im pikni a-go waahn im tel im wa riili a gwaan wid im. A siem so Jeuova waahn wi fi tel im wa riili a gwaan wid wi

6. Fi kyan prie tu Gad a wan nais sitn

Ou prieya kyan mek wi chrang wen tingz a go gud fi wi an wen tingz a go bad fi wi? Plie di VIDIYO.

VIDIYO: Wen Wi Prie It Elp Wi Fi Diil Wid Wi Prablem Dem (1:32)

Di Baibl mek wi nuo se wen wi prie tu Jeuova, it a-go gi wi piis iina wi aat an main. Riid Filipiyan 4:6, 7, an den wi a-go taak bout dem kwestiyan ya:

Wen wi prie it no miin tu se aal a wi prablem dem a-go go we, bot ou it stil elp wi?
Wa an wa yu wuda waahn fi prie bout?

Yu did nuo se?

Wen wi si di wod “iemen,” it riili miin “a so it go.” Fram di taim wen di Baibl did a rait til nou, wen dem don prie piipl wuda se “iemen.”—1 Kranikl 16:36.

7. Mek shuor se yu aalwiez fain taim fi prie tu Gad

Som a di taim wi a du so moch sitn dat wi no iivn memba fi prie. Yu tingk Jiizas did aalwiez mek taim fi prie? Riid Matyu 14:23 an Maak 1:35, an den wi a-go taak bout dem kwestiyan ya:

Wa Jiizas du fi mek shuor se im did aalwiez av taim fi prie?
Wa’a som difrant difrant taim wen yu kyan prie?

SUMADI MAIT-A SE: “Wen yu prie it naa riili elp yu; a jos sitn we mek yu fiil beta.”

Wa yu wuda tel dem se?

DIS A WA YU FI MEMBA

Wen wi prie tu Gad fram wi aat, it elp wi fi jraa nier tu im. It gi wi piis iina wi main an aat, an it elp wi fi tan op chrang so dat wi kyan du di sitn dem we Jeuova waahn wi fi du.