TIMEƔRI TIS 09

Taẓallit tezmer aţ-ţesseǧhed tadukli-inek akk-d Ṛebbi

SEL S

Yella wasmi i d-tufiḍ iman-ik di liḥala ideg ur teẓriḍ ara d acu ara txedmeḍ? Tebɣiḍ aţ-ţissineḍ leǧwab ɣef kra n westeqsi i k-iceɣben? Teḥwaǧeḍ win ara k-iṣebbren? Tebɣiḍ aţ-ţqerbeḍ akteṛ ɣer Yahwa? Taẓallit tezmer a k-tɛiwen di leḥwayeǧ-agi meṛṛa. Meɛna, amek i glaq a neţẓalla? Ṛebbi yeţḥessis-ed i tẓilla meṛṛa? D acu i tzemreḍ a t-txedmeḍ akken a d-iḥess Ṛebbi i tẓilla-inek kečč? D ayagi iɣef ara d-tehdeṛ tmeɣri-yagi.

1. I menhu ara neţẓalla yerna ɣef wanti leḥwayeǧ?

Ɛisa yesselmed-aɣ belli ḥaca i Baba-tneɣ kan n igenwan, yeɛni Yahwa, umi i glaq a neţẓalla. Yerna d ayagi i gexdem ula d neţţa. Inna-d: “Atan ihi wamek ara teţẓallam, kwenwi: ‘A Baba-tneɣ yellan deg igenwan...’” (Matta 6:9). M’ara neţẓalla i Yahwa, nesseǧhad tadukli-nneɣ yid-es.

Nezmer a s-neẓẓall i Yahwa ɣef kullec. Acu kan, akken a d-iǧaweb i tẓilla-nneɣ, ilaq ad ddunt akk-d lebɣi-s. ‘Ma nessuter-as i Ṛebbi kra yellan d lebɣi-s, yeţḥessis-aɣ-d’ (1 Yuḥenna 5:14). Ɛisa yessefhem-aɣ-d ɣef wacu i nezmer a neţẓalla (ɣer-ed Matta 6:9-13). Nezmer a s-neţẓalla i Ṛebbi ɣef leḥwayeǧ i ɣ-iɛnan, meɛna ur nteţţu ara daɣen a t-neţcekkiṛ ɣef wayen akk i gxeddem ɣef ddemma-nneɣ w’a s-neṭṭalab ad iɛiwen wiyaḍ.

2. Amek i glaq a neţẓalla?

Adlis Iqedsen yeţweṣṣi-yaɣ ‘a d-nesmir ulawen-nneɣ’ i Ṛebbi (Ahellil 62:9). Ihi tiẓilla-nneɣ ilaq a d-kkent seg wul. Nezmer a s-neẓẓall s ṣṣut ɛlayen neɣ deg wul-nneɣ. Nezmer daɣen a s-neẓẓall s ibeddi, s iɣimi, a neɣli ɣef tgecrar, neɣ akken nniḍen. Awi-d kan a s-neţẓalla s leqder. Nezmer a neẓẓall anda i nebɣa, melmi i nebɣa.

3. Amek i d-yeţǧawab Ṛebbi ɣef tẓilla-nneɣ?

Aṭas n ţţawilat swayes i d-yeţǧawab. Yahwa yefka-yaɣ-d Awal-is, Adlis Iqedsen, anda i neţţaf leǧwab ɣef yesteqsiyen-nneɣ. Awal n Ṛebbi “iţţak-ed lekyasa” i win ur njeṛṛeb ara (Ahellil 19:8; ɣer-ed Yeɛqub 1:5). Yerna, Yahwa yezmer a ɣ-d-yefk lehna deg wul-nneɣ m’ara nesɛu iɣeblan. Yezmer daɣen ad yessexdem iqeddacen-is akken a ɣ-iɛiwen.

A NNADI A NEFHEM AKTEṚ

A nwali anti tiẓilla i s-yeţţeɛǧaben i Ṛebbi, a nwali daɣen acuɣer i ɣ-telha tẓallit.

4. Ṛebbi yeţḥessis-ed i tẓilla-nneɣ meɛna llan kra n ccuruṭ

Acu-ten ccuruṭ i glaqen akken a d-iḥess Ṛebbi i tẓilla-nneɣ? Walit BIDYU-YAGI.

BIDYU: Eɛni Ṛebbi yeţḥessis i tẓilla meṛṛa? (aḥric) (2:42)

Yahwa yebɣa a s-neţẓalla. Ɣret-ed Ahellil 65:3, mbeɛd hedṛet ɣef yesteqsiyen-agi:

Ɛlaḥsab-ik, Ṛebbi yebɣa ‘a d-isel i tẓilla-inek’ kečč? Acuɣer?

Akken a d-isel Ṛebbi i tẓilla-nneɣ, ilaq a nxeddem lmeǧhud akken a nɛic ɛlaḥsab n wayen i ɣ-d-yeṭṭalab. Ɣret-ed Mixa 3:4 akk-d 1 Buṭrus 3:12, mbeɛd hedṛet ɣef westeqsi-yagi:

D acu i glaq a nexdem bac a d-iḥess Ṛebbi i tẓilla-nneɣ?

Di lgirra, yal tarbaɛt teţẓalla iwakken aţ-ţerbeḥ ṭṭrad. Meɛna d lmeɛqul ma yella Ṛebbi a sent-id-isel i snat?

5. Ilaq a d-kkent tẓilla-nneɣ seg wul

Kra n lɛibad ḥeffḍen tiẓilla-nsen yerna ţẓallan s lluɣa ur fehhmen ara. Meɛna, akka i gebɣa Yahwa a s-neţẓalla? Ɣret-ed Matta 6:7, mbeɛd hedṛet ɣef westeqsi-yagi:

Amek ara nexdem akken ur d-neţɛawad ara dima lehduṛ m’ara neţẓalla?

Yal ass, mmekti-d lḥaǧa yelhan i k-yeḍran, mbeɛd cekkeṛ fell-as Yahwa. Ma txeddmeḍ akka yal ass, m’ara d-taweḍ taggara n smana, a d-tafeḍ iman-ik teẓẓulleḍ ɣef sebɛa leḥwayeǧ yemxallafen mebla ma tɛawdeḍ-d i imeslayen.

Ababat yelhan ad yebɣu a s-ihdeṛ mmi-s seg wul. Yahwa daɣen yebɣa a s-nehdeṛ seg wul.

6. Taẓallit ţ-ţukci sɣur Ṛebbi

Amek i tezmer a ɣ-d-tefk lǧehd tẓallit, ama di teswiɛin yelhan, ama di teswiɛin n diri? Walit BIDYU-YAGI.

BIDYU: Taẓallit tezmer a ɣ-tɛiwen a nqabel ccedda (1:32)

Adlis Iqedsen iwɛed belli ma neţẓalla, a nḥuss s lehna deg wul-nneɣ. Ɣret-ed Ifilibiyen 4:6, 7, mbeɛd hedṛet ɣef yesteqsiyen-agi:

D ṣṣeḥ, taẓallit ur tferru ara daymen iɣeblan-nneɣ, meɛna amek i ɣ-teţɛawan?
Anti leḥwayeǧ iɣef i tebɣiḍ a s-teẓẓalleḍ i Ṛebbi?

Tɛelmeḍ?

Awal-agi “amin” lmeɛna-s “mebla ccekk” neɣ “a d-yeḍru waya”. Adlis Iqedsen ibeggen-ed belli si zik, iqeddacen n Yahwa qqaren-d “amin” m’ara kfun taẓallit (1 Amezruy 16:36).

7. A d-neɛzel lweqt iwakken a neţẓalla

Tikwal, seg wakken necɣel, nteţţu ur neţẓalla ara. Amek i gefka azal Ɛisa i tẓallit? Ɣret-ed Matta 14:23 akk-d Marqus 1:35, mbeɛd hedṛet ɣef yesteqsiyen-agi:

Amek i gella ixeddem Ɛisa akken a d-yaf lweqt ad yeẓẓall?
Melmi i tzemreḍ a d-tɛezleḍ lweqt akken aţ-ţeţẓallaḍ?

KRA QQAREN: “Akken a d-iḥess Ṛebbi i tẓallit-ik, ilaq aţ-ţeẓẓalleḍ s yiwet n lluɣa kan.”

Acu ara terreḍ i win ara k-d-yinin akka?

AYEN I D-NELMED

Tiẓilla i d-ikkan seg wul, sseǧhadent tadukli-nneɣ d Ṛebbi, ţɛawanent-aɣ a naf lehna deg wulawen-nneɣ, yerna ţţakkent-aɣ-d lǧehd i neḥwaǧ akken a s-neɛǧeb i Yahwa.