DAW 09

Akyu Hpyi Ai Hku Nna Karai Kasang Hpang De Sit Sa

HPAW

Na a prat hta lam matsun ni ra ai ngu hkamsha ga ai kun? Nang grai chye mayu ai ga san ni nga ai kun? Shalan shabran lam ra nga ai kun? Yehowa hte grau nihtep mayu ai kun? Akyu hpyi ai gaw dai ga san ni a mahtai hpe jaw ya lu ai. Rai yang, gara hku akyu hpyi na kun? Akyu hpyi ga yawng hpe Karai Kasang madat ya ai kun? Na a akyu hpyi ga hpe shi madat ya na matu hpa galaw ra ai kun? Yu yu ga.

1. Kadai kaw akyu hpyi ging ai kun? Gara lam a matu hpyi mai ai kun?

Anhte a sumsing Kawa kaw sha akyu hpyi ging ai ngu Yesu sharin ya ai. Yesu shi nan mung Yehowa kaw akyu hpyi wa ai. Shi ndai hku tsun ai: “Nanhte gaw ning ngu akyu hpyi mu, Sumsing lamu na anhte a Wa e, Na a amying nsang chyoi pra nga lit ga.” (Mahte 6:9) Yehowa kaw anhte akyu hpyi yang, shi hte hku hkau lam grau ngang kang wa na re.

Tatut re ai lam ni a matu akyu hpyi mai ai. Shi myit ra ai hte maren akyu hpyi na nga yang, anhte a akyu hpyi ga hpe Karai Kasang mahtai jaw na re. “Karai Kasang a myit ai hku hte maren, anhte lama ma hpyi ga yang gaw, shi anhte hpe madat mara na ra ai.” (1 Yawhan 5:14) Anhte gara lam ni hpe hpyi mai ai hte seng nna Yesu ga shadawn tsun dan wa ai. (Mahte 6:9-13 hpe hti u.) Dai hta n-ga, anhte a myit tsang ai lam ni hpe mung akyu hpyi nna tsun dan mai ai. Anhte a matu Karai Kasang galaw ya wa ai lam ni hpe chyeju dum ai lam tsun dan mai ai. Kaga ni a matu mung akyu hpyi ya mai ai.

2. Gara hku akyu hpyi ging ai kun?

Anhte a “myit [Karai Kasang] a man e hpaw dan” na matu Chyum Laika hta n-gun jaw da ai. (Shakawn 62:8) Dai majaw, anhte a akyu hpyi ga ni gaw myit majing hte rai ging ai. Nsen shapraw ai raitim, n shapraw ai raitim, hkungga lara ai hte akyu hpyi mai ai. Aten shagu, shara shagu akyu hpyi mai ai.

3. Anhte a akyu hpyi ga hpe Karai Kasang gara hku mahtai jaw ai kun?

Lam amyu myu hku nna mahtai jaw ai. Yehowa gaw anhte a ga san ni a mahtai hpe tam mu na matu Chyum Laika hpe lajang da ya ai. Karai a Mungga hpe hti ai gaw, “mahkrum madup n nga ai ni hpe hpaji” lu shangun ai. (Shakawn 19:7, NWT; Yaku 1:5 hpe hti u.) Manghkang ni hkrum ai shaloi, myit simsa lam lu na matu shi karum ya lu ai. Anhte karum shingtau lam ra nga ai shaloi, karum ya na matu hpunau nauna ni hpe shi shadut ya lu ai.

Kahtap Hkaja

Karai Kasang ra sharawng ai hte maren, myit majing hte gara hku akyu hpyi mai ai lam, akyu hpyi ai gaw nang hpe gara hku akyu lu shangun ai lam hpe sawk sagawn yu ga.

4. Akyu hpyi ai hte seng nna Karai Kasang hpyi shawn da ai lam

Karai Kasang hkap la ai akyu hpyi ga ni hte n hkap la ai akyu hpyi ga ni gaw hpa ni rai kun? VIDEO hpe hpaw.

VIDEO: Akyu Hpyi Ga Yawng Hpe Karai Kasang Madat Ya Ai Kun?—Kadun (2:42)

Yehowa gaw shi hpe akyu hpyi shangun mayu ai. Shakawn 65:2 hpe hti nna, ndai ga san ni hpe bawngban u:

“Akyu hpyi ai ga madat mara ai wa” gaw, shi hpang de akyu hpyi shangun mayu ai ngu nang shadu ai kun? Rai yang, nang hpa majaw dai hku shadu ai?

Anhte a akyu hpyi ga hpe madat shangun mayu yang, Karai a tsang madang ni hte maren asak hkrung ra ai. Mihka 3:4 hte 1 Petru 3:12 hpe hti nna, ndai ga san hpe bawngban u:

Anhte a akyu hpyi ga ni hpe Yehowa madat ya na matu gara hku galaw mai ai kun?

Majan hta lahkawng maga gaw awng dang na matu akyu hpyi nga. Dai zawn akyu hpyi ga hpe Karai Kasang mahtai jaw na ngu myit mada ai gaw jaw na kun?

5. Akyu hpyi ga ni gaw myit masin kaw na rai ging

Masha nkau gaw, akyu hpyi ga langai hpe sha kahtap kahtap nna hpyi na matu sharin da hkrum ai. Raitim, Karai Kasang gaw shi hpe gara hku akyu hpyi shangun mayu ai kun? Mahte 6:7 hpe hti nna, ndai ga san hpe bawngban u:

Na a akyu hpyi ga hta “ga bai kahtap htap” tsun ai hpe gara hku koi lu na kun?

Shani shagu lu la ai shaman chyeju ni kaw na laksan shaman chyeju langai a lam hpe myit ging nna, de a matu Yehowa hpe chyeju dum mai ai. Shani shagu dai hku galaw na nga yang, kahtap kahtap tsun ai baw n byin sai. Bat mi hta n bung ai lam sanit hpe akyu hpyi lu sai.

Kaja ai kawa gaw tinang a ma myit masin kaw na tsun dan ai hpe ra sharawng ai. Dai hte maren, Yehowa mung anhte a myit masin kaw na akyu hpyi ai hpe ra sharawng

6. Akyu hpyi ai gaw Karai Kasang kaw na kumhpa

Masa kaja ai aten raitim, n kaja ai aten raitim, akyu hpyi ai gaw anhte hpe gara hku n-gun jaw ya lu ai kun? VIDEO hpe hpaw.

VIDEO: Akyu Hpyi Ai Gaw Hkamjan Lu Hkra Karum Ya (1:32)

Akyu hpyi yang, myit simsa lam lu na ngu Chyum Laika hta ga sadi jaw da ai. Hpilipi 4:6, 7 hpe hti nna, ndai ga san ni hpe bawngban u:

Akyu hpyi shagu manghkang ni mat mat na n raitim, akyu hpyi ai gaw gara hku karum ya na kun?
Nang akyu hpyi mayu ai lam nkau gaw hpa ni rai kun?

Nang chye ai kun?

“Amen” ngu ai ga si gaw, “dai hte maren byin u ga,” “teng sha byin u ga” ngu ai lachyum re. Chyum Laika prat kaw nna, akyu hpyi ga hpungdim hta “amen” ngu tsun wa ai.—1 Hkawhkam Labau 16:36.

7. Akyu hpyi na matu aten la u

Kalang lang, anhte bungli nau law ai majaw, akyu hpyi na matu malap chye ai. Akyu hpyi ai gaw Yesu a matu kade daram ahkyak ai kun? Mahte 14:23 hte Marku 1:35 hpe hti nna, ndai ga san ni hpe bawngban u:

Akyu hpyi na matu Yesu gara hku aten la ai kun?
Akyu hpyi na matu nang gara hku aten la mai ai kun?

Nkau Mi Tsun Ai: “Akyu hpyi ai gaw myit hpe hkyam sa shangun ai lam sha re.”

Nang gaw gara hku shadu ai kun?

Kadun Dawk

Myit majing hte akyu hpyi ai gaw, Karai Kasang hte nihtep shangun ai, myit simsa shangun ai, Karai Kasang ra sharawng ai hte maren galaw na matu n-gun lu shangun ai.