TƆM KƖKPƐLƖKƖTƲ 09
Tɩŋnɩ adɩma yɔɔ nɛ ŋñɔtɩnɩ Ɛsɔ
Wiɖiyi ŋtɛm katʋʋ wɛtʋ natʋyʋ nɛ ŋŋnaɣ se ŋla ɛzɩma? Ŋpɔzʋʋ ña-tɩ tɔm kɩcɛyɩtʋ natʋyʋ nɛ ŋñɩnɩɣ se ŋnɩɩ tɩ-taa? Pɩpɔzʋʋ-ŋ laŋɩyɛ hɛzʋʋ nɛ ɖoŋ kpazʋʋ na? Ŋsɔɔlaa se ŋñɔtɩnɩ Yehowa nɛ pɩkpaɖɩ? Adɩma pɩzɩɣ nɛ asɩnɩ-ŋ nɛ ŋcɔnɩ kɩcɛyɩm mbʋ pɩtɩŋa pi-ɖeɖe. Ɛlɛ ɛzɩma pɩwɛɛ se ɖɩtɩmɩ? Ɛzɩ Ɛsɔ welisiɣ adɩma tɩŋa na? Ɛbɛ pɩwɛɛ se ŋla nɛ ña-taa tɛ se Ɛsɔ kaɣ welisuu ña-adɩma? Yele nɛ ɖɩyɔɔdɩ pɩ-tɔm.
1. Anɩ pɩwɛɛ se ɖɩtɩmna, nɛ ɛbɛ tɔm ɖɩpɩzɩɣ nɛ ɖɩyɔɔdɩ ɖa-adɩma taa?
Yesu wɩlaa se ɖa-Caa weyi ɛwɛ ɛsɔdaa yɔ, e-ɖeke pɩwɛɛ se ɖɩtɩmna. Yesu maɣmaɣ tɩmnɩ Yehowa. Ɛyɔɔdaa se: «Ye mbʋ, pɩwɛɛ se ɩtɩmɩ ɛzʋnɔ: “Ða-Caa ña weyi ŋwɛ ɛsɔdaa yɔ . . .”» (Maatiyee 6:9) Alɩwaatʋ ndʋ ɖɩtɩmɩɣnɩ Yehowa yɔ, pɩcɛyɩsɩɣ ɖa nɛ ɩ ɖa-taabalɩyɛ.
Ðɩpɩzɩɣ nɛ ɖɩyɔɔdɩ mbʋ payɩ ɖɩsɔɔlaa yɔ pɩ-tɔm ɖa-adɩma taa. Ɛlɛ pʋcɔ nɛ Ɛsɔ welisi ɖa-adɩma lɛ, pɩpɔzʋʋ se ala nɔɔ kʋɖʋmaɣ nɛ ɛ-sɔɔlɩm. «Paa ɛbɛ ɖɩpɔzʋʋ nɛ pɩlakɩ nɔɔ kʋɖʋmaɣ nɛ [Ɛsɔ] sɔɔlɩm yɔ, ewelisiɣni-ɖʋ.» (1 Yohanɛɛsɩ 5:14) Yesu yɔɔdɩ mbʋ pɩmʋnaa se ɛyʋ ɛpɔzɩ adɩma taa yɔ pɩ-taa nabʋyʋ tɔm. (Kalɩ Maatiyee 6:9-13.) Pɩtasɩnɩ ɖa-maɣmaɣ ɖa-kɩcɛyɩm lɛ, ɖɩtaasɔɔ se ɖɩsɛɛ Ɛsɔ se ɛlabaɣ lɛ mbʋ ɛlabɩ-ɖʋ yɔ pɩ-yɔɔ nɛ ɖɩpɔzɩ-ɩ ɖɔɖɔ se ɛsɩnɩ lalaa.
2. Ɛzɩma pɩwɛɛ se ɖɩtɩmɩ?
Bibl seɣtiɣ-ɖʋ se ‘ɖikuli ɖa-laŋɩyɛ nɛ ɖiheyi Ɛsɔ ɖa-taa tɔm.’ (Keɣa 62:8) Ye mbʋ pɩwɛɛ se ɖiheyi Ɛsɔ ɖa-laŋɩyɛ taa tɔm nɛ ɖɩtɛ ɖa-taa. Ðɩpɩzɩɣ nɛ ɖɩtɩmnɩ nɔɔ kʋkʋyaɣ yaa ɖɩtɩmɩ ɖa-laŋɩyɛ taa; ɛlɛ pɩwɛɛ se wɛtʋ ndʋ tɩ-taa ɖɩwɛɣ yɔ, tɩwɩlɩ se ɖɩñaŋ Ɛsɔ. Ðɩpɩzɩɣ ɖɩtɩmɩ paa alɩwaatʋ ndʋ nɛ paa lone nɖɩ lɛ ɖɩ-taa.
3. Ɛzɩma Ɛsɔ cosuu ɖa-adɩma yɔɔ?
Ɛsɔ tɩŋɩɣnɩ nʋmɔŋ ndɩ ndɩ yɔɔ nɛ ecosuu ɖa-adɩma yɔɔ. Yehowa ha-ɖʋ Bibl nɛ ɖoŋ ɖoŋ lɛ ɖɩpɩzɩɣ nɛ ɖihiɣ tɔm ndʋ ɖɩpɔzʋʋ ɖa-tɩ yɔ tɩ-yɔɔ cosuu kɩ-taa. Ɛsɔtɔm kalʋʋ pɩsɩɣ «ɛyʋ weyi ɛfɛyɩnɩ lɔŋsɩnɖɛ yɔ lɔŋsɩnɖʋ.» (Keɣa 19:7; kalɩ Yakubu 1:5.) Ɛpɩzɩɣ nɛ ɛha-ɖʋ maɣzɩm taa laŋhɛzɩyɛ alɩwaatʋ ndʋ ɖɩkatɩɣ kala yɔ. Nɛ ɛpɩzɩɣ nɛ eseɣti ɛ-sɛyaa nɛ pasɩnɩ-ɖʋ alɩwaatʋ ndʋ ɖɩwɛɣ kɩcɛyɩm taa yɔ.
TAZƖ NƐ PILIMI
Tazɩ nɛ ŋna ɛzɩma ŋpɩzɩɣ nɛ ŋtɩmnɩ ña-laŋɩyɛ nɛ ña-adɩma kɛdɩnɩ Ɛsɔ yɔ, nɛ ɛzɩma adɩma pɩzɩɣ nɛ awazɩ-ŋ yɔ.
4. Mbʋ pɩpɔzʋʋ se ɖɩla nɛ ɖa-adɩma kɛdɩnɩ Ɛsɔ yɔ
Ɛzɩma pɩwɛɛ se ɖa-adɩma ɩwɛɛ nɛ akɛdɩnɩ Ɛsɔ? Ɩcɔnɩ VIDEO.
Yehowa sɔɔlaa se ɖɩtɩmnɩ-ɩ. Ɩkalɩ Keɣa 65:2, nɛ pʋwayɩ lɛ ɩtazɩ tɔm tʋnɛ tɩ-taa:
-
Ŋmaɣzɩɣ se «adɩma Welisiyu» sɔɔlaa se ŋtɩmnɩ-ɩ? Ɛbɛ yɔɔ?
Ye ɖɩsɔɔlaa se Ɛsɔ ɛmʋ ɖa-adɩma yɔ pɩpɔzʋʋ se ɖɩñaɣ pana nɛ ɖe-wezuu caɣʋ la nɔɔ kʋɖʋmaɣ nɛ ɛ-paɣtʋ. Ɩkalɩ Mikee 3:4 nɛ 1 Pɩyɛɛrɩ 3:12, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛbɛ pɩpɔzʋʋ se ɖɩla nɛ Ɛsɔ welisi ɖa-adɩma?
You alɩwaatʋ taa, mba poyouni ɖama yɔ, paa hɔɔlʋʋ ŋgʋ lɛ kɩtɩmɩɣ se Ɛsɔ ɛsɩnɩ-kʋ nɛ kɩwa. Pɩmʋnaa se ɖɩmaɣzɩ se Ɛsɔ kaɣ cosuu adɩma ana a-yɔɔ?
5. Pɩpɔzʋʋ se ɖa-adɩma ɩlɩɩnɩ ɖa-laŋɩyɛ taa
Pawɩlɩ ɛyaa nabɛyɛ se pɩwɛɛ se pɔyɔɔdʋʋ tɔm kʋɖʋmtʋ natʋyʋ piye piye pa-adɩma taa. Ɛlɛ mbʋ Ɛsɔ sɔɔlaa se ɖɩtɩmnɩ-ɩ? Ɩkalɩ Maatiyee 6:7, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛbɛ ɖɩpɩzɩɣ ɖɩla nɛ ɖɩtaayɔɔdʋʋ «tɔm kʋɖʋmtʋ tam»?
Paa evemiye nɖɩ lɛ, pɩwɛɛ se ɖɩmaɣzɩ wazasɩ nzɩ ɖihikiɣ Yehowa cɔlɔ yɔ sɩ-taa nakɛyɛ yɔɔ nɛ ɖɩsɛɛ-ɩ kɔ-yɔɔ. La mbʋ paa evemiye nɖɩ kpɩtaʋ taa, piyeki nɛ ŋtɩmɩ wondu ndɩ ndɩ yɔɔ kpɩtaʋ taa nɛ ŋtaayɔɔdʋʋ tɔm kʋɖʋmtʋ.
Caja kɩbanʋ sɔɔlaa se ɛ-pɩɣa eheyi-i ka-laŋɩyɛ taa tɔm. Yehowa ɖɔɖɔ sɔɔlaa se ɖiheyi-i ɖa-laŋɩyɛ taa tɔm.
6. Adɩma kɛ Ɛsɔ kʋjɔʋ
Ɛzɩma adɩma pɩzɩɣ nɛ akpazɩ-ɖʋ ɖoŋ, kɔzɩ kɔzɩ kaɖɛ alɩwaatʋ taa? Ɩcɔnɩ VIDEO.
Bibl yɔɔdʋʋ se adɩma pɩzɩɣ asɩnɩ-ɖʋ nɛ ɖɩwɛɛnɩ maɣzɩm taa laŋhɛzɩyɛ. Ɩkalɩ Filiipi mba 4:6, 7; nɛ pʋwayɩ lɛ ɩtazɩ tɔm tʋnɛ tɩ-taa:
-
Paa adɩma eeyeki paa ɛzɩmtaa se kʋñɔŋ ŋgʋ kɩ-taa ɛyʋ wɛɛ yɔ kɩsɩɩ tɩnaɣ yɔ, ɛzɩma awazɩɣ-ɖʋ?
-
Ɛbɛ nɛ ɛbɛ tɔm ŋsɔɔlaa se ŋyɔɔdɩ ña-adɩma taa?
Ŋŋsɩm-tʋ?
Tɔm piye «amɛn» tɔbʋʋ lɛ se «pɩla mbʋ» yaa «pɩtʋʋ fɛyɩ.» Kpaɣnɩ ɖooo Bibl alɩwaatʋ taa ɛyaa paɣzɩ tʋmɩyɛ labɩnʋʋ tɔm piye «amɛn» alɩwaatʋ ndʋ pɛtɛŋ adɩma naayɛ labʋ yɔ.—1 Kroniiki 16:36.
7. Ñɩnɩ alɩwaatʋ nɛ ŋtɩmɩɣ
Nabʋyʋ taa pɩpɩzɩɣ nɛ pɩɖɔkɩnɩ-ɖʋ siŋŋ nɛ ɖɩsɔɔ se ɖɩtɩmɩ. Ɛzɩma tɩyɛ adɩma tɔm kaacɛyɩ Yesu ɛsɩndaa? Ɩkalɩ Maatiyee 14:23 nɛ Maarɩkɩ 1:35, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛbɛ Yesu kaalaba nɛ pɩsa nɛ ehiɣ alɩwaatʋ nɛ ɛtɩmɩ?
-
Ɛzɩmtaa ŋpɩzɩɣ nɛ ŋhiɣ alɩwaatʋ nɛ ŋtɩmɩ?
NABƐYƐ YƆƆDƲƲ SE: «Adɩma kɛnɩ alɩwaatʋ lesuu mbʋ pʋyɔɔ yɔ nɔɔyʋ fɛyɩ nɛ ewelisiɣ adɩma.»
-
Suwe ñamaɣzɩɣ?
TOBI LƐ
Adɩma wena ɖɩlakɩnɩ ɖa-laŋɩyɛ pilim yɔ ayeki nɛ ɖɩñɔtɩnɩ Yehowa nɛ pɩkpaɖɩ, ahaɣ-ɖʋ maɣzɩm taa laŋhɛzɩyɛ, nɛ aɖʋʋ-ɖʋ hʋnʋm se ɖɩla mbʋ pɩkɛdɩɣnɩ Yehowa yɔ.
Tɔm taa tazʋʋ
-
Anɩ pɩwɛɛ se ɖɩtɩmna?
-
Ɛzɩma pɩwɛɛ se ɖɩtɩmɩ?
-
Adɩma wazasɩ taa nasɩyɩ lɛ nzɩ?
WONDU LƐƐTƲ
Tɔm ndʋ ɛyaa pɔzʋʋ ɖoŋ ɖoŋ pɩlɩɩnɩ adɩma yɔɔ yɔ, na ɛzɩma pocosi tɩ-yɔɔ yɔ.
«Sept choses à savoir sur la prière» (La Tour de Garde, 1er octobre 2010)
Kpɛlɩkɩ tɔm lɛɛtʋ pɩlɩɩnɩ mbʋ pʋyɔɔ pɩwɛɛ se ɖɩtɩmɩ nɛ ɛzɩma ɖɩla nɛ ɖa-adɩma kɛdɩnɩ Ɛsɔ nɛ pɩkpaɖɩ yɔ pɩ-yɔɔ.
Kalɩ nɛ ŋna weyi Bibl heyiɣ-ɖʋ se ɛnʋ pɩwɛɛ se ɖɩtɩmna yɔ.
Minziiki tɛ video kʋnɛ kɩ-taa, cɔnɩ camɩyɛ nɛ ŋna se lone nɛ alɩwaatʋ ndʋ tɩ-taa ɖɩtɩmɩɣ yɔ pɩ-tɔm cɛyaa yaa we.
Kalɩ ɖɔɖɔ....
TƆM NDƲ ƐYAA PƆZƲƲ ÐOŊ ÐOŊ ÐƆ-YƆƆ YƆ
Ɛbɛ Bibl kpɛlɩkʋʋ kɛnaa?
Ŋpɩzɩɣ ŋlabɩnɩ tʋmɩyɛ paa Bibl ŋgʋ alɩwaatʋ ndʋ ña nɛ Yehowa Aseɣɖe Tɩnaa ɩkpɛlɩkɩɣ Bibl yɔ. Ŋpɩzɩɣ ŋyaa ñɔ-hɔʋ taa mba tɩŋa yaa ña-taabalaa mba ŋsɔɔlaa yɔ se pɔkɔɔ nɛ ña nɛ wɛ ɩkpɛlɩkɩ Bibl.
