THUTO 09
Tembezela Ndzimu Kuti u be Nkhwinya Uwe
A no kumbula kuti u no sheta ku kumbuludziwa mu buchilo? A u na buzo wulu dza u no shaka dzi dabigwa? A u no sheta ku nyaladziwa kene ku simisiwa? A u nga da ku be nkhwinya wa Jehova? Ku tembezela ku nga ku batsha ku wana zwithu zose izwezwi zwa u no sheta. Ngono i zila ipi ya ka fanila ye ku tembezela? A Ndzimu u no teedza mitembezelo yose? Ini cha u nga thama kuti Ndzimu a teedze mitembezelo iyo? Ima ti bone.
1. Ta ka fanila ku tembezela yani, ngono ti nga tembezela ne kweni?
Jesu wa ka diya kuti ta ka fanila ku tembezela Tate bedu ba kudzimu koga. Jesu na iyebo wa ka tembezela Jehova. Wa ka ti: “Tembezelani sahwoku: ‘Tate bedu ba kudzimu . . .’” (Matewu 6:9) Ha ti tembezela Jehova, to simisa bukhwinya gwedu naye.
Ti nga tembezela ne kwe chingwe ne chingwe. Iko, kuti Ndzimu a dabile mitembezelo yedu, ta ka fanila ku tembezela ku yendidzana ne ku da kukwe. “Tjimwe ne tjimwe tjatinokumbila nge kuda [kwe Ndzimu], unotihwa.” (1 Johani 5:14) Jesu wa ka pa zwilakidzilo zwe zwithu zwa ti nga tembezelela. (Bala Matewu 6:9-13.) Pezhugwi kwe ku zwitembezelela, a ti zo fanila ku kangangwa ku bokela Ndzimu zwithu zwa a ka ti thamila ne ku nkumbila ku batsha bangwe.
2. Ta ka fanila ku tembezela chini?
Baibili i no ti kumbuludza ku “[dusila] Ndzimu mazwihwo anodwa mukatikati kwe mimoyo [yedu].” (Pisalema 62:8) Mitembezelo yedu ya ka fanila ku dwa mu moyo. Ti nga tembezela hwi ledu li hwika kene li si nga hwike ne zila ipi koga i no lakidza ku hlonipa. Ti nga tembezela nako ingwe ne ingwe, pangwe ne pangwe.
3. Ndzimu u no dabila chini mitembezelo yedu?
U no thama e jalo ne zila dza ka siyasiyana. Jehova wa ka tipa Dama lile, Baibili, li no dabila buzo dzedu. Ku bala Dama le Ndzimu ku nga “tjenjedza basakatjenjela.” (Pisalema 19:7; bala Jakuba 1:5.) Ndzimu u nga ti batsha kuti ti si dziyidzike ha ta ka lingisana ne mathatha. Kakale u nga shingisa balanda babe ku ti batsha ha ti sheta batsho.
ZWIDIYE KWA KA NGINILILA
Bona kuti u nga tembezela Ndzimu chini ku dwa moyo ne zila ya a no amuchila, kakale bona kuti ntembezelo u nga ku batsha chini.
4. Zwa ka lingiligwa ne Ndzimu mu mitembezelo
Ini chi nga thama kuti mitembezelo yedu i amuchigwe kene i si amuchigwe ne Ndzimu? Zana VIDIYO.
Jehova u no shaka kuti ti ntembezele. Bala Pisalema 65:2, mu be mu lebesana ne kwe buzo dzi no tobela:
-
A u no kumbula kuti iye “U no dabila ntembezelo” u no shaka kuti u ntembezele? Ne kutini?
Ta ka fanila ku chila ne milayo ye Ndzimu ha ti shaka kuti a dabile mitembezelo yedu. Bala Mika 3:4 na 1 Pita 3:12, mu be mu lebesana ne kwe buzo i no tobela:
-
Ini cha ta ka fanila ku thama kuti Jehova a teedze mitembezelo yedu?
Ha ku na nghwa, bose ba no gwisana ba nga na ba ka tembezelela ku kunda. A ko hwikala kuti ku lingiligwe kuti Ndzimu a dabile mitembezelo ya ka jalo?
5. Mitembezelo yedu ya ka fanila ku dwa mu moyo
Bathu bangwe ba ka diyiwa ku buyilila mitembezelo mingwe se kwa ya ka kwagwa. Ngono a Ndzimu u no shaka kuti ti ntembezele ne zila iyeyo? Bala Matewu 6:7, mu be mu lebesana ne kwe buzo i no tobela:
-
U nga thama chini kuti u si “lombolodze matama asina nshingo” mu mitembezelo iyo?
Zhuba lingwe ne lingwe u nga kumbula ne kwe chingwe cha wa ka thamigwa na Jehova, ngono u mbokele kube a ka ku thamila icho. Thama ichecho zhuba ne zhuba, ngono mu chibaka che viki u nowo be wa ka tembezela ne kwe zwithu zwili 7 zwa ka siyasiyana u si nga buyilile.
Tate ba ka lulwama ba no shaka kuti ngwana wabo a lebeleke nabo ku dwa mu moyo. Ne zila i no fanana, Jehova u no shaka kuti ti ntembezele ku dwa mu moyo
6. Ntembezelo i chingwe chikulu cha ta piwa ne Ndzimu
Ntembezelo u nga ti batsha chini, kwazo kwazo ha ta ka lingisana ne mamo a no lema? Zana VIDIYO.
Baibili i no thembesa kuti ntembezelo u nga ti batsha kuti ti si dziyidzike. Bala Bafilipi 4:6, 7, mu be mu lebesana ne kwe buzo dzi no tobela:
-
Nenguba ntembezelo u si nga pedzise mathatha edu mu zwibaka zose, u no ti batsha chini?
-
Izwithu zwipi zwa u nga da ku tembezela ne kwazo?
A wa gala u ziba?
Dama “amen” lo dwa “nga ku jalo.” Ngono dama ileli, “amen,” la ka gala li lebgwa ku bupelo gwe mitembezelo ku dwa ntolo mu chibaka che Baibili.—1 Shingikalo 16:36.
7. U si kangangwe ku tembezela
Mu zwibaka zwingwe ti nga batika kwazo ti be ti pelela ta kangangwa ku tembezela. Jesu wa ka be e tola ntembezelo ili chithu chikulu ku ngapani? Bala Matewu 14:23 na Mako 1:35, mu be mu lebesana ne kwe buzo dzi no tobela:
-
Jesu wa ka thamani kuti a be ne nako ye ku tembezela?
-
U nga bona ngayi nako ye ku tembezela?
BATHU BANGWE BA KATI: “Ku tembezela ha ku to batsha ne kuti Ndzimu ha a to dabila mitembezelo.”
-
Iwe u ka tini?
CHA WA ZWIDIYA
Mitembezelo i no dwa mu moyo i no thama kuti ti be pejo ne Ndzimu, i no ti batsha kuti ti si dziyidzike, ne ku ti pa masimba a ti no sheta ku shathisa Jehova.
U Nga Tini?
-
Ta ka fanila ku tembezela yani?
-
Ta ka fanila ku tembezela chini?
-
Ntembezelo u no ti batsha chini?
SHAKISISA
Bona dabilo dze buzo dze bathu banjinji ne kwe ntembezelo.
“Zwithu Zwili 7 Zwa wa ka Fanila ku Ziba ne Kwe Ntembezelo” (Thungamakole, October 1, 2010)
Zwidiye ne kwe mabaka makulu e ku tembezela, kakale ne kuti u nga thama chini kuti mitembezelo iyo i be butuka.
Bona kuti Baibili i no diyani ne kwe kuti ta ka fanila ku tembezela yani.
Mu vidiyo ye nlidzo i no tobela, bona kuti a ko amuchilika ku tembezelela pangwe ne pangwe kene ne nako ingwe ne ingwe.
Kakale u Nga Shathila ku Bona
BUZO DZI NO BUZWIWA KANJINJI
Course ye ku Zwidiya Baibili i no Piwa ne Bafakazi ba Jehova Ndi Ipi?
U shingisa ndongoloso ye mahala ye ku zwidiya i no piwa ne Bafakazi ba Jehova, u nga shingisa Baibili ingwe ne ingwe. Sungunuka ku laletsa be nsha uwo kene bakhwinya babo.
