DILONGI 09
Kwenda Pene-Pene na Nzambi na Nzila ya Kisambu
Keti nge me vandaka dezia na mfunu ya lusadisu na luzingu? Keti nge kele na bangiufula ya mfunu ya nge ke zola kubaka bamvutu? Keti nge kele na mfunu ya kikesa? Keti nge kele na mfunu ya kukuma nduku ya ngolo ya Yehowa? Kisambu lenda sadisa nge na mambu yai yonso. Kansi, nki kele mutindu ya mbote ya kusamba? Keti Nzambi ke waka bisambu yonso? Inki nge fwete sala sambu Nzambi kuwa bisambu na nge? Beto tala bamvutu.
1. Nani beto fwete samba mpi beto fwete samba sambu na nki mambu?
Yezu longaka nde beto fwete samba kaka Tata na beto ya zulu. Yezu vandaka kusamba Yehowa. Yandi tubaka nde: “Ebuna, beno fwete samba mutindu yai: ‘Tata na beto yina kele na zulu . . .’” (Matayo 6:9) Ntangu beto ke sambaka Yehowa, kinduku na beto ti yandi ke kumaka ngolo.
Beto lenda samba sambu na konso kima. Ya kieleka, sambu Nzambi kupesa mvutu na bisambu na beto, yo fwete wakana ti luzolo na yandi. Biblia ke tuba nde: ‘Konso kima yina beto ke lomba na kuwakana ti luzolo ya Nzambi, yandi ke waka beto.’ (1 Yoane 5:14) Yezu pesaka bambandu ya mambu ya mfunu yina beto fwete samba sambu na yo. (Tanga Matayo 6:9-13.) Katula kusamba sambu na mambu na beto mosi, beto fwete vila ve kupesa Nzambi mersi sambu na mambu yina yandi ke sadilaka beto mpi kulomba yandi na kusadisa bantu ya nkaka.
2. Inki mutindu beto fwete samba?
Biblia ke lombaka beto na ‘kukangula bantima na beto na ntwala ya Nzambi.’ (Nkunga 62:8) Yo yina, bisambu na beto fwete vanda ya masonga mpi yina ke katuka na ntima. Beto lenda samba na ndinga ya ngolo to na nsi ya ntima, na konso mutindu ya ke monisa luzitu, na konso kisika mpi na konso ntangu.
3. Inki mutindu Nzambi ke pesaka mvutu na bisambu na beto?
Yandi ke salaka yo na mitindu mingi. Yehowa ke pesaka bamvutu na bangiufula na beto na Ndinga na yandi Biblia. Kutanga Ndinga na yandi lenda ‘kumisa mayele muntu yina me konda mayele.’ (Nkunga 19:7; tanga Yakobo 1:5.) Nzambi lenda sadisa beto na kuvanda na ngemba ata beto ke kutana ti bampasi. Diaka, yandi lenda pusa bansadi na yandi ya nkaka na kusadisa beto ntangu beto kele mpenza na mfunu ya lusadisu.
LONGUKA MAMBU MINGI
Beto tala mambu ya nge fwete sala sambu Nzambi kuwa bisambu na nge mpi mutindu kisambu lenda natila nge mambote.
4. Mambu ya nge fwete sala sambu Nzambi kuwa kisambu na nge
Inki ke salaka nde Nzambi kuwa bisambu na beto to yandi buya yo? Beno tala VIDEO.
Yehowa ke zolaka nde beto samba yandi. Beno tanga Nkunga 65:2 mpi na nima, beno pesa mvutu na bangiufula yai:
-
Keti nge ke ndima nde “Muntu ya ke waka kisambu” ke zolaka nde nge samba yandi? Kana mpidina to ve, sambu na nki?
Beto fwete zitisa bansiku ya Nzambi kana beto ke zola nde yandi wa bisambu na beto. Beno tanga Mika 3:4 mpi 1 Piere 3:12. Na nima, beno pesa mvutu na ngiufula yai:
-
Inki beto fwete sala sambu Nzambi kuwa bisambu na beto?
Na ntangu ya bitumba bimvuka yonso zole ya ke nwana lenda samba sambu na kununga bitumba. Keti Nzambi lenda pesa mvutu na bisambu yai?
5. Bisambu na beto fwete katuka na ntima
Bo me longaka bantu ya nkaka na kuvutukila bangogo ya mutindu mosi na kisambu. Keti yai mutindu Nzambi ke zolaka nde beto samba yandi? Beno tanga Matayo 6:7 mpi na nima, beno pesa mvutu na ngiufula yai:
-
Inki nge lenda sala sambu na “kuvutukila ve mambu ya mutindu mosi mbala na mbala” na bisambu?
Konso kilumbu nge lenda yindula kima mosi ya mbote ya Nzambi me sadila nge mpi kupesa yandi mersi sambu na yo. Kana nge ke yindula kima mosi ya kupesa yandi mersi konso kilumbu, na mposo mosi yo ta sadisa nge na kusamba sambu na mambu nsambwadi kukonda kuvutukila bangogo ya mutindu mosi.
Tata ya mbote ke zolaka nde bana na yandi kusonga yandi mambu yina ke katuka na bantima na bo. Yehowa mpi ke zolaka nde beto songa yandi mambu ya ke katuka na bantima na beto
6. Kisambu kele dikabu ya Nzambi
Inki mutindu kisambu lenda sadisa beto na ntangu ya kiese mpi ya mpasi? Beno tala VIDEO.
Biblia ke tubaka nde kisambu lenda sadisa beto na kuvanda na ngemba ya mabanza. Beno tanga Bafilipi 4:6, 7 mpi na nima, beno pesa mvutu na bangiufula yai:
-
Inki mutindu kisambu ke sadisaka beto ata yo ke katulaka ve ntangu yonso bampasi na beto?
-
Inki kele mwa mambu ya nge lenda samba sambu na yo?
Keti nge zabaka yo?
Ngogo “amen” ke tendula “yo vanda mpidina” to “ya kieleka.” Banda na ntangu ya ntama, bantu vandaka kutuba “amen” na nsuka ya bisambu.—1 Bansangu 16:36.
7. Bumbaka ntangu sambu na kusamba
Bantangu ya nkaka beto lenda vanda ti mambu mingi ya kusala mpi yo lenda sala nde beto vila kusamba. Inki mutindu Yezu vandaka kutadila kisambu? Beno tanga Matayo 14:23 mpi Marko 1:35. Na nima, beno pesa mvutu na bangiufula yai:
-
Inki Yezu vandaka kusala sambu na kuzwa ntangu ya kusamba?
-
Inki ntangu yo lenda vanda mbote sambu nge samba?
BANTU YA NKAKA KE TUBAKA NDE: “Kisambu kele ve mfunu sambu yo ke sadisaka kaka na kudiwa mbote.”
-
Inki nge ta tuba?
NA BUNKUFI
Bisambu ya masonga ke sadisaka beto na kukuma banduku ya Nzambi, na kuvanda ti ngemba ya mabanza mpi ngolo yina beto ke vandaka ti yo mfunu sambu na kusepedisa Yehowa.
Inki Nge Me Simba?
-
Nani beto fwete samba?
-
Inki mutindu beto fwete samba?
-
Inki mambote kisambu lenda natila nge?
TALA MPI
Tala bamvutu na bangiufula yina bantu mingi ke kudiyulaka sambu na kisambu.
“Mambu Nsambwadi ya Nge Fwete Zaba na Yina Me Tala Kisambu” (Nzozulu ya Nkengi, Novembri 1, 2010)
Tala bikuma ya mfunu yina fwete pusa beto na kusamba mpi mutindu beto lenda kuma kusamba mbote.
Tala mambu yina Biblia ke tubaka sambu na muntu yina beto fwete samba.
Ntangu nge ke landa nkunga yai, tala kana kisika to ntangu ya beto fwete samba kele mfunu.
Nge Lenda Sepela Mpi Ti
BANGIUFULA YINA BANTU KE YULAKA MINGI
Inki Mutindu Bambangi ya Yehowa Ke Longukaka ti Bantu Biblia?
Ntangu nge ke longuka Biblia ti Bambangi ya Yehowa, nge lenda sadila konso Biblia yina. Nge lenda bingisa mpi dibuta na beno to banduku na nge na kulonguka nzila mosi ti nge.
