LYNNONG 09

Ka Jingduwai ka Ϊarap ïa Ngi ban Jan sha U Blei

TEM

Ka jingduwai ka lah ban ïarap ïa phi ha bun ki liang. Ka lah ban ïarap ïa phi ban shim ïa ki rai kiba biang, bad ban ïoh ïa ki jubab jong ki jingkylli ba kongsan jong ka jingim. Ka jingduwai ka lah ban ai jingtngen bad jingkyrmen ïa phi bad ban jan ruh sha U Jehobah. Hynrei kumno ngi dei ban duwai? Hato U Blei u sngap ïa ki jingduwai jong baroh? Kaei kaba phi dei ban leh khnang ba U Blei un sngap ïa ki jingduwai jong phi? To ngin ïa peit.

1. Hano ngi dei ban duwai?

U Jisu u la hikai ba ngi dei ban duwai tang ha U Kpa jong ngi uba ha bneng. Ïalade ruh u la duwai ha U Jehobah. U la ong: “Namar kata phin duwai kumne: ‘Ko Kpa jong ngi uba ha bneng . . . ’” (Mathaïos 6:9) Haba ngi duwai ha U Jehobah ngi pynkhlaiñ ïa ka jingïadei paralok jong ngi bad u.

Ngi lah ban duwai shaphang kiei? Haba ngi duwai ngi lah ban pan ïa kiei kiei kiba katkum ka mon jong u. Ka Baibl ka ong, “Lada ngi pan ïa kiei kiei ruh katba kum ka mon jong [U Blei], u sngew ïa ngi.” (1 Ïoannis 5:14) U Jisu u la hikai ïa ngi shaphang kum kiei kiba ngi lah ban duwai. (Pule Mathaïos 6:9-13.) Ngi dei ban duwai ym tang shaphang ki jingdonkam la jong, hynrei ngi dei ruh ban ainguh ïa u ïa kaei kaba u la leh na ka bynta jong ngi, bad ban kyrpad ruh ïa u ban ïarap lem ïa kiwei.

2. Kumno ngi dei ban duwai?

Ka Baibl ka pynshlur ïa ngi ban “theh noh ïa la ka dohnud ha khmat jong [U Blei].” (Salm 62:8) Te ngi dei ban ïathuh lut ha U Jehobah kat kaba don ha ka dohnud jong ngi. Ngi lah ban duwai jam ne jar jar. Ngi lah ban duwai da kaba dem, ïeng, shong, ne ha kano kano ka rukom kaba don burom. Ngi lah ruh ban duwai ha kano kano ka por bad ha kano kano ka jaka.

3. Kumno U Blei u jubab ïa ki jingduwai jong ngi?

U Jehobah u jubab ïa ngi ha bun ki rukom. U la ai ïa ngi ïa ka Ktien jong u, ka Baibl, ha kaba ngi lah ban shem ïa ki jubab jong ki jingkylli jong ngi. Ka jingpule ïa ka ktien U Blei ka “pynstad ïa uba shida.” (Salm 19:7; pule Jakob 1:5.) U lah ban pyntngen ïa ngi haba ngi mad jingeh. U lah ruh ban pyndonkam ïa ki nongmane jong u ban ïarap ïa ngi ha ka por kaba ngi donkam.

WAD SHUH SHUH

Peit kumno phi lah ban duwai ha ka rukom kaba pynsngewbha ïa U Blei, bad kumno ka jingduwai ka lah ban ïarap ïa phi.

4. Kaei kaba ngi dei ban leh khnang ba U Blei un sngap ïa ki jingduwai jong ngi?

Haba ngi duwai, ngi dei ban kynmaw katto katne kiei kiei. Peit ïa ka VIDEO

VIDEO: Hato U Blei u Sngap ïa ki Jingduwai jong Baroh?—Shi Bynta (2:42)

U Jehobah u kwah ïa ngi ba ngin duwai sha u. Pule Salm 65:2, bad nangta sa ïa peit lang ïa kane ka jingkylli harum:

Hato phi tharai ba U Blei u kwah ïa phi ban duwai sha u? Balei?

Lada ngi kwah ba U Blei un sngap ïa ki jingduwai jong ngi, ngi dei ban pyrshang ban im ha ka rukom kaba pynsngewbha ïa u. Pule Mikah 3:4 bad 1 Petros 3:12, bad nangta sa ïa peit lang ïa kane ka jingkylli harum:

Kaei kaba ngi dei ban leh khnang ba U Jehobah un sngap ïa ki jingduwai jong ngi?

Ha ka thma, baroh ar liang ki duwai ba kin jop. Hato phi tharai ba U Blei un jubab ïa kum kine ki jingduwai?

5. Ngi dei ban kren ïa U Jehobah naduh ka dohnud

Don ki nongïalam niam kiba hikai ïa ki briew ban duwai ïa kajuh shi kajuh. Hynrei hato U Blei u kwah ïa ngi ban duwai ha kata ka rukom? Pule Mathaïos 6:7 bad nangta sa ïa peit lang ïa kane ka jingkylli harum:

Kumno phi lah ban kiar na kaban duwai ïa kajuh shi kajuh?

Man la ka sngi, pyrkhat shaphang kawei ka jingkyrkhu kaba phi la ïoh na U Jehobah. Nangta pyrshang ïa kane shi taïew - ainguh ïa U Jehobah man la ka sngi na ka bynta ki jingkyrkhu kiba pher ba pher. Da kaba leh kumne ka jingduwai jong phi kan ym long kajuh shi kajuh man la ka sngi.

U kpa uba ieid u kwah ïa la u khun ba un kren ïa u naduh ka dohnud. Kumjuh ruh, U Jehobah u kwah ïa ngi ba ngin duwai ha u naduh ka dohnud

6. Ka jingduwai ka dei ka jingaiei na U Blei

Kumno ka jingduwai ka lah ban ïarap ïa ngi ha ki por kiba suk bad kiba jynjar ruh? Peit ïa ka VIDEO.

VIDEO: Ka Jingduwai ka Ïarap ïa Ngi ban Ïaleh ïa ki Jingeh (1:32) (Phareng)

Ka Baibl ka kular ba ka jingduwai ka lah ban ïarap ïa ngi ban ym khuslai than. Pule Philippi 4:6, 7, bad nangta sa ïa peit lang ïa kine jingkylli harum:

Watla ka jingduwai kam ju weng ïa ki jingeh jong ngi barobor, kumno pat ka lah ban ïarap ïa ngi?
Shaphang kiei phi kwah ban duwai?

Hato phi tip?

Ka kyntien “amen” ka mut ba ngi “mynjur” ïa kaei kaba la ong ha ka jingduwai. Naduh mynshuwa ki briew jong U Blei ki ju ong “amen” ha kaba kut jong ka jingduwai jong ki.—1 Khronikl 16:36.

7. Pyllait por ban duwai

Teng teng namarba ngi bunkam palat ngi klet noh ban duwai. Haduh katno ka jingduwai ka long kaba kongsan ïa u Jisu? Pule Mathaïos 14:23 bad Markos 1:35, bad nangta sa ïa peit lang ïa kine ki jingkylli harum:

Kaei kaba u Jisu u la leh khnang ba un ïoh por ban duwai?
Ha kano ka por phi lah ban pyllait por ban duwai?

DON KIBA ONG: “Kam pher la ngi duwai hano hano ruh. Baroh ki jingduwai ki leit sha U Blei.”

Phi pat phin ong kumno?

KI MAT BAKONGSAN

Ka jingduwai kaba naduh ka dohnud ka pynjan ïa ngi sha U Blei. Ka ai ïa ngi ïa ka jingsuk mynsiem, bad ka ai ruh ïa ka bor kaba ngi donkam ban pynsngewbha ïa U Jehobah.