មេរៀនទី០៩

យើងអាចចូលទៅជិតព្រះតាមរយៈការអធិដ្ឋាន

លេង

តើអ្នកធ្លាប់គិតថាអ្នកត្រូវការការណែនាំក្នុងជីវិតឬទេ? តើអ្នកចង់បានជំនួយដើម្បីដោះស្រាយបញ្ហាណាមួយឬទេ? តើអ្នកត្រូវការការសម្រាលទុក្ខឬកម្លាំងចិត្តទេ? តើអ្នកចង់ជិតស្និទ្ធជាមួយនឹងព្រះយេហូវ៉ាឬទេ? សេចក្ដីអធិដ្ឋានអាចជួយអ្នកចំពោះរឿងទាំងអស់នេះ។ តើអ្វីជាវិធីត្រឹមត្រូវដើម្បីអធិដ្ឋាន? តើព្រះស្ដាប់សេចក្ដីអធិដ្ឋានរបស់មនុស្សទាំងអស់ឬ? តើអ្នកអាចធ្វើអ្វីដើម្បីប្រាកដថាលោកស្ដាប់សេចក្ដីអធិដ្ឋានរបស់អ្នក? សូមយើងពិភាក្សាជាមួយគ្នា។

១. តើយើងគួរអធិដ្ឋានទៅអ្នកណា ហើយតើយើងអាចអធិដ្ឋានអំពីអ្វី?

លោកយេស៊ូបង្រៀនថាយើងគួរអធិដ្ឋានទៅព្រះយេហូវ៉ាតែមួយប៉ុណ្ណោះ ដែលជាបិតារបស់យើងនៅស្ថានសួគ៌។ លោកយេស៊ូផ្ទាល់បានអធិដ្ឋានទៅព្រះយេហូវ៉ា។ លោកមានប្រសាសន៍ថា៖ «អ្នករាល់គ្នាត្រូវអធិដ្ឋានតាមរបៀបនេះវិញ៖ ‹ឱបិតារបស់យើងដែលនៅស្ថានសួគ៌អើយ . . .›»។ (ម៉ាថាយ ៦:៩) ពេលយើងអធិដ្ឋានទៅព្រះយេហូវ៉ា យើងមានចំណងមិត្តភាពរឹងមាំជាមួយនឹងលោក។

យើងអាចអធិដ្ឋានអំពីរឿងអ្វីក៏បាន ឲ្យតែសមស្របតាមបំណងប្រាថ្នារបស់ព្រះ។ យ៉ាងនោះ លោកនឹងធ្វើតាមសេចក្ដីអធិដ្ឋានរបស់យើង។ គម្ពីរចែងថា៖ «អ្វីក៏ដោយដែលយើងអធិដ្ឋានសុំ ដែលសមស្របតាមបំណងប្រាថ្នារបស់ព្រះ នោះព្រះនឹងស្ដាប់យើង»។ (យ៉ូហានទី១ ៥:១៤) លោកយេស៊ូបានលើកឡើងអំពីអ្វីមួយចំនួនដែលយើងគួរអធិដ្ឋាន។ (សូមអាន ម៉ាថាយ ៦:៩-១៣) ក្រៅពីអធិដ្ឋានអំពីកង្វល់ផ្ទាល់ខ្លួន យើងក៏ត្រូវអធិដ្ឋានអរគុណព្រះសម្រាប់អ្វីដែលលោកបានធ្វើចំពោះយើង និងសុំលោកឲ្យជួយអ្នកឯទៀតដែរ។

២. តើយើងគួរអធិដ្ឋានយ៉ាងដូចម្ដេច?

គម្ពីរលើកទឹកចិត្តយើងឲ្យ«ជម្រាប[ព្រះ]អំពីអ្វីទាំងអស់ដែលមាននៅក្នុងចិត្តរបស់[យើង]»។ (ចម្រៀងសរសើរព្រះ ៦២:៨) ដូច្នេះ យើងគួរអធិដ្ឋានដោយស្មោះ និងអស់ពីចិត្ត។ យើងអាចអធិដ្ឋានឮៗ ឬស្ងាត់ៗ ដោយឥរិយាបថណាដែលបង្ហាញការគោរពចំពោះព្រះ។ យើងអាចអធិដ្ឋាននៅពេលណា និងនៅកន្លែងណាក៏បាន។

៣. តើព្រះឆ្លើយតបសេចក្ដីអធិដ្ឋានរបស់យើងតាមវិធីណាខ្លះ?

ព្រះយេហូវ៉ាឆ្លើយតបតាមវិធីផ្សេងៗ។ លោកផ្ដល់គម្ពីរដែលជាបណ្ដាំរបស់លោក ហើយតាមរយៈគម្ពីរ យើងច្រើនតែរកឃើញចម្លើយចំពោះចម្ងល់របស់យើង។ ការអានគម្ពីរអាច«ធ្វើឲ្យអ្នកដែលខ្វះបទពិសោធន៍មានប្រាជ្ញា»។ (ចម្រៀងសរសើរព្រះ ១៩:៧; សូមអាន យ៉ាកុប ១:៥) ពេលយើងជួបការពិបាក លោកអាចជួយយើងឲ្យមានសេចក្ដីសុខសាន្តនៅក្នុងចិត្ត។ ម្យ៉ាងទៀត លោកអាចជំរុញចិត្តអ្នកគោរពប្រណិប័តន៍លោកឲ្យជួយយើង ពេលយើងត្រូវការជំនួយ។

បង្កើនចំណេះ

សូមពិនិត្យមើលថា តើអ្នកអាចអធិដ្ឋានយ៉ាងដូចម្ដេចដើម្បីឲ្យព្រះពេញចិត្ត? ហើយសូមស្វែងយល់ថា តើសេចក្ដីអធិដ្ឋានអាចជួយអ្នកយ៉ាងណាខ្លះ?

៤. តើព្រះចង់ឲ្យអ្នកដែលអធិដ្ឋានទៅលោកធ្វើអ្វីខ្លះ?

តើមានអ្វីខ្លះដែលធ្វើឲ្យព្រះស្ដាប់ឬមិនស្ដាប់សេចក្ដីអធិដ្ឋានរបស់យើង? លេងវីដេអូ។

វីដេអូ: តើព្រះស្ដាប់សេចក្ដីអធិដ្ឋានទាំងអស់ឬ? (ឈុតខ្លី) (២:៤២)

ព្រះយេហូវ៉ាចង់ឲ្យយើងអធិដ្ឋានទៅលោក។ សូមអាន ចម្រៀងសរសើរព្រះ ៦៥:២ រួចពិភាក្សាសំណួរដូចតទៅ៖

តើអ្នកគិតថា«ព្រះដែលស្ដាប់សេចក្ដីអធិដ្ឋាន»ចង់ឲ្យអ្នកផ្ទាល់អធិដ្ឋានទៅលោកឬទេ? ហេតុអ្វី?

បើយើងចង់ឲ្យព្រះស្ដាប់សេចក្ដីអធិដ្ឋានរបស់យើង នោះយើងត្រូវខំរស់នៅស្របតាមខ្នាតតម្រារបស់លោក។ សូមអាន មីកា ៣:៤ និងពេត្រុសទី១ ៣:១២ រួចពិភាក្សាសំណួរនេះ៖

តើយើងអាចធ្វើយ៉ាងណាដើម្បីប្រាកដថាព្រះយេហូវ៉ានឹងស្ដាប់សេចក្ដីអធិដ្ឋានរបស់យើង?

ក្នុងអំឡុងពេលធ្វើសង្គ្រាម ភាគីទាំងសងខាងប្រហែលជាអធិដ្ឋានទៅព្រះសុំជ័យជម្នះ តើជាការសមហេតុសមផលទេដែលពួកគេរំពឹងថាព្រះនឹងឲ្យពួកគេឈ្នះ?

៥. យើងគួរអធិដ្ឋានប្រាប់ពីអារម្មណ៍ពិតរបស់យើង

មនុស្សខ្លះបានត្រូវបង្រៀនឲ្យអធិដ្ឋានដោយសូត្រពាក្យដដែលៗម្ដងហើយម្ដងទៀត។ ប៉ុន្តែ តើព្រះចង់ឲ្យយើងអធិដ្ឋានដូច្នោះទៅលោកឬ? សូមអាន ម៉ាថាយ ៦:៧ រួចពិភាក្សាសំណួរនេះ៖

តើតាមរបៀបណាអ្នកអាចអធិដ្ឋានដោយមិន«ពោលពាក្យដដែលៗ»?

ក្នុងមួយថ្ងៃ អ្នកអាចគិតអំពីអ្វីពិសេសមួយដើម្បីអធិដ្ឋានអរគុណព្រះ។ បើអ្នកធ្វើដូច្នេះជារៀងរាល់ថ្ងៃក្នុងមួយសប្ដាហ៍ នោះអ្នកនឹងមានអ្វីពិសេស៧យ៉ាងដែលអ្នកបានអធិដ្ឋានអរគុណព្រះ។ ដោយធ្វើដូច្នេះ អ្នកនឹងមិននិយាយអ្វីដដែលៗទេ។

ឪពុកល្អចង់ឲ្យកូនប្រាប់គាត់អំពីអារម្មណ៍ពិត។ ដូចគ្នាដែរ ព្រះយេហូវ៉ាក៏ចង់ឲ្យយើងអធិដ្ឋានប្រាប់លោកអំពីអារម្មណ៍ពិតដែរ។

៦. សេចក្ដីអធិដ្ឋានជាការអញ្ជើញដ៏ពិសេសពីព្រះ

តើសេចក្ដីអធិដ្ឋានអាចជួយយើងយ៉ាងដូចម្ដេច ជាពិសេសពេលយើងជួបការលំបាកក្នុងជីវិត? លេងវីដេអូ។

វីដេអូ: សេចក្ដីអធិដ្ឋានជួយយើងឲ្យស៊ូទ្រាំ (១:៣២)

គម្ពីរសន្យាថាសេចក្ដីអធិដ្ឋានអាចជួយយើងឲ្យមានសេចក្ដីសុខសាន្តក្នុងចិត្ត។ សូមអាន ភីលីព ៤:៦, ៧ រួចពិភាក្សាសំណួរដូចតទៅ៖

តើសេចក្ដីអធិដ្ឋានអាចជួយយើងអ្វីខ្លះ ទោះជាបញ្ហារបស់យើងមិនបាត់ភ្លាមៗក៏ដោយ?
តើអ្នកចង់អធិដ្ឋានអំពីរឿងអ្វីខ្លះ?

តើអ្នកដឹងទេ?

ពាក្យ«អាមេន» មានន័យថា«សូមឲ្យកើតឡើង» ឬ«ពិតប្រាកដ»។ តាំងពីសម័យគម្ពីរ គេនិយាយពាក្យ«អាមេន» ពេលអធិដ្ឋានចប់។—ប្រវត្តិហេតុទី១ ១៦:៣៦

៧. សូមលៃទុកពេលអធិដ្ឋាន

ជួនកាល យើងប្រហែលជារវល់ពេករហូតដល់ភ្លេចអធិដ្ឋាន។ ចុះលោកយេស៊ូចាត់ទុកសេចក្ដីអធិដ្ឋានថាសំខាន់យ៉ាងណា? សូមអាន ម៉ាថាយ ១៤:២៣ និងម៉ាកុស ១:៣៥ រួចពិភាក្សាសំណួរដូចតទៅ៖

តើលោកយេស៊ូបានធ្វើអ្វីដើម្បីលៃទុកពេលអធិដ្ឋាន?
តើអ្នកអាចលៃទុកពេលអធិដ្ឋាននៅពេលណា?

មនុស្សខ្លះនិយាយថា៖ «ការអធិដ្ឋានគ្មានប្រយោជន៍ទេ ព្រោះព្រះមិនដែលធ្វើតាមអ្វីដែលយើងសុំឡើយ»។

តើអ្នកនឹងនិយាយយ៉ាងណា?

សេចក្ដីសង្ខេប

ពេលយើងអធិដ្ឋានស្មោះអស់ពីចិត្ត នោះជួយយើងឲ្យចូលកាន់តែជិតព្រះ ធ្វើឲ្យយើងមានសេចក្ដីសុខសាន្តក្នុងចិត្ត និងជួយយើងឲ្យមានកម្លាំងដែលយើងត្រូវការដើម្បីធ្វើអ្វីដែលព្រះយេហូវ៉ាពេញចិត្ត។