LUFUNJISHO 09

Kulomba kwi Lesa Kukosesha Bulunda Bwetu ne Aye

JIZHAI

Nanchi mukeba wa kwimutangijila mu bwikalo bwenu nyi? Abya mubena kukeba bukwasho mwa kupwishisha makatazho nyi? Nanchi mukeba muntu wakwimutekenesha nyi? Abya nanchi mukebesha kufwenya kwipi ne Yehoba nyi? Kulomba kwi Lesa kwafwainwa kwimukwasha mu bintu byonse. Ñanyi jishinda jawama kulombelamo kwi Lesa? Nanchi Lesa ukumbula milombelo yonse ilomba bantu bonse nyi? Mwafwainwa kuba byepi pa kuba’mba Lesa omvwenga milombelo yenu? Twayai twisambe bishinka bimo.

1. Twafwainwa kulomba kwi ñanyi, kabiji ñanyi bintu byo twafwainwa kulombapo?

Yesu witufunjishe’mba twafwainwa kulombatu kwi Shetu wa mwiulu kwapwa. Yesu naye walombangatu kwi Yehoba. Waambile’mba: “Byonkabyo, mwafwainwa kulombanga bino amba: ‘Tata wetu wa mwiulu . . .’” (Mateo 6:9) Kulomba kwi Yehoba, kukosesha bulunda bwetu ne aye.

Twafwainwa kulomba pa bintu byonsetu byo tukeba. Nangwa byonkabyo, pa kuba’mba Lesa akumbule milombelo yetu, twafwainwa kulomba kwesakana na kyaswa muchima wanji. Baibolo waamba’mba: “Kintu kyonse kyo twakonsha kumulomba mwayila kyaswa muchima wa [Lesa], aye witumvwa.” (1 Yoano 5:14) Yesu waambile pa bintu bimo byo twafwainwa kulombapo. (Tangai Mateo 6:9-13.) Inge tubena kulomba pa bintu byo tukeba, kechi twafwainwa kulubako kusanchilanga Lesa pa bintu byo etubila ne kulombelako bakwetu kuba’mba nabo ebakwashe ne.

2. Twafwainwa kulombanga byepi?

Baibolo witutundaika’mba ‘tubuulenga [Lesa] biji ku michima [yetu].’ (Salamo 62:8) Onkao mambo, twafwainwa kulombanga kwi Lesa kufuma panshi ya muchima. Twakonsha kulomba jiwi saka jibena kumvwanyika nangwa kulombelatu mu muchima. Kimye kyo tubena kulomba twafwainwa kumwesha mushingi kwi Yehoba. Twafwainwa kulomba kimye kyonse ne pa mpunzha paji ponse.

3. Lesa ukumbula byepi milombelo yetu?

Lesa ukumbula milombelo mu mashinda apusana pusana. Yehoba witupa Mambo anji Baibolo mo tutaana mikumbu ya mepuzho o twikala nao. Kwesakana na byaamba Salamo 19:7, kutanga Mambo a Lesa kwakonsha “[kupana] maana ku wabula maana.” (Tangai Yakoba 1:5.) Lesa wakonsha kwitupa mutende wa mu muchima inge tubena kupita mu makatazho. Kabiji wafwainwa kwingijisha bakalume banji kwitukwasha inge tubena kukeba bukwasho.

FUNJILAIPO BIKWABO

Fundai bya kulombanga milombelo itokesha Lesa ku muchima. Kabiji langulukaingapo pa milombelo byo yafwainwa kwimukwasha.

4. Lesa witupa mikambizho ya kulondela pa kulomba

Ñanyi bintu byafwainwa kulengela Lesa kukumbula milombelo yetu nangwa ne? Tambai VIDyO.

VIDYO: Nanchi Lesa Umvwa Milombelo Yonsetu Nyi?—(2:42)

Yehoba ukeba’mba tulombenga kwi aye. Tangai Salamo 65:2, ne kwisamba ano mepuzho:

Nanchi mulanguluka’mba Lesa “umvwa milombelo” ukeba’mba mulombenga kwi aye nyi? Mambo ka o mwakumbwila byobyo?

Inge tukeba Lesa amba akumbulenga milombelo yetu, twafwainwa kulondelanga mikambizho yanji. Tangai Mika 3:4; ne 1 Petelo 3:12, ne kwisamba buno bwipuzho:

Twafwainwa kuba byepi pa kuba’mba Yehoba akumbulenga milombelo yetu?

Inge kuji nkondo, bonse baya ku nkondo balomba kwi Lesa amba bakashinde bakwabo. Nanchi twafwainwa kuketekela’mba Lesa wakonsha kukumbula milombelo ya uno mutundu nyi?

5. Twafwainwa kulomba kwi Yehoba kufuma panshi ya muchima

Bantu bamo bebafunjisha kubwezhabwezhangapotu byambo bintutu bimo pa kulomba. Nanchi bino byo bikeba Lesa amba tulombenga kwi aye nyi? Tangai Mateo 6:7, ne kwisamba buno bwipuzho:

Mwafwainwa kuba byepi pa kuba’mba mubulenga kubwezhangapo byambo “bintu bimo” pa kulomba kwi Lesa?

Pa juba pa juba langulukaingapo bintu bimo byawama bimubila Yehoba ne kumusanchila. Ubainga bino kimye kyonse pa mulungu umo. Inge mwauba bino, ko kuba’mba mukalomba pa bintu 7 byapusana pusana kwa kubula kubwezhabwezhapo kulomba pa kintutu kimo.

Nsemi watemwa baana banji ukeba’mba bamubuulenga byonse biji ku muchima wabo. Kyo kimotu, ne Yehoba naye ukeba’mba atweba tumubuulenga bintu byonse biji ku muchima wetu

6. Lulombelo ke bupe bwitupa Lesa

Kulomba kwi Lesa kwafwainwa kwitukwasha byepi inge tubena kupita mu makatazho? Tambai VIDYO.

VIDYO: Lulombelo Lwitukwasha Kuchinchika Makatazho (1:32)

Baibolo witubuula’mba kulomba kwi Lesa kwitukwasha kubula kukizhamo kwikala na bijikila. Tangai Filipai 4:6, 7, ne kwisamba ano mepuzho:

Nangwa kya kuba kulomba kwi Lesa kechi kupwisha makatazho etu ne, pano kwitukwasha byepi?
Ñanyi bintu bimo byo mukebesha kulombapo kwi Lesa?

Bishinka bikwabo

Kyambo kya “amena” kilumbulula’mba “kikale byonkabyo” nangwa’mba “kya kine.” Kufumatu ne kala bantu baamba’mba “amena” inge muntu wapwisha kulomba.—1 Byambo bya Moba 16:36.

7. Ikalaingapo na kimye kya kulomba kwi Lesa

Bimye bimo tupayankana bingi kya kuba tulubako ne kulomba kwi Lesa. Bino Yesu walombanga kwi Lesa kimye kyonse. Tangai Mateo 14:23 ne Mako 1:35, ne kwisamba ano mepuzho:

Yesu waubanga byepi pa kuba’mba ekalepo na kimye kya kulomba?
Nga anweba mwafwainwa kubanga byepi pa kuba’mba mwikalengapo na kimye kya kulomba?

BANTU BAMO BAMBA’MBA: “Kulomba kwi Lesa kechi kukwasha ne. Mambo Lesa kechi ukumbula milombelo yami ne.”

Nga anweba musakwambapo’mba ka pa kino?

NANYI BISHINKA BYO MWAFUNDA?

Milombelo ifuma panshi ya muchima itukwasha kufwenya kwipi ne Lesa ne kwitukwasha kubula kukizhamo kwikala na bijikila. Kabiji lulombelo lwitukwasha kutwajijila kutokesha Yehoba ku muchima.