SUƐI LEBOLII 09

Piɛileŋ Le Tosa Ma Sɔɔŋguu Mɛlɛka Ikɛi

PILEI

Kani bɛɛ a yiyaŋ niŋ pa maa a yeema waŋndo mbo chɔm num nɛiyo o yoomoo niŋ? Baa a nɔ pa nyunalaŋ lapum la ŋ yeema ma sɔla mulioo laŋ? Baa a yeema pa kɔl dɛɛniaa ɔɔ tiindaŋndo? A yeema pa ma sɔɔŋguu Chɛhowa ikɛi kpɛɛluŋ? Piɛileŋ le nɔla mi le tosal num sɔɔŋ muŋ kpou. Kɛ vɛɛ ŋ nɔ yɛ ma piɛi? Baa Mɛlɛka yaŋ pa nilaŋ o piɛiye kpou? Yɛɛ ŋ nɔ yɛ ma tosa le mi Mɛlɛka yaŋ nilaŋ o piɛile num ndeŋ? Ŋ tofawɔ.

1. O nɛɛ lo naŋ nɔ yɛ miŋ piɛi nduyɛ, a yɛɛ okɔɔ naŋ nɔ yɛ miŋ piɛi?

Mi Chiisu pɛɛku naa maa o Finya naa cho o choo choo niŋndo lo kinɛi naŋ nɔ ni miŋ piɛi. Chiisu pila bɛɛ o Chɛhowa lo ndoo piɛi ni. Mbo dimi aa: “Te la wa piɛileŋ pɛ, la dimi aa: ‘Finya naa o choo choo niŋ . . . ’” (Maatiu 6:9) Te ŋ wa pɛ piɛileŋ o Chɛhowa lo, chaŋyɛi cho naa tɛɛŋ naa ndaa ve nɔla mii kendu poŋ.

Ŋ piɛi a nyɛ o nyɛ okɔɔ. Kɛ le mi Mɛlɛka muli piɛile naaleŋ, mɛɛ mi le chɛlaŋ a hɛnaŋ ndɔɔ. “Nyɛ o nyɛ naŋ nyuna [Mɛlɛka] pɛ mbo chɛlaŋ a hɛnaŋ ndɔɔ, nilaŋ o yaŋ naa ni.” (1 Chɔŋ 5:14) Mi Chiisu chɔm naa sɔɔŋ naŋ nɔ miŋ piɛi le muŋ ndoŋ ŋpum. (Nuawɔ Maatiu 6:9-13.) Te ŋ wa pɛ piɛileŋ o Mɛlɛka lo le bahawɛila naalaŋ, ŋ nɔ miŋ mel ndu balikaa le sɔɔŋ o tosal naa niŋ ndoŋ. Ŋ nɔ vɛlɛ miŋ piɛi le mbo mala acheleŋnda.

2. Vɛɛ naŋ nɔ yɛ miŋ piɛi?

Baabuiyo dɛɛniaa naa le miŋ ‘chɔm Mɛlɛka bala naala hawɛilaŋ kpou.’ (Sam 62:8) Lelaŋ, piɛile naaleŋ le nɔ mi le chɛŋ naa o kɔl di. Ŋ nɔla miŋ piɛi choo choo ɔɔ o kɔl niŋ. Ŋ piɛi vɛlɛ isisi, ichali ɔɔ mɛɛ o mɛɛ naŋ yeema pɛ. Nyɛ yeemaŋ suee wo cho tosaa ndi a lebɛɛ ni. Ŋ piɛi teleŋ o teleŋ a ba o ba fee.

3. Vɛɛ Mɛlɛka muli yɛ piɛile naaleŋ?

Chɛhowa muli piɛile naaleŋ o nɛila bɔɔbɔɔ niŋ. O ke naa Diom ndɔɔ Baabuiyo nduyɛ, leniŋ naŋ saaluŋ mulilaŋ le nyunala naalaŋ ni. Te ŋ wa pɛ diomndaŋ veeloo o Baabuiyo niŋ, o nɔla mbo tosa miŋ sɔla kɔl kaloo a taasioo. (Sam 19:7; nuawɔ Chemisi 1:5.) Te bahawɛilaŋ la komal naa pɛ, Mɛlɛka nɔla mbo tosa miŋ pɛŋgi buulaŋndo. Nduyɛ mbo tosa mi buɛiyaa nduaa mala naa, a teleŋ kpeekpei naŋ yeema malaa wo.

CHƆƆLU YAASIAA

Pɛɛku ma sina mɛɛ ŋ piɛi o Mɛlɛka lo mbo hini kɔl lɛ nduyɛ, ma che tɔnɔ piɛileŋ le chuu num ndo.

4. Mɛlɛka chɔm naa nyɛ naŋ nɔ miŋ tosa le mbo muli piɛile naaleŋ ndo

Yɛɛ tosa yɛ mi Mɛlɛka muli piɛile naaleŋ ɔɔ mbo kɛɛ le leŋ mulioo? Handu VIDUEIYO.

VIDUEIYO: Baa Mɛlɛka Yaŋ Pa Nilaŋ o Piɛiye Kpou?—Buŋgɛi Pɔmbɔ (2:42)

Chɛhowa yeema naa miŋ piɛi o ndu lo. Nuawɔ Sam 65:2, okoŋ mi la suukaŋ o nyunalaŋ ndaŋ choo:

A yiyaŋ pa maa “wana muli piɛileŋ ndo” yeema num ma piɛi o ndu lo? Le yɛɛ ŋ dimi yɛ lende?

Te ŋ yeema pɛ mi Mɛlɛka muli piɛile naaleŋ, mɛɛ miŋ diikuŋ sawala ndɔlaŋ. Nuawɔ Makal 3:4 a 1 Pitɛ 3:12, okoŋ mi la suukaŋ o nyunaa hoo choo:

Yɛɛ naŋ nɔ yɛ miŋ tosa te ŋ yeema pɛ mi Mɛlɛka yaŋ nilaŋ o piɛile naaleŋ?

Te chɔuwo del pɛ, mi puaa chɔuwa piɛi Mɛlɛka vellaa velle le mbo mala nda ma yem yaamɔɔwaa ndaa. A yiyaŋ pa maa Mɛlɛka nɔla mbo muli piɛile waa lende?

5. Piɛile naaleŋ le nɔ mi le chɛŋ naa o kɔl

Ma pɛɛku waŋnda apum le sondoo miŋgioo o nyɛ pilɔɔ choo teleŋ o teleŋ nda wa pɛ piɛileŋ. Kɛ baa lende pa Mɛlɛka yeema ni miŋ wa piɛileŋ o ndu lo? Nuawɔ Maatiu 6:7, okoŋ mi la suukaŋ o nyunaa hoo choo:

Yɛɛ mala yɛ num a ‘Miŋgi sondoo o diomnda pilɛlaŋ choo’ le te a wa pɛ piɛileŋ?

Lepaa o lepaa, yiyaŋ a sɔɔŋ kɛndɛŋ Chɛhowa tosal numndoŋ ipilɛ okoŋ, ma mel ndu balikaa. Wa hei tosaa lepaa o lepaa o lɔɔ bɛŋgu. Te a tosa lende pɛ, tuupa mi lɔɔ chuu, a cho piɛi a sɔɔŋ teŋgeŋ teŋgeŋ ndoŋ okɔɔ ŋɔmmɛu a miŋgi sondo o nyɛ pilɔɔ choo le.

Finya kaala po ndɔɔ wo yeema mi po ndɔɔ dimul ndu nyɛ kpeekpei cho ndu o kɔl lo te o wa pɛ suɛi o ndu lo. Lende koni Chɛhowa yeema ni miŋ dimul ndu nyɛ cho naa o kɔl lo te ŋ wa pɛ piɛileŋ o ndu lo

6. Nyɛ teŋgeŋ Mɛlɛka ke naa wo piɛileŋ le cho ni

Vɛɛ piɛileŋ le mala yɛ naa taama taama a teleŋ nyɛ kindilaa? Handu VIDUEIYO.

VIDUEIYO: Piɛileŋ le Mala Naa Miŋ Biunuŋ (1:32)

Baabuiyo dimul naa maa piɛileŋ le mala naa miŋ pɛŋgi buulaŋ bɛndoo. Nuawɔ Filipiaŋnda 4:6, 7, okoŋ mi la suukaŋ o nyunalaŋ ndaŋ choo:

Mi che bɛɛ bahawɛila naalaŋ la chuu faŋaŋ lepum le piɛileŋ te, kɛ vɛɛ le mala yɛ naa?
Sɔɔŋ kuɛɛ ŋ yeema yɛ ma piɛi a muŋ okɔɔ?

A sina pa?

Diomndo hoo “amiina” sim ni, i yɔŋnuŋ lende fɔ ɔɔ lende fɔ. O sindɔɔ niŋ, mi waŋnda ndaa dimi “amiina” o piɛileŋ mɛɛlulaŋ.—Koloniko Tasoo 16:36.

7. Nuuviaa teleŋndo le piɛileŋ

Teleŋndaŋ lapum, miŋ wa kpɔndi kpɔndi a waltaŋ miŋ puɛɛŋ le piɛileŋ. Vɛɛ Chiisu ndoo che yɛ piɛileŋ? Nuawɔ Maatiu 14:23 a Maki 1:35, okoŋ mi la suukaŋ o nyunalaŋ ndaŋ choo:

Yɛɛ Chiisu ndoo tosa yɛ le mbo nuuviaa teleŋndo le piɛileŋ?
Teleŋnda kuɛɛ ŋ yiyaŋ yɛ maa o bɛnda le piɛileŋ?

TE WAŊNDO DIMI PƐ AA: “Wana piɛi bɛɛ o Mɛlɛka lo o keleŋa muli le.”

Yɛɛ ŋ cho yɛ dimi?

SƆƆŊ KULLOŊ

Piɛile chaŋ o kɔllo niŋ di leŋ le nɔla mi le sɔɔŋguu naa Mɛlɛka ikɛi kpɛɛluŋ, mi le tosa miŋ mal buulaŋndaŋ, nduyɛ mi le luei naa yoomuaŋ le Chɛhowa kɔllo nɛŋioo.