တၢ်မၤလိ ၉
တၢ်ထုကဖၣ် ကမၤဂၢၢ်ကျၢၤထီၣ် နတၢ်ရ့လိာ်သးဒီး ကစၢ်ယွၤ
တၢ်ထုကဖၣ် မၤစၢၤနၤသ့အါမံၤလီၤ. အဒိ လၢနတၢ်အိၣ်မူအပူၤန့ၣ် ဖဲနလိၣ်ဘၣ် တၢ်ဟံးစုနဲၣ်ကျဲအခါ တၢ်ထုကဖၣ် မၤစၢၤနၤသ့. ဒီးဖဲနအဲၣ်ဒိးသ့ၣ်ညါ နတၢ်သံကွၢ် လၢအရ့ဒိၣ်တဖၣ် အတၢ်စံးဆၢအခါ တၢ်ထုကဖၣ် မၤစၢၤနၤသ့. တကးဒံးဘၣ် ဖဲနလိၣ်ဘၣ်လၢ ပှၤကမၤမုာ်ထီၣ်က့ၤနသး ဒီးဟ့ၣ်ဂံၢ်ဟ့ၣ်ဘါနၤအခါ တၢ်ထုကဖၣ်မၤစၢၤနၤသ့. ဒီးတၢ်ထုကဖၣ် မၤစၢၤနၤလၢ နမၤဂၢၢ်ကျၢၤထီၣ် နတၢ်ရ့လိာ်သးဒီး ယဟိဝၤယွၤ သ့စ့ၢ်ကီးလီၤ. ဘၣ်ဆၣ် နကဆိကမိၣ်ဘၣ်လၢ ပကဘၣ် ဃ့ထုကဖၣ် ဒ်လဲၣ်. မ့ၢ်ကစၢ်ယွၤ ဒိကနၣ် ပှၤကိးဂၤဒဲး အတၢ်ထုကဖၣ်ဧါ. ဒ်သိးကစၢ်ယွၤ ကဒိကနၣ် နတၢ်ထုကဖၣ်အဂီၢ် နကဘၣ်မၤဒ်လဲၣ်. ခဲအံၤ ပကမၤလိသကိး.
၁. ပကဘၣ်ဃ့ထုကဖၣ် လၢမတဂၤအအိၣ်လဲၣ် ဒီးပကဘၣ်ဃ့ မနုၤလဲၣ်.
ယ့ၣ်ၡူး သိၣ်လိဝဲလၢ ပကဘၣ်ဃ့ထုကဖၣ် ထဲလၢ ပပၢ်အိၣ်လၢမူခိၣ်အအိၣ်. ယ့ၣ်ၡူး အနီၢ်ကစၢ်ဒၣ်ဝဲ ဃ့ထုကဖၣ် လၢယဟိဝၤယွၤအအိၣ်. ဒီးယ့ၣ်ၡူးတဲဝဲလၢ “သုကဘၣ်ဃ့ထုကဖၣ်တၢ် ဒ်အံၤလီၤ.” ‘ပပၢ်အိၣ်လၢမူခိၣ်ဧၢ . . . ’ (မးသဲ ၆:၉) အဃိ ဖဲပဃ့ထုကဖၣ် လၢယဟိဝၤယွၤ အအိၣ်အခါ မ့ၢ်ဝဲ ပမၤဂၢၢ်ကျၢၤထီၣ် ပတၢ်ရ့လိာ်သးဒီးအီၤလီၤ.
ဖဲပဃ့ထုကဖၣ်အခါ ပဃ့တၢ် တမံၤဂ့ၤတမံၤဂ့ၤသ့. ဘၣ်ဆၣ် ဒ်သိးကစၢ်ယွၤ ကစံးဆၢ ပတၢ်ထုကဖၣ်အဂီၢ် တၢ်လၢပဃ့တဖၣ်န့ၣ် ကဘၣ်မ့ၢ်ဝဲ ဒ်ကစၢ်ယွၤအတၢ်ဘၣ်သး အသိးလီၤ. ဒီး “ပမ့ၢ်ဃ့တၢ် တမံၤဂ့ၤတမံၤဂ့ၤ ဒ်အတၢ်ဘၣ်သးအသိးန့ၣ် [ကစၢ်ယွၤ] ကဒိကနၣ်ပှၤ.” (၁ ယိၤဟၣ် ၅:၁၄) တကးဒံးဘၣ် ပကဘၣ်ဃ့ထုကဖၣ်ဒ်လဲၣ်န့ၣ် ယ့ၣ်ၡူးသိၣ်လိပှၤ. (ဖး မးသဲ ၆:၉-၁၃.) ဖဲပဃ့ထုကဖၣ်အခါ ပဃ့လၢ ပနီၢ်ကစၢ် အတၢ်လိၣ်ဘၣ်အဂီၢ် တကးဒံးဘၣ် ပကဘၣ်စံးဘျုး ကစၢ်ယွၤလၢ တၢ်လၢအမၤန့ၢ်ပှၤတဖၣ် ဒီးပဃ့န့ၢ်တၢ်လၢ ပှၤဂၤအဂီၢ်သ့စ့ၢ်ကီး.
၂. ပကဘၣ် ဃ့ထုကဖၣ် ဒ်လဲၣ်.
လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ ပက ‘တဲဖျါထီၣ် ပတၢ်တူၢ်ဘၣ်ခဲလၢာ် လၢကစၢ်ယွၤအအိၣ်.’ (စံးထီၣ်ပတြၢၤ ၆၂:၈) အဃိ ဖဲပဃ့ထုကဖၣ်အခါ ပကဘၣ်တဲဖျါထီၣ် တၢ်အိၣ်လၢပသးပူၤနီၢ်ကီၢ်. ပဃ့ထုကဖၣ် လၢပကလုၢ်ဒိၣ်ဒိၣ် မ့တမ့ၢ် ပဃ့ထုကဖၣ်တၢ် လၢပသးပူၤသ့. ဒီးပမ့ၢ်အိၣ်လၢ တၢ်လီၢ်တပူၤဂ့ၤတပူၤဂ့ၤ ပဃ့ထုကဖၣ်သ့ ကိးဆၢကတီၢ်ဒဲးလီၤ. ဖဲပဃ့ထုကဖၣ်အခါ ပချံးလီၤပခီၣ်, ပဆ့ၣ်နီၤ မ့တမ့ၢ် ပဆၢထၢၣ်သ့. ဘၣ်ဆၣ် တၢ်လၢအရ့ဒိၣ်ကတၢၢ်န့ၣ် ပကဘၣ်ဃ့ထုကဖၣ်လၢ ယဟိဝၤယွၤအအိၣ် လၢတၢ်ပာ်ကဲအပူၤ.
၃. ကစၢ်ယွၤ စံးဆၢပတၢ်ထုကဖၣ် ဒ်လဲၣ်.
ကစၢ်ယွၤ စံးဆၢပတၢ်ထုကဖၣ် လၢကျဲအါဘိ. ယဟိဝၤယွၤ ဟ့ၣ်လီၤပှၤ အကလုၢ်ကထါ လံာ်စီဆှံ ဒီးညီနုၢ်န့ၣ် ပတၢ်သံကွၢ်တဖၣ် အတၢ်စံးဆၢန့ၣ် ပထံၣ်န့ၢ်အီၤ လၢလံာ်စီဆှံအပူၤလီၤ. ကစၢ်ယွၤ အကလုၢ်ကထါန့ၣ် “ဒုးကူၣ်သ့ ပှၤလၢအတၢ်လဲၤခီဖျိ တအိၣ်ဘၣ်.” (စံးထီၣ်ပတြၢၤ ၁၉:၇; ဖး ယၤကိာ် ၁:၅.) အဃိ ဖဲပထံၣ်ဘၣ် တၢ်ကီတၢ်ခဲတဖၣ်အခါ ကစၢ်ယွၤ ကမၤစၢၤပှၤဒ်သိး ပကပာ်ပသး မုာ်မုာ်ခုၣ်ခုၣ်. ဒီးဖဲပလိၣ်ဘၣ် တၢ်မၤစၢၤနီၢ်ကီၢ်အခါ ကစၢ်ယွၤ ကသူဝဲအခ့အပှၤတဖၣ် လၢကမၤစၢၤပှၤ.
ဃုသ့ၣ်ညါအါထီၣ်
ခဲအံၤ ပကတဲသကိး ဘၣ်ဃးဒီး နဃ့ထုကဖၣ် ဒ်တၢ်ဘၣ်ကစၢ်ယွၤအသး ကသ့ဒ်လဲၣ်. ဒီးတၢ်ထုကဖၣ် မၤစၢၤနၤ ကသ့ဒ်လဲၣ်.
၄. တၢ်ဃ့ထုကဖၣ် လၢကစၢ်ယွၤဒိကနၣ်ဝဲ
ကစၢ်ယွၤ ဒိကနၣ် ပတၢ်ထုကဖၣ်ဧါ တဒိကနၣ်ဘၣ်ဧါန့ၣ် ဒိးသန့ၤထီၣ်သးလၢ တၢ်ဂ့ၢ်မနုၤလဲၣ်. ကွၢ်တၢ်ဂီၤမူ.
ယဟိဝၤယွၤ အဲၣ်ဒိးလၢ ပကဃ့ထုကဖၣ် လၢအအိၣ်လီၤ. ဖး စံးထီၣ်ပတြၢၤ ၆၅:၂ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
-
မ့ၢ်နဆိကမိၣ် “ပှၤလၢအဒိကနၣ် တၢ်ထုကဖၣ်တဂၤ” န့ၣ်အဲၣ်ဒိးလၢ နကဃ့ထုကဖၣ် လၢအအိၣ်ဧါ. ဘၣ်မနုၤအဃိ နဆိကမိၣ်ဒ်န့ၣ်လဲၣ်.
ပမ့ၢ်အဲၣ်ဒိးလၢ ကစၢ်ယွၤကဒိကနၣ် ပတၢ်ထုကဖၣ်န့ၣ် ပကဘၣ်ဂုာ်ကျဲးစၢး အိၣ်မူဒ် အတၢ်သိၣ်တၢ်သီ အိၣ်ဝဲအသိး. ဖး မံကၤ ၃:၄ ဒီး ၁ ပ့းတရူး ၃:၁၂ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
ဒ်သိး ယဟိဝၤယွၤ ကဒိကနၣ် ပတၢ်ထုကဖၣ်အဂီၢ် ပကဘၣ်မၤမနုၤလဲၣ်.
ပှၤသုးဖိခံဖုလၢာ်န့ၣ် တချုးလၢ အဝဲသ့ၣ် ဒုးလိာ်အသးဒံးဘၣ်အခါ အဝဲသ့ၣ် ဃ့ထုကဖၣ်တၢ်. မ့ၢ်ကစၢ်ယွၤ ကစံးဆၢ အဝဲသ့ၣ် အတၢ်ဃ့ထုကဖၣ်ဧါ.
၅. ဖဲပဃ့ထုကဖၣ်အခါ ပကဘၣ်တဲယဟိဝၤယွၤ တၢ်အိၣ်လၢပသးပူၤနီၢ်ကီၢ်
ပှၤတနီၤန့ၣ် ပှၤသိၣ်လိ အဝဲသ့ၣ်လၢ အကရူးတိၢ်သံဝဲ တၢ်ဃ့ထုကဖၣ်. ဘၣ်ဆၣ် ကစၢ်ယွၤ အဲၣ်ဒိးလၢ ပမၤဒ်န့ၣ်ဧါ. ဖး မးသဲ ၆:၇ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
ဖဲနဃ့ထုကဖၣ်တၢ်အခါ ဒ်သိး နသုတတဲဝံၤတဲက့ၤ တၢ်ကတိၤအလီၢ်လီၢ် တဂ့ၤအဂီၢ် နဘၣ်မၤဒ်လဲၣ်.
တနံၤဘၣ်တနံၤန့ၣ် ဆိကမိၣ်ထီၣ် တၢ်ဂ့ၢ်လီၤလီၤဆီဆီ တမံၤမံၤ လၢနအဲၣ်ဒိးစံးဘျုး ယဟိဝၤယွၤ. မၤဒ်အံၤ ကိးနံၤဒဲး ဒီးလၢနွံသီအတီၢ်ပူၤန့ၣ် နကဃ့ထုကဖၣ် ဘၣ်ဃးဒီး တၢ်ဂ့ၢ်နွံမံၤ အဃိ နတတဲဝံၤတဲက့ၤ တၢ်ကတိၤအလီၢ်လီၢ်ဘၣ်.
ပါလၢအဂ့ၤတဂၤန့ၣ် အဲၣ်ဒိးဝဲလၢ အဖိကတဲဘၣ်အီၤ တၢ်လၢအဖိတူၢ်ဘၣ်ဝဲတဖၣ်. ဒ်န့ၣ်အသိး ဖဲပဃ့ထုကဖၣ်အခါ ယဟိဝၤယွၤ အဲၣ်ဒိးဝဲလၢ ပတဲဘၣ်အီၤ တၢ်လၢပတူၢ်ဘၣ်တဖၣ်
၆. တၢ်ဃ့ထုကဖၣ်န့ၣ် မ့ၢ်ဝဲ ကစၢ်ယွၤ အတၢ်ဟ့ၣ်တခါ
ဖဲပထံၣ်ဘၣ် တၢ်ကီတၢ်ခဲအခါ တၢ်ဃ့ထုကဖၣ် မၤစၢၤပှၤသ့ဒ်လဲၣ်. ကွၢ်တၢ်ဂီၤမူ.
လံာ်စီဆှံအၢၣ်လီၤပှၤလၢ တၢ်ဃ့ထုကဖၣ်န့ၣ် ကမၤစၢၤပှၤ ဒ်သိး ပကပာ်ပသး မုာ်မုာ်ခုၣ်ခုၣ်. ဖး ဖံလံးပံၤ ၄:၆, ၇ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
-
တၢ်ဃ့ထုကဖၣ်န့ၣ် တမၤလီၤမၢ်ကွံာ် ပတၢ်ကီတၢ်ခဲထီဘိဘၣ်, ဘၣ်ဆၣ် အမၤစၢၤပှၤဒ်လဲၣ်.
-
ဖဲနဃ့ထုကဖၣ်အခါ နအဲၣ်ဒိးဃ့ မနုၤလဲၣ်.
မ့ၢ်နသ့ၣ်ညါဧါ
တၢ်ကတိၤ “အၤမ့ၣ်” န့ၣ်အခီပညီမ့ၢ်ဝဲ “သပှၢ်တၢၢ်” မ့တမ့ၢ် “မ်တၢ်မၤအသး ဒ်န့ၣ်တက့ၢ်.” စးထီၣ်လၢ လံာ်စီဆှံအစိၤ တုၤလၢခဲအံၤ ပှၤဃ့ထုကဖၣ်တၢ်မ့ၢ်ဝံၤန့ၣ် ပှၤတဲဝဲ “အၤမ့ၣ်.”—၁ ကွဲးနီၣ်တၢ် ၁၆:၃၆.
၇. ဟံးန့ၢ်တၢ်ဆၢကတီၢ် လၢနကဃ့ထုကဖၣ်
တဘျီတခီၣ် ပတၢ်မၤအါတလၢအဃိ ပသးပ့ၤနီၣ်ဃ့ထုကဖၣ်. တၢ်ဃ့ ထုကဖၣ်န့ၣ် အရ့ဒိၣ်လၢ ယ့ၣ်ၡူးအဂီၢ်ထဲလဲၣ်. ဖး မးသဲ ၁၄:၂၃ ဒီး မၢ်ကူး ၁:၃၅ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
-
ဒ်သိး ယ့ၣ်ၡူးကအိၣ်ဒီး တၢ်ဆၢကတီၢ် လၢအကဃ့ထုကဖၣ်တၢ်အဂီၢ် အဝဲမၤဝဲဒ်လဲၣ်.
-
ဒ်သိး နကဃ့ထုကဖၣ်တၢ်အဂီၢ် နဟံးန့ၢ်တၢ်ဆၢကတီၢ် သ့လၢအခါဖဲလဲၣ်.
ပှၤတနီၤတဲဝဲလၢ– “တၢ်ဃ့ထုကဖၣ်န့ၣ် အတမၤစၢၤနၤဘၣ်. အိၣ်ဒၣ် အမၤမုာ်ထီၣ်က့ၤနၤ တစိၢ်ဖိလီၤ.”
-
မ့မ့ၢ်နၤမီၤ နကတဲဒ်လဲၣ်.
တၢ်ဂ့ၢ်လၢအရ့ဒိၣ်
ပမ့ၢ်ဃ့ထုကဖၣ် လၢပသးဒီဖျၢၣ်န့ၣ် အမၤစၢၤပှၤလၢ ပကဘူးဒိၣ်ထီၣ်ဒီး ကစၢ်ယွၤ, အဟ့ၣ်ပှၤ တၢ်သူၣ်မံသးမုာ် ဒီးအဟ့ၣ်ပှၤ တၢ်ဂံၢ်တၢ်ဘါလၢပလိၣ်ဘၣ် ဒ်သိးပကမၤတၢ်ဘၣ် ယဟိဝၤယွၤအသး.
တၢ်ကွၢ်ကဒါက့ၤ
-
ပကဘၣ် ဃ့ထုကဖၣ် လၢမတဂၤအအိၣ်လဲၣ်.
-
ပကဘၣ် ဃ့ထုကဖၣ် ဒ်လဲၣ်.
-
တၢ်ဃ့ထုကဖၣ်န့ၣ် မၤစၢၤပှၤဒ်လဲၣ်.
ဃုသ့ၣ်ညါ
ဖးကွၢ် တၢ်စံးဆၢ လၢအဘၣ်ဃးဒီး တၢ်သံကွၢ်လၢ ပှၤအါဂၤသံကွၢ်ဝဲ ဘၣ်ဃးဒီး တၢ်ဃ့ထုကဖၣ်အဂ့ၢ်.
“တၢ်ဂ့ၢ်နွံခါလၢ နကြၢးသ့ၣ်ညါ ဘၣ်ဃးဒီးတၢ်ထုကဖၣ်” (တၢးထီခိးတၢ်, လါအီးကထိဘၢၣ် ၁, ၂၀၁၀)
ဘၣ်မနုၤအဃိ ပဘၣ်ဃ့ထုကဖၣ်လဲၣ် ဒီးပမၤဂ့ၤထီၣ် ပတၢ်ထုကဖၣ် ကသ့ဒ်လဲၣ်.
“ဘၣ်မနုၤအဃိ ယကြၢးဃ့ထုကဖၣ်လဲၣ်” (တၢ်မၤလိလၢ အအိၣ်လၢ online အဖီခိၣ်)
လံာ်စီဆှံ သိၣ်လိဝဲလၢ ပကြၢးဃ့ထုကဖၣ် လၢမတဂၤအအိၣ်လဲၣ်န့ၣ် မၤလိကွၢ်.
“ပကြၢးဃ့ထုကဖၣ်လၢ ပှၤစီဆှံအအိၣ်ဧါ” (တၢ်မၤလိလၢ အအိၣ်လၢ online အဖီခိၣ်)
တၢ်သးဝံၣ်တခါအံၤန့ၣ် ပာ်ဖျါထီၣ်ဝဲလၢ ပဃ့ထုကဖၣ်သ့ ကိးဆၢကတီၢ်ဒဲး ဒီးလၢတၢ်လီၢ်ကိးပူၤဒဲး.
တၢ်ဂ့ၤအဂၤလၢ နကဘၣ်သး
တၢ်သံကွၢ်လၢ ညီနုၢ်ပှၤသံကွၢ်တဖၣ်
ယဟိဝၤပှၤအုၣ်အသးတဖၣ် မၤလိလံာ်စီဆှံဒီးပှၤဂၤန့ၣ် မ့ၢ်မနုၤလဲၣ်
ယဟိဝၤပှၤအုၣ်အသးတဖၣ် ကွဲးမုာ်ပှၤဂၤလၢ ကမၤလိလံာ်စီဆှံ အတၢ်ရဲၣ်တၢ်ကျဲၤလၢ တလိၣ်ဟ့ၣ်အပှ့ၤဘၣ်န့ၣ် နသူ လံာ်စီဆှံလၢ နဘၣ်သးအီၤ တဘ့ၣ်ဘ့ၣ်သ့လီၤ. နကွဲမုာ် နဟံၣ်ဖိဃီဖိ ဒီးနတံၤသကိးတဖၣ်သ့လီၤ.
