DILONGI 09

Pusana penepene ya Nzambi na nzila ya kisambu

KUWA NA

Nge kekanisaka ti nge kele na nsatu ya lutuadusu na luzingu na nge? Nge kele na biuvu ya mfunu yina nge kezolaka kubakila bamvutu? Nge kele na nsatu ya lukindusu? Nge kesepelaka kupusana penepene ya Yehova? Kisambu lenda sadisa nge nge sala mambu nionso yina. Kasi yinki kele mutindu ya mbote ya kusambila? Nzambi kekuwaka bisambu nionso? Yinki nge lenda sala samu nge kukindimisa ti yandi kekuwa bisambu na nge? Beto tadila yau.

1. Nani beto fueti sambila, mpe yinki mambu beto lenda tula na bisambu na beto?

Yesu longaka beto ti beto fueti sambila kaka Tata na beto yina kele na dizulu. Yesu yandi mosi diaka vuandaka sambila Yehova. Yandi tubaka: “Na yau, beno fueti sambila mutindu yayi: ‘Tata na beto yina kele na dizulu . . .’” (Matayo 6:9) Ntangu beto kesambilaka Yehova, beto kekumisaka kinkundi na beto ngolo na yandi.

Beto lenda sambila samu na konso diambu. Ya kedika, samu Nzambi pesa mvutu na bisambu na beto, bisambu na beto fueti vuanda na nguizani na luzolo na yandi. ‘Konso kima yina beto kelomba na nguizani na luzolo na yandi [Nzambi], yandi kekuwa beto.’ (1 Yoane 5:14) Yesu pesaka bifuani ya mbote samu na mambu yina beto fueti tula na bisambu. (Tanga Matayo 6:9-13.) Katula kusambila samu na mambu yina metadila beto mosi, beto fueti zimbakana ve kupesa Yehova matondo samu na mambu yina yandi salaka samu na beto mpe kulomba yandi yandi sadisa bantu yankaka.

2. Yinki mutindu beto fueti sambila?

Biblia kena kukindisa beto na ‘kudukula bantima na beto na ntuala ya [Nzambi].’ (Nkunga 62:8) Na yau bisambu na beto fueti vuanda ya puelele mpe yina mekatuka na ntima. Beto lenda sambila na ndinga ya ngolo to na yinsi ya ntima mpe na konso pozision yina kena kumonisa ti beto kele na luzitu na Yehova. Beto lenda sambila konso ntangu mpe konso kisika.

3. Yinki mutindu Nzambi kepesaka mvutu na bisambu na beto?

Yandi kesalaka yau na mutindu mingi. Yehova pesaka beto Mpova na yandi, Biblia, kuna beto kemonaka mbala mingi bamvutu ya biuvu na beto. Kutanga Mpova ya Nzambi lenda ‘[kumisa] muntu yina mekondua nduenga muntu ya nduenga.’ (Nkunga 19:7; tanga Yakobo 1:5.) Yandi lenda pesa beto kiyenge na makanisi ntangu beto kena kukutana na bampasi. Mpe yandi lenda tinda bisadi na yandi basadisa beto ntangu beto kele mpenza na nsatu ya lusadusu.

KOTA NA MPINDA

Tala mutindu nge lenda sala bisambu yina kesepedisaka Nzambi yina mekatuka na ntima, mpe tala mutindu kisambu lenda natina nge mambote.

4. Mambu yina kesalaka ti Nzambi ndima bisambu na beto to ve

Yinki mambu kesalaka ti Nzambi ndima bisambu na beto to ve? Tula VIDEO.

VIDEO: Nzambi kekuwaka bisambu nionso?—Video ya nkufi (2:42)

Yehova zola beto sambila yandi. Tanga Nkunga 65:2, mpe na manima tadila biuvu yayi:

Nge mekanisa ti ‘Muntu yina kekuwaka kisambu’ zola ti nge sambila yandi? Samu na yinki? Sasila mvutu na nge.

Beto fueti sala ngolo samu luzingu na beto vuanda na nguizani na bansikudukusu ya Nzambi kana beto zola yandi kuwa bisambu na beto. Tanga Mika 3:4 mpe 1 Piere 3:12, mpe na manima tadila kiuvu yayi:

Yinki mutindu beto lenda kukindimisa ti Yehova kekuwa bisambu na beto?

Na ntangu ya mvita, bandambu nionso zole yina kena kunuana lenda sambila samu na kununga. Yakele mbote kukanisa ti Nzambi kepesa mvutu na bisambu?

5. Bisambu na beto fueti katuka na ntima

Bantu yankaka kesalaka bisambu na kuvutukilaka bampova kaka mosi. Kasi mutindu yina nde Nzambi zola beto sambila yandi? Tanga Matayo 6:7, mpe na manima tadila kiuvu yayi:

Yinki mutindu nge lenda ‘kuvutukila ve mambu ya mutindu mosi mbala na mbala’ na bisambu na nge?

Konso kilumbu, nge lenda kanisa samu na lusakumunu nionso na luzingu na nge mpe pesa Yehova matondo samu na lusakumunu yango. Sala yau konso kilumbu na sabala, mpe nge kebanda kusambila samu na mambu kukondua kuvutukila kaka bampova mosi.

Tata ya mbote kezolaka muana na yandi tubila yandi mambu yina kena kukatuka na ntima. Mutindu mosi mpe, Yehova zola ti beto sambila yandi na ntima ya mvimba

6. Kisambu kele dikabu yina mekatuka na Nzambi

Yinki mutindu kisambu lenda pesa beto ngolo, yavuanda na ntangu ya mbote mpe na ntangu ya mpasi? Tula VIDEO.

VIDEO: Kisambu kesadisaka beto samu beto kanga ntima (1:32)

Biblia melaka ti kisambu lenda sadisa beto baka kiyenge ya makanisi. Tanga Bafilipi 4:6, 7, mpe na manima tadila biuvu yayi melanda:

Atako kisambu kemanisaka ntangu nionso ve bampasi na beto, kasi yinki mutindu yakesadisaka beto?
Yinki mambu nge lenda tula na kisambu?

Nge zabaka yau?

Mpova “amen” zola monisa “Yavuanda mutindu yina” to “Yau nde.” Banda ntama mpova, “amen” kesaduluaka na nsuka ya kisambu.—1 Bansangu 16:36.

7. Kuzimbakanaka ve kusambila

Mbala yankaka beto lenda vuanda na mambu mingi ya kusala yau lenda sala ti beto zimbakana kusambila. Yinki mutindu kisambu vuandaka na mfunu samu na Yesu? Tanga Matayo 14:23 mpe Marko 1:35, mpe na manima tadila biuvu yayi:

Yinki Yesu vuandaka sala samu yandi zimbakana ve kusambila?
Yinki ntangu nge kemonaka mbote samu na kusambila?

BANTU YANKAKA METUBA: “Kisambu kele kulutisa ntangu, samu muntu mosi ve kekuwa nge.”

Yinki nge lenda tuba?

BUNKUFI

Bisambu ya puelele kesalaka ti beto pusana penepene ya Yehova, yakepesaka beto kiyenge ya makanisi, mpe yakepesaka beto ngolo yina beto kele na yau nsatu samu na kusepedisa Yehova.