KILESO 09
Kuma pene-pene ya Nzambi na nzila ya lusambu
Lusambu lenda sadisa nge na bafaso mingi. Na kifwani, ya lenda sadisa nge ntangu nge me zaba ve yinki ya kusala mpe nge ke na nsatu ba twadisa nge. Lusambu lenda sadisa nge ntangu nge ke na sosá bamvutu na byuvu ya nge. Ya lenda sadisa nge na kuzwa ngolo na bantangu ya mpasi. Ya lenda sadisa mpe nge na kukuma pene-pene na Yehova. Kasi nge lenda yufula: ‘Wapi yina ke faso ya mbote ya kusambila? Nzambi ke kuwá kwandi balusambu ya bantu nyonso? Yinki mu lenda sala samu Nzambi kuwa balusambu ya munu?’ Kileso yayi ke pesa nge bamvutu.
1. Nani beto me bonga kusambila mpe samu na wapi mambu beto lenda sambila?
Yesu longá beto na kusambila kaka Tata ya beto ya mazulu. Yandi mosi mpe vandá sambilá kaka Yehova. Yandi zonzaka: “Beno fwana kusambila mutindu yayi: ‘Tata ya beto yina kele na mazulu . . .’” (Matayi 6:9) Kusambila kaka Yehova ke faso ya mbote ya kukulisa kindiku ya beto na yandi.
Beto lenda sambila samu na bamambu nyonso. Kasi, samu Nzambi kuwa beto, balusambu ya beto me bonga kuvanda faso yandi ke zolá. “Beto zaba ti [Nzambi] ke kuwaka beto kana beto lomba yandi kima yina kele ya kudedama na luzolo ya yandi.” (1 Yoane 5:14) Yesu zonzilá bifwani ya bamambu yina beto lenda lomba na Nzambi. (Tanga Matayi 6:9-13.) Beto lenda sambila samu na bamambu ya beto mosi, samu na kuvutula matondo na Nzambi, mpe samu yandi sadisa bampangi ya nkaka.
2. Wa’ faso beto me bonga kusambila?
Biblia ke lombá na beto na ’kufungula bantima ya beto na mantwala ya Nzambi.’ (Nkunga 62:8) Na yawu, balusambu ya beto me bonga kukatuka na ntima. Beto lenda basisa ndinga ntangu beto ke sambilá to beto lenda sambila na yinsi ya ntima. Ntangu beto ke sambilá, beto lenda vanda ya kufukama, ya kutelama, to ya kuvanda. Kasi yina ke ya kulutila mfunu, ni kusambila Yehova na buzitu nyonso. Beto lenda sambila na kisika mpe na ntangu yina beto me zola.
3. Wa’ faso Nzambi ke pesá bamvutu na balusambu ya beto?
Yandi ke pesá bamvutu na bafaso mingi. Na nzila ya Biblia, Yehova lenda pesa beto bamvutu. Kutanga Biblia lenda “kumisa mayela muntu yina me kondwa mayela.” (Nkunga 19:7; Tanga Zaki 1:5.) Mpe Yehova lenda pesa beto kizunu ya ntima ntangu beto ke bwabaná na bamambu ya mpasi. Dyaka yandi lenda twadisa bisadi ya yandi samu ba sadisa beto.
SOSA KUZABA MBOTE-MBOTE
Tala wa’ faso balusambu ya nge lenda sepelisa Nzambi mpe bambote yina nge lenda kuzwa ntangu nge ke sambilaka.
4. Yinki beto me bonga kusala samu Nzambi kuwa balusambu ya beto
Yinki lenda sala ti Nzambi kuwa to ve balusambu ya beto? Tala VIDEO.
Yehova me zola ti beto sambila yandi. Tanga Nkunga 65:2, mpe na manima beto zonzila byuvu yayi:
-
Nge me kanisa ti “Muntu yina ke kuwaka lusambu” me zola ti nge sambila yandi? Samu na yinki nge me zonza faso yina?
Samu Nzambi kuwa balusambu ya beto, beto me bonga kusala bangolo samu na kusadila misiku ya yandi. Tanga Mika 3:4 na 1 Piere 3:12, mpe na manina beto zonzila kyuvu yayi:
-
Yinki beto zolá sala samu Yehova kuwa balusambu ya beto?
Ntangu bantu ke kwendá na kunwana, bakote nyonso zole ke sambilá ti Nzambi sadisa bawu. Kasi samu na nge, Nzambi lenda pesa kwandi bamvutu na balusambu ya faso yayi?
5. Balusambu ya beto zolá katuka na ntima
Bantu ya nkaka ke longokaka balusambu na ntima mpe ke vutukilá yawu bambala mingi. Kasi ni faso yina kwandi Nzambi zola ti beto sambila yandi? Tanga Matayi 6:7 (nwt-MK), mpe na manima beto zonzila kyuvu yayi:
-
Na balusambu ya beto, yinki beto lenda sala samu na “kuvutukila ve mambu ya mutindu mosi mbala na mbala”?
Kana bilumbu nyonso nge ke na mambu ya malu-malu ya kuvutula matondo na Yehova, na nsuka ya semaine nge ke sambila samu na bamambu 7. Na yawu, nge ke vutukila ve mambu mosi bambala mingi.
Tata ya mbote ke zolá ti mwana ya yandi zonzila yandi mambu yina ke na yandi na ntima. Faso mosi mpe, Yehova zola ti ntangu beto ke sambilá, beto zonzila yandi bamambu yina ke katukaka na ntima ya beto
6. Lusambu kele dikabu mosi ya nene yina Nzambi me pesa beto
Wa’ faso lusambu lenda sadisa beto ata na bantangu ya mpasi? Tala VIDEO.
Biblia me zonza ti lusambu lenda sadisa beto na kuzwa kizunu ya ntima. Tanga Bafilipi 4:6, 7, mpe na manima beto zonzila byuvu yayi:
-
Ata lusambu lendá manisa ve bamambu yina ke na beto, wa’ faso ya lenda sadisa beto?
-
Samu na wapi mambu nge lenda sambila?
Nge me zaba yawu?
“Amen” zola zonza “mu me ndima yawu” to “ni mutindu yina.” Kubanda ntangu ba vandá sonika Biblia, bantu vandá zonzá “amen” na nsuka ya lusambu.—1 Bansangu 16:36.
7. Kuzimbana ve na kusambila
Beto lenda zimbana na kusala lusambu ntangu beto ke vandá na bamambu mingi ya kusala. Wa’ faso Yesu lakisá ti lusambu vandá mfunu na meso ya yandi? Tanga Matayi 14:23 na Marke 1:35, mpe na manima beto zonzila byuvu yayi:
-
Yinki Yesu vandá sala samu na kuzwa ntangu ya kusambila?
-
Na wapi ntangu nge lenda sambila?
BANTU YA NKAKA KE ZONZAKA: “Banda ntama mu ke sambilá samu na bamambu yayi, kasi ya ke manisaka ve.”
-
Nge me kanisa yinki?
NA BUNKUFI
Balusambu yina ke katukaka na ntima ke kulisá kindiku ya beto na Nzambi, ke pesá beto kizunu ya ntima, mpe ngolo samu na kusadila misiku ya Yehova.
Mambu ya kusimba
-
Nani beto me bonga kusambila?
-
Wa’ faso beto me bonga kusambila?
-
Wapi bambote beto lenda kuzwa ntangu beto ke sambilaka?
SOSA KUZABA DYAKA
Tala bamvutu na byuvu yina bantu mingi ke yufulá na yina me tadila lusambu.
“ Sept choses à savoir sur la prière ” (La Tour de Garde, 1er Octobre 2010)
Tala samu na yinki ya ke mbote na kusambila, mpe tala faso ya kubongisa balusambu ya beto.
“Samu na yinki mu me bonga kusambila?” (Tanga yawu na jw.org)
Tala nani Biblia me zonza na beto na kusambila.
“Mu me bonga kusambila kwandi basantu?” (Tanga yawu na jw.org)
Tala na nzimbu yayi ti kisika mpe ntangu ya kusambila ke ve mfunu.
