ISAMBILILO 09

Palamineni Kuli BaLesa Ukupitila mwi Tembelo

LISHENI

Kani mulapengela uwakumofweniko pakweba’ti musalululepo bwino pa fintu? Kani muli ne fyakwipushe’ficindeme, ifi mufwaisha ukwishibe’fyasuko? Kani mulapengela ukumusangalasheni ili muli ne makatasho? Kani mulafwaya ukupalamina makosa kuli baYawe? Itembelo lingamofweniko muli fyonse’fi twalabilapo. Kani baLesa balakutika ku matembelo onse lukoso? Findo mwelelwe ukucita pakweba’ti baLesa balukukutika ku matembelo enu? Nga tubone ifi tungasuke’fi ifyakwipusha.

1. Ni kuli bani twelelwe ukutembela kabili findo tungatembelelapo?

BaYesu balisambishe’ti tulyelelwe ukutembela lukoso kuli baWishifwe ba kwiulu. BaYesu nabo balukutembela kuli baYawe. Balilabile ati: “Mulukutembela ifi, ati: ‘Mwe baWishifwe aba kwiulu . . . ’” (Matayo 6:9) Ili tulukutembela kuli baYawe, tulakosha bucibusa bwesu na bo.

Tungatembelela pa fintu ifili fyonse lukoso. Nangabe’fyo, baLesa balaasuka lukoso amatembelo esu kani aelelwa ne kufwaya kwabo. Baibolo ilalabila’ti: “Kani tulombe’cintu koti kufwaya kwabo, [baLesa] balatumfwa.” (1 Yoane 5:14) BaYesu balilabile pa fintu ifingelelwa ukutembelelapo. (Pendeni Matayo 6:9-13.) Ili tulukutembela kuli baLesa pali fyefyo tulukufwaya, tatwelelwepo ukulubako ukubatoota pali fyefyo batucitila, eli ne kubalomba’ti balukofwako abantu bambi.

2. Kani tulyelelwe ukutembela shani?

Baibolo ilalabila’ti: “Tulukwitulule’mitima yesu pa menso [abaLesa].” (Amasamo 62:8) Popele, amatembelo esu alyelelwe ukufuma panshi ya mutima. Tungalukulabila pa kutembela neli ukutembelela lukoso mu mutima. Kani kuli ifilibelele ifi twelelwe ukucita ili tulukutembela? BaYawe tabatubuulapo ati tulyelelwe ukufukama, ukwikala, neli ukwimakana ili tulukutembela. Pano icipengelwa makosa, kulangisho’mucinshi kuli baLesa ili tulukutembela. Tungatembela ukuli konse lukoso na pa mpindi iili yonse lukoso.

3. Kani baLesa balaasuka shani amatembelo esu?

Balaasuka mu nshila ishilekene-lekene. BaYawe balitupeele Amashiwi abo Baibolo, umu tusangane’fyasuko ku fyakwipusha fyesu. Ukupenda Amashiwi abaLesa “[kulabaalula] abatumpile ati ba mano.” (Amasamo 19:7; Pendeni Jakobo 1:5.) Bangatupeelo’butende bwa mwilangulushi ili tuli ne makatasho. Bangalengesha ne bapyungishi babo ukutofwako ili tulukupengela ukutofwako.

SAMBILILENI IFINGI

Sambilileni ifi mungalukutembela amatembelo aakufuma panshi ya mutima kabili aakusangalasha baLesa, eli na fyefyo itembelo lingamofweniko.

4. Ifipengelwa pakweba’ti baLesa baasuke amatembelo esu

Findo fingalengesha baLesa ukukutika neli ukubulo’kukutika ku matembelo esu? Tambeni VIDYO.

VIDYO: Kani BaLesa Balakutika ku Matembelo Onse Lukoso?—Iciputusha (2:42)

BaYawe balafwaya’ti tulukutembela kuli bo. Pendeni Amasamo 65:2, eli ne kwambaale’fyakwipusha ifyakonkapo:

Kani mulukubona’ti ‘Abomfwa ukutembela’ balafwaya mwebo ukulukutembela kuli bo? Nindo mwalabilile’fyo?

Tulyelelwe ukulukulondo’kufunda kwa baLesa, pakweba’ti balukukutika ku matembelo esu. Pendeni Mika 3:4 na 1 Petilo 3:12, eli ne kwambaala icakwipushe’ci:

Findo twelelwo’kucita pakweba’ti baYawe balukukutika ku matembelo esu?

Ili kuli inkondo, bonse bangalukutembela ati bakomeke ababyabo. Kani cingaba icelelwe ukucetekela ati baLesa bangakutika ku matembelo akube’fyo?

5. Amatembelo esu alyelelwe ukulukufuma panshi ya mutima

Bambi abantu balibasambishe ukubweleshapo amatembelo eli ne kulukupyungisha amashiwi antu amo ili balukutembela. Kani ifi efi baLesa bafwaya’ti tulukutembela? Pendeni Matayo 6:7, eli ne kwambaala icakwipushe’ci:

Kani mungacita shani pakweba’ti mwilukubweleshapo amashiwi antu amo ili mulukutembela?

Cila kasuba, mulukubonako icintu cimo ciweme ici baYawe bamucitileni kabili mulukubatoota pali ceco icintu. Kani mwacite’fyo pa tusuba 7, ninshi mwatembela amatembelo 7 aapusene-pusene kabili aakubulo’kubweleshapo amashiwi antu amo.

Umufyashi umuweme alasangalala kani umwana wakwe alukumubuula fyonse ifili ku mutima. Fyopele’fyo, baYawe nabo balafwaya tulukutembela kuli bo ukufuma panshi ya mutima

6. Itembelo ni mpese iyakufuma kuli baLesa

Kani itembelo lingatofwako shani ili tulukupita mu makatasho? Tambeni VIDYO.

VIDYO: Itembelo Lilatofwako Ukuba Abakosele (1:32)

Baibolo ilatubuula ukweba’ti itembelo lingatulengesho’kuba ne butende bwa mwilangulushi. Pendeni AbaFilipoi 4:6, 7, eli ne kwambaala ifyakwipushe’fi:

Kani itembelo lingatofwako shani nangaba’ti shimbi impindi tekuti lishilishepo amakatasho?
Findo mungatemwa ukutembelelapo?

Kani mulishi?

Ishiwi lyakweba’ti “ameni” lilalula’ti “cibe fyenke’fyo” neli ati “fyacine.” Ukutatika lukoso pa mpindi baalukulemba Baibolo, ishiwi “ameni” lilapyungishiwa pa kushila kwe tembelo.—1 Ifyebo 16:36.

7. Mulukusanganako impindi ya kutembela

Shimbi impindi tungaba ne fyakucite’fingi, icakweba’ti twalubako ne kutembela. Kani baYesu balilangishe shani ati itembelo licindeme makosa? Pendeni Matayo 14:23 na Mako 1:35, eli ne kwambaala ifyakwipushe’fi:

Kani baYesu baalukucita shani pa kusanganako impindi ya kutembela?
Ni isa mpindi iingelelwa kuli mwebo ukulukutembela?

BAMBI BALALABILA ATI: “Ukutembela kupoosa lukoso impindi, pakuti takupo abomfwa.”

Kani mwebo mungalabilapo shani?

IFI MWASAMBILILA

Amatembelo akufuma panshi ya mutima alatulengesho’kupalamina makosa kuli baLesa, alatupeelo’butende bwa mwilangulushi eli ne kutupeela amakosa akucita ifyakubasangalasha.