CIIYO 09
Kupaila Inga Kwayumya Bushicibusa Bwanu a Lesa
Sa mwakalinyumfwaawo kale ayi mulayandika wakumutanjilila mubuumi? Sa kuli miipusho iyandika njemucite njeenga mwasuna kucana shikumbulo? Sa mutoyandika kuyuminishikwa? Sa inga mwasuna kuba abushicibusa buyumu a Yehova? Mupailo inga wamucafwa mushintu shoonse nshetwaambawo. Ano ino tulyeelete kupaila buyani? Sa Lesa alakutika kumipailo yoonse? Ino inga mwacita buyani kwaamba ayi Lesa akutike kumipailo yanu? Amuleke tubone.
1. Ino tulyeelete kupaila kuli baani, alimwi ino ngamakani nshi ngeenga twapaililaawo?
Yesu wakaamba ayi tulyeelete kupailabo kuli Ishiwesu wakwiculu. Alimwi lakwe mwiine wakalinga kupaila kuli Yehova. Wakaamba ayi: “Anu mbulya mbomweelete kupaila, ‘NoBeeshiwesu nomuli kwiculu . . . ’” (Mateyo 6:9) Na twapaila kuli Yehova tulayumya bushicibusa bwesu anguwe.
Inga twasenga cili coonse kuli Lesa ndyetutopaila, kulilabo na citokweendelana akuyanda kwakwe. “Tulishinishite kwaamba ayi ulanyumfwa na twamusenga cintu cili coonse kweelana akuyanda kwakwe.” (1 Joni 5:14) Yesu wakaamba pashintu shimwi nsheenga twapaililaawo. (Amubelenge Mateyo 6:9-13.) Kwiilika pakupailila pashintu shapalwesu, tulyeelete kwiibaluka kulumba Lesa pashintu nshaatucitila akupaililaako bamwi.
2. Ino tulyeelete kupaila buyani?
Baibo ilatuyuminisha ayi “amumulwiite mapensho anu oonse Lesa.” (Kulumbaisha 62:8) Aboobo tulyeelete kupaila kuswa panshi lyamoyo. Inga twapaila cakuposha maswi na kupailabo mumoyo munshila ili yoonse itondesha bulemu kuli Lesa. Inga twapaila ndyetuli kumusena kuli koonse alimwi paciindi cili coonse.
3. Ino Lesa alaikumbula buyani mipailo yesu?
Alakumbula mipailo yesu munshila shipusenepusene. Yehova wakatupa Maswi akwe Baibo umo liinji motucana shikumbulo kumiipusho yesu. Kubelenga Maswi akwe Lesa inga ‘kwalengesha batacite busongo kubaabo.’ (Kulumbaisha 19:7; amubelenge Jemusi 1:5.) Inga watucafwa kukalika moyo ndyetutokwiinda mumapensho. Alimwi inga wapa kwaamba ayi basebenshi bakwe batucaafwe ndyetutoyandika lucafwo.
AMWIIYILEWO ASHIMWI
Amubone nsheenga mwaciita kwaamba ayi munopaila mipailo yakuswa panshi lyamoyo alimwi isangalasha Lesa. Lyalo amubone akupaila mbweenga kwamucafwa.
4. Kuli nshotweelete kucita kwaamba ayi Lesa akumbule mipailo yesu
Ino nshiinshi sheenga shapa kwaamba ayi Lesa akumbule na atakumbuli mipailo yesu? Amweebele VIDYO.
Yehova alisuni ayi tunopaila kuli nguwe. Amubelenge Kulumbaisha 65:2, akubandika miipusho iyi:
-
Sa mutobona ayi “Shikukumbula mipailo” alisuni ayi munopaila kuli nguwe? Ino nceebonshi?
Tulyeelete kweelesha cankusu kukonkela njiisho shakwe Lesa na tulisuni kwaamba ayi anookutika mipailo yesu. Amubelenge Mika 3:4 a 1 Pita 3:12, akubandika mwiipusho uyu:
-
Ino inga twacita buyani kwaamba ayi Yehova akutike mipailo yesu?
Ciindi ca nkondo, makoto oonse obilo inga apaila kwaamba ayi akome. Ano sa Lesa inga wakumbula mipailo ya mushobo uyu?
5. Mipailo yesu ilyeelete kuswa panshi lyamoyo
Bantu bamwi bakaiishikwa kwaamba maswi womwi womwi lyoonse ndyebatopaila. Ano sa ubu Lesa mbwaasuni ayi tunopaila? Amubelenge Mateyo 6:7, akubandika mwiipusho uyu:
-
Ino inga mwacita buyani kwaamba ayi “mutanokwaamba maswi womwi womwi cakwiinduluka induluka” ndyemutopaila?
Bushiku buli boonse, inga mwayeeya akumulumba Yehova pashintu shibotu nshaamucitila. Na mwacita boobo kwansondo yoonse, nkokwaamba ayi mwapailila pashintu shipusenepusene shili 7 kwakubula kuboshawo shomwi shomwi.
Mushali ucite lusuno alisuni kwaamba ayi mwanaakwe anoomulwiita mbwaatoolinyumfwa. Yehova alakwe alisuni ayi tunopaila kuli nguwe kuswa panshi lyamoyo
6. Mupailo ncipo kuswa kuli Lesa
Ino mupailo inga watucafwa buyani bunene bunene ndyetuli mubukaalo buyumu? Amweebele VIDYO.
Baibo ilashomesha ayi kupaila inga kwatucafwa kukalikana mumoyo. Amubelenge Bene Filipi 4:6, 7, akubandika miipusho iyi:
-
Ino kupaila kulatucafwa buyani nabi kwaamba ayi cimwi ciindi inga takumani lipenshi ndyetucite?
-
Ino ngamakani nshi ngeenga mwasuna kupaililawo?
Sa mulishi?
Liswi lyakwaamba ayi “ameni” lilasansulula ayi “acibe boobo” na “ncakwiila.” Kuswabo muciindi camu Baibo, liswi lyakwaamba ayi “ameni” lilaambwa kumamanino amupailo.—1 Makani 16:36.
7. Amucane ciindi cakupaila
Cimwi ciindi inga twaba ashakucita shiinji cakwaamba ayi twaalilwa akucana ciindi cakupaila. Ino Yesu wakalinga kukubona buyani kupaila? Amubelenge Mateyo 14:23 a Maako 1:35, akubandika miipusho iyi:
-
Ino Yesu wakalinga kucita buyani kwaamba ayi acane ciindi cakupaila?
-
Ino nciindi cili ndyeenga mwapaila?
BANTU BAMWI BALAAMBA AYI: “Kupaila nkusowabo ciindi, taakuwo ukumbula mipailo.”
-
Ino mwebo mulabona buyani?
CITEENTE CINENE
Kupaila kuswa panshi lyamoyo inga kwayumya bushicibusa bwesu a Lesa, kutupa kukalikana mumiyeeyo, akutupa nkusu shakucita shintu shisangalasha Yehova.
Kwiindulukaamo
-
Ino tulyeelete kupaila kuli baani?
-
Ino tulyeelete kupaila buyani?
-
Ino mupailo ulatucafwa buyani?
AMULANGWETEEWO ASHIMWI
Amucane shikumbulo kumiipusho bantu baanji njobeepusha pamakani amupailo.
“Shintu Shili 7 Nshomweelete Kushiba Pamakani Amupailo” (Njashi Yamulindilishi, October 1, 2010)
Amwiiye kupaila ncokuyandikila ansheenga mwaciita kwaamba ayi munopaila kuswa panshi lyamoyo.
“Ino Nceebonshi Ndyeelete Kupaila?” (Makani acanika pa jw.org)
Amubone Baibo nshoyaamba pamakani angotweelete kupailaako.
“Sa Mulyeelete Kupaila Kubatakatifu?” (Makani acanika pa jw.org)
Muvidyo ya nyimbo iyi, amubone na inga twapaila ndyetuli kumusena kuli koonse alimwi paciindi cili coonse.
You May Also Like
MIIPUSHO LIINJI BANTU NJOBEPUSHA
Ino Nshiinshi Nsheenga Mweeya Ndyemutokwiiya Baibo a Bakamboni Bakwe Yehova?
Ndyemutokwiiya Baibo a Bakamboni Bakwe Yehova kwakubula kulipila, inga mwasebensesha Baibo ili yoonse. Mulyangulukite kwiitako bamumukwashi wanu na beshicibusa banu bali boonse mbweenga mwasuna kucanikaawo paciiyo.
