TUTO 09
Musutelele ku Mulimu ka Tapelo
Kana muikutwanga kuli mutokwa kuetelelwa mwa bupilo? Kana munani lipuzo za butokwa mi mubata kuziba likalabo za lipuzo zeo? Kana mubata kuomba-ombiwa ni kuba ni sepo? Kana mwatabela kuikutwa kuba bukaufi ni Jehova? Tapelo yakona kumitusa kueza lika zeo kaufela. Kono ki ifi nzila yende yemuswanela kulapela ka yona? Kana Mulimu wateelezanga kwa litapelo kaufela? Ki lika mañi zemuswanela kueza kuli Mulimu autwe litapelo zamina? Halunyakisiseñi litaba zeka lutusa kufumana likalabo kwa lipuzo zeo.
1. Luswanela kulapelanga ku mañi, mi ki lika mañi zeluswanela kubulelanga halulapela?
Jesu naalulutile kuli luswanela feela kulapelanga ku Ndataa luna wa kwa lihalimu. Mane Jesu naalapezi ku Jehova. Naabulezi kuli: “Mi cwale mina mulapele cwana, muli: ‘Ndataa luna ya kwa mahalimu, . . . ’” (Mateu 6:9) Halulapela ku Jehova, lutiisa silikani saluna ni yena.
Halulapela lwakona kutaluseza Mulimu nto ifi kamba ifi yelulata. Kono kuli Mulimu autwe litapelo zaluna, luswanela kulapelanga ka kuya ka tato yahae. “Halukupa nto ifi kamba ifi ka kuya ka tato [ya Mulimu], waluutwa.” (1 Joani 5:14) Jesu ulutomezi mutala obonisa lika zeluswanela kukupanga halulapela. (Mubale Mateu 6:9-13.) Kufita kukupanga feela lika zelutokwa halulapela, luswanela kuitumelanga ku zaluezelize Mulimu ni kumukupa kuli atuse babañwi.
2. Luswanela kulapelanga cwañi?
Bibele ilususueza kuli ‘lubulelele Mulimu kaufela ze mwa lipilu zaluna.’ (Samu 62:8) Kacwalo luswanela kulapelanga kuzwelela kwatasaa pilu. Lwakona kulapela ka kutumusa kamba inze lukuzize mi lwakona kueza cwalo inze luinzi ka nzila yebonisa kuli lwakuteka Jehova. Hape lwakona kulapela ka nako ifi kamba ifi mwa sibaka sifi kamba sifi.
3. Mulimu ualabanga cwañi litapelo zaluna?
Uezanga cwalo mwa linzila zeñata. Jehova ulufile Linzwi lahae, yona Bibele ili molufumananga likalabo kwa lipuzo zaluna. Kubala Linzwi la Mulimu kwakona ‘kutalifisa yasina zibo.’ (Samu 19:7; mubale Jakobo 1:5.) Jehova wakona kulutusa kuba ni kozo ya mwa munahano halukopana ni miinelo yetaata. Mi hape wakona kuitusisa batanga bahae kuli balutuse.
MUBATISISE
Munyakisise zekona kumitusa kulapelanga ka nzila yetabisa Mulimu, mi mubone mo kulapela kukona kumituseza.
4. Mulimu ubata kuli mumulapele ka nzila yeswanela
Ki lika mañi zekona kutahisa kuli Mulimu autwe litapelo zaluna kamba kutokwa? Mubuhe VIDIO.
Jehova ubata kuli lulapelange ku yena. Mubale Samu 65:2, mi kihona mukanyakisisa lipuzo zelatelela:
-
Kana munahana kuli “Yautwa litapelo” ubata kuli mulapele ku yena? Ki kabakalañi hamubulela cwalo?
Haiba lubata kuli Mulimu autwe litapelo zaluna, luswanela kueza molukonela kaufela kupila ka kulatelela likuka za Mulimu. Mubale Mika 3:4 ni 1 Pitrosi 3:12, mi kihona mukanyakisisa puzo yelatelela:
-
Ki lika mañi zeluswanela kueza kuli Mulimu aalabe litapelo zaluna?
Ka nako ya ndwa, batu babalwanisana balapelanga ku Mulimu kuli abatuse. Kana Mulimu wakona kualaba litapelo zecwalo?
5. Luswanela kulapela kuzwelela kwatasaa pilu yaluna
Batu babañwi balutilwe kulapelanga ka kukuta-kutela kubulela manzwi aswana. Kono kana Mulimu ubata kuli lubulelange manzwi aswana nako kaufela halulapela ku yena? Mubale Mateu 6:7, mi kihona mukanyakisisa puzo yelatelela:
-
Ki lika mañi zekona kumitusa ‘kusakuta-kutela kubulela manzwi aswana’ hamulapela?
Zazi ni zazi mwakona kunahana ka za nto yeñwi yamiezelize Jehova mwa bupilo bwamina, mi mwakona kuitumela ku Jehova kwa nto yamiezelize yeo. Muezange cwalo zazi ni zazi ka sunda, mi mukalemuha kuli hamulaho wa sunda, mubulezi lika ze 7 zeshutana-shutana hane mulapela musakuta-kuteli kubulela manzwi aswana.
Ndate yomunde ubatanga kuli mwanaa hae amubulelele mwaikutwela. Jehova ni yena ubatanga kuli lulapelange ku yena kuzwelela kwatasaa pilu
6. Tapelo ki mpo yezwa ku Mulimu
Tapelo ikona kulutusa cwañi sihulu halukopana ni miinelo yetaata mwa bupilo? Mubuhe VIDIO.
Bibele ilusepisa kuli tapelo yakona kulutusa kuba ni kozo ya mwa munahano. Mubale Mafilipi 4:6, 7, mi kihona mukanyakisisa lipuzo zelatelela:
-
Tapelo ilutusa cwañi niha isafelisangi miinelo yetaata yelukopana ni yona?
-
Ki lika mañi zemubata kutaluseza Jehova hamulapela?
Kana mwaziba?
Linzwi la “ameni” litalusa kuli “kube cwalo” kamba “haike kube cwalo.” Kuzwa feela mwa linako za kwamulaho, linzwi la “ameni” lizwezipili kuitusiswanga kwa mafelelezo a litapelo.—1 Makolonika 16:36.
7. Mufumanange nako ya kulapela
Fokuñwi lupatehanga hahulu kuli mane lwalibalanga kulapela. Jesu naanga cwañi taba ya kulapela? Mubale Mateu 14:23 ni Mareka 1:35, mi kihona mukanyakisisa lipuzo zelatelela:
-
Ki lika mañi zanaaezanga Jesu kuli afumane nako ya kulapela?
-
Ki lili fomukona kufumanela nako ya kulapela?
BABAÑWI BABULELANGA KULI: “Kulapela ki kusinya feela nako, kakuli hakuna yateeleza.”
-
Mina mubona cwañi?
LITABA KA BUKUSWANI
Kulapela kuzwelela kwatasaa pilu kulutusa kusutelela ku Mulimu, kuba ni kozo ya mwa munahano, ni kueza lika zetabisa Jehova.
Mulundulule
-
Luswanela kulapelanga ku mañi?
-
Luswanela kulapelanga cwañi?
-
Ki bufi bunde bwa kulapela?
MUBONE LITABA ZEÑWI
Mubone likalabo kwa lipuzo zebabuzanga batu ka za tapelo.
“Lika ze 7 Zemutokwa Kuziba ka za Tapelo” (Tawala ya Mulibeleli, January-March, 2011)
Muitute libaka hamuswanela kulapelanga ni momukona kulapelela litapelo zende.
“Ki Kabakalañi Haniswanela Kulapelanga?” (Taba ya fa webusaiti)
Munyakisise zeiluta Bibele ka za yeluswanela kulapelanga ku yena.
“Kana Naswanela Kulapela Kwa Bahalalehi?” (Taba ya fa webusaiti)
Mwa pina ya vidio ye, mulemuhe kuli lwakona kulapela inze luli kwa sibaka sifi kamba sifi ni ka nako ifi kamba ifi.
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
