SULA MAR 09

Sud Machiegni gi Nyasaye e Lamo

TUGE

Be isegagombo mondo iyud ng’at ma nyalo tayi? Be in gi penjo moko madongo ma diher yudo dwokogi? Be diher mondo ng’ato ohoyi kata ojiwi? Be diher mondo isud machiegni gi Jehova? Lamo nyalo konyi e wechego duto. Kata kamano, onego walem e yo mane? To be Nyasaye winjo lamo duto? Ang’o minyalo timo mondo ibed gadier ni obiro winjo lamo magi? We wanon ane.

1. En ng’ano monego wawuogo e lamo, to gin ang’o ma wanyalo nyise?

Yesu nowacho ni onego walem ka wawuoyo mana gi Wuonwa manie polo. Yesu bende ne lemoga. Nowacho niya: “Un to onego ulem kama: ‘Wuonwa manie polo . . . ’” (Mathayo 6:9) Watego osiep manie kindwa gi Jehova sama walemo.

Wanyalo lemo e wi gimoro amora. Kata kamano, mondo Nyasaye odwok lamo magwa nyaka walem kaluwore gi dwache. “Gimoro amora ma wakwaye kaluwore gi dwache, owinjowa.” (1 Johana 5:14) Yesu nomiyowa ranyisi mar gima onego wakwa e lamo. (Som Mathayo 6:9-13.) Wanyalo nyiso Nyasaye gik ma chandowa, kata kamano, wiwa kik wil goyone erokamano kuom gik ma osetimonwa kendo kwaye mondo okony jomamoko.

2. Ere kaka onego walem?

Muma jiwowa niya: “Olneuru [Nyasaye] gik manie chunyu.” (Zaburi 62:8) Lamo magwa onego oa e chunywa. Wanyalo lemo gi dwol kata gi chunywa kendo onego wabed e yo ma nyiso ni wamiyo Nyasaye luor. Wanyalo lemo sa asaya kendo ka wan kamoro amora.

3. Ere kaka Nyasaye dwokoga lamo magwa?

Odwokoga lamowa e yore mopogore opogore. Jehova osemiyowa Wachne ma en Muma, ma wanyalo yudoe dwoko mag penjo ma wan-go. Somo Wach Nyasaye nyalo ‘miyo ng’at ma onge rieko obed mariek.’ (Zaburi 19:7; Som Jakobo 1:5.) Nyasaye nyalo miyowa chuny mokuwe sama waromo gi chandruoge. Onyalo tiyo gi jotichne mondo okonywa sama wan gi chandruok.

TIM NONRO

Non kaka inyalo lemo kowuok e chunyi mondo imor Nyasaye kod kaka lamo nyalo konyi.

4. Gik ma Nyasaye dwaro ni watim sama walemo

Ang’o ma nyalo miyo Nyasaye owinj lamowa kata otamre winjo lamowa? Tug VIDIO.

VIDIO: Be Nyasaye Winjo Lemo Duto?—En Bath Vidio (2:42)

Jehova dwaro ni wawuo kode e lamo. Som Zaburi 65:2, kae to uwuo e wi penjo ma luwogi:

Be iparo ni “Jawinj lamo” dwaro ni iwuo kode? Ang’o momiyo iwacho kamano?

Ka wadwaro ni Nyasaye owinj lamowa nyaka wadag kaluwore gi chikene. Som Mika 3:4 kod 1 Petro 3:12, kae to uwuo e wi penjo ma luwoni:

Ang’o ma wanyalo timo mondo wabed gadier ni Nyasaye winjo lamo magwa?

E kinde lweny, joma kedo nyalo lemo mondo gilochi. Be en gima owinjore geno ni Nyasaye biro dwoko lamo kaka mago?

5. Lamo magwa onego oa e chunywa

Nitie jomoko ma osepuonj mondo ginwo weche moko sa asaya ma gilemo. Kata kamano, be mano e kaka Nyasaye dwaro ni walem? Som Mathayo 6:7, kae to uwuo e wi penjo ma luwoni:

Ang’o ma wanyalo timo mondo kik ‘wanwo anwoya weche’ sama walemo?

Pile ka pile, inyalo paro gimoro ma Jehova otimoni kae to igoyone erokamano. Kitimo kamano pile ka pile kuom juma achiel, ibiro goyo ne Jehova erokamano kuom gik moko abiriyo mopogore opogore, to mano biro konyi mondo kik inwo weche.

Wuoro maber dwaroga ni nyathine onyise gima ni e chunye. Jehova bende dwaro ni walem koa chunywa

6. Lamo en mich moa kuom Nyasaye

Ere kaka lamo nyalo konyowa to ahinya ahinya sama wan gi chandruok? Tug VIDIO.

VIDIO: Lamo Konyowa Nano (1:29)

Muma singo ni lamo nyalo konyowa mondo wabed gi kuwe. Som Jo-Filipi 4:6, 7, kae to uwuo e wi penjo ma luwogi:

Kata obedo ni lamo ok gol chandruoge ma wan-go, ere kaka onyalo konyowa?
Gin gik mage ma inyalo wuoye sama ilemo?

Be Ing’eyo?

“Amin” tiende en ni “obed kamano” kata ni “adier.” Chakre kinde Muma, ji osebedo ka wacho ni, “amin” e giko lamo.—1 Weche mag Ndalo 16:36.

7. Many thuolo mar lemo

Nitie kinde ma wanyaloga bedo modich ma wiwa wil gi lemo. Yesu ne nenoga nade thuolo ma en-go mar lemo? Som Mathayo 14:23 kod Mariko 1:35, kae to uwuo e wi penjo ma luwogi: