KĨTHOOMO KĨA 09

Thengeera Mũrungu Gũkũrũkĩĩra Maromba

CHETHA

Kwĩrĩo wigagua atĩ nũkũbatara kwegwa mwerekera ũtũũrone? Gwe-rĩ, ũrĩ na biũria bia bata birĩa ũrĩngĩenda gũcookerua? Gwe-rĩ, nũkwigua ũkĩbatara kũborerua, na gwĩkĩrwa inya? Rĩ, wenda kwigua ũrĩ akuĩ na Jehova? Maromba no jagũtethie kwingia mobaatu jau jonthe. Ĩndĩ-rĩ, nĩ njĩra ĩrĩkũ ĩnjega ya kũromba? Mũrungu-rĩ, nathikagĩĩra maromba jonthe? Gwe-rĩ, nĩatĩa ũũmba kũthithia nĩkenda athikĩĩra maromba jaaku? Tiga twone.

1. Nũũ tũbuĩrĩte kũromba, na nĩ mantũ jarĩkũ tũũmba kũromba?

Jesũ aaritanĩre atĩ, tũbuĩrĩte kũromba Baaba weetũ ũrĩa ũrĩ ĩgũrũ wenka. Jesũ wengwa naarombaga Jehova. Augĩre: “Ni untu buu, bwi rombageni uju atiri, Baaba wetu uria uri Iguru. . . ” (Mathayo 6:9) Rĩrĩa twaromba Jehova, nĩtwĩkagĩra ũcoore bwetũ inya amwe nawe.

Twomba kũromba ũntũ o bunthe kinya bũrĩkũ. Amwe na bũu, nĩkenda Mũrungu acookia maromba jeetũ, no mwanka jagwatanĩre na wendi bwawe. “Kethira tukamuromba untu kinya buriku buria bwagirite methone jawe [Murungu], agatuthikiira.” (1 Johana 5:14) Jesũ naejanĩre ngerekano cia mantũ jongwa jarĩa tũbuĩrĩte kũromba. (Thooma Mathayo 6:9-13.) Amwe na kũromba bwegie mobaatũ jeetũ, tũtĩbuĩri kũũrĩrua nĩ gũcookeria Jehova nkaatho tontũ bwa jarĩa atũthithĩrĩtie, na kũmũromba atethie bangĩ.

2. Nĩatĩa tũbuĩrĩte kũromba?

Bibiria ĩtwĩkagĩra inya ‘twonoragiirie [Murungu] nkoro cietu.’ (Zaburi 62:8) Kwou, maromba jeetũ jabuĩrĩte kwĩthĩrwa jarĩ ja kuuma nkorone. No tũrombe na kaajũ kana tũkiri ki, na tũkari na njĩra o yonthe ĩrĩa ĩkwonania nĩtũgũtĩa Jehova. Twomba kũromba o ĩgiita rĩonthe, ona tũrĩ o gũntũ kunthe.

3. Nĩatĩa Mũrungu acookagia maromba jeetũ?

Acookagia na njĩra mwanya mwanya. Jehova naejanĩte rũteto rwawe, Bibiria, naarĩa kaingĩ twonaga macokio ja biũria bietu. Kũthooma Rũteto rwa Mũrungu kwomba ‘kuumigia kiaa.’ (Zaburi 19:7; thooma Jakubu 1:5.) Omba gũtwaa thĩĩrĩ ya mathũgaanio rĩrĩa tũgũkũrũkĩĩra mantũ jamoomũ. Na kinya oomba gũtumĩra nthũũmba ciawe gũtũtethia rĩrĩa kamma tũrĩ na ũbatu.

ĨNJA NKŨRŨKI

Cũnkũuna ũrĩa ũũmba kũromba na njĩra ĩrĩa ĩgwĩragia Mũrungu, na wone ũrĩa maromba joomba gũgũtethia.

4. Mantũ jarĩa Mũrungu endaga nĩkenda etĩkĩĩria maromba

Nĩmbi bĩũmba gũtũma Mũrungu etĩkĩĩria maromba jeetũ, kana arega kũjetĩkĩĩria? Tega VIDIO.

VIDIO: Mũrungu-rĩ, Nathikagĩĩra Maromba Jonthe—Gĩcuncĩ (2:42)

Jehova nendaga tũmũromba. Thooma Zaburi 65:2, rĩu bwarĩĩrie biũria bibi:

Ũrĩthũgaania ‘Mwigua wa maromba’ neendaga ũgwe ũmũromba? Nĩkĩ, kana nĩkĩ tĩu?

Tũbuĩrĩte gũciũmia gũtũũra kũringana na mooritani ja Mũrungu, kethĩra nĩtũkwenda athikĩĩra maromba jeetũ. Thooma Mika 3:4 na 1 Petero 3:12, rĩu bwarĩĩrie kĩũria gĩkĩ:

Nĩatĩa tũũmba kũthithia nĩkenda twĩthĩrwa na mma atĩ Jehova akathikĩĩra maromba jeetũ?

Ĩgiita rĩa ndwa, nteere cionthe no irombaga ciũmbane. Rĩ, nĩ ũntũ bũkũgwatanĩra na mathũgaanio kwĩrĩgĩĩra Mũrungu acookia maromba ta jau?

5. Maromba jeetũ jabuĩrĩte kuuma nkorone

Antũ bamwe baritani gũcookera maromba o jarĩa kaĩrĩ na kaĩrĩ. Ĩndĩ-rĩ, ũu nĩu Murungu endaga tũmũromba? Thooma Mathayo 6:7, rĩu bwarĩĩrie kĩũria gĩkĩ:

Nĩatĩa ũũmba gũtiga gũcookeera mantũ o jarĩa kaĩrĩ na kaĩrĩi kana ‘kwaria gukwingi’ marombene jaaku?

Thũgaanĩria ũntũ bwa mwanya bũrĩa ũũmba gũcookeria Jehova nkaatho o ntukũ o ntukũ. Thithia ũu ntukũ cionthe kiumia kĩmwe, naawe ũkeethĩrwa ũrombete mantũ mũgwanja mwanya mwanya ũtĩgwicookera.

Baaba ũmwega eendaga mwanowe aaranĩria nawe kuuma nkorone. Ũu no u, Jehova endaga kinya tuĩ tũmũromba kuuma nkorone

6. Maromba nĩ kĩewa kuuma kĩrĩ Mũrungu

Nĩatĩa maromba joomba gũgũtethia, mono mono magiitene jamoomũ ũtũũrone bwaku? Tega VIDIO.

VIDIO: Maromba Nĩjatũtethagia Kũũmĩĩria Magiita Jamoomũ (1:26)

Bibiria nĩ ĩtwejaga wĩrane atĩ maromba no jatũtethie kwĩthĩrwa na thĩĩrĩ ya mathũgaanio. Thooma Afilipi 4:6, 7, rĩu bwarĩĩrie biũria bibi:

Kinya kethĩra maromba jatĩũmba kũthiria mathĩĩna jeetũ, nĩatĩa joomba gũtũtethia?
Nĩ mantũ ta jarĩkũ wenda kũromba ũntũ bwajo?

Ũramenya?

Kiugo ‘ameni’ nĩ kuuga “nĩgũkarĩke ũu” kana “na mma.” Kuuma ĩgiita rĩrĩa Bibiria yaandĩkagwa, kiugo “ameni” nĩkĩĩthĩrĩtwe kĩgĩtumĩrwa mũthiene jwa maromba.—1 Mantu ja Karaja 16:36.

7. Cwaa kaanya ga kũromba

Magiita jamwe no tũũrĩrue nĩ kũromba, tontũ bwa kwĩthĩrwa na mantũ jamaingĩ mono ja kũthithia. Jesũ oonaga maromba jarĩ ja gĩtũmi bũngˈana atĩa? Thooma Mathayo 14:23 na Mariko 1:35, rĩu bwarĩĩrie biũria bibi: