AKORANGA 09

Whakatata Atu ki te Atua Mā te Inoi

PUREI

Kua whakaaro rānei koe me tohutohungia koe i tōu oranga? Kei a koe ētahi pātai nui e kimi ana koe he whakautu? Kei te pīrangi koe ki te whakamārie, ki te whakamanawa? E hiahia ana rānei koe kia tata ake ki a Ihowa? Mā te inoi koe e āwhina kia tutuki ai ēnei mea. Engari me pēhea e tika ai te inoi? Ka whakarongo rānei te Atua ki ngā inoi katoa? Me aha koe kia rongo ia ki āu inoi? Me titiro tātou.

1. Me inoi tātou ki a wai, me inoi hoki mō te aha?

I whakaako a Ihu kia inoi tātou ki tō tātou Matua i te rangi anake. I inoi hoki a Ihu ki a Ihowa. I kī ia: “Nā kia pēnei tā koutou inoi: ‘E tō mātou Matua i te rangi . . . ‘” (Matiu 6:9) Ina inoi tātou ki a Ihowa, ka kaha ake tō tātou hoatanga ki a ia.

Ka taea te inoi mō te nuinga o ngā mea. Otirā, kia whakautu te Atua i a tātou inoi, me inoi ko tāna i pai ai. “Ki te inoia e tātou tētahi mea i a ia, tāna i pai ai, ka whakarongo mai ia ki a tātou.” (1 Hoani 5:14) He tauira tā Ihu o ngā mea tika hei inoi. (Pānuitia Matiu 6:9-13) Tāpiri ki te inoi mō ō tātou ake āwangawanga, kaua rawa e wareware ki te whakawhetai ki te Atua mō āna mahi pai ki a tātou, me te inoi kia āwhina ia i ētahi atu.

2. Me inoi pēhea tātou?

E whakahau ana te Paipera kia “ringihia tō koutou ngākau ki tōna aroaro.” (Ngā Waiata 62:8) Nā reira kia pono, kia puta mai i te ngākau a tātou inoi. Ka taea te inoi reonui, puku rānei, i tētahi āhua tōtika o te tinana. Ka taea te inoi i ngā wā katoa, i ngā wāhi katoa.

3. Ka whakautu pēhea te Atua i a tātou inoi?

He maha ōna ara. Kua hōmai e Ihowa tāna Kupu, te Paipera, kei roto hoki ngā whakautu maha ki a tātou pātai. Mā te pānui i te Kupu a te Atua “e whakawhaiwhakaaro ana i te kuare.” (Ngā Waiata 19:7; pānuitia Hēmi 1:5.) Ka hōmai e ia te ngākau rangimārie ina uaua te haere. Ka akiaki hoki i āna pononga ki te āwhina mai ina tino hiahiatia e tātou.

KIMI MĀRAMATANGA

Kitea me pēhea e inoi e koe ngā inoi o te ngākau e āhuareka ai te Atua, me pēhea hoki koe e whiwhi painga ai i te inoi.

4. Kei te Atua ētahi whakaritenga mō te inoi

He aha ngā āhuatanga e pai ai a tātou inoi ki te Atua, e kore e pai rānei? ātakitakitia te ATAATA.

ATAATA: Ka Whakarongo te Atua ki ngā Inoi Katoa?—Tangohanga (2:42)

E hiahia ana a Ihowa kia inoi tātou ki a ia. Pānuitia Ngā Waiata 65:2, kōrerotia ēnei pātai:

Ki tōu whakaaro e hiahia ana rānei te “Kaiwhakarongo inoi” kia inoi koe ki a ia? He aha ai, he aha i kore ai rānei?

Me whai e tātou ngā ture a te Atua ki te hiahia tātou kia rangona a tātou inoi. Pānuitia Mika 3:4 me 1 Pita 3:12, kōrerotia tēnei pātai:

Me tino aha tātou kia rangona ai e Ihowa a tātou inoi?

I tētahi pakanga, ka inoi pea ngā taha e rua kia toa. He tika rānei te tūmanako kia whakautua e te Atua aua inoi?

5. Me inoi tātou mai i te ngākau

Ka whakahua noa ētahi tāngata i ngā inoi kua ākona e rātou. Engari, kei te hiahia rānei te Atua ki ngā inoi pērā? Pānuitia Matiu 6:7, kōrerotia tēnei pātai:

Me pēhea e kore ai “e whakahuatia noatia ko aua kupu anō” ki āu inoi?

I ia rā, whakaarohia tētahi manaakitanga i tōu oranga ka tuku whakawhetai ki a Ihowa. Kia pēnei ia rā o te wiki, ā kua inoia e koe ētahi mea rerekē e whitu.

Ka hiahia te matua pai kia kōrero tāna tamaiti ki a ia mai i tōna ngākau. Pērā hoki, e hiahia ana a Ihowa kia inoi tātou ki a ia mai i te ngākau

6. He taonga te inoi nā te Atua

Ka whakakaha pēhea te inoi i a tātou, i ngā wā pai, i ngā wā kino? Mātakitakitia te ATAATA.

ATAATA: Mā te Inoi ka Taea Ai Ngā Mea Katoa (1:32)

E kī ana te Paipera ka āwhina te inoi kia tau ai te rangimārie ki a tātou. Pānuitia Piripai 4:6, 7, kōrerotia ēnei pātai:

Ahakoa kāore pea e mutu ngā raruraru ina inoi tātou, ka āwhina pēhea te inoi?
He aha anō ētahi mea hei inoi māu?

I mōhio rānei koe?

Ko te tikanga o te kupu “amine” ko “kia pērā tonu”, “āe rawa” rānei. Nō ngā wā anō o te Paipera, ko “amine” te kupu i te mutunga o te inoi.—1 Whakapapa 16:36.

7. Kaua e wareware ki te inoi

I ētahi wā nā te kaha pukumahi ka wareware tātou ki te inoi. He pēhea ki a Ihu te nui o te inoi? Pānuitia Matiu 14:23 me Māka 1:35, kōrerotia ēnei pātai: