SAK A 09
Pʋʋsgã tõe n paasa tõnd ne Wẽnnaam zoodã pãnga
Yãmb mi n datame tɩ b wilg-y y sẽn tog n maan bũmb ning wɛɛngẽ bɩ? Yãmb tara sogsg y sẽn dat n bãng b leoorã bɩ? Yãmb data belsgo, wall raood kengr bɩ? Yãmb datame tɩ yãmb ne a Zeova zoodã pãng paas bɩ? Pʋʋsgã tõe n sõng-y-la rẽ fãa wɛɛngẽ. La wãn to la y segd n pʋʋse? Wẽnnaam kelgda pʋʋsg buud fãa bɩ? Bõe la y tõe n maan tɩ Wẽnnaam kelg yãmb pʋʋsgã? Bɩ d gom rẽ yelle.
1. Ãnda la d segd n pʋʋse, la bõe la d tõe n pʋʋs n kose?
A Zeezi yeelame tɩ d segd n pʋʋsa d Ba sẽn be saasẽ wã bala. Yẽ mengã ra pʋʋsda a Zeova. A yeelame: “Woto wã, ad yãmb sẽn tog n pʋʋs to-to: ‘Tõnd Ba sẽn be saasẽ . . .’” (Matiye 6:9) D sã n pʋʋsd a Zeova, d paasda tõnd ne yẽ zoodã pãnga.
D tõe n pʋʋsa bũmb fãa la bal yĩnga. La yaa vẽeneg tɩ sẽn na yɩl tɩ Wẽnnaam leok-do, d kosgã segd n zemsa ne a raabã. “Sẽn wa n yaa bũmb ning fãa la d kos [Wẽnnaam] tɩ zems b raabã, b kelgda tõndo.” (1 Zã 5:14) A Zeezi wilga bũmb toor-toor d sẽn tõe n pʋʋs n kose. (Karm-y Matiye 6:9-13.) Bũmb nins sẽn pak tõndã sẽn yãk a toogo, d segd n tẽegd n pʋʋsda Wẽnnaam bark bũmb nins a sẽn maan n kõ tõndã yĩnga, la d pʋʋsd d taabã yĩnga.
2. Wãn to la d segd n pʋʋse?
Biiblã pʋgẽ b yetame: “Pelg-y y pʋs Wẽnnaam taoore!” (Yɩɩn-sõamyã 62:9) Rẽnd d segd n pelgda d pʋg n togsd Wẽnnaam sẽn be d sũurẽ. D tõe n zẽka d koɛɛga, wall d pʋʋs d sũurẽ. D tõe n yĩgimdame, n zĩndi, bɩ n yals yĩngri. Sẽn yaa to-to fãa, segd n yɩɩ ne waoogre. Tõe n yɩɩ wakat la zĩig ning d sẽn date.
3. Wãn to la Wẽnnaam leokd tõnd pʋʋsgã?
A leokda d pʋʋsgã ne manesem toor-toore. A Zeova kõo tõnd Biiblã sẽn yaa a Gomdã, tɩ d wae n paamd d sogsgã leoor be. Wẽnnaam Gomdã kareng tõe n kõo “ka-yam soabã yam.” (Yɩɩn-sõamyã 19:8; karm-y Zak 1:5.) D sã n wa tar zu-loeese, a tõe n sõng-d lame tɩ d yamã gãand bãane. D sã n wa rat sõngre, a tõe n kɩtame tɩ d tẽed-n-taasã sõng-do.
D BAO N BÃNG N PAASE
D ges y sẽn tõe n pʋʋs Wẽnnaam to-to tɩ ta a yam, la pʋʋsgã sẽn tõe n naf-y to-to.
4. D sã n dat tɩ Wẽnnaam kelg d pʋʋsgo, bũmb kẽer n yaa tɩlɛ
Bõe n tõe n kɩt tɩ d pʋʋsg ta Wẽnnaam yam? Ges-y VIDEO wã.
A Zeova ratame tɩ d pʋʋsd-a. Karm-y Yɩɩn-sõamyã 65:3, tɩ rẽ poor bɩ y leok sogsgã:
-
Yãmb tagsdame tɩ Wẽnnaam “sẽn kelgd pʋʋsgã” ratame tɩ yãmb pʋʋs-a bɩ? Bõe yĩnga?
D sã n dat tɩ Wẽnnaam kelgd d pʋʋsgã, d segd n modgame tɩ d sẽn vɩ to-to wã zemsd ne a noyã. Karm-y Miise 3:4 la 1 Pɩyɛɛr 3:12, tɩ rẽ poor bɩ y leok sokrã:
-
Bõe la d segd n maan sẽn na yɩl t’a Zeova kelg d pʋʋsgã?
Zabr sasa, sul a yiibã fãa pʋʋsdame n dat tɩ Wẽnnaam sõng-b tɩ b tõoge. Yãmb tagsdame tɩ Wẽnnaam leokda pʋʋsg a woto buud bɩ?
5. D segd n pelgda d pʋg n pʋʋsdẽ
B zãmsa sãnda pʋʋsg kẽere, tɩ b togsd n yɩlemdẽ. La yaa woto la Wẽnnaam dat tɩ d pʋʋsd-a bɩ? Karm-y Matiye 6:7, tɩ rẽ poor bɩ y leok sokrã:
-
Bõe la d tõe n maan tɩ d sã n wa pʋʋsdẽ bɩ d ra “togsd goam n yɩlemdẽ?”
Daar fãa, y tõe n tagsa bũmb a ye a Zeova sẽn maan n kõ-y yelle, n pʋʋs-a bark rẽ yĩnga. Y sã n maan woto semen tõre, y na n mikame tɩ y pʋʋsa bũmb toor-toor a yopoe yĩnga, n pa lebg n togs goam n yɩlem ye.
Rao sẽn nong a biig ratame t’a togsd-a bũmb ning sẽn be a sũurẽ. Woto me, a Zeova ratame tɩ d pelgd d pʋg n pʋʋsd-a
6. Pʋʋsgã yaa Wẽnnaam kũuni
Wãn to la pʋʋsgã tõe n kõ-d pãnga, noog la toog wakate? Ges-y VIDEO wã.
Biiblã pʋgẽ, b wilgame tɩ pʋʋsgã tõe n sõng-d lame tɩ d yamã sɩd gãand bãane. Karm-y Filip rãmb 4:6, 7, tɩ rẽ poor bɩ y leok sogsgã:
-
Baa sẽn pa wakat fãa la pʋʋsgã kɩtd tɩ d zu-loeesã sa wã, wãn to la sõngd tõndo?
-
Bõe la y rat n pʋʋs n kose?
Yãmb miime bɩ?
“Ãmiina” rat n yeelame tɩ “bɩ a sɩd yɩ woto,” wall “hakɩɩka.” Hal pĩnd wẽndẽ n tãag masã, pʋʋsg baasgẽ b yetame tɩ “ãmiina.” —1 Kibayã 16:36.
7. Baood-y wakat n pʋʋsdẽ
Wakat ninga, d tõe n tara tʋʋm wʋsgo, hal n yĩm pʋʋsgã yelle. A Zeezi ra getame tɩ pʋʋsgã yõod taa zĩ-bʋgo? Karm-y Matiye 14:23 la Mark 1:35, tɩ rẽ poor bɩ y leok sogsgã:
-
Bõe la a Zeezi ra maand n paamd sẽk n pʋʋsdẽ?
-
Wakat bʋg la y tõe n yãk n pʋʋsdẽ?
NEB KẼER SẼN YETE: “Pʋʋsgã yõod pa waoog ye. A sõngda ned t’a yam gãand bala.”
-
Yãmb tagsg yaa wãn ne rẽ?
KƲMSGO
D sã n pelgd d pʋg n pʋʋsd Wẽnnaam, tõnd ne yẽ zoodã pãng paasdame, d yam gãee bãane. Pʋʋsgã kɩtdame me tɩ d paamd pãng n maand sẽn tat a Zeova yam.
Lebg-n-gese
-
Ãnda la d segd n pʋʋse?
-
Wãn to la d segd n pʋʋse?
-
Wãn to la pʋʋsgã tõe n naf yãmba?
BŨMB A TAABA
Sogsg kẽer nebã sẽn wae n sokd pʋʋsgã wɛɛngẽ leoore.
“Bũmb a yopoe y sẽn segd n bãng pʋʋsgã wɛɛngẽ” (Yʋʋmd 2010 sɩpaolg kiuug pipi daar Gũusg Gasgã)
Bõe yĩng tɩ y segd n pʋʋsdẽ, la bõe la y tõe n maan n paas y pʋʋsgã sõmblem?
Biiblã pʋgẽ, b yetame tɩ ãnda la d segd n pʋʋse?
Video sẽn wilgd tɩ d tõe n pʋʋsa zĩig fãa, la wakat buud fãa.