ISAMBILILO 09
Ipepo Lingawomya Wuciwuza Wako nu Leza
Uzye ukalonda uwa kukutungulula mu wumi? Uzye wawa na mawuzyo yano ukalonda ukumanya ivyasuko? Uzye ukalonda uwakukusansamusya? Uzye ungakunda ukupalamila kwe Yehova? Ipepo lingakwavwa kwe vyonsinyene vyo-o. Nomba tuzipizile ukupepa wuli? Uzye e Leza akakwivwa ku mapepo yonsinye? Avyani vino ungacita pa kuti e Leza awakwivwa ku mapepo yako? Katulole.
1. Tuzipizile ukupepa kwe weni, swinya avyani vino tungapepelapo?
E Yesu watusambilizizye ukuti tuzipizile ukupepa vye ku Mukwasi witu uwa kwi yulu. Avino nawenye wacitanga. Wapepanga vye kwe Yehova. Watili: “Muwapepa wonye-woo muwati: ‘Tata witu uwa mwiyulu . . .’” (Mateyu 6:9) Nga tukupepa kwe Yehova apano tukawa sana iviwuza vyakwe.
Tungapepa kwe Yehova pa ciliconsinye. Nomba pa kuti ayasuke amapepo yitu, tuzipizile ukupepa ukulingana nu kulonda kwakwe. “Ndi tukulenga icintu cimwi nukulonda kwakwe akatwivwa.” (1 Yohani 5:14) E Yesu watunenile ivintu vimwi vino tungapepelapo. (Wazyani Mateyu 6:9-13) Pano tukupepela pe vino tukulonda tuzipizile twakwizuka ukusalifya Yehova, nu kupepelako wanji.
2. Uzye tuzipizile ukupepa wuli?
E Baibolo ikatunena ukuti “wumbula ivyamumwezo wako.” (Ukulosya 2:19) Acino pano tukupepa tuzipizile ukumunena wulyanye vino tukuyivwa. Tutazipizile ukumufisa nanti cimwi. Tungapongomoka pa kupepa nanti tungapepela mu mwezo. Kweni e Yehova atatunena ukufukama, ukulala pansi nanti ukwimilila pakupepa, lelo cino cacindama akulanjizya ukuti tumucindisile. Cinji acakuti tungapepa impindi iyili yonsinye nu kuli konsinye.
3. Uzye Leza akakwasuka wuli amapepo yitu?
Akatwasucila mu nzila imvule. E Yehova watupa Izwi lyakwe, e Baibolo, muno tukazana ivyasuko ku mawuzyo yano twakwata. Ukuwazya Izwi lya kwe Leza kukapa “amano kwe wano wasi na mano.” (Amalumbo 19:7; wazya Jemusi 1:5.) Angatupa umutende pano tukupita mu ntazi ica kuti tutanga twasakamikwa na nkani pe vino tukupitamo. Swinya angalenga awawomvi wakwe ukutwavwa palyanye pano tusowezizye.
SAMBILILA IVICILE PA-A
Lola vino ungapepa mu nzila yino yingasecelesya e Yehova, na vino ipepo lingakwavwa.
4. Kwawa vino vikalondekwa pa kuti Leza ayasuke amapepo yitu
Avyani vino vingalenga ukuti e Yehova ayasuke amapepo yitu nanti akane ukwasuka? Tambani e VIDYO.
E Yehova akalonda tuwapepa kwe weliwe. Wazyani Amalumbo 65:2, nu kulanzyanya ya-a amawuzyo:
-
Uzye ukulola ukuti ‘e katolelela wamapepo’ akalonda ukuti wewe uwapepa kwe weliwe? Amulandu ci wuno wasucila wowo?
Tuzipizile twakwelezya na maka ukukonka amasundo ya kwe Leza nga tukulonda awakwivwa amapepo yitu. Wazyani Mika 3:4; 1 Peter 3:12, nu kulanzyanya lyo-o iwuzyo:
-
Tungacita wuli pa kuti e Leza awakwivwa amapepo yitu?
Nga kwawa inkondo, wonsinye wangapepa kwe Leza ukuti awavwe waye wakacimvye. Uzye tungenecela Leza ukwasuka amapepo yamusango wo-o?
5. Tuzipizile ukunena Yehova vino tukuyivwa
Awantu wamwi wawasambilizya amapepo ya kusunjila vye ku mutwe, nanti ukupepela mu lulimi luno wasikwivwa nu kwivwa. Nomba uzye wo-o avino Yehova akalonda ukuti twapepa kwe weliwe? Wazyani Mateyu 6:7, nu kulanzyanya lyo-o iwuzyo:
-
Ungacita wuli pakuti utati uwataka “amazwi chitaketake” nanti ukulanda amazwi ayali yonganye pano ukupepa?
Cila wanda uwakwelenganya pa cintu nanti conganye cino ungasalifizyapo e Yehova. Ngu kucita wo-o cila wanda, ulizana ukuti pano sabata akusila, lyo upepezile pa vintu 7 ukwasowa ukulanda ivili vyonganye.
Umukwasi umuzima akalonda umwana wakwe ukumunena vino akuyivwa. Ne Yehova nye akalonda twamunena vino tukuyivwa pano tukupepa
6. Ipepo acawila iciyiwele nkaninye cino Leza watupa
Uzye ipepo lingatuwomya wuli pano ivintu vizifile na pano viwifile? Tambani e VIDYO.
E Baibolo yatulaya ukuti ipepo lingatwavwa ukuteka umwezo pano tukupita mu ntazi. Wazyani Wafilipi 4:6, 7, nu kulanzyanya ya-a amawuzyo:
-
Uzye ipepo likatwavwa wuli nanti aca kuti asa lyonsi pano intazi zikasila nga twapepa?
-
Avyani vimwi vino ungakunda ukupepelapo?
Uzye umanyile
Izwi lyakuti “ameni” likasula mukuti “ciwe wowonye” nanti “acisinka.” Ukufuma pano walembanga Baibolo, izwi lyakuti “ameni” alino walandanga ipepo nga lyasila.—1 Imilandu 16:36.
7. Utakwiwilila ukupepa
Impindi zimwi tungawa ni vyakucita ivivule ica kuti tungiwilila nu kupepa. Uzye Yesu walolanga wuli ipepo? Wazyani Mateyu 14:23 ne Marko 1:35, nu kulanzyanya ya-a amawuzyo:
-
Uzye e Yesu wacitanga wuli pa kuti atakwiwilila ukupepa?
-
Ngawewe ungacita wuli pakuti utakwiwilila ukupepa?
WAMWI WAKATI: “Ukupepa akuyisumbilavye impindi, amuno kutawa wino akakwivwa.”
-
Nga wewe ukutipo wuli?
IVISINKA VIKULU
Ukulanda wulyanye vino tukuyivwa pano tukupepa kukatupalamika kwe Leza, kukatuteka umwezo pano tukupita muntazi, swinya kukatupa amaka ya kucita vino vingaselesya Yehova.
Avyani Vino Wasambilila?
-
Tuzipizile ukupepa kwe weni?
-
Uzye tuzipizile ukupepa wuli?
-
Awuzima ci wuno wawa mu kupepa?
MANYILAPO NA VINJI
Zana ivyasuko ku mawuzyo yano awantu wavulila ukuwuzya pi pepo.
“Ivintu 7 Vino Muzipizile Ukumanya pi Pepo” (Ulupungu lwa kwa Kalinda, October 1, 2010)
Sambilila umulandu wuno uzipizile ukupepa na vino ungazifyako amapepo yano ukapepa.
“Amulandu ci Wuno Nzipizile Ukupepa?” (Icipande ca pa webusayiti)
Lola vino Baibolo ikasambilizya pe wino tuzipizile ukupepako.
“Uzye Nzipizile Ukupepa ku Watakatifu?” (Icipande ca pa webusayiti)
Mwe yo-o vidyo ya lwimbo lola nga ca kuti impindi na kuno ukupepela vya cindama.
Mungakunda na vyoo
AMAWUZYO YANO AWANTU WAKAWUZYAPO SANA
Uzye Isambililo lye Baibolo Ilya Nte zya kwe Yehova Lyawa Wuli?
Mwe lyoo isambililo lino Inte zya kwe Yehova wakasambilila na wantu uwiilanye, mungawomvya e Baibolo iyili yonsinye ino mukulonda. Mungitako na wali wonsinye wano mukulonda.
