LECCIÓN 09
Ña̱ oración sákuyatinña yóʼó nu̱ú Ndióxi̱
¿Á ndákanixi̱níún sava yichi̱ ña̱ xíniñúʼu ka̱ʼa̱nna xíʼún ndáaña xíniñúʼu keʼún ña̱ va̱ʼa vií koún? ¿Á íyo ña̱ xa̱a̱ ku̱a̱ʼání tiempo kúni̱ún kunda̱a̱-iniún xa̱ʼa̱? ¿Á xíniñúʼún ña̱ chika̱a̱na ndee̱ xíʼún á ña̱ sandíkona-iniún? ¿Á kúni̱ún kuyatinkaún nu̱ú Jehová? Ña̱ oración kivi chindeétáʼanña xíʼún ña̱ va̱ʼa keʼún ndiʼi ña̱yóʼo. Soo, ¿ndáa ki̱ʼva xíniñúʼu keʼún oración? ¿Á xíniso̱ʼo Ndióxi̱ ndiʼi ña̱ káʼa̱nna xíʼinra? ¿Ndáa ki̱ʼva kivi kunda̱a̱-iniún ña̱ xíniso̱ʼo Ndióxi̱ ndiʼi oración ña̱ káʼún xíʼinra? Ná kunda̱a̱-iniyó xa̱ʼa̱ ña̱yóʼo.
1. ¿Ndáana xíniñúʼu ka̱ʼa̱nyó xíʼin? Ta, ¿ndáa xa̱ʼa̱ kúú ña̱ kivi ka̱ʼa̱nyó tá kéʼéyó oración?
Ta̱ Jesús sa̱náʼa̱ra ña̱ iinlá xíʼin yiváyó ta̱ íyo chí ndiví xíniñúʼu ka̱ʼa̱nyó. Chi saá ke̱ʼé miíra oración nu̱ú Jehová. Iin yichi̱ ni̱ka̱ʼa̱nra ña̱yóʼo: “Siaʼa xíniñúʼu ka̱ʼa̱nndó xíʼinra: ‘Yivándi̱ ta̱ íyo chí ndiví...ʼ” (Mateo 6:9). Tá káʼa̱nyó xíʼin Jehová, va̱ʼaníka xáa̱yó kítáʼanyó xíʼinra.
Tá kéʼéyó oración kivi ka̱ʼa̱nyó xa̱ʼa̱ nda̱a̱ ndáaka ña̱ʼa. Soo tá kúni̱yó ña̱ ná ndakuiin Ndióxi̱ ña̱ káʼa̱nyó xíʼinra, va̱ása kivi ndukúyó ña̱ʼa ña̱ kǒo kítáʼan xíʼin ña̱ kúni̱ra. Ña̱ Biblia káʼa̱nña, “nda̱a̱ ndáaka ña̱ʼa ná ndukúyó nu̱ú Ndióxi̱, tá kítáʼanña xíʼin ña̱ kúni̱ra, xíniso̱ʼovara ña̱ káʼa̱nyó xíʼinra” (1 Juan 5:14). Ta̱ Jesús ni̱ka̱ʼa̱nra xa̱ʼa̱ sava ña̱ʼa ña̱ kivi ndukúyó tá kéʼéyó oración (kaʼvi Mateo 6:9-13). Va̱ása xíniñúʼu ka̱ʼa̱n kuitíyó xíʼin Ndióxi̱ xa̱ʼa̱ ña̱ ndóʼoyó, chi saátu xíniñúʼu taxiyó tíxa̱ʼvi ndaʼa̱ra xa̱ʼa̱ ndiʼi ña̱ xa̱a̱ kéʼéra xa̱ʼa̱yó, ta saátu ná ka̱ʼa̱nyó xíʼinra ña̱ chindeétáʼanra xíʼin inka na̱ yiví.
2. ¿Ndáa ki̱ʼva xíniñúʼu keʼéyó oración?
Ña̱ Biblia káʼa̱nña xíʼinyó ña̱ ná ka̱ʼa̱nyó xíʼin Ndióxi̱ xíʼin ndiʼi níma̱yó (Salmo 62:8). Ña̱kán, xíʼin ndinuʼu-iniyó ná ka̱ʼa̱nyó xíʼinra, kivi ndeé ka̱ʼa̱nyó xíʼinra ta saátu kivi ka̱ʼa̱n ya̱áyó xíʼinra, kivi kundichiyó, kivi kooyó á nda̱a̱ ndáaka ki̱ʼva kúni̱ miíyó, soo ná na̱ʼa̱yó ña̱ íxato̱ʼóyó Jehová. Ta saátu kivi ka̱ʼa̱nyó xíʼinra ama kúni̱ miíyó, ta saátu nda̱a̱ ndáaka nu̱ú xíkayó.
3. ¿Ndáa ki̱ʼva ndákuiin Ndióxi̱ oración ña̱ káʼa̱nyó xíʼinra?
Ku̱a̱ʼáva ki̱ʼva ndákuiinra yuʼúyó. Xíniñúʼura tu̱ʼunra ña̱ Biblia ña̱ va̱ʼa ndakuiinra ña̱ kúni̱yó kunda̱a̱-iniyó xa̱ʼa̱. Tá ná kaʼviyó tu̱ʼun Ndióxi̱ kivi ndasaa ndíchiña miíyó (Salmo 19:7; kaʼvi Santiago 1:5). Ta tá yáʼayó nu̱ú tu̱ndóʼo, Jehová kivi chindeétáʼanra xíʼinyó ña̱ kǒo kundi̱ʼi̱ní-iniyó. Ta saátu kivi kuniñúʼura na̱ káchíñu nu̱úra ña̱ chindeétáʼanna xíʼinyó.
NÁ SAKUAʼAKAYÓ XA̱ʼA̱ÑA
Ná kotoyó ndáa ki̱ʼva kivi keʼéyó oración ña̱ kútóo Ndióxi̱, ta saátu ndáa ki̱ʼva kivi chindeétáʼanña xíʼinyó.
4. Íyo sava ña̱ xíniñúʼu kiʼinyó kuenta xíʼin tá kéʼéyó oración nu̱ú Ndióxi̱
¿Ndáaña xíniñúʼu keʼéyó ña̱ va̱ʼa kuniso̱ʼo Ndióxi̱ oración ña̱ káʼa̱nyó xíʼinra? Kotondó VIDEO.
Jehová kúni̱ra ña̱ ná ka̱ʼa̱nyó xíʼin iinlá miíra. Kaʼvindó Salmo 65:2 ta ka̱ʼa̱nndó xa̱ʼa̱ ña̱yóʼo:
-
¿Á kúni̱ Ndióxi̱ ta̱ xíniso̱ʼo ndiʼi oración ña̱ ná ka̱ʼún xíʼinra? ¿Nda̱chun ndákanixi̱níún saá?
Tá kúni̱yó ña̱ ná kuniso̱ʼo Ndióxi̱ oración ña̱ káʼa̱nyó xíʼinra, xíniñúʼu chika̱a̱yó ndee̱ ña̱ keʼéyó ña̱ káʼa̱nra xíʼinyó. Kaʼvindó Miqueas 3:4 xíʼin 1 Pedro 3:12, ta ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva kivi kunda̱a̱-iniyó ña̱ xíniso̱ʼo Ndióxi̱ oración ña̱ káʼa̱nyó xíʼinra?
Tá íyo guerra u̱vi̱ tiʼvi na̱ soldado káʼa̱nna xíʼin Ndióxi̱ ña̱ ná chindeétáʼanra xíʼinna ña̱ kuchiñuna nu̱ú ku̱a̱chi kán, soo ¿á ndakuiinra oración ña̱ kéʼé na̱yóʼo?
5. Nda̱a̱ níma̱yó xíniñúʼu kana ña̱ káʼa̱nyó xíʼinra
Ku̱a̱ʼání na̱ yiví sa̱náʼa̱nana ña̱ ka̱ʼa̱n xíʼin xi̱nína oración. Soo, ¿á kútóo Ndióxi̱ oración ña̱ kéʼéna? Kaʼvindó Mateo 6:7 ta ka̱ʼa̱nndó xa̱ʼa̱ ña̱yóʼo:
-
¿Ndáaña kivi keʼéyó ña̱ va̱ása tuku ta tuku ka̱ʼa̱nyó xa̱ʼa̱ iin ña̱ʼa ña̱ xa̱a̱ ni̱ka̱ʼa̱nyó xa̱ʼa̱ tá kéʼéyó oración?
Ndakanixi̱ní xa̱ʼa̱ ña̱ʼa ña̱ livi ña̱ ndóʼún ki̱vi̱ tá ki̱vi̱, ta taxi tíxa̱ʼvi ndaʼa̱ Jehová xa̱ʼa̱ ña̱yóʼo. Tá ná keʼún ña̱yóʼo iníísaá semana, tá ná ndiʼi semana u̱xa̱ ña̱ʼa kúú ña̱ ni̱ka̱ʼún xa̱ʼa̱ tá ke̱ʼún oración.
Iin ta̱ íyo se̱ʼe kúni̱ra ña̱ xíʼin ndiʼi níma̱ ta̱ loʼo se̱ʼera ná ka̱ʼa̱nra xíʼinra. Saátu Jehová kúni̱ra ña̱ ná ka̱ʼa̱nyó xíʼinra xíʼin ndiʼi níma̱yó.
6. Iin regalo ña̱ ta̱xi Ndióxi̱ ndaʼa̱yó kúú ña̱ oración
¿Ndáa ki̱ʼva kivi taxi ña̱ oración ndee̱ ndaʼa̱yó tá yáʼayó nu̱ú tu̱ndóʼo ña̱ yo̱ʼvi̱ní? Kotondó VIDEO.
Ña̱ Biblia káʼa̱nña xíʼinyó ña̱ kivi chindeétáʼan ña̱ oración xíʼinyó ña̱ kǒo kundi̱ʼi̱ní-iniyó. Kaʼvindó Filipenses 4:6, 7 ta ka̱ʼa̱nndó xa̱ʼa̱ ña̱yóʼo:
-
Ni kǒo sáku̱taʼa ña̱ oración tu̱ndóʼo ña̱ yáʼayó nu̱ú, soo ¿ndáa ki̱ʼva chíndeétáʼanña xíʼinyó?
-
¿Ndáa ña̱ʼa kúú ña̱ kivi ka̱ʼún xa̱ʼa̱ tá ná keʼún oración?
¿Á xa̱a̱ xíni̱ún xa̱ʼa̱ ña̱yóʼo?
Ña̱ tu̱ʼun amén kúni̱ kachiña “saá koo” á “xi̱nuña”. Nda̱a̱ tá tiempo xi̱naʼáví káʼa̱nna “saá koo” tá sándiʼina kéʼéna oración (1 Crónicas 16:36).
7. Tavá tiempo ña̱ va̱ʼa keʼún oración
Sava yichi̱ íyoní chiñu nu̱úyó ta nda̱a̱ nándósóyó keʼéyó oración. ¿Á xi̱ndayáʼvi ña̱ oración nu̱ú ta̱ Jesús? Kaʼvindó Mateo 14:23 xíʼin Marcos 1:35, ta ka̱ʼa̱nndó xa̱ʼa̱ ña̱yóʼo:
-
¿Ndáaña xi̱keʼé ta̱ Jesús ña̱ va̱ʼa xi̱tavára tiempo ña̱ xi̱keʼéra oración?
-
Ta miíún, ¿ndáa ki̱ʼva kivi taváún tiempo ña̱ keʼún oración?
ÑA̱ KÁʼA̱N SAVA NA̱ YIVÍ: “Tá kéʼéyó oración, ni kǒoví na̱ xíniso̱ʼo ña̱ káʼa̱nyó”.
-
¿Ndáaña ndákanixi̱níún xa̱ʼa̱ ña̱yóʼo?
ÑA̱ XA̱A̱ SA̱KUAʼAYÓ
Tá xíʼin ndiʼi níma̱yó kéʼéyó oración nu̱ú Ndióxi̱ saá kúyatinkayó nu̱úra. Ta saátu chíndeétáʼanña xíʼinyó ña̱ va̱ása kundi̱ʼi̱ní-iniyó, ta táxiña ndee̱ ndaʼa̱yó ña̱ keʼéyó ña̱ kúni̱ Jehová.
Ná ndakaʼányó xa̱ʼa̱ ña̱yóʼo
-
¿Ndáana xíniñúʼu ka̱ʼa̱nyó xíʼin tá kéʼéyó oración?
-
¿Ndáa ki̱ʼva xíniñúʼu keʼéyó oración?
-
¿Ndáa ki̱ʼva chíndeétáʼan ña̱ oración xíʼinyó?
NANDUKÚKA XA̱ʼA̱ÑA
Kivi kunda̱a̱-iniún xa̱ʼa̱ ña̱ ndáka̱tu̱ʼun ku̱a̱ʼání na̱ yiví xa̱ʼa̱ ña̱ oración.
“U̱xa pregunta ña̱ ndáka̱tu̱ʼunna xa̱ʼa̱ ña̱ oración” (La Atalaya, 1 tí octubre ku̱i̱ya̱ 2010)
Kaʼvi nda̱chun ndáyáʼviní keʼún oración ta koto ndáa ki̱ʼva viíka keʼún ña̱yóʼo.
“¿Nda̱chun ndáyáʼviní keʼéyó oración?” (Artículo ña̱ va̱xi nu̱ú jw.org)
Koto ndáaña sánáʼa̱ ña̱ Biblia xa̱ʼa̱ ndáa na̱ xíniñúʼu ka̱ʼa̱nyó xíʼin tá kéʼéyó oración.
“¿Á va̱ʼa ka̱ʼa̱nyó xíʼin santo?” (Artículo ña̱ va̱xi nu̱ú jw.org)
Koto video yóʼo, ta kiʼún kuenta á ndáyáʼvi ama ka̱ʼa̱nyó xíʼin Ndióxi̱ ta ndáa míí ka̱ʼa̱nyó xíʼinra.
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
