CILONGESA 09

Suenenu Kuli Njambi mu ku Vundila

ZIKULENU

Vuno mue ku livua ngecize vintsimbu vimo mue ku tondeka ku mi tuamenena mu muono ni? Vuno mua kala na vimo vihula via seho vi mua tonda ku tantekeya vikumbululo ni? Vuno mue ku tondeka ku mi lembezieka na ku mi kaniamesa ni? Vuno mua tonda ku livua ngecize Yehova ua kala ha hiehi nenu ni? Nga mukemuo, ku vundila ci hasa ku mi kuasa mu vinjila viose evi. Vunoni halumo mu hasa ku lihula nguenu: Vati honi ve ku vundila? Vuno Njambi ue ku halakana vivundilo viose ni? Vika nji hasa ku linga mangana Njambi evue vivundilo viange? Tu hilulenu hali evi.

1. Kuli iya tua pande ku vundila, kaha vika tu hasa ku vundila?

Yesu ua longesele ngecize tua pande ku vundila lika kuli Tatetu ua muilu. Neni vene, ua kele na ku vundila kuli Yehova. Ua tu longesele ngueni: “Ngoco vene vundilenu ngecize: Tatetu u li muilu . . . ” (Mateo 6:9) Mu tue ku vundila kuli Yehova tue ku kaniamesa vusamba vuetu neni.

Tu hasa ku vundila kampe viuma viose-ovio. Vunoni tu tantekeya ngecize linga Njambi a kumbulule vivundilo vietu, tua pande ku vundila muaya cizango ceni. “Nga tu vundila vimosi via litombola na cizango [ca Njambi], ikeye a ku tu ivua.” (1 Yoano 5:14) Yesu ua tumbuile vimo viuma via cili vi tu hasa ku vundila. (Tandenu Mateo 6:9-13.) Citava tu kundike visoti vietu mu vivundilo, vunoni ka tua pandele ku suva ku santsela Njambi ku viuma via tu lingila kaha na ku mu vundila a kuase naua vakuetu.

2. Vati tua pande ku vundila?

Mbimbiliya ya tu kaniamesa nguayo, “muanienu mutima uenu ku meso [a Njambi].” (Visamo 62:8) Ngeci mukemuo, vivundilo vietu via pande ku tundilila mpundu ku mutima. Tu hasa ku vundila na lizi lia kama ni mu mutima lika. Tu hasa ku imana ni ku tumama ni ku kala mu nkala cifua ceka ci muesa kasingimiko. Tu hasa ku vundila ha ntsimbu yose oyo kaha naua ku cihela cose-oco.

3.Vati Njambi ue ku kumbulula vivundilo vietu?

Ue ku lingamo mu vinjila via ku liseza-seza. Ca ku muenako, Yehova ua tu hana Lizi lieni Mbimbiliya, muze mu tu hasa ku uana vikumbululo via vihula vietu. Cili vene ku tanda Lizi lia Njambi ci hasa ku “hia mangana kuli ciheve” ni nguetu uze kesi na vutongue. (Visamo 19:7; tandenu Tiango 1:5.) Cikuavo naua, a hasa ku tu hana ciyulo ca mu mutima nga tuli na ku hita mu visoti. Kaha a hasa naua ku pangesa vangamba veni mu ku tu kuasa.

TANTEKEYENU VIKUAVO

Hilulenu vati mu hasa ku vundila kuli Njambi, mu cifua ci muya ku mutima, na ku tantekeya vati ku vundila ci hasa ku mi kuasa.

4. Via tonda Njambi linga evue vivundilo vietu

Vika vi hasa ku lingisa vivundilo vietu vi ka hete ni vi honoue ku heta kuli Njambi? Talenu VIDEO.

VIDEO: Vuno Njambi ue ku Ivua Vivundilo Viose Ni?—Mutamba ua video (2:42)

Yehova ua tonda tu vundile kuli ikeye. Tandenu Visamo 65:2, kaha mu nima yaco simutuilenu ha vihula vi na hatako:

Mu ku mona cenu, vuno mukua ku ivua vivundiko ua tonda mu vundile kuli ikeye ni? Nga eyo ni kuahi, omo lia vika?

Tua pande ku lihakela kapandi ka ku yoya muaya vitume via Njambi nga tu tonda linga evue vivundilo vietu. Tandenu Mika 3:4; na 1 Petulu 3:12, kaha mu nima yaco simutuilenu ha cihula eci:

Vika tua pande ku linga mangana Yehova evue vivundilo vietu?

Mu ndzita mitamba yose ivali i hasa ku vundila linga ivule ndzita. Vuno ca sungama ku lavelela ngecize Njambi a ka kumbulula vivundilo vieyi mitamba ivali ni?

5. Vivundilo vietu via pande ku tundilila ku mutima

Vamo va va longesa ku patekela cimo civundilo mu ku ci hilukila-hilukila ntsimbu yose. Vuno mukemuo mua tonda Njambi ni? Tandenu Mateo 6:7, kaha simutuilenu ha cihula ci na hatako:

Vika mu hasa ku linga mangana kati mu hilukile-hilukile viuma vimo lika mu vivundilo vuenu?

Nkala litangua, mu hasa ku singanieka ha cimo civezikiso ca na mi hana Yehova kaha na ku mu santsela. Nga mu linga evi matangua ose mu simano, mu nima yaco mu ka mona ngecize mu na vundila viuma via ku pua 7 ca ku hona ku hilukila.

Cisemi ua cili, ua tonda vana veni va simutuile neni na mutima uose. Yehova neni ua tonda tu mu vundile na mutima uose

6. Vivundilo via pua vuana vua tu hana Njambi

Vati ku vundila ci hasa ku tu hana ndzili cipue mu vintsimbu via cili ni via vikalu? Talenu VIDEO.

VIDEO: Vivundilo vie ku tu Kuasa ku Kolesa (1:32)

Mbimbiliya ya kulahesa ngecize ku vundila ci hasa ku tu kuasa ku kala na ciyulo ca vusunga mu mutima. Tandenu Filipu 4:6, 7, Kaha simutuilenu ha vihula vi na hatako:

Vutuhu ku vundila ka ce ku manusula visoti vietu ntsimbu yose, vunoni vati ce ku tu kuasa?
Viuma vika mu tonda ku kundika mu vivundilo vienu?

Mua vi tantekeyele ni?

Lizi “ame” lia lomboloka “mukemuo vene” ni “vipuemo.” Tunde ku ntsimbu i va sonekele Mbimbiliya, vantu ve ku tumbula ame ku ntsongo ya vivundilo.—1 Mizimbu 16:36.

7. Puenu na ku tonda ntsimbu ya ku vundila

Vintsimbu vimo tu hasa ku kala na via vingi via ku panga mu cifua ca ku linga tu suva na ku vundila. Ku vundila ca kele na seho ika kuli Yesu? Tandenu Mateo 14:23 na Mako 1:35, kaha simutuilenu ha vihula vi na hatako: