TLAMACHTILI 09
Tlamaijtoli mitspaleuis xijnechkaui Jehová
¿Kemantika tijnekiskia se akajya ma mitsiljui kenijkatsa kuali tiitstos? ¿Tijneki tijmatis se keski tlamantli tlen tlauel ipati? ¿Tijneki ma mitsyolchikauakaj? ¿Tijneki nojua tijnechkauis Jehová? Tlamaijtoli uelis mitspaleuis ika ni tlamantli. Uan, ¿kenijkatsa moneki timomaijtos? ¿Kitlakakilia toTeotsij nochi tlamaijtoli? ¿Tlake uelis tijchiuas uan kiampa toTeotsij mitstlakakilis kema timomaijtos? Ma tikitakaj.
1. ¿Ajkia moneki tijnojnotsasej kema timomaijtosej, uan tlake uelis tikijtosej?
Jesús kiijtok kema timomaijtosej moneki san Jehová tijnojnotsasej. Ya kiijtok: “Kema inmomaijtosej ipan toTeko, xikiljuikaj kej ni: ‘ToTeko toTata tlen tiitstok nepa iluikakʼ” (Mateo 6:9). Kema timomaijtouaj techpaleuia nojua kuali ma timouikakaj iuaya Jehová.
Maske kema timomaijtosej uelis tijtlajtlanisej Jehová miak tlamantli, tlaj tijnekij ma technankili amo kinamiki titlajtlanisej se tlamantli tlen amo kipaktia. Biblia kiijtoua tlaj “tijtlajtlaniaj toTeko tlen kinamiki ika tlen yajaya kineki, yajaya techtlakakilia” (1 Juan 5:14). Jesús kiijtok tlake uelis tikiljuisej Jehová kema timomaijtosej (xijpoua Mateo 6:9-13). Maske kena uelis tikiljuisej Jehová tlen timoiljuiaj, nojkia moneki tijtlaskamatilisej pampa nochipa techpaleuia uan tikiljuisej ma kinpaleui sekinok.
2. ¿Kenijkatsa moneki timomaijtosej?
Biblia kiijtoua: “Xijpouilikaj [toTeotsij] nochi tlen eltok ipan inmoyolo” (Salmo 62:8). Yeka, kema timomaijtosej moneki tikijtosej tlen eltok toyolijtik. Uelis timomaijtosej chikauak o san ipan toyolo uan kej tiitstosej moneki kinextis tijtlepanitaj Jehová. Nojkia uelis timomaijtosej kampa ueli uan kema tijnekisej.
3. ¿Kenijkatsa technankilia Jehová kema timomaijtouaj?
Ya kitekiuia miak tlamantli, uan miakpa technankilia ika Biblia. Kema se akajya kipoua Biblia kipaleuia “ma tlalnamiki” (Salmo 19:7; xijpoua Santiago 1:5). Uan kema tijpiaj kuesoli, Jehová uelis techpaleuis amo tlauel ma timokuesokaj. Nojkia uelis kichiuas sekinok ma techpaleuikaj.
KUALI XIMOMACHTI
Ma tikitakaj kenijkatsa moneki timomaijtosej tlaj tijnekij toTeotsij ma techtlakakili uan kenijkatsa techpaleuia tlamaijtoli.
4. ¿Kenijkatsa moneki timonejnemiltisej tlaj tijnekij toTeotsij ma techtlakakili?
¿Tlake moneki tijtlajtlanisej toTeotsij tlaj tijnekij ma techtlakakili? Xikitakaj nopa VIDEO.
Jehová kineki san ya ma tijnojnotsakaj kema timomaijtouaj. Xijpouakaj Salmo 65:2 uan xijnankilikaj ni tlajtlanili:
-
¿Timoiljuia toTeotsij kineki ximomaijto? ¿Kenke kiampa timoiljuia?
Tlaj tijnekij toTeotsij ma techtlakakili kema timomaijtouaj, moneki timonejnemiltisej kej ya kipaktia. Xijpouakaj Miqueas 3:4 uan 1 Pedro 3:12 uan xijnankilikaj ni tlajtlanili:
-
¿Tlake moneki tijchiuas tlaj tijneki toTeotsij ma mitstlakakili?
Maske uelis katli yauij tlateuitij kiiljuiaj toTeotsij ma kinpaleui tlatlanisej, ¿timoiljuia kena kinpaleuia?
5. Moneki tikiljuisej Jehová tlen eltok toyolijtik
Miakej momajtokej kiompauiaj sanse tlamantli kema momaijtouaj. ¿Kiampa kineki toTeotsij ma tijchiuakaj? Xijpouakaj Mateo 6:7 uan xijnankilikaj ni tlajtlanili:
-
¿Tlake uelis tijchiuas tlaj amo tijneki tikompauis tlen tikijtoua kema timomaijtoua?
Mojmostla ximoiljui ipan se kuali tlamantli tlen mitspanok uan xijtlaskamatili Jehová. Tlaj kiampa tijchiuas, ipan se semana tijtlaskamatilis Jehová chikome tlamantli tlen amo eli sanse.
Se kuali tetaj kineki ikone ma kiiljui nochi tlen kiyolmati. Jehová nojkia kiampa kineki ma tijchiuakaj kema tijnojnotsaj.
6. Tlamaijtoli eli se yejyektsi tlamantli tlen Jehová techkaua ma tijchiuakaj
¿Kenijkatsa techpaleuia tlamaijtoli kema tijpiaj kuesoli? Xikitakaj nopa VIDEO.
Biblia kiijtoua tlaj timomaijtosej techpaleuis kuali ma tijyolmatikaj. Xijpouakaj Filipenses 4:6, 7 uan xijnankilikaj ni tlajtlanili:
-
Maske tlamaijtoli amo kisenkauas tokuesoljuaj, ¿kenijkatsa techpaleuia?
-
¿Tlake mitspaktiskia tikiljuis Jehová kema timomaijtos?
¿Tijmajtoya?
Nopa tlajtoli amén kiijtosneki “kiampa ma eli” o “nelnelia”. Uejkajkia, toTeotsij itekipanojkauaj nojkia kiijtouayayaj “amén” kema tlamiyayaj momaijtouaj (1 Crónicas 16:36).
7. Nochipa ximomaijto
Kemantika tlauel timotekiuiaj, yeka tikilkauaj timomaijtosej. ¿Timoiljuia Jesús kichiuayaya kampeka nochipa momaijtos? Xijpouakaj Mateo 14:23 uan Marcos 1:35 uan xijnankilikaj ni tlajtlanili:
-
¿Tlake kichiuayaya Jesús pampa kinekiyaya momaijtos?
-
Maske tlauel timotekiuia, ¿tlake uelis tijchiuas tlaj tijneki timomaijtos?
TLEN SEKINOK KIIJTOUAJ: “Kema timomaijtos amo aka mitstlakakilis, san mitspaleuis kuali xijyolmati”.
-
¿Ta tlake timoiljuia?
TLEN TIMOMACHTIJKEJ
Tlamaijtoli techpaleuia ma tijnechkauikaj toTeotsij. Nojkia techpaleuia kuali ma tijyolmatikaj uan ma tijchiuakaj tlen Jehová techiljuia.
¿Tlake tijyekok?
-
¿Ajkia kinamiki tijnojnotsasej kema timomaijtosej?
-
¿Kenijkatsa moneki timomaijtosej?
-
¿Kenijkatsa techpaleuia tlamaijtoli?
NOJKIA XIKITA NI
Xikita kenijkatsa monankilia se keski tlajtlanili tlen maseualmej motlatsintokiaj tlen tlamaijtoli.
“Chikome tlajtlanili tlen tlamaijtoli” (Tlen Tematiltia, octubre 1, 2010)
Xikita kenke tlauel ipati timomaijtos uan tlake mitspaleuis nojua kuali timomaijtos.
“¿Kenke tlauel moneki timomaijtosej?” (Tlamachtili ipan jw.org)
Xikita ipan Biblia ajkia moneki tijnojnotsas kema timomaijtos.
“¿Kinamiki tikiniljuisej santojmej ma techpaleuikaj?” (Tlamachtili ipan jw.org)
Ipan ni video ika uikatl tikitas kena uelis timomaijtosej kampa ueli.
Tlen nojkia mitspaktis tikitas
TLEN KINEKIJ KIMATISEJ
¿Kenijkatsa Jehová itlajtoltemakauaj tlamachtiaj ika Biblia?
Kema Jehová itlajtoltemakauaj mitsmachtisej ika Biblia amo mitsinamasej uan uelis tijtekiuis Biblia tlen ta tijnekis. Nojkia uelis tikintlaneuis sekinok kej mochampoyouaj o mouampoyouaj.
