ISIFUNDO 09
Sondela KuNkulunkulu Ngokuthandaza
Ubona angani uyakudinga yini ukucetshiswa? Ulemibuzo ekukhathazayo yini? Uyakufuna yini ukududuzwa? Uyafuna yini ukuba ngumngane kaJehova? Umthandazo ungakunceda kukho konke lokhu. Kodwa kumele sithandaze njani? UNkulunkulu ulalela imithandazo yonke yini? Kumele wenzeni ukuze uNkulunkulu aphendule imithandazo yakho? Ake sixoxe ngemibuzo le.
1. Kumele sikhuleke kubani njalo yiziphi izinto esingaziqamba nxa sithandaza?
UJesu wayethandaza kuJehova futhi wasifundisa ukuthi lathi sikhuleke kuBaba wethu osezulwini kuphela. Wathi: “Lina kumele lithandaze kanje: ‘Baba wethu osezulwini . . . ’” (UMathewu 6:9) Ukuthandaza kuJehova kwenza siqinise ubungane bethu laye.
Sikhululekile ukutshela uJehova loba kuyini okusezinhliziyweni zethu. Kodwa ukuze uNkulunkulu aphendule imithandazo yethu, kumele ivumelane lentando yakhe. IBhayibhili lithi: “Nxa sicela loba yini evumelana lentando [kaNkulunkulu], uyasizwa.” (1 UJohane 5:14) UJesu waqamba okunye esingakuthandazela. (Bala uMathewu 6:9-13.) Singathandaza sitshela uNkulunkulu okusikhathazayo, kodwa akumelanga sikhohlwe ukuthandazela abanye lokubonga uNkulunkulu ngakho konke asenzele khona.
2. Kumele sithandaze njani?
IBhayibhili lisikhuthaza ukuthi sitshele uNkulunkulu ‘konke okusenhliziyweni zethu.’ (IHubo 62:8) Lokhu kutsho ukuthi imithandazo yethu kumele ibe ngesuka enhliziyweni. Singakhulekela enhliziyweni kumbe siphumisela amazwi. UJehova kakhethi ukuthi sikhuleka siguqile, simile kumbe sihlezi kodwa akuqakathekisayo yikuthi sitshengise ukuthi siyamhlonipha. Sikhululekile ukuthandaza loba nini futhi kungelani lokuthi singaphi.
3. UNkulunkulu uyiphendula njani imithandazo yethu?
UNkulunkulu uphendula imithandazo yethu ngendlela ezitshiyeneyo. Ngokwesibonelo usebenzisa iLizwi lakhe iBhayibhili ukuze aphendule imibuzo eminengi esingabe silayo. Ukubala iLizwi lakhe ‘kwenza abangelalwazi bahlakaniphe.’ (IHubo 19:7; bala uJakhobe 1:5.) Enye indlela uJehova aphendula ngayo imithandazo yethu yikusincedisa ukuthi sihlaliseke nxa siphakathi kwenhlupho. Kwezinye izikhathi usebenzisa izinceku zakhe ukuthi asincedise.
GEBHA UJULE
Engxenyeni le uzafunda ukuthi ngenjani imithandazo ethokozisa uNkulunkulu lokuthi ukuthandaza kuzakunceda njani.
4. UNkulunkulu uyasitshela ukuthi sithandaze njani
Kuyini okwenza uNkulunkulu angalaleli eminye imithandazo? Bukelani IVIDIYO.
UJehova ufuna sithandaze kuye. Bala iHubo 65:2 beselixoxa ngemibuzo le:
-
Ucabanga ukuthi uNkulunkulu uyafuna yini ukuthi uthandaze kuye? Kungani usitsho njalo?
Kumele silwise ukuphila ngendlela ethokozisa uNkulunkulu nxa sifuna alalele imithandazo yethu. Bala uMikha 3:4 lo-1 Phetro 3:12 beselixoxa ngombuzo olandelayo:
-
Singenzani ukuze sibe leqiniso lokuthi uJehova uyayilalela imithandazo yethu?
UNkulunkulu uyayilalela yini imithandazo yamasotsha akhulekela ukuyanqoba empini?
5. Imithandazo yethu kumele ibe ngesuka enhliziyweni
Abanye abantu bajayele ukuphindaphinda imithandazo efananayo. Kodwa uNkulunkulu ufuna sithandaze njalo yini? Bala uMathewu 6:7 beselixoxa ngombuzo lo:
-
Ungenzani ukuze ungaphindaphindi “izinto ezifananayo kanenginengi” emithandazweni yakho?
Ilanga ngalinye, zama ukucabanga ngento eyodwa ongathanda ukuyibonga kuJehova. Ekupheleni kweviki, uyabe usuthandaze kuJehova ngezinto ezingu-7 ezitshiyeneyo ungazange uphindaphinde.
Ubaba uyathokoza nxa umntanakhe emtshela konke okusenhliziyweni yakhe. UJehova laye ufuna sithandaze kuye simtshele konke okusezinhliziyweni zethu
6. Umthandazo yisipho esivela kuNkulunkulu
Kungani kumele sithandaze nxa siphakathi kobunzima lalapho izinto zisihambela kuhle? Bukelani IVIDIYO.
IBhayibhili lithi ukuthandaza kuyasinceda ukuthi sibekezele. Bala uFiliphi 4:6, 7 beselixoxa ngemibuzo elandelayo:
-
Ukuthandaza kusinceda njani lanxa kwezinye izikhathi kungaqedi inhlupho zethu?
-
Yiziphi izinto ongafisa ukuzitshela uNkulunkulu emithandazweni yakho?
Ubukwazi yini?
Ibala elithi “ameni” litsho ukuthi “akube njalo” kumbe “kuliqiniso.” IBhayibhili liveza ukuthi lakudala, ibala elithi “ameni” lalisetshenziswa ekucineni kwemithandazo.—1 ImiLando 16:36.
7. Zinike isikhathi sokuthandaza
Kwezinye izikhathi singabambeka sicine siswela lesikhathi sokuthandaza. UJesu wayekuqakathekisa kakhulu ukuthandaza. Bala uMathewu 14:23 loMakho 1:35 beselixoxa ngemibuzo elandelayo:
-
UJesu wayesenzani ukuze athole isikhathi sokuthandaza?
-
Ungathandaza nini?
ABANYE BATHI: “Ukuthandaza akuncedi kangako.”
-
Wena uthini?
ISIFINQO
Ukuthandaza kuJehova ngenhliziyo yonke kwenza sihlaliseke, kusinike lamandla okwenza izinto ezimthokozisayo futhi kwenza sibe ngabangane bakhe.
Ufundeni?
-
Kumele sithandaze kubani?
-
Kumele sithandaze njani?
-
Ukuthandaza kusinceda njani?
THOLA OKUNENGI
Bala imagazini le ukuze uthole izimpendulo zemibuzo ejayele ukubuzwa ngabantu mayelana lokuthandaza.
“Izinto Eziyisikhombisa Okumele Uzazi Ngokuthandaza” (INqabayokulinda, October 1, 2010)
Bala isihloko lesi uzwe ukuthi kungani kuqakathekile ukuthandaza lokuthi ungenzani ukuze imithandazo yakho ibe ngesuka enhliziyweni.
“Kungani Kumele Ngithandaze?” (Isihloko esikuwebhusayithi yethu)
Bala isihloko lesi uzwe ukuthi iBhayibhili lithi kumele sithandaze kubani.
“Kumele Ngithandaze Kwabangcwele Yini?” (Isihloko esikuwebhusayithi yethu)
Bukela ividiyo le ukuze ubone ukuthi singathandaza loba nini kungelani lokuthi singaphi.
Nanku Okunye
IMIBUZO EJAYELE UKUBUZWA NGABANTU
OFakazi BakaJehova Babafundisa Njani Abantu IBhayibhili?
Uhlelo lokufunda iBhayibhili laboFakazi bakaJehova ngolwamahala njalo ukhululekile ukusebenzisa iBhayibhili olijayeleyo kanye lokunxusa izihlobo labangane ukuthi labo bafunde lindawonye.
