CIJIJO 09

Khwederanyi Phedo na Mwari ngo Kuita Mukumbiro

RIJANYI

Makambojizwa mecida ndhungamiriro mu upenyu hwenyu here? Muno muvhunjo unosisira maningi wamaida kuzwa mupinguro wakona here? Muri kuda kuembejehwa no kuvangiswa? Maidakarira kujizwa muri phedo na Jehovha? Mukumbiro ungamubesera kuti mukwanise kuwana zvese izvi. Asi ngoyapi njira yaushoni yo kuita mukumbiro? Kureva kuti Mwari anozwa mukumbiro jese here? Ngozvapi zvamungaita kuti muve no cokwadi cokuti iyena anozozwa mukumbiro jenyu? Ngatende tivone.

1. Tingaita mukumbiro kuna ani, tecikumbira ngo pamusoro penyi?

Jesu wakajijisa kuti tinodikana kuita mukumbiro kuna Baba vedu vo kudenga basi. Jesu pacake waiita mukumbiro kuna Jehovha. Iyena wakati: “Munodikana kukumbira kudari: ‘Baba wedu muri kumatenga . . .’” (Mateu 6:9) Patinoita mukumbiro kuna Jehovha, ushamwari hwedu naye hunovanga maningi.

Tingaita mukumbiro ngo pamusoro po ciri cese haco. Asi Mwari anodavira mukumbiro jedu kudari jikaithwa mukuzwirana no zvaanoda. “Tikamukumbira ciro cinozwirana no kuda kwake [Mwari], iyena anotizwa.” (1 Johani 5:14) Jesu wakatipekeja muezaniso wo zviro zvatingakumbira. (Verenganyi Mateu 6:9-13.) Patinoita mukumbiro ngo pamusoro po zviro zvedu, atidi kukanganwa kubonga Mwari ngo zviro zvaanotiitira no kukumbiriravo kuti iyena abesere vamweni.

2. Tingakumbirisa kudini?

Bhaibheri rinotivangisa kuti tivhunje Mwari “bzokuthimwathimwa [zvedu] bzese [zvatinazvo].” (Nduyo 62:9) Ngo kudaro, mukumbiro jedu jinodikana kuithwa ngo mwoyo wese. Tingaita mukumbiro ngo izwi guru kana mucinyararire, asi ngo njira iri yese inovonesa kuti tinoreremeja Jehovha. Tingaita mukumbiro pa nguva iri yese no ndau iri yese.

3. Mwari anodavirisa kudini mukumbiro jedu?

Iyena anodavira mukumbiro ngo njira jakasiyana-siyana. Jehovha wakatipa Soko rake Bhaibheri, matinowanira mupinguro jo muvhunjo jedu. Kuverenga Soko ra Mwari kunopa “hwiru vandhu [vacina uzivi].” (Nduyo 19:7; verenganyi Jakobo 1:5.) Iyena anoita kuti murangariro wedu ugajane kudari tikasongana no zvineso. Jehovha angaitazve kuti vashandiri vake vatibesere patinonga tecida besero.

NASANYI KUPSAKISISA

Vonanyi kuti mungaitisa kudini kuti muite mukumbiro unodakajisa Mwari. Vonanyizve kuti mukumbiro unomubeseresa kudini.

4. Zvatinodikana kuita kuti Mwari azwe mukumbiro wedu

Ngo zvapi zvinoitisa kuti Mwari azwe kana kuti atame kuzwa mukumbiro jedu? Rijanyi VHIDHIYO.

VHIDHIYO: Mwari Anopurukira Mukumbiro Jese Here?—Cidimbu (2:42)

Jehovha anoda kuti itusu tiite mukumbiro kwaari. Verenganyi Nduyo 65:3, perapo bhuisananyi ngo muvhunjo iji:

Munorangarira kuti ‘muzwi wo munamato’ anoda kuti imwimwi muite mukumbiro kwaari here? Ngenyi muri kunanga zvondhozvo?

Kudari tecida kuti Mwari azwe mukumbiro jedu, tinodikana kupona mukuzwirana no zvaanoda. Verenganyi Mikeya 3:4 na 1 Pedhru 3:12, perapo bhuisananyi ngo muvhunjo uwu:

Zvicinyi zvinotikhohwesa kuti Jehovha anozozwa mukumbiro jedu?

Panonga peciithwa hondo, mativi ese o maviri vanoita mukumbiro kuti vawine. Munorangarira kuti Mwari angadavira mukumbiro javo?

5. Mukumbiro jedu jinodikana kuithwa ngo mwoyo wese

Vandhu vamweni vakajijiswa kuphinda magama amwewo pa mukumbiro. Asi kureva kuti Mwari anoda kuti itusu tiite mukumbiro ngo njira yondhoyo? Verenganyi Mateu 6:7, perapo bhuisananyi ngo muvhunjo uwu:

Mungaitisa kudini kuti ‘mutame kuphinda magama ondhowo’ mu mukumbiro jenyu?

Njiku imwe nga imwe munodikana kurangarira makomborero amuri kupuwa ndi Jehovha perapo momubonga ndizvona. Zviitenyi njiku jese pa sumana, mukaita kudaro munozova no zviro zvinomwe zvo kukumbira pa sumana mucikaphindi-phindi mukumbiro.

Baba vanoda kuti mwana wavo abhuye navo zvecivha ngo mumwoyo kamare. Munjira yakaezana, Jehovha anodavo kuti tiite mukumbiro kwaari zvecivha ngo mumwoyo kamare

6. Mukumbiro icipo cinovha kuna Mwari

Mukumbiro ungativangisa kudini, maningi-ningi pamukuvo wokunesa? Rijanyi VHIDHIYO.

VHIDHIYO: Mukumbiro Unotibesera Kunyisa (1:32)

Bhaibheri rinotivhunja kuti kuita mukumbiro kunotibesera kuti tive takagajana mu murangariro. Verenganyi Vafiripi 4:6, 7, perapo bhuisananyi ngo muvhunjo iji:

Ngo zvokadi kuti mukumbiro auiti kuti zvineso zvipere. Asi iwona ungabeseresa kudini?
Ngo zvapi zvamaida kukumbira ngo pamusoro pazvo?

Imwimwi maizviziva?

Magama okuti “ameni” anoreva kuti “ngazviite kudaro” kana kuti “ngo zvokadi kamare.” Kuvhira mu nguva jo kare, gama ro kuti “ameni” rainangwa pakupera kuita mukumbiro.—1 Kronike 16:36.

7. Psakanyi nguva yokuita mukumbiro

Nguva jimweni tingatobatikana maningi totokanganwa kuita mukumbiro. Kureva kuti Jesu waivona kuita mukumbiro inga kunosisira maningi? Verenganyi Mateu 14:23 na Marko 1:35, perapo bhuisananyi ngo muvhunjo iji:

Jesu waiitenyi kuti awane mukuvo wokuita mukumbiro?
Ngo zvapi zvamungaita kuti muwane nguva yo kuita mukumbiro?

VANDHU VAMWENI VANOTI: “Kuita mukumbiro tinonga tecitamba no nguva ngokuti apana mundhu anouzwa.”

Imwimwi munotivo kudini?

ZVOTAJIJA

Zvecivoneka kuti mukumbiro jinotikhwedeja phedo na Mwari, ijona jinotibesera kuti tive no runyararo mu murangariro no kutipa vangiso yatinoda kuti tidakajise Jehovha.