OSHILESHWA 09
Hedha popepi naKalunga okupitila megalikano
Mbela oho kala wu uvite wa pumbwa ewiliko monkalamwenyo yoye? Owu na mbela omapulo ga simana ngoka wa hala ga yamukulwa? Owa pumbwa ehekeleko nenge etsomukumo? Mbela owa hala okukala wu na ekwatathano lyopothingo naJehova? Ngele osho, egalikano otali vulu oku ku kwathela miinima ayihe mbyoka. Opo Kalunga e ku uve, owu na okugalikana ngiini? Mbela Kalunga oha pulakene kegalikano kehe? Oshike to vulu okuninga, opo u uve omagalikano goye? Natu shi kundathane.
1. Okulye tu na okugalikana, noshike tatu vulu okupopya momagalikano getu?
Jesus okwe tu lombwela tu galikane owala kuTate yetu gwomegulu. Jesus naye okwa li ha galikana kuJehova. Okwa ti: “Omu na okugalikana ngeyi: ‘Tate yetu ngu u li megulu . . . ’” (Mateus 6:9) Ekwatathano lyetu naJehova ohali kolo, uuna tatu galikana kuye.
Otatu vulu okugalikana kombinga yoshinima kehe. Opo Kalunga u uve omagalikano getu, oge na okukala metsokumwe nehalo lye. Ombiimbeli otayi ti: “Ngele tatu mu indile shaa shoka she mu opalela, oye ote tu uvu ethimbo kehe.” (1 Johannes 5:14) Jesus okwa popya iinima yimwe mbyoka tatu vulu okupula momagalikano getu. (Lesha Mateus 6:9-13.) Kakele kokugalikana owala kombinga yiinima yetu yopaumwene, otwa pumbwa wo okupandula Kalunga omolwiinima mbyoka e tu pa. Otatu vulu wo oku mu pula a kwathele yalwe.
2. Otu na okugalikana ngiini?
Ombiimbeli otayi tu ladhipike tayi ti kutya “anekeni omaudhigu geni koshipala [shaKalunga].” (Episalomi 62:8) Otu na okugalikana tashi zi komutima. Otatu vulu okugalikana tatu popi muule, nenge momwenyo momukalo tagu ulike kutya otwa simaneka Jehova. Otatu vulu okugalikana ethimbo kehe nopehala kehe.
3. Kalunga oha yamukula ngiini omagalikano getu?
Ohe shi ningi momikalo dhi ili nodhi ili. Okwe tu pa Oohapu dhe, Ombiimbeli, moka tatu vulu okwaadha omayamukulo gomapulo getu. Okulesha Oohapu dhaKalunga otaku vulu “[okugandja] uunongo kumboka taa u pumbwa.” (Episalomi 19:7; lesha Jakob 1:5.) Kalunga ota vulu oku tu pa ombili yopamadhiladhilo uuna tu li momashongo. Ota vulu wo okulongitha aapiya ye, ye tu kwathele uuna twa pumbwilililwa ekwatho.
ILONGA OSHINDJI
Ilonga nkene to vulu okugalikana momukalo ngoka Kalunga a hokwa nosho wo kutya okugalikana otaku vulu oku ku kwathela ngiini.
4. Nkene tu na okugalikana, opo Kalunga e tu uve
Oshike hashi utha kutya Kalunga ota ka pulakena komagalikano getu nenge ite ke ga pulakena? Dhana OKAVIDIO.
Jehova okwa hala tu galikane kuye. Lesha Episalomi 65:2, e tamu kundathana omapulo taga landula:
-
Mbela sho to dhiladhila, Kalunga ‘ngoka hu uvu omagalikano’ okwa hala wu kale ho galikana kuye? Omolwashike to tile ngawo?
Onkalamwenyo yetu oyi na okukala metsokumwe nomithikampango dhaKalunga, ngele otwa hala a pulakene komagalikano getu. Lesha Mika 3:4 nosho wo 1 Petrus 3:12, e tamu kundathana epulo tali landula:
-
Oshike tu na okuninga, opo tu kale tu na uushili kutya Kalunga ota ka pulakena komagalikano getu?
Uuna pu na iita, oongundu ndhoka tadhi kondjithathana, aakwiita yadho ohaya galikana ya sindane. Mbela sho to tala Kalunga ota ka yamukula ngaa omagalikano ngono?
5. Otu na okugalikana tashi zi komutima
Aantu yamwe oya longwa ya kale haye endulula omagalikano gontumba ngoka yi ilonga momutse. Ihe mbela Kalunga osho ngaa a hala tu galikane ngawo? Lesha Mateus 6:7, e tamu kundathana epulo tali landula:
-
Ongiini to vulu okuyanda ‘okupopyagana’ nenge okweendulula omagalikano ngoka wu shi momutse?
Esiku kehe oto vulu okudhiladhila oshinima oshiwanawa shoka wa ningilwa, e to pandula Jehova megalikano. Ngele owe shi ningi esiku kehe momukokomoko gwoshiwike, oto ka popya iinima iheyali ya yoolokathana megalikano, nopwaa na okwiiyendulula.
Tate kehe oha kala a panda ngele omwana ta popi naye tashi zi komutima. Jehova naye okwa hala tu popye naye tashi zi komutima
6. Egalikano olyo omagano ga za kuKalunga
Egalikano otali vulu ngiini oku tu kwathela monkalamwenyo kutya nduno omomathimbo omawanawa nenge omawinayi? Dhana OKAVIDIO.
Ombiimbeli oya popya kutya egalikano otali vulu oku tu etela ombili yashili yopamadhiladhilo. Lesha Aafilippi 4:6, 7, e tamu kundathana omapulo taga landula:
-
Nonando egalikano ihali kutha po aluhe omaupyakadhi getu, ongiini tali vulu oku tu kwathela?
-
Iinima yimwe yini wa hala okukwatela momagalikano goye?
Owe shi tseya ngaa?
Oshitya “amen” otashi ti kutya “eeno osho” nenge “oshoshili.” Okuza pethimbo sho Ombiimbeli tayi nyolwa, aantu oya kala haya ti “amen” pehulilo lyegalikano. — 1 Ondjalulo 16:36.
7. Kala ho galikana pandjigilile
Omathimbo gamwe ohatu kala twi ipyakidhila noonkondo, e tatu dhimbwa okugalikana. Mbela Jesus okwa li ngaa a simaneka egalikano? Lesha Mateus 14:23 nosho wo Markus 1:35, e tamu kundathana omapulo taga landula:
-
Jesus okwa li ha ningi shike, opo a mone ompito yokugalikana?
-
Ongiini nangoye to vulu okukonga ethimbo wu galikane?
AANTU YAMWE OHAYA TI: “Uuna to galikana, nena oto mana po owala ethimbo, oshoka kapu na ngoka te ku uvu.”
-
Mbela ngoye oto ti ngiini?
OWI ILONGO SHIKE?
Egalikano tali zi komutima ohali tu hedhitha popepi naJehova, ohali tu pe ombili yopamadhiladhilo noku tu kwathela tu ninge shoka Jehova a hokwa.
Omapulo geendululo
-
Okulye tu na okugalikana?
-
Otu na okugalikana ngiini?
-
Okugalikana ohaku tu etele uuwanawa wulwe wuni?
UUYELELE WA GWEDHWA PO
Mona omayamukulo gomapulo ngoka aantu haya pula olundji kombinga yegalikano.
“Iinima iheyali mbyoka wa pumbwa okutseya kombinga yegalikano” (Oshungolangelo, 1 Novomba 2010)
Ilonga kutya omolwashike okugalikana ku li oshinima sha simana, nankene to vulu okuhwepopaleka omagalikano goye.
“Omolwashike ndi na okugalikana?” (Oshitopolwa shi li kepandja lyetu lyokointaneta)
Tala shoka Ombiimbeli tayi ti kombinga yaangoka tu na okugalikana kuye.
Pulakena kokaimbilo haka, wu mone kutya oto vulu okugalikana ethimbo kehe kutya nduno owu li peni.
Opu na ishewe uuyelele mbuka
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Ekonakonombiimbeli ndyoka hali ningwa kOonzapo dhaJehova oshike?
Oto vulu okulongitha Ombiimbeli kehe mootundi dhopaMbiimbeli dhoshali, ndhoka hadhi ningwa kOonzapo dhaJehova. Oto vulu okuhiya aantu yaandjeni nenge ookuume koye.
