WANGƆ 09

Lingɔ sambela ndo li ya eti na mangbi ti kpengbani na Nzapa

Mɔ na gwɛ̃ ya aza mɔ? Mɔ na ahũnda ti ngbondoni mɛ mɔ ndo gi gbinya ni? Mɔ na gwɛ̃ ya awamba bɛ mɔ bere asa ngunu bɛ mɔ? Mɔ na gwɛ̃ ti dɔngɔ dã na Yehova? Lingɔ sambela lengbi ti zangɔ mɔ na ya lo olo zu. Kanda se ti nzɔ̃ni ti lingɔ na sambela wa? Nzapa ndo ma sambela zu? Wa ye mɛ mɔ li ti nɛngɔ ya Nzapa ma sambela tɛ mɔ nɛ? Aye mɛ e na tɛnɛngɔ tɛnɛ ni so ya wangɔ mɛ la.

1. Zo mɛ e li sambela hɛ̃ lo na, wa ye mɛ elengbi ti yɔngɔ na ya sambela ni nɛ?

Yezo tɛnɛndó ya, elengbi ti lingɔ sambela bo hɛ̃ To e ti ndozu. Yezo nvɛ̃ni ndo li ngandó sambela hɛ̃ Yehova. Lo tɛnɛndó ya: “Wa ĩ ba se mɛ ale ĩ ndo sambela na ni lo mɛ: ‘To e mɛ ka yayu . . .’” (Matie 6:9) Ngoi mɛ e ndo li sambela hɛ̃ Yehova ko, mangbi tɛ e na lo ndo ti kpengbani.

Elengbi ti lingɔ sambela na lo ti aye zu mɛ e na gwɛ̃ ni. Biani, ti nɛngɔ ya Nzapa hɛ̃ gbinya ti sambela tɛ e ko, ayɔ ya ni mangbi na gwɛ̃ tɛ lo. Nzapa tɛnɛ ya, “se e yɔ ye mɛ bɛ lo aye ko, lo na mangɔ e.” (1 Yoanɛ 5:14) Yezo hɛ̃ se lɛlo ti nzɔ̃ni na omɛ aba ye mɛ elengbi ti yɔngɔ ni na ya sambela tɛ e. (Di Matie 6:9-13.) Se e hã yɔngɔ ye mɛ e na gwɛ̃ ni e zi ko, ale ta bɛ e li na hɛ̃ngɔ Nzapa siakɔli na lo ti aye mɛ lo hɛ̃ e nga na yɔngɔ ka ti lo ya lo za azi mɛndɛ̃ ma.

2. Elengbi ti lingɔ sambela ngasia?

Ngbangɔ sa ngunu bɛ e ya “[e] zi bɛ [e] zu hɛ̃ [Nzapa].” (Nzembo 62:8) Ni fa ya, ale sambela tɛ e ndo lo ka bɛ e. Elengbi ti lingɔ sambela na legɔ̃ ti ndozu, bere tise, elengbi ti dungɔ tise, bere longɔ ndozu. Elengbi ti lingɔ sambela ngoi zu nga na ndozu na se mɛ ndo fa ya e ndo hɛ̃ Nzapa ndima.

3. Nzapa ndo hɛ̃ gbinya ti sambela tɛ e ngasia?

Lo ndo hɛ̃ gbinya ti sambela tɛ e na lége ndɛ̃ ndɛ̃ ndɛ̃. Na lége ti Ngbangɔ, Yehova ndo hɛ̃ gbinya ti ahũnda tɛ e. Dingɔ Ngbangɔ ndo li ya “zo mɛ zanga kɔdɛ ati wa ndara.” (Nzembo 19:7; di Zaki 1:5.) Lo lengbi ti hɛ̃ngɔ e siriri ti bɛ na ngoi mɛ e ndo tengbi na kpengba kpale. Lo lengbi ti tongɔ awakwa tɛ lo ya, ala za e na ngoi mɛ e na gwɛ̃ ti ye kɔi.

GI HĨNGANGƆ LO MƐNDƐ̃

Gi hĩngangɔ se ti lingɔ sambela mɛ Nzapa ndo sepala na ni, wa gi nga hĩngangɔ anzɔ̃ kpale mɛ mɔ lua na lingɔ sambela.

4. Nzapa yɔ ya e li ye mɛ alengbi ti lingɔ ya lo ma sambela tɛ e

Ye mɛ ndo li ya Nzapa kɛ̃ bere lo ma sambela tɛ e nɛ? Ba VIDEO.

VIDEO: Nzapa ndo ma sambela zu?—Video ti ndunu ni (2:42)

Yehova yɔ ya e li hɛ̃ lo sambela. Di Nzembo 65:2, wa na pɛni hɛ̃ gbinya ti hũnda olo mɛ:

Mɔ da bɛ mɔ ya “Wa mangɔ sambela” na gwɛ̃ ya mɔ li sambela hɛ̃ lo? Nda mɛ mɔ tɛnɛ ngaso nɛ?

Ti nɛngɔ ya Nzapa ma sambela tɛ e ko, ayɔ ya e tɔndɔ andia tɛ lo. Di Mika 3:4 ná 1 Petro 3:12, wa na pɛni hɛ̃ gbinya ti hũnda olo mɛ:

Ye mɛ lengbi ti tongɔ e, e ye ya Yehova na mangɔ sambela tɛ e nɛ?

Na ngoi ti to, asoda ti mbage na mbage mɛ ndo tiri to, ndo li sambela ya Nzapa za ani ti nɛngɔ ya ani nwɔ̃ to. Elengbi ti dungɔ na dangɔ bɛ ya Nzapa lengbi ti mangɔ sambela ti ngaso?

5. Ale sambela tɛ e alo ka bɛ e

A ha na azi mɛndɛ̃ ya na ngoi mɛ ala ndo li sambela ko, ale ala ndo diri ndo tɛnɛ kɔi ngoi zu. Se mɛ Yehova yɔ ka ti e ya e li na ni la? Di Matie 6:7, wa na pɛni hɛ̃ gbinya ti hũnda olo mɛ:

Ye mɛ mɔ li ti nɛngɔ ya ta mɔ diri ndo tɛnɛ kɔi ti sambela ngoi zu ma nɛ?

Bi kɔi kɔi ndo binga li mɔ ndo lo ti nzɔ̃ni mɛ alengbi ti tongɔ mɔ ya mɔ hɛ̃ Nzapa siakɔli. Se mɔ li ngaso na ya pɔsɔ kɔi ko, mɔ na hũngɔ ya mɔ li sambela na lo ti aye mbala mbala zangangɔ ya mɔ diri ndo tɛnɛ kɔi fãni gba.

To ti nzɔ̃ni ndo sepala ya nyi ni kambisa hɛ̃ ni tɛnɛ mɛ ka bɛ lo. Yehova ndo sepala nga ya e tɛnɛ hɛ̃ lo tɛnɛ mɛ alo ka bɛ e na ngoi mɛ e ndo li hɛ̃ lo sambela

6. Sambela adu nzɔ̃ ye mɛ Nzapa hɛ̃ e

Ngasia la lingɔ sambela lengbi ti zangɔ e na ngoi mɛ e na siriri bere e tengbi na kpengba lo nɛ? Ba VIDEO.

VIDEO: Libondeli esalisaka biso toyika mpiko (1:32)

Ngbangɔ ko kapa ya lingɔ sambela alengbi ti hɛ̃ngɔ e siriri ti bɛ. Di Filipɛ 4:6, 7, wa na pɛni hɛ̃ gbinya ti ahũnda olo mɛ:

Abɛse du ya ta lingɔ sambela ndo onzi pɛnɔ tɛ e ngoi zu ma, wa ni ndo za e ngasia?
Aye mɛ mɔ lengbi ti lingɔ sambela na lo ni nɛ?

Mɔ hĩnga ni?

Tɛnɛ mɛ “amen” afa ya “se ni la” bere “adu biani.” Na ngoi ti gã, ando tɛnɛndó “amen” ka nda sambela mɛ zo kɔi li.—1 Ntango 16:36.

7. Vɔ̃ ngoi ti lingɔ sambela

Na ya ngoi mɛndɛ̃ bɛ e ndo li na lingɔ sambela na lo mɛ ya e na akpale gba ti lingɔ ni. Nda mɛ Yezo ndo hũndó ya lingɔ sambela du ngbondoni nɛ? Di Matie 14:23 ná Marko 1:35, wa na pɛni hɛ̃ gbinya ti ahũnda olo mɛ:

Ye mɛndó Yezo ndo li ti luangɔ ngoi ti lingɔ sambela nɛ?
Ngoi mɛ wa la mɔ lengbi ti lingɔ sambela nɛ?

AZI MƐNDƐ̃ NDO TƐNƐ YA: “Lingɔ sambela adu gelengɔ na ngoi, na lo mɛ ya ta zo ti mangɔ ni da ma.”

Se zo kɔi tɛnɛ ngaso, gbinya mɛ mɔ hɛ̃ lo nɛ?

NA NDUNU NI

Sambela mɛ ndo lo ka bɛ e, ndo li ya e ti na mangbi ti kpengbani ná Nzapa, e du na dangɔ bɛ ti siriri, wa ni ndo hɛ̃ e nga ngunu mɛ e na gwɛ̃ ni ti nɛngɔ ya e li ye mɛ bɛ Yehova ndo ye.