MWAHA 09

Mmwaacamele Muluku Orweela mu Nivekelo

ORUMIHA

Apwanne hamutonko wuupuwela wi munnachuna oohoolela mookumini? Mookhalano makoho oochuneya yaawo munachunaanyu maakhulo aya? Mano, munnachuna nihakararyo naari nlipiho? Mano, mwaamusiveliwa okhala awaacameleya wa Yehova? Nivekelo nnamookhaviheryaani waakhwaniherya ichu seiya soothene. Nyenya tuuvi ori mukhalelo waphaama wa ovekela? Apwanne Muluku onnawiriyana mavekelo oothene? Tiheeni munaphwanelaanyu opaka wi muroromele wi owo onahaala owiriyana mavekelo anyu? Hankooni nthokororye.

1. Taani nnaphwanelaahu omvekela, nave nnaphwanela ovekela vooloca sa eheeni?

Yesu oohusiha wi nnaphwanela ovekelaka pahiru wa Tiithi ahu a wirimu. Yesu aanavekela wa Yehova. Owo oriye: “Nyuwo muvekeleke hiiha: ‘Atiithihu muri wirimu . . . ’” (Mateu 6:9) Vaavaa nnavekelaahu wa Yehova, ninnalipiha onthamwene ahu ni yoowo.

Hiyaano nnanwerya ovekela vooloca sa echu vyakala. Mwawiihiiha, wi Muluku aakhule mavekelo ahu, awo anaphwanela wiiwanana ni yookhwela awe. “Navekaru echu ntoko mwa okhwela wawe, [Muluku] onnaniiwa.” (1 Yohani 5:14) Yesu oovaha yootakiherya wa ichu soophwanelela ovekela. (Mwaalakhanye Mateu 6:9-13.) Ohiya pahiru ovekela wa ichu seiyo inanithowa, hannaphwanela ocuwala omuthamalela Muluku wa yeeyo opankeiye ntakhara hiyaano ni omveka wi aakhaviherye achu akina.

2. Nnaphwanela ovekela mwawiihai?

Piipiliya onnanceenyerya wi “muloceno [ni Muluku] ni murima anyu woothene.” (Salumu 62:8) Mwawiihiiha mavekelo ahu anaphwanela okhala ookhumela vathi va murima. Nnanwerya ovekela moovuwa naari moomaaleleya nave mmukhalelo yoowo onooniherya wi ninnamucicimiha Yehova. Nnanwerya ovekela ilukuluku soothene ni mmapuro oothene.

3. Muluku onaakhula hai mavekelo ahu?

Owo onnaakhula mavekelo ahu mmikhalelo soohiyanahiyana. Yehova oovahererya Masu awe, Piipiliya, mwemmo nnaphwanyaahumo maakhulo a makoho ahu. Waalakhanya Masu a Muluku onanwerya omweeriha “oolosowa [okhala a] miruku.” (Salumu 19:7; mwaalakhanye Tiyako 1:5.) Owo onanwerya onivaha murecele wa mmuupuweloni vaavaa nnahoolelaahu makacamiho. Nave onanwerya waaceenyerya alapeli awe wi enivahe nikhaviheryo vaavaa nnachunaahu.

OHUSERYA MWAWIISEELA

Muthokororye mukhalelo muneeraanyu mvekele mmukhalelo onamuhakalaliha Muluku, nave musuwele mukhalelo nivekelo nneeraaya nookumiheryeeni mphurelo.

4. Mukhalelo nnaphwanelaahu ovekela wa Muluku

Ichu taani inooniherya wi mavekelo ahu anneemereryiwa ni Muluku naari hooye? Moone EXILEMA.

EXILEMA: Será que Deus escuta todas as orações?—Trecho (2:42)

Yehova onachuna wi nivekeleke wa yoowo. Mwaalakhanye Salumu 65:2, nave voocharela muthokororye makoho ala:

Munuupuwela wi ‘Namawiriyana a mavekelo’ onnachuna wi nyuwaano mvekeleke wa yoowo? Waakhanle wi aa ntakhara heeni, naari waakhanle wi hooye ntakhara heeni?

Wakhala wi ninnachuna wi owo awiriyaneke mavekelo ahu nnaphwanela okhala mwawiiwanana ni malakiheryo awe. Mwaalakhanye Mikeya 3:4 ni 1 Pedro 3:12, nave voocharela muthokororye nikoho nla:

Nni nroromele hai wi Yehova onahaala owiriyana mavekelo ahu?

Variyari va ekhoco, makhuuru oomeeli a anakhoco annavekela wi evoothe. Apwanne ti yoophwanelela oweherya wi Muluku onamwaakhula mavekelo yaawo?

5. Mavekelo ahu anaphwanela orweela vathi va murima

Achu akina aaleeliwa oloca nivekelo nimohamoha ekwaha ti ekwaha. Apwanne Muluku onachuna wi nivekeleke mmukhalelo yoowo? Mwaalakhanye Mateu 6:7, nave voocharela muthokororye nikoho nla:

Muni musepe hai ‘wuuluulela masu yaawo-yaawo’ mmavekelo anyu?

Nihiku ti nihiku, munaphwanela wuupuwela mareeliho ooluluwanya mu okumi anyu nave voocharela mmuthamalele Yehova ntakhara mareeliho yaawo. Mweerano hiiha nihiku ti nihiku va esumana, munahaala ovekela ntakhara ichu thanu napiili muhuuluulenle mavekelo anyu.

Tiithi aphaama onaweherya wi mwanawe aloceke ni yoowo ni murima woothene. Moolikana, Yehova onaweherya wi nivekeleke wa yoowo ni murima ahu woothene

6. Nivekelo yamahala enarweela wa Muluku

Ti mwawiihai nivekelo nnaweryaaya onilipiha, mu ilukuluku saphaama ni ilukuluku soovila? Moone EXILEMA.

EXILEMA: Nivekelo Ninnanikhaviherya Ovilela Ilukuluku Soovila (1:32)

Piipiliya onnaniroromeliha wi nivekelo nnanwerya onikhaviherya okhalano murecele weeparipari wa mmuupuweloni. Mwaalakhanye Filipi 4:6, 7, nave voocharela muthokororye makoho ala:

Naamwi nivekelo nihimalihaka makacamiho ahu, ti mwawiihai nlo nnanikhaviheryaaya?
Ichu taani mwaahaalaanyu osiveliwa oloca mu nivekelo?

Nyuwaano mwaanasuwela?

Masu awi “amen” anataphulela wi “ekhale hiiha” naari “yeereye hiiha.” Ovinyerya ilukuluku sakhalai, “amen” aapakiwa wookuchulani wa nivekelo.—1 Matharihelo 16:36.

7. Mwiivahe elukuluku ya ovekela

Ikwaha ikina nnamukhala ooweiwa ophiyerya ocuwala ovekela. Yesu oona hai ovekela? Mwaalakhanye Mateu 14:23 ni Marko 1:35, nave voocharela muthokororye makoho ala:

Tiheeni Yesu aapakeiye wi akhaleno elukuluku ya ovekela?
Elukuluku taani muneeraanyu nwerye ovekela?

ACHU AKINA ANI: “Nivekelo ori omaliha elukuluku woona wi haavo onawiriyana.”

Tiheeni mwaahaalaanyu oloca?

MUKWASU

Mavekelo ookhumela vathi va murima annanaacameliha wa Muluku, annanivaha murecele wa mmuupuweloni, nave annanivaha ikuru nnachunaahu wi nimuhakalalihe Yehova.