TLAMACHTIJLI 09

Uelis más kuajli touikaskej iuan toTajtsin tla tiknotsaj

REPRODUCIR EN

¿Kemantika xok tikmati tlenon tikchiuas niman tikneki mamitspaleuikan? ¿Tikneki itlaj tikasikamatis, san ika, xakaj ueli mitspaleuiya? ¿Tikneki yakaj mamitsyolchikaua? ¿Tikuelitaskia más kuajli timouikas iuan Jehová? Tla kema, xnotsa toTajtsin. San ika ¿kenijki noneki tiknotsaskej toTajtsin? ¿Kinkaki toTajtsin nochimej akin kinotsaj? ¿Tlenon uelis tikchiuas niman ijkon toTajtsin mamitskaki ijkuak tiknotsas? Matikitakan.

1. ¿Akinon noneki tiknotsaskej niman tlenon uelis tikijliskej?

Jesús okijto ika san noneki tiknotsaskej toueyiTajtsin Jehová. Jesús nochipa kinotsaya Jehová. Se tonajli yejua okijto: “Ijkin xchiuakan oración: ‘ToTajtsin, akin tinemi ne iluikak...’” (Mateo 6:9). Ijkuak tiknotsaj toTajtsin noso tikchiuiliaj “oración”, más kuajli iuan touikaj.

Ijkuak tiknotsaskej toTajtsin, uelis tikijliskej nochi tlen tiknekiskej. San ika, tla tiknekij matechnankili, xnoneki tiktlajtlaniliskej tlen yejua xkuelita. Biblia kijtoua ika tla tiktlajtlaniliaj itlaj tlen yejua kuelita, yejua techkakis (1 Juan 5:14). Jesús okijto tlenon uelis tiktlajtlaniliskej toTajtsin (xkita Mateo 6:9-13). Uelis tikijliskej toTajtsin tlen techajmana niman tlen tiknekij. San ika, noijki noneki tiktlasojkamachiliskej nochi tlen yokichiuj topampa niman tiktlajtlaniliskej makinpaleui oksekimej.

2. ¿Kenijki noneki tiknotsaskej toTajtsin?

Biblia kijtoua: “Xkijlikan [Dios] nochi tlinon mechajmana” (Salmo 62:8). Kuakon, nochi tlen tikijliskej toTajtsin noneki kisas ipan toyojlo. Yejua techkakis maski tla chikauak noso san ichtakatsin tiknotsaj. San kanon niman san kemanon uelis tiknotsaskej toTajtsin. ToTajtsin xtechijlia tla noneki tijkatoskej noso totlalijtoskej ijkuak tiknotsaskej. San ika, noneki nesis ika tiktlakaitaj ijkuak tiknotsaskej.

3. ¿Kenijki technankilia toTajtsin ijkuak itlaj tiktlajtlaniliaj?

Jehová miyekpa technankilia ika Biblia. Tla tikitaj tlen kijtoua iTlajtol toTajtsin, titlamachilisejkej yeskej niman tikasikamatiskej tlen miyekpa totlajtoltiaj (Salmo 19:7; xkita Santiago 1:5). Niman tla kemantika tikixnamikij tlen xkuajli, Jehová uelis kichiuas maka sajnoye matajmanakan. Jehová noijki uelis kintekitiltis itekipanojkauan niman ijkon techpaleuis.

OKSEKI XKASIKAMATI

Matikitakan kenijki noneki tiknotsaskej toTajtsin niman ijkon uelis techkakis.

4. Jehová techijlia kenijki noneki tiknotsaskej

¿Tlenon noneki tikchiuaskej niman ijkon matechkaki toTajtsin? Xkitakan VIDEO.

VIDEO: ¿Kinkaki toTajtsin nochimej akin kinotsaj? (san achijtsin) (2:42)

Jehová kineki san yejua matiknotsakan. Xkitakan Salmo 65:2 niman xtlajtokan itech yejuin:

¿Tiknemilia ika toTajtsin kinektika xnotsa? ¿Tleka ijkon tiknemilia?

Tla tiknekij matechkaki toTajtsin, noneki tikchiuaskej tlen yejua kuelita. Xkitakan Miqueas 3:4 (TNM) niman 1 Pedro 3:12, niman xtlajtokan itech yejuin:

¿Tlenon noneki tikchiuaskej niman ijkon toTajtsin matechkaki ijkuak tiknotsaskej?

Tla sekimej soldados akin yauej ipan guerra kitlajtlaniliaj toTajtsin makinpaleui, ¿tiknemilia ika kinkakis niman kinpaleuis?

5. Matikijlikan toTajtsin tlen onka ipan toyojlo

Miyekej, ijkuak kinotsaj toTajtsin, kijtouaj seki oraciones niman seki rezos tlen yokintsontekontlalijkej. Kinemiliaj ika san ijkon uelis kinkakis toTajtsin. San ika ¿yejon tlen kineki toTajtsin matikchiuakan? Xkitakan Mateo 6:7 niman xtlajtokan itech yejuin:

¿Tlenon uelis tikchiuaskej niman ijkon xnochipa san no yejua tikijtoskej ijkuak tiknotsaskej toTajtsin?

Mojmostla xtlanemili itech itlaj kampa otikitak ika toTajtsin omitspaleui niman xtlasojkamachili. Tla ijkon tikchiua, tikitas ika ipan se semana miyekpa otiknots toTajtsin niman xsan no yejua otikijli.

Se tajtli kuelitaskia ika ikoneuj makijli tlenon ipan nochiua. Jehová noijki kineki matikijlikan tlen topan nochiua niman tlen tiknemiliaj.

6. Melak kualtsin ika toTajtsin techkauilia matiknotsakan

¿Kenijki techpaleuis tla tiknotsaj toTajtsin ijkuak tikixnamikij tlen xkuajli? Xkitakan VIDEO.

VIDEO: Uelis titlaxikoskej tla tiknotsaj toTajtsin (1:32)

Biblia techijlia matiknotsakan toTajtsin ijkuak itlaj techajmanas, pampa yejon techpaleuis matitlaxikokan. Xkitakan Filipenses 4:6, 7 niman xtlajtokan itech yejuin:

¿Kenijki techpaleuis toTajtsin tla tiknotsaj ijkuak itlaj techajmana?
¿Tlenon tikuelitaskia tikijlis toTajtsin ijkuak tiknotsas?

¿Tikmatiya yejuin?

Tlajtojli amén kijtosneki “ijkon manochiua”. Ijkuak titlamij tiknotsaj toTajtsin, tikijtouaj “amén” noso “ijkon manochiua”. Biblia kijtoua ika desde yeuejkaui ijkon uajnochiujtiuj (1 Crónicas 16:36).

7. Nochipa xkilnamiki tiknotsas toTajtsin

Kemantika tikilkauaj tiknotsaskej toTajtsin pampa tikpiyaj miyek tekitl. San ika, Jesús nochipa kinotsaya Jehová maski noijki kipiaya miyek tekitl. Xkitakan Mateo 14:23 niman Marcos 1:35, niman xtlajtokan itech yejuin: