FAMAHAʼÖ 09
Hatöʼö Ndraʼugö khö Lowalangi ba Wangandrö
Hadia no irai örasoi wa moguna khöu wanuturu lala ba waʼauri andre? Hadia so wanofu-nofu somasiʼö öʼila fanema li? Hadia örasoi wa moguna khöu wondrara dödö hegöi famarou dödö? Hadia omasiʼö na abölö ahatö ndraʼugö khö Yehowa? Tola ösöndra daʼö fefu na ölau mangandrö. Hizaʼi, hewisa zatulönia na mangandrö? Hadia ahori ifondrondrongo fefu wangandrö Lowalangi? Hadia zinangea öfalua enaʼö ifondrondrongo wangandröu Lowalangi? Datatutunö.
1. Haʼökhö sindruhunia mangandrö ita ba hadia manö zinangea taʼangandröi?
Ifahaʼö ita Yesu enaʼö mangandrö ita ha khö Namada si so ba zorugo. Yesu manö mangandrö ia khö Yehowa. Imane, ”Andrö, mimane wangandrö: ’He Ama khöma si so ba zorugo . . . ʼ” (Mataiʼo 6:9) Na mangandrö ita khö Yehowa, itugu aro wahuwusada khönia.
Ba ginötö mangandrö ita, tola taʼandrö gofu hadia manö, asala tefaudu ba zomasi Yehowa. Na tafalua daʼö, ifondrondrongo wangandröda Yehowa. Imane Sura Niʼamoniʼö, ”Ifondrondrongo [Lowalangi] gofu hadia ia niʼandröda si faudu ba zomasi ia.” (1 Yohane 5:14) No ibeʼe khöda duma-duma Yesu hadia manö zinangea taʼangandröi. (Baso Mataiʼo 6:9-13.) Na mangandrö ita, böi ha ba wangandrö fanolo börö me no göna ita abula dödö. Böi olifu ita ba wangandrö saohagölö khö Lowalangi ba zi no ifalua khöda. Baero daʼö, moguna göi taʼohe ba wangandrö niha böʼö.
2. Hewisa zatulönia wangandröda?
Imane Sura Niʼamoniʼö, ”Mifaehagö khö [Lowalangi] nösi dödömi.” (Sinunö 62:8) Na simanö, fangandröda enaʼö sindruhu-ndruhu soroi ba dödöda. Na mangandrö ita tola ebua li mazui ha bakha ba dödö. Tola mangandrö ita gofu hezo ba gofu hadia ginötö. Lö ifaso ita Yehowa hewisa wetaroda na mangandrö ita khönia, duma-dumania, mosindro mazui tatuhi danö. Hizaʼi, sabölö moguna mangandrö ita safönu famosumange.
3. Hewisa Lowalangi ba wameʼe fanema li ba wangandröda?
Oya lala niʼogunaʼö Yehowa ba wameʼe fanema li ba wangandröda. Sambua lala niʼogunaʼö Yehowa yaʼia daʼö Taromalinia, Sura Niʼamoniʼö. Ba Zura Niʼamoniʼö, tola tasöndra wanema li moroi ba zinofu-nofuda. Taromali Lowalangi tola ”ifofaʼatua-tua zambö tödö”. (Sinunö 19:7; baso Yakobo 1:5.) Ifondrondrongo wangandröda Yehowa ba ibeʼe khöda wanolo enaʼö lö fawuka gera-erada na göna ita abula dödö. Tola iʼogunaʼö nono mbanuania ba wameʼe khöda fanolo ba ginötö moguna khöda wanolo andrö.
ODÖDÖGÖ NASA WANGALUI
Tatutunö dania hadia manö wangandrö si möi fangomuso dödö Lowalangi, ba hadia mbua nitemau na mangandrö ndraʼugö khönia.
4. Nitötöna Lowalangi na mangandrö ita
Hadia manö mbörö wa ifondrondrongo wangandröda Lowalangi? Futa VIDEO.
Omasi Yehowa na mangandrö ita khönia. Baso Zinunö 65:2, ba beʼe wanema li ba wanofu-nofu daʼa:
-
Moloʼö yaʼugö, hadia omasi ”Zamondrondrongo fangandrö” na mangandrö ndraʼugö khönia? Hadia mbörö wa öwaʼö daʼö?
Na omasi ita ifondrondrongo wangandröda Lowalangi, moguna taforege enaʼö tafaudugö ba waʼaurida goi-goinia. Baso Mikha 3:4 ba 1 Fetero 3:12, ba beʼe wanema li ba wanofu daʼa:
-
Hadia zinangea tafalua enaʼö ifondrondrongo wangandröda Yehowa?
Ba ginötö fasuwö, faoma lalau mangandrö faoma fatambai enaʼö möna ira. Hadia faoma ifondrondrongo wangandröra andrö Lowalangi?
5. Fangandröda enaʼö soroi ba dödö
Ato niha nifahaʼö ba wangandrö nitanö ba dödö. Hizaʼi, hadia fangandrö simane daʼö zomasi Lowalangi? Baso Mataiʼo 6:7, ba beʼe wanema li ba wanofu daʼa:
-
Hewisa enaʼö lö ’öfuli ötötöi wehede si no ötötöi mege’ ero na mangandrö ndraʼugö?
Ero maʼökhö, tandraigö törö tödöu sambua howu-howu nitemamö ba zi maʼökhö daʼö, ba andrö saohagölö khö Yehowa ba howu-howu si no ötema andrö. Na öfalua daʼö barö zi samigu, so fitu ngawalö wangandröu si faböʼö-böʼö ba lö öfuli ötöi-töi.
Ama sebua faʼomasi, tatu manö omasi ia ifondrondrongo na so nitutunö nononia. Omasi göi Yehowa na mangandrö ita soroi ba dödö
6. Fangandrö no buala moroi khö Lowalangi
Hewisa wa tola möi fangabölöda wangandrö na göna ita abula dödö? Futa VIDEO.
Ifabuʼu khöda Sura Niʼamoniʼö wa tola möi fanoloda wangandrö irege lö fawuka gera-erada ba ginötö alua gabula dödö. Baso Wilifi 4:6, 7, ba beʼe wanema li ba wanofu-nofu daʼa:
-
Me no awai mangandrö ita, te lö nasa saheta gabula dödöda. Hewaʼae simanö, hadia mbua nitemada na talau mangandrö?
-
Hadia manö zomasiʼö öʼohe ba wangandrö?
Hadia öʼila?
Ngawua wehede ”yaduhu” eluahania ”yasimanö zalua” mazui ”hasambalö”. Iʼotarai ba götö Zura Niʼamoniʼö, ero na afuriata wangandrö, lamane, ”Yaduhu.”—1 Ngaʼötö 16:36.
7. Beʼe ginötöu ba wangandrö
Itaria olifu ita wangandrö börö waʼoya halöwöda. Ba waʼauri Yesu, moguna sibai khönia wangandrö. Baso Mataiʼo 14:23 ba Mareko 1:35, ba beʼe wanema li ba wanofu-nofu daʼa:
-
Hadia nifalua Yesu enaʼö so ginötönia wangandrö?
-
Hawaʼara so ginötöu wangandrö?
SO ZANGUMAʼÖ: ”Asese ae ulau mangandrö, ba hana wa lö ifondrondrongo wangandrögu Lowalangi?”
-
Hewisa moloʼö yaʼugö?
RAHU-RAHU WAMAHAʼÖ
Na mangandrö ita soroi ba dödö, tola ahatö ita khö Lowalangi. Lö fawuka wangera-ngerada ba ginötö alua gabula dödö ba aro gangetulada ba woloʼö Yehowa.
Hadia Wamahaʼö si Tola Öhalö?
-
Haʼökhö zindruhunia mangandrö ita?
-
Hewisa zatulönia wangandröda?
-
Hadia manö mbuania na mangandrö ita?
ALUI NASA DANÖ BÖʼÖ
Baso wanema li moroi ba zasese lasofu-sofu niha sanandrösa ba wangandrö.
Hadia mbörö wa mangandrö ndraʼugö ba hewisa enaʼö tefaudu wangandröu?
Moloʼö Sura Niʼamoniʼö, haʼökhö zindruhunia mangandrö ita?
Ba video musik andre, faigi hadia tola mangandrö ita gofu hezo manö ba gofu hadia ginötö.
Te Göi Adöni Dödöu
SASESE LASOFU NIHA
Hewisa Wamahaʼö Zura Niʼamoniʼö Nifaʼema Ndra Samaduhuʼö Yehowa?
Lö muʼandrö gefe ba program daʼa. Tola öʼogunaʼö gofu hadia manö wamoʼeluaha Zura Niʼamoniʼö somasiʼö. Tola göi ökaoni nawöu mazui ösi nomou ba wefao khöu.
