FAKAAKOAGA 09
Fakatata ke he Atua he Liogi
Kua logona hifo nakai e koe e lata haau ke fai takitakiaga e moui? Fai hūhū aoga lahi nakai a koe kua manako ke moua e tali? Lata nakai a koe ke moua e fakamafana po ke atihake? Manako nakai a koe ke logona hifo e tata lahi ki a Iehova? Maeke e liogi ke lagomatai a koe ke he tau mena oti ia. Ka ko e heigoa e puhala hako ke liogi? Fanogonogo nakai e Atua ke he tau liogi oti? Ko e heigoa haau ka taute ke logona mooli e ia e tau liogi haau? To kitekite a tautolu ki ai.
1. Lata a tautolu ke liogi ki a hai mo e hagaao ke he heigoa e liogi ha tautolu?
Fakaako e Iesu kua lata a tautolu ke liogi hokoia ni ke he ha tautolu a Matua he lagi. Liogi foki a Iesu ki a Iehova. Pehē a ia: “Hanai, kia liogi pehe a mutolu, Ha mautolu a Matua na e, ha ha he lagi . . . ” (Mataio 6:9) He liogi a tautolu ki a Iehova, to fakamalolō e kapitiga ha tautolu mo ia.
Maeke a tautolu ke liogi hagaao ke he tau mena kehekehe. Ka ke tali he Atua e tau liogi ha tautolu, lata e tau liogi ke fakatatau ke he finagalo haana. “Kaeke ke ole atu ai e tautolu ha mena ke lata mo e hana [Atua] finagalo, ti fanogonogo mai ai a ia kia tautolu.” (1 Ioane 5:14) Talahau e Iesu e tau mena kua lata ke liogi hagaao ki ai. (Totou Mataio 6:9-13.) Lafi ke he liogi hagaao ke he tau mena ne tupetupe a tautolu ki ai, ua nimo ke fakaaue ke he Atua ma e tau mena ne taute e ia ma tautolu mo e ole ki a ia ke lagomatai e falu.
2. Lata a tautolu ke liogi fēfē?
Fakamalolō mai he Tohi Tapu “kia fakatokanoa e [ha tautolu] a tau loto ki mua hana” ko e Atua. (Salamo 62:8) Ti kua lata e tau liogi ha tautolu ke hake mai mooli he tau fatuakiloto. Maeke a tautolu ke liogi fakaleo lahi, po ke ke he loto, mo e he ha puhala kua fakalilifu ki a Iehova. Maeke a tautolu ke liogi he ha magaaho mo e he ha matakavi.
3. Tali fēfē he Atua e tau liogi ha tautolu?
Tali e ia he tau puhala kehekehe. Ne foaki e Iehova e Kupu haana ko e Tohi Tapu, ti moua e tautolu e tau tali ke he tau hūhū ha tautolu. Ko e totou e Kupu he Atua “kua fakailoilo a lautolu kua goagoa.” (Salamo 19:7; totou Iakopo 1:5.) Maeke a ia ke foaki mai e mafola he manamanatuaga ka fehagai a tautolu mo e tau lekua. Ti maeke a ia ke omoomoi e tau fekafekau haana ke lagomatai a tautolu ka lata mooli a tautolu ke moua e lagomatai.
KUMIKUMI FAKAHOKULO
Kumikumi ke he puhala kua maeke a koe ke talahau e tau liogi mai he loto kua fakafiafia e Atua, mo e ke iloa e puhala kua aoga e liogi ki a koe.
4. Fai tuaga e Atua ke he liogi
Ko e heigoa ka taute e tau liogi ha tautolu ke talia po ke nakai talia he Atua? Tā e VITIŌ.
Manako a Iehova ke liogi a tautolu ki a ia. Totou Salamo 65:2, ti tutala ke he tau hūhū nei:
-
Manatu nakai a koe kua manako e “fanogonogo liogi” ke liogi a koe ki a ia? Ko e ha ne manatu pihia a koe, po ke ko e ha ne nakai manatu pihia a koe?
Lata a tautolu ke lali ke momoui fakatatau ke he tau tuaga he Atua ka manako a tautolu ke fanogonogo a ia ke he tau liogi ha tautolu. Totou Mika 3:4 mo e 1 Peteru 3:12, ti tutala ke he hūhū nei:
-
Maeke fēfē a tautolu ke iloa mooli to fanogonogo a Iehova ke he tau liogi ha tautolu?
He felakutaki, ne liogi e tau faahi ne ua ke kautū. Lata nakai ke amanaki to tali he Atua e tau liogi nei?
5. Lata a tautolu ke liogi mai he tau loto
Falu tagata ne fakaako ke fatiaki e tau kupu he tau liogi pauaki. Ka ko e puhala nakai a ia kua manako e Atua ke liogi a tautolu ki a ia? Totou Mataio 6:7, ti tutala ke he hūhū nei:
-
Kalo kehe fēfē a koe he “pola mau” e tau kupu he tau liogi haau?
He tau aho takitaha, liga manamanatu a koe ke he taha monuina pauaki he moui haau ti fakaaue ki a Iehova ma e monuina ia. Taute pihia ke he tau aho oti ke he taha e faahi tapu, to liga fitu e matakupu kehekehe he tau liogi haau ti nakai pola mau e tau kupu liogi haau.
Ko e matua taane mitaki kua manako ke he tama haana ke tutala ki a ia mai he loto. Pihia foki, manako a Iehova ke liogi ki a ia mai he tau loto ha tautolu
6. Ko e liogi ko e mena fakaalofa mai he Atua
Lagomatai fēfē he liogi a tautolu he tau magaaho mitaki mo e tau magaaho kelea? Tā e VITIŌ.
Mavehe mai he Tohi Tapu to lagomatai he liogi a tautolu ke fakatotoka mooli e manamanatuaga. Totou Filipi 4:6, 7, ti tutala ke he tau hūhū nei:
-
Pete kua nakai utakehe tumau he liogi e tau lekua ha tautolu, ko e heigoa mogoia e lagomatai?
-
Ko e heigoa falu mena kua manako a koe ke liogi hagaao ki ai?
Iloa nakai e koe?
Ko e kupu “amene” kua kakano “pihia ni” po ke “moolioli.” Tali mai he tau vahā Tohi Tapu, kua talahau “amene” he matahiku he tau liogi.—1 Nofoaga he Tau Patuiki 16:36.
7. Fakatoka e magaaho ke liogi
Falu magaaho kua liga lavelave lahi a tautolu ti nimo ia tautolu ke liogi. Aoga fēfē ki a Iesu e liogi? Totou Mataio 14:23 mo e Mareko 1:35, ti tutala ke he tau hūhū nei:
-
Fakatoka fēfē e Iesu e magaaho ke liogi?
-
Liga ko e tau magaaho fe ka liogi a koe?
PEHĒ FALU TAGATA: “Nakai fai aoga e liogi ha kua nakai tali he Atua e tau liogi haaku.”
-
Ko e heigoa haau ka talahau?
MANATU KATOA
Ko e tau liogi mai he loto kua fakatata lahi a tautolu ke he Atua, fakatotoka e manamanatuaga, mo e foaki mai e malolō kua lata ke fakafiafia a Iehova.
Liu Fakamanatu
-
Lata a tautolu ke liogi ki a hai?
-
Lata a tautolu ke liogi fēfē?
-
Ko e heigoa e falu mena aoga he liogi?
KUMI FOKI
Moua e tau tali ke he tau hūhū fa mahani hagaao ke he liogi.
“Fitu e Mena kua Lata ia Koe ke Iloa Hagaao ke he Liogi” (Vala tala he Kolo Toko)
Fakaako e kakano kua lata a koe ke liogi, mo e puhala ke fakaholo ki mua e tau liogi haau.
Manamanatu ke he fakaakoaga he Tohi Tapu hagaao ki a ia kua lata a tautolu ke liogi ki ai.
“Kua Lata Nakai Au ke Liogi ke he Tau Tagata Tapu?” (Vala tala he kupega hila)
He vitiō he lologo nei, mailoga kua atāina a tautolu ke liogi he ha matakavi po ke he ha magaaho.
Liga Manako Foki a Koe
TAU HŪHŪ MAHANI MAU
Ko e Heigoa e Fakaakoaga Tohi Tapu ne Foaki he Tau Fakamoli a Iehova?
He fakaholoaga fetutalaaki ne foaki he Tau Fakamoli a Iehova kua nakai totogi, maeke a koe ke fakaaoga ha Tohi Tapu. Atāina ke uiina e magafaoa katoa po ke tau kapitiga ke fakalataha mo koe.
