LÉZIʼI 09

Suièʼté nnè née léjʉng Ssé ntchʉaté na préya

PLAY

Ta oo péʼé tso fʉʼ njouʼ ngié a zèté ngié gning tsiéen wou tsaa wou lénéŋé? Ta oo péʼé ngwiée tso ménzèté mié o né nkouoŋo ngié mé na mbʉèe mbwo wou? Ta aa péʼé nzèté ngié mé suiété létʉm chou? Oo péʼé nkouong lé kuiʼi suièʼté nnè né léjʉng Jéova? Angouo préya kuiété wou na sôôn choum ntsém. Taʼ, nti yé mboŋo lé lôg ngʉo préya ée yèe? Ta Ssé jouʼ mépréya ntsém? Angouo o gʉo lékô ta Ssé zuiʼté mépréya mou? Aa mmo yié pégé gé giè fʉʼôôn.

1. Mé gwiée lé gʉo préya mbwo wôô, mbing ngwiée lé gʉo nti sèe choum?

Yéeso la ziʼi wégé ngié a zèté ngié pégé gʉo préya pé ndaʼ mbwo Ta wégé wuié aa tʉo lépwo. Kouaʼ Yéeso lôôn ngʉo préya pé ndaʼ mbwo Jéova. A la gôôn ngié: «Pi lôôn né suingté Ssé pi gôôn ngié: “Ta wég, wou wuié ôô tʉo lépwo”» (Matio 6:9). Pégé né ngʉo préya mbwo Jéova péʼé, chou wéga yé kuiʼi ntʉté.

Fʉʼé pégé né ngʉo préya, ngouo pégé zèté kôôkôô, paʼ a lôôn ngouo yié a tsuiéʼé na mmo yié Ssé né nkouoŋo. Pégé lôôn ngʉo pouʼou, mba Ssé gé na mbʉèe na mépréya mégé. Biible gôôn ngié «pégé lôôn ndouô mmo mbwo [Ssé], a wô yié a né nkouoŋo, mba a gé jouʼ» (1 Jang 5:14). Yéeso la naʼa ntʉ tso choum sié ngouo pégé zaté tsaa préya (Toŋo Matio 6:9-13). Nkuiʼi na paʼ yié ngouo pégé gʉo préya nti choum sié é lié two mboum yégé, pégé pôôn lé légé lé sié Jéova na choum sié a gʉo mbwo pégé, mboo lé suingté yé ngié a kuiété pétsô pʉa.

2. Ngouo pégé gʉo préya lékô?

Biible kuingté wégé lé «gôôn kôôkôô yié aa létʉm [pégé] mbwo [Ssé]» (Zôbô ntsé 62:8). Pouʼou la, a zèté ngié mépréya mégé kouaʼ ngouo choum sié é foo tsaa létʉm ségé. Ngouo pégé gʉo préya tsaa létʉm ségé, ka ngʉo po né nghié tétʉ wôô, mbing nthié po na yèe nti wôô, ano wo ngié a gwiée mékouʼ. Ngouo pégé gʉo préya fʉʼ ntsém, mbaa nzôô nzôô wôô.

3. Ssé na mbʉèe na mépréya mégé lékô?

A lôg ménti ta ngiôôn. Jéova la naa wégé Chouŋé yé yié aa Biible, a wo jʉʼ yié pégé wa ngiè mémbʉée na ménzèté mégé. Ngouo létoŋoo Chouŋé Ssé «naa zséno mbwo gning wuié a né nzaga» (Zôbô ntsé 19:7; toŋo Jag 1:5). Angouo Ssé naa wégé mbʉlé tsèe létʉm afʉʼ yié pégé né ngia ngôʼ. Ngouo a lôg mégaŋa faʼ pé nkuiété wégé fʉʼé pégé kouaʼ ngouo tsaa nzag.

YING NKUIʼI NZIʼI

Tsaasé paʼ ngouo o gʉo préya na nti yié a gé pong Ssé, mbing ngia paʼ ngouô préya kuiété wou pouʼou.

4. Échoum sié Ssé zèté ngié pégé gʉo ta a jouʼou préya yégé

Sèe choum gʉo ngié Ssé zuiʼté mépréya mégé? Ée sèe choum sié é gʉo a té zuiʼté mépréya mégé wôô? Tsôʼô VIDÉO.

VIDÉO: A kuièe tsèe: Ssé péʼé njouʼ mépréya ntsém? (2:42)

Jéova né nkouoŋo ngié pégé gʉo préya mbwo yé. Toŋo Zôbô ntsé 65:2, mbing chouŋé na môôn ménzèté:

Ta oo péʼé nkouang ngié «Gning wuié a zuiʼté préya» né nkouoŋo ngié o gʉo préya mbwo yé? O kouang pouʼou nti kô?

Pégé lôôn né nkouoŋo ngié Ssé zuiʼté mépréya mégé, mba a zèté ngié pégé ying paʼ a né nzèté. Toŋo Michée 3:4 po 1 Piè 3:12, ndéen nké chouŋé na yôôn nzèté:

A zèté ngié pégé gʉo kô ta Jéova zuiʼté mépréya mégé?

Aa fʉʼʉ ntchou, yèe yèe gouoong wô gʉo préya mbwo Ssé ngié a kuiété wôb po jʉo ntchou. Ta ngouo mé kouang ngié ngouo Ssé na mbʉèe na yèe nti préya?

5. A zèté ngié mépréya mégé foo tsèe létʉm

Mé la ziʼi tso pʉa ngié a zèté ngié mé zôg mbingté mépréya pingté. Taa péʼé ngouo nti yié Ssé né nkouoŋo ngié mé gʉo préya mbwo yé? Toŋo Matio 6:7, ndée nké chouŋé na yôôn nzaté:

Ngouo o gʉo lékô ta nzaʼa ma lé gôôn po taʼa two no fʉʼé o né ngʉo préya?

Gʉa lièeʼ ntsém, ntsigé no na tso mmo mboŋo yié a too na wou lénéŋé mbing sié Jéova nti yèe. O lôôn ngʉo pouʼou liaaʼ ntsém na ngaba laʼ, mba o gé gʉo préya ngʉa sôônmbʉa na ngaba laʼ nti choum ndièʼè té pingté tso.

Taʼ ta mboŋo kouong ngié ming wé chouoŋo yé kôôkôô yié aa tsaa létʉm sé. Ndésém pouʼou, Jéova né nkouoŋo ngié fʉʼé pégé né ngʉo préya, pégé pou chouoŋo yé kôôkôô yié aa létʉm pégé.

6. Préya aa kouaʼ mmo ntchouŋo ntchouŋo yié Ssé la na né pégé

Ngouo préya kuiété wégé lékô ntchouŋé ntchouŋé fʉʼé pégé ée tsaa méngôʼ? Tsôʼô VIDÉO.

VIDÉO: Ngouo préya kuiété wégé lé chʉôg méngôʼ (1:32)

Biible gôôn ngié ngouo préya kuiété wégé lé gwiée kouaʼ mbʉlé tsaa létʉm. Toŋo Filipo 4:6, 7, ndée nké chouŋé na môôn ménzaté:

Préya té gʉo ngié méngôʼ mégé ntsém mag wô, ta ngouo a ké nkuiété wégé lékô?
O né nkouoŋo lé gʉo préya nti sèe choum?

Oo péʼé nzsé?

Fʉʼé mé gôôn ngié «aamén» péʼé, a lôgô ngôôn ngié «a wo pouʼou», ka po ngié «oon» wô. Biible gniè ngié ta fo taa méngouʼ, pʉa pié é gouʼté Ssé gôôn «aamén» afʉʼé préya maag (1 Kronik 16:36).

7. Jouou tam lé lôg ngʉo préya

Ngouo a wo tso fʉʼ, méno thié two pégé ta pégé légé lé gʉo préya. Yéeso laa péʼé nnéŋé wèe tʉnzuing na préya? Toŋo Matio 14:23 po Malékousé 1:35, ndée nké chouŋé na môôn ménzaté:

Yéeso laa ngʉo lékô ta njouou tam lé lôg ngʉo préya?
Ngouô ô gʉo lékô ta ngwiée tam lé lôg ngʉo préya?

TSO PɄA GÔÔN NGIÉ: «Apréya wo po pié tam suièe suièe, nti noué gning wuié a zuiʼté a té wo wô.»

Ngouo o gôôn ngié kô mbwo gning wuié a gôôn pouʼou?

TA O ZIʼII KÔ?

Mépréya mié é foo kouaʼ tsaa létʉm gʉo pégé kuiʼi suièʼté nnè né léjʉng Ssé, é naa wégé mbʉlé tsèe létʉm, mbing nnaa wégé métʉ lé lôg ngʉo mmo yié Jéova né nkouoŋo.