ISIFUNDO 09

Tjhidela KuJehova Ngomthandazo

IDLALE

Vane uzizwe ngathi utlhoga umuntu ozokunqophisa ekuphileni? Kghani kunemibuzo eqakathekileko ofuna iimpendulo zayo? Kghani utlhoga ukududuzwa namkha ukuqinisekiswa? Ungathanda na ukuzizwa utjhidelene noJehova? Umthandazo ungakusiza kizo zoke iintlhogwezi. Ngiyiphi indlela efaneleko yokuthandaza? Inga-kghani uZimu ulalela yoke imithandazo? Khuyini ongayenza nawuzakuqiniseka ukuthi uyayizwa imithandazwakho? Akhesicoce ngendaba le.

1. Ngubani ekufuze sithandaze kuye, khuyini ekufuze siyithandazele?

UJesu wasifundisa ukuthi kufuze sithandaze kuBabethu wezulwini kwaphela. NoJesu ngokwakhe wathandaza kuJehova. Wathi: “Yeke kufuze nithandaze nganasi indlela: ‘Babethu osezulwini . . . ’” (Matewu 6:9) Nasithandaza kuJehova, siqinisa ubuhlobo bethu naye.

Singathandazela nanyana yini. Bona uZimu aphendule imithandazwethu, kufuze ikhambisane nentandwakhe. “Nanyana yini esiyibawa ngokuvumelana nentandwakhe, [uZimu] uyasizwa.” (1 Jwanisi 5:14) UJesu wasinikela isibonelo sezinto ekufuze sizithandazele. (Funda uMatewu 6:9-13.) Ngaphezu kokuthandaza ngemiraro esiqalana nayo, kufuze singakhohlwa ukuthokoza uZimu ngazo zoke izinto asenzele zona besimbawe asize nabanye.

2. Kufuze sithandaze njani?

IBhayibheli lisikhuthaza bona ‘sithululele iinhliziyo [zethu kuZimu].’ (IRhubo 62:8) Yeke, imithandazwethu kufuze kube ngesuka ehliziyweni. Singathandaza ngokuzwakalako namkha buthule besitjengise ukuthobeka nasenza njalo. Singathandaza nanyana kungasiphi isikhathi kunganandaba ukuthi sikuphi.

3. UZimu uyiphendula njani imithandazwethu?

Uyiphendula ngeendlela ezinengi. Usinikele iliZwi lakhe, iBhayibheli, la singafumana khona iimpendulo zemibuzwethu. Ukufunda iliZwi lakaZimu ‘kuhlakaniphisa onganalemuko.’ (IRhubo 19:7; funda uJakopo 1:5) Angasinikela nokuthula lokha nasiqalene neenkhathi ezibudisi. Angenza nabantu esilotjha nabo basisize nasitlhoga isizo.

FUNDA NGOKUNGENELELEKO

Funda ngokuthi ungawenza njani umthandazo osuka ehliziyweni othabisa uZimu, ufumane nokuthi umthandazo ungakuzuzisa njani.

4. Imithandazo uZimu ayamukelako

Ngiziphi izinto ezitjengisa ukuthi imithandazwethu izokwamukeleka namkha angekhe yamukeleke kuZimu? Dlala IVIDIYO.

IVIDIYO: Kghani UZimu Ulalela Yoke Imithandazo?—Isiqetjhana (2:42)

UJehova ufuna sikhulume naye. Funda IRhubo 65:2, bese nicoca ngombuzo naku:

Kghani ucabanga ukuthi ‘uMuzwi wemithandazo’ ufuna uthandaze kuye? Sekela ipendulwakho.

Kufuze silinge ukuphila ngeenkambisolawulo zakaZimu nasifuna alalele imithandazwethu. Funda uMikha 3:4 neyoku-1 kaPitrosi 3:12, bese nicoca ngombuzo olandelako:

Singaqiniseka njani bona uJehova uzoyilalela imithandazwethu?

Epini amahlangothi womabili angathandazela ukuthumba. Kghani kuyezwakala na bona uZimu kulindeleke ukuthi ayiphendule imithandazo enjengaleyo?

5. Imithandazwethu kufuze isuke ehliziyweni

Abanye abantu bafundiswe ukuthi babuyelele umthandazo munye njengombana unjalo. Inga-kghani ngilokho uZimu afuna ukwenze lokha nawuthandaza kuye? Funda uMatewu 6:7, bese nicoca ngombuzo olandelako:

Ungakubalekela njani ‘ukubuyelela umthandazo munye’ nawuthandazako?

Ilanga ngalinye, ungacabanga ngento ethileko uJehova akubusise ngayo bese uyamthokoza ngalokho. Kwenze lokhu qobe langa iveke yoke, kuzokuthi ngemva kweveke uzokulemuka ukuthi uzabe uthandaze ngezinto ezilikhomba ezihlukahlukeneko ngaphandle kokuzibuyelela.

Ubaba onethando ulindele abantwabakhe ukuthi bamtjele koke okuseenhliziyweni zabo. Ngendlela efanako, uJehova ufuna sithandaze kuye ngokusuka ehliziyweni

6. Umthandazo usisipho esivela kuZimu

Umthandazo ungasipha njani amandla kokubili ngeenkhathi ezibudisi nezimnandi? Dlala IVIDIYO.

IVIDIYO: Umthandazo Usisiza Sikghodlhelele

IBhayibheli lithi umthandazo ungasisiza sifumane ukuthula. Funda kwebeFilipi 4:6, 7 bese nicoca ngemibuzo elandelako:

Nanyana umthandazo ungekhe uqede imirarwethu kodwana usisiza njani?
Ngiziphi izinto ongathanda ukuzithandazela?

Kghani bewazi?

Ibizo elithi, “amen” litjho ukuthi “akube njalo.” Kusukela eenkhathini zeBhayibheli, u-“amen” bekatjhiwo qobe ngemva kokuphethwa komthandazo.—1 IinKronike 16:36.

7. Yenza isikhathi sokuthandaza

Kesinye isikhathi, siba majadu khulu besilibale ukuthandaza. Bekuqakatheke kangangani ukuthandaza kuJesu? Funda uMatewu 14:23 noMarkosi 1:35 bese nicoca ngemibuzo elandelako: