THUTO 09

Go Rapela go ka go Thuša Gore o be Mogwera wa Modimo

BAPALA

Na o fela o ikwa eka o hloka motho yo a ka go hlahlago? Na o hloka motho yo a ka go thušago go rarolla mathata a gago? Na o hloka motho yo a ka go homotšago goba yo a ka go kgothatšago? Na o ka rata go ba mogwera wa Jehofa? Dilo tše ka moka, o ka di hwetša ge feela o ka rapela Modimo. Eupša o ka ipotšiša gore, o ka rapela bjang gore Modimo a go kwe? Na Modimo o theetša dithapelo tša batho ka moka? Wena o ka dira’ng gore Modimo a theetše dithapelo tša gago? A re kwe gore o ka dira eng.

1. Re swanetše go rapela mang, gona re swanetše go rapelela eng?

Jesu o ile a ruta gore re swanetše go rapela Tatago rena wa magodimong feela. Jesu ka boyena o be a rapela Jehofa. O itše: “Le swanetše go rapela ka tsela ye: ‘Tatago rena wa magodimong . . . ’” (Mateo 6:9) Ge re rapela Jehofa, re dira gore segwera sa rena le yena se tie.

Re ka botša Modimo selo se sengwe le se sengwe. Eupša e le gore a arabe dithapelo tša rena, re swanetše go rapela ka tsela yeo yena a e nyakago. Beibele e re: “Go sa šetšwe seo re se kgopelago go ya ka thato ya Modimo, . . . o a re kwa.” (1 Johane 5:14) Jesu o ile a botša barutiwa ba gagwe mehlala ya dilo tše bohlokwa tšeo ba ka di rapelelago. (Bala Mateo 6:9-13.) Ke nnete gore re ka botša Modimo mathata a rena, goba ra mo kgopela dilo tšeo re di hlokago, eupša re swanetše go leboga le dilo tšeo a re direlago tšona, gotee le go mo kgopela gore a thuše batho ba bangwe.

2. Re swanetše go rapela bjang?

Beibele e re kgothaletša gore re ‘tšhollele Modimo seo se lego ka dipelong tša rena.’ (Psalme 62:8) Seo se ra gore re swanetše go botša Jehofa selo se sengwe le se sengwe seo se lego dipelong tša rena. Re ka rapela Modimo ka lentšu la go kwagala, goba ra mo rapela ka pelong, eupša re swanetše go dira bjalo ka tsela yeo e bontšhago gore re a mo hlompha. Le gona, re ka mo rapela nako e nngwe le e nngwe, go sa šetšwe gore re mo kae.

3. Modimo o araba dithapelo tša rena bjang?

Modimo o araba dithapelo tša rena ka ditsela tša go fapafapana. Ka mohlala, o re file Lentšu la gagwe e lego Beibele, yeo gantši e re thušago go hwetša dikarabo tša dipotšišo tšeo re ipotšišago tšona. Go bala Lentšu la Modimo go thuša ‘yo a se nago temogo gore a be le bohlale.’ (Psalme 19:7; bala Jakobo 1:5.) Modimo a ka re thuša gore re ikwe re imologile ge re na le mathata. Le gona, a ka diriša bahlanka ba gagwe gore ba re thuše ge re tloga re hloka thušo.

ITHUTE KA MO GO TSENELETŠEGO

Nyaka go tseba gore o ka dira eng gore o rapele ka tsela yeo Modimo a e nyakago, le gore go rapela go ka go thuša bjang.

4. Modimo o re botša kamoo re swanetšego go mo rapela ka gona

Ke dilo dife tšeo di ka dirago gore Modimo a kwe dithapelo tša rena goba a se ke a di kwa? Bapalang BIDIO ye.

BIDIO: Na Modimo o Theetša Dithapelo ka Moka?—Karolwana (2:42)

Jehofa o nyaka gore re rapele yena. Balang Psalme 65:2, gomme le boledišaneng ka dipotšišo tše di latelago:

Na o nagana gore Jehofa, yena “Mokwi wa dithapelo,” o nyaka gore o rapele yena feela? Ke ka baka la’ng o re’alo?

Ge e ba re nyaka gore Modimo a kwe dithapelo tša rena, re swanetše go phela ka go dumelelana le melao ya gagwe. Balang Mika 3:4 le 1 Petro 3:12, gomme le boledišaneng ka potšišo e latelago:

Re ka rapela bjang gore Modimo a theetše dithapelo tša rena?

Nakong ya ntwa, na go a kwagala gore Modimo a arabe dithapelo tša dihlopha tše pedi tša mašole, tšeo di rapelelago go fenya manaba a tšona?

5. Ge re rapela re swanetše go botša Jehofa kamoo re ikwago ka gona

Batho ba bangwe ba rutilwe gore ge ba rapela, ba boaboetše mantšu a go swana. Eupša na Jehofa o nyaka re mo rapela ka yona tsela yeo? Balang Mateo 6:7, gomme le boledišaneng ka potšišo e latelago:

O ka dira’ng gore “o se ke wa boaboetša dilo tše di swanago” ge o rapela?

Letšatši le lengwe le le lengwe, nagana ka selo se sebotse seo Jehofa a go diretšego sona, gomme o mo leboge. Ge o ka dira bjalo, ge beke e fela, o tla be o rapeletše dilo tša go se swane ntle le go boaboetša.

Tate wa nnete o nyaka gore ngwana wa gagwe a mmotše kamoo a ikwago ka gona. Jehofa le yena o nyaka gore ge re mo rapela, re se tšhabe go mmotša kamoo re ikwago ka gona

6. Thapelo ke mpho e botse yeo Modimo a re filego yona

Go rapela go ka re thuša bjang, kudukudu ge re na le mathata? Bapalang BIDIO ye.

BIDIO: Thapelo e re Thuša go Kgotlelela Mathata (1:32)

Beibele e re tshepiša gore go rapela go ka re thuša gore re ikwe re na le khutšo ya monagano, goba re imologile. Balang Bafilipi 4:6, 7, gomme le boledišaneng ka dipotšišo tše di latelago:

Le ge ka dinako tše dingwe go rapela go ka se fediše mathata a rena, eupša go ka re thuša bjang?
Ke dilo dife tše dingwe tšeo wena o ka ratago go di rapelela?

Na o be o tseba?

Lentšu “amene” le bolela gore “a go be bjalo.” Ke go tloga kgale batho ba bolela lentšu “amene” mafelelong a thapelo.—1 Dikoronika 16:36.

7. O se ke wa lebala go rapela

Ka dinako tše dingwe re ka swarega kudu moo e lego gore re ka lebala le go rapela. Thapelo e be e le bohlokwa gakaaka’ng go Jesu? Balang Mateo 14:23 le Mareka 1:35, gomme le boledišaneng ka dipotšišo tše di latelago: