IKIMANYILO 09
Amusegheleleghe kwa Kyala Ukwendela Ndwiputo
Ngimba mukwinong’ona ukuti mukulondiwa ukulongosiwa pa bumi bwinu? Ngimba muli na malalusyo ghamo aghakulondiwa fiyo agha mukulonda ukwamuliwa? Ngimba mukulonda ukusubisiwa pamo ukukasiwa? Ngimba mukulonda ukuseghelela kwa Yehova? Ulwiputo lubaghile ukubatula pa findu fyosa ifi. Loli ngimba injila inunu iyakwiputila yo yiliku? Ngimba Kyala ikupilika inyiputo syosa? Ngimba mubaghile ukubomba isyafiki ukuti apilike inyiputo syinu? Isagha tukete.
1. Ngimba tubaghile ukwiputa kwa nani kangi twiputeghe isyafiki?
Yesu amanyisye ukuti tukulondiwa ukwiputa kwene kwa Tata witu wa kumwanya. Yesu yope iputagha kwa Yehova. Umwene atile: “Umwe lelo bo mukwiputa mutighi: ‘Tata witu wa kumwanya . . . ’” (Matai 6:9) Linga tukwiputa kwa Yehova tukukasya ubumanyani bwitu nu mwene.
Tubaghile ukwiputa inkhani yiliyosa. Loli ukuti Kyala amule inyiputo syitu, isi tukwiputa sikolelaneghe nubwighane bwake. Ibaibolo likuti “Aka linga tukusuma ukufwana nubwighane bwake, ikutupilika.” (1 Yohani 5:14) Yesu atupele ififwanikisyo fya findu ifi tubaghile ukwiputa. (Belenga Matai 6:9-13.) Ukongelelapo pakunsuma isi tukulonda, tutikulondiwa ukwibwa ukundaghisya panongwa ya isi atubombile nu kunsuma ukuti abatule abangi.
2. Ngimba tukulondiwa ukwiputa bulebule?
Ibaibolo likutukasya ukuti “syosa isi sili mundumbula [syitu] syo tuntaghileghe [Kyala].” (Salimo 62:8) Inyiputo syitu sikulondiwa ukufuma pasi pandumbula. Tubaghile ukwiputa mwakukwesya amasyu pamo mwakimyemye, loli tumpeghe Yehova ulughindiko linga tukwiputa kumyake. Tubaghile ukwiputa akabalilo kalikosa kangi kulikosa.
3. Ngimba Kyala ikwamula bulebule inyiputo syitu?
Ikwamula munjila syakukindanakindana. Yehova atupele Amasyu ghake Ibaibolo muno tubaghile ukwamuliwa amalalusyo ghitu. Ukubelenga Amasyu gha Kyala kubaghile “[ukumpela] umundu unkonyofu ukuya wa mahala.” (Salimo 19:7; belenga Yakobu 1:5.) Umwene abaghile ukutupa ulutengano lwa mundumbula linga tukwaghana ni ndamyo. Kangi abaghile ukubombela ababombi abinitu ukuti batutule linga tukulondiwa ubutuli.
MANYILA NYINGI
Keta muno mubaghile ukwiputila munjila iyi yikunhobosya Kyala kangi namuno ulwiputo lubaghile ukubatulila.
4. Isi tukulondiwa ukubomba ukuti Kyala amule inyiputo syitu
Ngimba findu fiki ifi fikupangisya ukuti inyiputo syitu sitikisiweghe na Kyala pamo hayi? Ketelela IVIDIYO.
Yehova ikulonda ukuti twiputeghe kumyake. Belenga Salimo 65:1, 2 ukufuma apo muyobesanie amalalusyo agha:
-
Ngimba mukwinong’ona ukuti “Uyu ikwamula inyiputo” ikulonda ukuti twiputeghe kumyake? Nongwa yafiki mukuyoba bo ulu?
Tukulondiwa ukukonga ifundo syake linga tukulonda ukuti Kyala amule inyiputo syitu. Belenga Mika 3:4 na 1 Peteri 3:12 ukufuma apo muyobesanie ilalusyo ili:
-
Ngimba tubaghile ukusimikisya bulebule ukuti Yehova ikuya pakwamula inyiputo syitu?
Pakabalilo ka bwite, aliwesa uyu ikulwa ikwiputa ukuti atole. Ngimba mukwinong’ona ukuti Yehova abaghile ukwamula inyiputo bo isi?
5. Inyiputo syitu sifumeghe pasi pandumbula
Abandu bamo bamanyisiwe ukuti linga bikwiputa bikulondiwa ukwandisania amasyu ghamoghene. Loli ngimba momuno Kyala ikulondela ukuti twiputileghe? Belenga Matai 6:7, ukufuma apo muyobesanie ilalusyo ili:
-
Ngimba mubaghile ukubomba isyafiki ukuti ‘mungandisaniagha ifindu’ fimofyene linga mukwiputa?
Isiku lililyosa mwinong’oneleghe ikindu ikya padela iki Yehova ababombile nu kundaghisya. Mubombe isi kwa sabata wesa kangi mukuya pakuketa ukuti mundaghisye Yehova pa findu 7 ifyakukindanakindana kisita kwandisania.
Tata unnunu ikulonda ukuti umwanake ayobeghe nawe ukufuma pasi pandumbula. Yehova ikulonda ukuti tuyobeghe nawe ukufuma pasi pandumbula
6. Ulwiputo kyabupe kyakufuma kwa Kyala
Ngimba ulwiputo lubaghile ukututula bulebule nkabalilo akanunu na ka ndamyo? Ketelela IVIDIYO.
Ibaibolo lifingile ukuti ulwiputo lubaghile ukututula ukuya nulutengano lwa mundumbula. Belenga Bafilipi 4:6, 7, ukufuma apo muyobesanie amalalusyo agha:
-
Nalinga ukuti ulwiputo lutikusosyapo indamyo isi tukwaghana nasyo, ngimba lukututula bulebule?
-
Ngimba findu filiku fimo ifi mubaghile ukwiputa?
Ngimba musimenye?
Amasyu aghakuti “ameni” ghikusanusya ukuti “siye bo lululo” pamo “naloli.” Ukwanda iyolo, amasyu aghakuti “ameni” ghikuyobiwa kubumalikisyo kwa nyiputo.—1 Syambukulu 16:36.
7. Muyeghe na kabalilo ka kwiputa
Utubalilo tumo tukuya bize fiyo kangi tukwibwa ukwiputa. Ngimba ulwiputo lwali lwakulondiwa bulebule kwa Yesu? Belenga Matai 14:23 na Marko 1:35, ukufuma apo muyobesanie amalalusyo agha:
-
Ngimba Yesu abombile isyafiki ukuti akabalilo kosa iputeghe?
-
Ngimba kabalilo kaliku aka mubaghile ukwiputa?
ABANDU BAMO BIKUYOBA UKUTI: “Ulwiputo lukaya lwakutula.”
-
Ngimba mubaghile ukuyoba isyafiki?
IFUNDO INYWAMU
Ulwiputo ulwakufuma pasi pandumbula lukututula ukuseghelela kwa Kyala, lukutupa ulutengano lwa mu mundumbula kangi lukutukasya ukuti tunhobosyeghe Yehova.
Ukughomokelamo
-
Ngimba twiputeghe kwa nani?
-
Ngimba twiputeghe bulebule?
-
Ngimba ulwiputo lukututula bulebule?
KETA KANGI IFINGI
Mubaghile ukughagha amaansala gha malalusyo agha muli nagho aghakufwana nu lwiputo.
“Mfundo 7 Zimene Muyenera Kudziwa pa Nkhani ya Pemphero” (Nsanja ya Olonda, Okutobala 1, 2010)
Keta ififukwa fyakulondiwa ifi tukulondiwa ukwiputa kangi muno inyiputo syitu sibaghile ukuyila nunu.
“Chifukwa Wuli Nkhwenera Kupemphera?” (Inkhani ya pawebusayiti)
Keta isi Ibaibolo likumanyisya isya uyu tukulondiwa ukwiputako.
“Kasi Nkhwenera Kulomba ku Ŵatuŵa?” (Inkhani ya pawebusayiti)
Mu vidiyo ya nyimbo iyi, keta linga amalo na kabalilo ka kwiputa fyakulondiwa.
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
