ƐZUKOALƐDEƐ 09
Dua Asɔneyɛlɛ Zo Bikye Nyamenle
Ɛhyia adehilelɛ wɔ ɛbɛlabɔlɛ nu ɔ? Ɛlɛ kpuya mɔɔ anwo hyia mɔɔ ɛkpondɛ nwolɛ mualɛ ɔ? Ɛhyia arɛlekyekyelɛ anzɛɛ anwosesebɛmaanlɛ ɔ? Ɛkulo kɛ ɛbikye Gyihova ɔ? Asɔneyɛlɛ bahola aboa wɔ yeamaa wɔali ɔ muala anwo gyima. Noko adenle kpalɛ boni a ɔwɔ kɛ ɛdua zo ɛyɛ asɔne a? Asoo Nyamenle tie asɔneyɛlɛ kɔsɔɔti? Duzu a ɛbahola wɔayɛ amaa wɔalie wɔali kɛ ɔbadie wɔ asɔneyɛlɛ a? Maa yɛnlea.
1. Nwane a ɔwɔ kɛ yɛsɛlɛ ye a, na duzu a yɛbahola yɛayɛ nwolɛ asɔne a?
Gyisɛse hilehilele yɛ kɛ yɛzɛlɛ yɛ anwuma Selɛ ne angomekye. Gyisɛse mumua ne zɛlɛle Gyihova. Ɔhanle kɛ: “Yemɔti bɛyɛ asɔne a, bɛyɛ ye zɛhae: ‘Yɛ Ze mɔɔ wɔ anwuma . . .’” (Mateyu 6:9) Saa yɛfa yɛ asɔneyɛlɛ yɛto Gyihova anyunlu a, ɔmaa agɔnwolɛvalɛ mɔɔ yɛ nee ye lɛ la anu mia kpalɛ.
Yɛbahola yɛayɛ debie biala anwo asɔne. Noko saa Nyamenle babua yɛ asɔneyɛlɛ a, ɔwɔ kɛ ɔ nee ye ɛhulolɛdeɛ yia. “Debie biala mɔɔ yɛkɛbiza ye wɔ [Nyamenle] ɛhulolɛ zo la, ɔtie yɛ.” (1 Dwɔn 5:14) Gyisɛse hilele ninyɛne bie mɔ mɔɔ fɛta mɔɔ yɛbahola yɛayɛ nwolɛ asɔne la. (Kenga Mateyu 6:9-13.) Ɛye ninyɛne mɔɔ hyia yɛ mɔɔ ɔwɔ kɛ yɛsɛlɛ la ɛsie ahane a, ɔnle kɛ yɛ rɛle fi kɛ yɛbayɛ Nyamenle mo wɔ ninyɛne mɔɔ yeyɛ yemaa yɛ la anwo yɛɛ ɔwɔ kɛ yɛsɛlɛ ye kɛ ɔboa awie mɔ.
2. Kɛzi ɔwɔ kɛ yɛyɛ asɔne ɛ?
Baebolo ne maa yɛ anwosesebɛ kɛ ‘yɛha yɛ ahonle nu edwɛkɛ yɛhile Nyamenle.’ (Edwɛne 62:8) Ɔti ɔwɔ kɛ yɛfi yɛ ahonle nu yɛyɛ asɔne. Yɛkola yɛyɛ asɔne ne kpole anzɛɛ yɛka ye yɛ ti anu yɛɛ yɛkola yɛfi ɛbulɛ nu yɛyɛ asɔne wɔ mekɛ mɔɔ yɛde aze, yɛhoto anzɛɛ yɛgyi ɛkɛ la. Yɛbahola yɛayɛ asɔne mekɛ biala wɔ ɛleka biala.
3. Kɛzi Nyamenle bua yɛ asɔneyɛlɛ ɛ?
Ɔdua ndenle dɔɔnwo azo ɔbua. Gyihova ɛmaa yɛ sa ɛha ye Edwɛkɛ, Baebolo ne mɔɔ yɛnyia yɛ kpuya ne mɔ anwo mualɛ wɔ nu a. Nyamenle Edwɛkɛ ne ɛgengalɛ “[maa] mɔɔ ɛnlɛ anwubielɛ la nwu nrɛlɛbɛ.” (Edwɛne 19:7; kenga Gyemise 1:5.) Nyamenle kola maa yɛnyia anzodwolɛ wɔ mekɛ bɔbɔ mɔɔ yɛlɛyia ngyegyelɛ la. Yɛɛ ɔbahola yeamaa ye azonvolɛ aboa yɛ wɔ mekɛ mɔɔ yɛhyia moalɛ kpalɛ la.
SUKOA DƆƆNWO
Sukoa kɛzi ɛbahola wɔavi wɔ ahonle nu wɔayɛ asɔne mɔɔ Nyamenle anye die nwo, na nea kɛzi asɔneyɛlɛ bahola aboa wɔ la.
4. Mɔɔ Nyamenle kpondɛ kɛ ɛyɛ ye wɔ asɔneyɛlɛ nwo la
Duzu a bamaa Nyamenle adie yɛ asɔneyɛlɛ anzɛɛ ɔnrɛdie a? Ye VIDIO ne.
Gyihova kulo kɛ yɛfa yɛ asɔneyɛlɛ yɛto ɔ nyunlu. Kenga Edwɛne 65:2, na akee bɛzuzu kpuya ɛhye mɔ anwo:
-
Ɛnea a “asɔneyɛlɛ Tievolɛ” ne kulo kɛ ɛfa wɔ asɔneyɛlɛ ɛto ɔ nyunlu ɔ? Nzɔne ati ɔ?
Ɔwɔ kɛ yɛbɔ mɔdenle kɛ yɛbava Nyamenle mɛla ne mɔ yɛabɔ yɛ ɛbɛla amaa yeadie yɛ asɔneyɛlɛ. Kenga Maeka 3:4 nee 1 Pita 3:12, na akee bɛzuzu kpuya ɛhye anwo:
-
Kɛ ɔkɛyɛ na yɛalie yɛali kɛ Gyihova badie yɛ asɔneyɛlɛ ɛ?
Sogyama ɛlɛkɔ konle a, afoa nwiɔ ne amuala sɛlɛ Nyamenle kɛ ɔmaa bɛli konim. Ɛ nye la kɛ Nyamenle babua bɛ asɔneyɛlɛ ne ɔ?
5. Ɔwɔ kɛ yɛfi yɛ ahonle nu yɛyɛ asɔne
Bɛhilehile bie mɔ kɛ bɛha edwɛkɛ ko ne ala fane dɔɔnwo wɔ bɛ asɔneyɛlɛ nu. Noko asoo kɛ Nyamenle kulo kɛ yɛyɛ asɔne la ɛne? Kenga Mateyu 6:7, na akee bɛzuzu kpuya ɛhye anwo:
-
Kɛ ɔkɛyɛ na wɔanga “edwɛkɛ ko ne ala fane dɔɔnwo” wɔ wɔ asɔneyɛlɛ nu ɛ?
Alehyenlɛ biala dwenle debie fɔɔnwo bie mɔɔ ɛhɔ zo wɔ wɔ ɛbɛlabɔlɛ nu la anwo na yɛ Gyihova mo wɔ nwolɛ. Saa ɛyɛ ɛhye kenle ko biala too dapɛne ko a, ɛbanwu ye kɛ wɔyɛ ninyɛne ngakyile nsuu anwo asɔne mɔɔ wɔanga edwɛkɛ ko ne ala a.
Selɛ kpalɛ kulo kɛ ɔ ra fi ye ahonle nu tendɛ kile ye. Gyihova noko kulo kɛ yɛfi yɛ ahonle nu yɛyɛ asɔne
6. Asɔneyɛlɛ le ahyɛlɛdeɛ mɔɔ vi Nyamenle ɛkɛ
Kɛzi asɔneyɛlɛ kola maa yɛ anwosesebɛ wɔ mekɛ kpalɛ nee mekɛ ɛtane nu ɛ? Ye VIDIO ne.
Baebolo ne bɔ yɛ ɛwɔkɛ kɛ asɔneyɛlɛ kola boa yɛ maa yɛ nzo nu dwo yɛ bɔkɔɔ. Kenga Felepaema 4:6, 7, na akee bɛzuzu kpuya ɛhye mɔ anwo:
-
Ɔwɔ nu kɛ asɔneyɛlɛ ɛnye yɛ ngyegyelɛ ne mɔ ɛnvi ɛkɛ dahuu ɛdeɛ, noko kɛzi ɔboa yɛ ɛ?
-
Ninyɛne boni mɔ a ɛkulo kɛ ɛyɛ nwolɛ asɔne a?
Asoo ɛze?
Edwɛkɛkpɔkɛ “amen” abo kile kɛ “ɔyɛ ɛkɛ” anzɛɛ “ɔyɛ zɔ.” Ɔvi tete ne amuala, bɛyɛ asɔne bɛwie a bɛka “amen.”—1 Edwɛkɛsisilɛ 16:36.
7. Nyia mekɛ yɛ asɔne
Ɔdwu mekɛ ne bie a yɛnnyia alagye fee ɔti yɛ rɛle fi kɛ yɛbayɛ asɔne. Kɛzi ɛnee asɔneyɛlɛ hyia Gyisɛse ɛ? Kenga Mateyu 14:23 yɛɛ Maake 1:35, na akee bɛzuzu kpuya ɛhye mɔ anwo:
-
Duzu a Gyisɛse yɛle amaa yeanyia mekɛ yeayɛ asɔne a?
-
Mekɛ boni a ɛbanyia mekɛ wɔayɛ asɔne a?
BIE MƆ KA KƐ: “Nyamenle ɛmbua asɔneyɛlɛ ndɛndɛ.”
-
Boni a ɛbaha a?
EDWƐKƐ TITILI
Saa yɛfi yɛ ahonle nu yɛyɛ asɔne a ɔmaa yɛbikye Nyamenle, ɔmaa yɛ nzo nu dwo yɛ yɛɛ ɔmaa yɛnyia anwosesebɛ mɔɔ yɛhyia amaa yɛayɛ mɔɔ sɔ Gyihova anye la.
Ndinu
-
Nwane a ɔwɔ kɛ yɛfa yɛ asɔneyɛlɛ yɛto ɔ nyunlu a?
-
Kɛzi ɔwɔ kɛ yɛyɛ asɔne ɛ?
-
Asɔneyɛlɛ zo nvasoɛ bie mɔ a le boni?
KPONDƐ DƆƆNWO
Nea asɔneyɛlɛ nwo kpuya mɔɔ bɛta bɛbiza la anwo mualɛ.
“Ninyɛne Nsuu Mɔɔ Ɔwɔ Kɛ Ɛnwu Ye Wɔ Asɔneyɛlɛ Nwo La” (Ɛzinzalɛ Arane, October 1, 2010)
Sukoa deɛmɔti ɔwɔ kɛ ɛyɛ asɔne nee kɛzi ɛbahola wɔayɛ asɔne kpalɛ la anwo debie.
“Duzu Ati A Ɔwɔ Kɛ Meyɛ Asɔne A?” (Edwɛkɛ mɔɔ wɔ jw.org azo)
Sukoa mɔɔ Baebolo ne kilehile wɔ ahenle mɔɔ ɔwɔ kɛ yɛfa yɛ asɔneyɛlɛ yɛto ɔ nyunlu anwo la.
Wɔ edwɛne ɛhye mɔɔ bɛyɛ ye vidio la anu, nea saa ɛleka anzɛɛ mekɛ mɔɔ yɛyɛ asɔne la anwo hyia a.
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
