O wee kɛɛrɛge kɔ o gbīe baɛloo bu dum ni? A ɛrɛge pya gbɛnɛ gbɛnɛ ebip o gbī kɔ alu e’agara a nɛ ni? O gbī egbɔ̄nyiɛ sɛh agɛrɛ nyiɛ ni? Eniage a etɔɔ̄ waɛloo Jɛhova ni? Kara dap a yerebah nɛ bu dɛ̄dɛɛ̄ kɛ̄tɔɔ̄ ama. Mɛ, mɛ sīdee na a bɔloo kɔ i yere kara a? Bari gbaɛ̄ge tɔ̄loo dɛ̄dɛɛ̄ kara ni? E na o doo lokwa Bari dā dɛ̄dɛɛ̄ o kara a? I naa ɛp.

1. Mɛɛ̄ na i yere kara ma a, e e na i dap yere kara kumaloo a?

Jizɔs bee kɔ i yere kara ma aba i Tɛ a le li bunyɔɔ. Jizɔs bee yere kara nɛ Jɛhova. A bee kɔ: “Bui taāŋa doo wo ama: ‘Ilii Tɛ a le li bunyɔɔ . . . ’” (Matiu 6:9) Sɔ̄ i yere kara nɛ Jɛhova, i agɛrɛtɛ̄ gbanialoo i ye ɛrɛ kumaloo.

I dap yere kara nyɔɔ ɛrɛgeba nu. Mɛ lokwa Bari agara i kara, a ɛrɛ egbaaloo ye ekɛɛrɛ. “Lo a le i bara ɛrɛgeba nu dookɛ̄ [Bari] gbī doo, alɛ edā i muɛ̄.” (1 Jɔn 5:14) Jizɔs bee nɛ edoba nyɔɔ pya nu a bɔloo kɔ i yere kara kumaloo. (Buū Matiu 6:9-13.) Gbaāloo yere kara kumaloo pya i ebɛɛ̄, ii le e’ibere edoo yaa Bari loo pya nu edoora i nɛ, lɛɛ i bara kɔ a yerebah nɛ pya dɔɔ̄na.

2. I yere kara doodoo wa?

Baibol yere i mɛm loo kɔ i ‘egara i beenyiɛ kɛ̄sī Bari.’ (Le-yɔɔ 62:8) Nyɔɔwo, a bɔloo kɔ i kara a aa i taɛ bu beenyiɛ. I dap yere kara siā nyɔɔ ale i yere bu nyiɛ i, e i dapnage tɔɔ̄ ɛrɛgeba tɔɔ̄ a tɔgɛ enwadɛɛ̄. I dap yere kara ɛrɛgeba sɔ̄ bie ɛrɛgeba kɛ̄.

3. Bari agara pya i kara doodoo wa?

A doo wo bu gbɛnɛ-edo sīdee. Jɛhova enɛā i ye Muɛ̄ Ue lo a le Baibol, kɛ̄ i dap gbī ture pya i ebip. Bubuū Muɛ̄ Ue Bari dap “nɛ suānu pya a naa ɛrɛ ekɛɛrɛ.” (Le-yɔɔ 19:7; buū Jemes 1:5.) A dap i nɛ efɛɛloo beenyiɛ sɔ̄ i le bu e’aga kɛ̄tɔɔ̄. E a dapnage doo kɔ pya ye zooro a yerebah i nɛ sɔ̄ i gbī yerebah.

 TƐƐ̄NYƆƆ

Kara a i aa bu beenyiɛ doo kɔ i tɔɔ̄ waɛloo Bari, i nɛ efɛɛloo beenyiɛ, sa i nɛnage mɛm lo edoo nu a nia Jɛhova.

Ebip Tɛ̄ma Nyɔɔ

• Mɛɛ̄ na i yere kara ma a?

• Bu mɛ sīdee na i yere kara a?

• Pio amunu biī na i ɛrɛ aāloo yere kara a?